وحدت نیوز(ملتان) مسجد اقصیٰ میں نمازیوں پر اسرائیلی درندوں کے حملہ کی جتنی مذمت کی جائے وہ کم ہے، جو دنیا بھر کے امن کو تباہ و برباد کرنے کے درپے ہیں، اب وقت آگیا ہے کہ امت مسلمہ متحد ہو کر اسرائیل کے خلاف اٹھ کھڑی ہو۔ ان خیالات کا اظہار مجلس وحدت مسلمین جنوبی پنجاب کے صوبائی سیکرٹری سیاسیات انجینئر مہرسخاوت سیال نے ایک بیان میں کیا۔

اُنہوں نے مزید کہا کہ اسرائیل صرف فلسطین میں ہی نہیں بلکہ کشمیر، عراق، شام، برما، یمن سمیت دنیا بھر میں اپنے ظالم حواریوں کے ساتھ مظلوم مسلمانوں پر ظلم ڈھانے کا سلسلہ جاری رکھے ہوئے ہے، جو کسی سے پوشیدہ نہیں ہے۔ اسی لئے اسرائیل کے ساتھ اتحادی انداز اپنانے کی بجائے اس کا مکمل طور پر بائیکاٹ کیا جائے، کیونکہ اسرائیل مسلمانوں کی معاشی حالت کو بھی تباہ و برباد کرنے پر تلا ہوا ہے اور دن رات امت مسلمہ کے خلاف سازشوں میں مصروف ہے۔ انہوں نے امت مسلمہ سے اپیل کی کہ آئندہ جمعہ کو امت مسلمہ اسرائیل کے خلاف یوم مذمت کے طور پر منائے۔

وحدت نیوز(ملتان)ملتان سمیت پنجاب بھر میں شیعیان حیدر کرار کے خلاف یوم علی علیہ السلام اور اُس کے بعد یوم القدس کے موقع پر درج کیے گئے مقدمات، بلاجواز گرفتاریاں، چادر و چاردیواری کے تقدس کی پامالی کیخلاف ملتان میں شیعہ رہنمائوں اور قائدین نے وزیراعظم پاکستان کے معاون خصوصی برائے سیاسی اُمور و ممبر قومی اسمبلی ملک محمد عامر ڈوگر سے ملاقات کی۔ وفد کی قیادت مجلس وحدت مسلمین جنوبی پنجاب کے صوبائی سیکرٹری جنرل علامہ سید اقتدار حسین نے کی، جبکہ وفد میں انجمن تحفظ عزاداری کے صدر خاور حسنین بھٹہ، سید طالب حسین پرواز، انجینیئر سخاوت علی، ناصر علی کربلائی، حسنین بخاری، خادم بخاری، آصف گردیزی، عمران نقوی، عترت کاظمی، مصطفیٰ زیدی، ندیم کاظمی اور دیگر موجود تھے۔ شیعہ قائدین اور رہنمائوں نے ملاقات میں ملتان انتظامیہ اور پولیس کی جانب سے بزدلانہ کارروائیوں کی شدید الفاظ میں مذمت کی۔

رہنمائوں کا کہنا تھا کہ عزاداری ہماری ریڈ لائن ہے، اس سے ایک قدم بھی پیچھے نہیں ہٹیں گے، ہم سمجھتے ہیں کہ ملک کا ماحول ایک سوچی سمجھی سازش کے تحت خراب کیا جا رہا ہے، ملتان ایک پُرامن شہر ہے، اس کے امن کو تباہ کرنے کی کوشش کی جا رہی ہے، ہمارے ساتھ انتظامیہ نے معاملات خود طے کیے اور پھر مقدمے بھی درج کر دیئے، اگر ملتان انتظامیہ اور پولیس نے روش نہ بدلی تو حالات یکسر مختلف ہوں گے۔ رہنمائوں نے اس موقع پر وزیراعظم کے معاون خصوصی کو ایک یادداشت بھی پیش کی۔ رہنمائوں نے مطالبہ کیا کہ ملتان سمیت پنجاب بھر میں قائم کیے گئے بے بنیاد مقدمات کو فی الفور ختم کیا جائے اور 8 شوال یوم انہدام جنت القبیع کے موقع پر کسی بدمزگی سے بچنے کے لیے عزاداروں کے ساتھ تعاون کیا جائے۔

