وحدت نیوز(اسلام آباد)مجلس وحدت مسلمین پاکستان کے مرکزی سیکرٹری یوتھ علامہ اعجاز حسین بہشتی نے امامیہ جامع مسجد پشاور میں دہشتگردانہ حملہ کی شدید مذمت کرتے ہوئے کہا کہ قصہ خوانی بازار میں یہ کوئی پہلا سانحہ نہیں ہے یہ علاقہ ہمیشہ سے دہشتگردوں کی ٹارگٹ میں رہا ہے، ایسی صورتحال میں سیکورٹی اداروں کو ہمیشہ ایکٹو رہنے کی ضرورت تھی مگر افسوس کہ ہمارے ادارے ہمیشہ کوئی سانحہ رونما ہونے کے بعد ہائی الرٹ ہوتی ہے۔

علامہ اعجاز بہشتی کا کہنا تھا کہ وزیراعظم کہتے ہیں ہم پوری طاقت کے ساتھ دہشتگردوں کا پیچھا کر رہے ہیں، اگر آپ واقعا ایسا کرتے تو آج یہ سانحہ رونما نہیں ہوتا جس میں اب تک 62 بے گناہ شہید اور دو سو سے زائد زخمی ہو چکے ہیں۔ اگر حکومت کالعدم دہشتگردوں کو معافی دینے اور ان سے مذاکرات کرنے کے بجائے ان پاکستان دشن قوتوں کے خلاف آپریشن تیز کر دیتے تو ہمیں اس قدر نقصان اٹھانا نہیں پڑتا۔

ان کا مزید کہنا تھا کہ اتوار کو قائد وحدت علامہ راجہ ناصر عباس جعفری کے اعلان پر ملک بھر میں احتجاجی مظاہرہ اور ریلیاں نکالی جائے گئ، لہذا ملک بھر میں مومنیں سے اپیل ہے کہ وہ سانحہ پشاور کے خلاف، اس میں ملوث عناصر کے خلاف اور اس حوالے سے غفلت برتنے والوں کے خلاف احتجاج میں بھر پور شرکت کریں۔ ہم حکومت وقت کو بتانا چاہتے ہیں کہ مکتب تشیع کو دیوار سے لگانے انہیں ڈرانے کی کوششیں بند کریں اور سانحہ پشاور سمیت ملک بھر میں شیعہ ٹارگٹ کلنک میں ملوث وطن دشمن عناصر کے خلاف فوری کاروائی کریں۔

وحدت نیوز (اسلام آباد) مجلس وحدت مسلمین کے زیر اہتمام امامیہ جامع مسجد پشاور میں ہونے والی دہشت گردی کے خلاف کراچی، لاہور، اسلام آباد ، کوئٹہ سمیت آزاد کشمیر اور گلگت بلتستان میں احتجاجی مظاہرے کیےگئے،مظاہروں میں بڑی تعداد میں خواتین ،بزرگ،بچے شریک ہوئے،مظاہرین نے پشاور اور کوئٹہ دہشتگردی کو ملت جعفریہ کیخلاف منظم منصوبہ بندی کے ساتھ شیعہ نسل کشی قرار دیتے ہوئے بلوچستان اور خیبر پختون خواہ حکومت کی مکمل ناکامی کی شدید مذمت کی،اتوار کو مجلس وحدت مسلمین نے ملک بھر میں احتجاجی مظاہروں کا اعلان بھی کیا ہے،پریس کلب اسلام آباد کے سامنے احتجاجی مظاہرہ کیا جس میں کثیر تعداد میں کارکنوں نے شرکت کی۔

 شرکاء سے خطاب کرتے ہوئے ایم ڈبلیو ایم ضلع راولپنڈی کے ضلعی سیکرٹری جنرل علامہ علی اکبر کاظمی اور ضلع اسلام آباد کے سیکریٹری جنرل ظہیر عباس نقوی نے کہا کہ اس المناک سانحہ کی جتنی بھی مذمت کی جائے کم ہے۔ قیمتی انسانی جانوں کا غیر معمولی ضیاع انتہائی افسوسناک ہے۔ ملک دشمن عناصر کو قومی دھارے میں شامل کرنے کی خواہش کے بھیانک نتائج پوری قوم کو بھگتنے پڑ رہے ہیں۔دہشت گردوں کے ساتھ ریاست کی مفاہمتی پالیسی کا یہ باب ہمیشہ کے لیے بند کیا جائے تاکہ مستقبل میں مزید سانحات سے بچا جا سکے۔

انہوں نے کہا خانہ خدا میں خون کی ہولی کھیلنے والوں کا نہ تو کوئی مذہب ہے اور نہ ہی کوئی وطن ہے۔دہشت گردوں کی طرف دوستی کا ہاتھ بڑھانا امن وسلامتی کو دانستہ طور پر تباہی کی طرف لے جانے کے مترادف ہے۔انہوں نے کہا کہ سیکورٹی اداروں کو مزید چوکنا ہونا ہو گا تاکہ درندہ صفت عناصر کو کسی شرپسندی کا کوئی موقع نہ مل سکے۔انہوں نے کہا کہ گزشتہ چالیس سال میں دہشت گردی کی سب سے زیادہ شکار ملت تشیع ہوئی ہے۔اس پرامن اور محب وطن قوم کو مزید آزمائش میں نہ ڈالا جائے۔ انہوں نے مجلس وحدت مسلمین کے کارکنوں کو امدادی کارروائیوں میں فوری حصہ لینے کی ہدایت بھی کی۔