رہنمائوں نے کہا کہ ہم ہر ظالم کے خلاف ہیں اور مظلوم کے حامی ہیں، جنہوں نے خاتون جنت سیدہ فاطمہ زہرا سلام اللہ علیہا کا روضہ شہید کیا ہے، وہ قطعاً مسلمان نہیں ہوسکتے۔ اُنہوں نے کہا کہ ہر سال کی طرح اس سال بھی یوم انہدام جنت القبیع کا مرکزی جلوس گھنٹہ گھر چوک سے شروع ہو کر نواں شہر چوک پر اختتام پذیر ہوگا۔ اس موقع پر وزیراعظم کے معاون خصوصی ملک عامر ڈوگر نے کہا کہ ان شاء اللہ آپ کی یادداشت بھی وزیراعظم تک پہنچائی جائے گی اور ملتان کی ضلعی انتظامیہ اور پولیس سے اس حوالے سے ملاقات کرکے انصاف کے تقاضوں کو پورا کیا جائے گا۔

وحدت نیوز(اسلام آباد)مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے غزہ پر اسرائیلی حملے کی شدید مذمت کرتے ہوئے اسے بدترین جارحیت قرار دیاہے۔انہوں نے کہا کہ فلسطینی مسلمانوں کے خلاف اسرائیل کے وحشیانہ اقدامات میں روز بروز اضافہ ہوتا جا رہا ہے۔شہری آبادی پر حملہ کرکے بے گناہ افراد اور معصوم بچوں کو نشانہ بنانا جنگی قوانین کی سنگین ترین خلاف ورزی ہے جس پر اقوام متحدہ اور عالمی برادری کو نوٹس لینا چاہئے۔

ان کا کہنا تھا کہ غاصب اسرائیل مسلمانوں کے قبلہ اول  پر اپنا حق جتانے کے لیے جو غیر انسانی کھیل رہا اس کا خمیازہ اس کی رہتی نسلوں کو بھی بھگتنا پڑے گا۔ایمان کی دولت سے مالا مال فلسطینی مسلمان غیرت و حمیت کا وہ پہاڑ ہیں جن سے ٹکرانے والا پاش پاش ہو کر رہے گا۔انہوں نے کہا کہ اسرائیل کی بڑھتی ہوئی بربریت پر عالم اسلام  کےنام نہاد چیمپیئن ممالک کے سکوت کو مجرمانہ خاموشی کے سوا کوئی دوسرا نام نہیں دیا جا سکتا۔ یہود نصاری باطل پر بھی مجتمع ہیں تو امت مسلمہ حق پر ہوتے ہوئے باہم کیوں نہیں ہو سکتی۔

انہوں نے کہا دنیا بھر کے مسلمان عید منانے کی تیاریاں کر رہے ہیں اور فلسطینی مسلمانوں کے گھروں میں بچوں اور نوجوانوں کی لاشیں پڑی ہوئی ہیں۔ اگر امت مسلمہ نے اپنے مسلمان بھائیوں کی مشکلات اور غم کا ادراک نہ کیا تو پھر دنیا میں ان جیسا بے حس کوئی نہیں ہو گا۔ انہوں نے مسلمان حکمرانوں سے مطالبہ کیا کہ اسرائیل کو انتہائی اقدامات سے باز رکھنے کے لیے اپنا کردار ادا کریں۔اگر اس شیطانی طاقت کو شرپسندی سے نہ روکا گیا تو اس کی سلگائی ہوئی آگ سب کے دامن سے لپٹی ہوئی نظر آئے گی۔