لاہور میں پریس کلب کے باہر احتجاجی مظاہرہ منعقد کیا گیا جس میں مظاہرین نے بڑی تعدادمیں شرکت کی، انہوں نے ہاتھوں میںبینرز اور پلے کارڈ اٹھا رکھے تھے جن پر دہشت گردی کے خلاف نعرے درج تھے، مظاہرین سے خطاب کرتے ہوئے ایم ڈبلیوایم پنجاب کے رہنما علامہ عبدالخالق اسدی، علامہ حسن رضا ہمدانی اور دیگر مقررین نے کہاکہ پشاور سانحہ قانون نافذ کرنے والے اداروں کی کارکردگی پر سوالیہ نشان ہے ۔ شہریوں کی جان ومال کا تحفظ ریاست فرض اولین ہے جس میں وہ مکمل طورپر ناکام دکھائی دیتی ہے۔

کراچی میں نمائش چورنگی سے گورنر ہاؤس تک ایم ڈبلیوایم ، آئی ایس او اور ایس یوسی نے احتجاجی ریلی نکالی جس کی قیادت علامہ سید باقرعباس زیدی نے کی، مظاہرین سے خطاب کرتے ہوئے انہوں نے کہا کہ جامع مسجد امامیہ پشاور میں خودکش حملہ دراصل ریاست کی شہہ رگ پر حملہ ہے، تکفیری دہشت گردوں کو قومی سیاسی دھارے میں شامل کرنے کی کوشش قومی سلامتی اور استحکام کےلئے خطرہ بن چکی ہے ۔ اگر مقتدر قوتوں کو وطن عزیز کی سلامتی عزیز ہے تو ملک دشمن تکفیری دہشت گردوں کے خلاف فیصلہ کن آپریشن کا آغا زکریں اور ان کے ان کے سلیپرسیلز اور ان کے پشت پناہوں کے خلاف موثر اقدامات اٹھائیں۔

ملتان میں چوک کمہاراں والاپر بھی ایم ڈبلیوایم اور آئی ایس اوکی جانب سے احتجاجی مظاہرہ کیا گیا جس سے خطاب کرتے ہوئے علامہ اقتدار حسین نقوی ، علامہ قاضی نادر علوی ، سلیم عباس صدیقی ودیگر نے کہاکہ پوری قوم سانحہ پشاور کے غم میں سوگوار ہے، پشاور میں ایک بارپھر بربریت کی تاریخ رقم کی گئی، نہتے نمازیوں کو جن میں معصوم بچے بھی شامل تھے کو بے دردی سے نشانہ بنایا گیااور ان کے اعضاء خاک پر بکھر گئے۔ انہوں نے وزیر اعظم پاکستان عمران خان اور آرمی چیف جنرل باجوہ سے مطالبہ کیا کہ خداراشیعیان حیدرکرارؑ پر رحم کھائیں اور ان درندہ صفت دہشت گردوں کو لگام دیں۔

وحدت نیوز(بغداد)عراق کی پارلیمانی حکمت پارٹی کے سربراہ عمار الحکیم کا مجلس وحدت مسلمین کے مرکزی سیکرٹری خارجہ کوتعزیتی مراسلہ۔سانحہ پشاور پر عمار الحکیم کا ایم ڈبلیو ایم کے مرکزی رہنما علامہ ڈاکٹرشفقت شیرازی سے اظہار تعزیت۔

 سید عمارالحکیم نے امامیہ مسجد پشاور میں رونما ہونے والے مجرمانہ فعل کی بھر پور مذمت کرتے ہوئےکہاکہ دکھ کی اس گھڑی میں پاکستانی بھائیوں کے ساتھ کھڑے ہیں۔

عراق کی پارلیمانی پارٹی کے سربراہ علامہ سید عمارالحکیم نے پاکستان سے دھشت گردی کے مراکز اور منابع ختم کرنے کا مطالبہ کی اور شہداء کی درجات کی بلندی اور خانوادہ شہداء کیلئے صبر جمیل کی دعا کی ہے۔

وحدت نیوز(لاہور) پشاور میں نماز جمعہ کے دوران جامع مسجد امامیہ میں ہونے والے خودکش حملے کیخلاف لاہور پریس کلب کے باہر مجلس وحدت مسلمین لاہور کی جانب سے احتجاجی مظاہرہ کیا گیا۔ مظاہرے کی قیادت ایم ڈبلیو ایم پنجاب کے ڈپٹی سیکرٹری جنرل قیادت ڈپٹی سیکرٹری جنرل پنجاب علامہ حسن رضا ہمدانی نے کی۔ احتجاجی مظاہرے میں سید حسین زیدی، رائے ناصر علی، مولانا اسد نقوی سمیت دیگر رہنماؤں نے شرکت اور خطاب کیا۔

 مظاہرین نے پلے کارڈز اور کتبے اٹھا رکھے تھے جن پر دہشت گردی کیخلاف نعرے درج تھے۔ مظاہرین نے دہشتگردی کے واقعہ کیخلاف شدید نعرے بازی کی۔ احتجاجی مظاہرے سے خطاب کرتے ہوئے ڈپٹی سیکرٹری جنرل ایم ڈبلیو ایم پنجاب علامہ سید حسن رضا ہمدانی کا کہنا تھا کہ دہشت گردی کی لہر کا دوبارہ شروع ہونا لمحہ فکریہ ہے۔

انہوں نے کہا کہ یہ دھماکہ سکیورٹی اداروں کے انتظامات پر سوالیہ نشان ہے۔ مقررین کا کہنا تھا کہ حکومت واقعہ کے زمہ داروں کو گرفتار کرکے قرار واقعی سزا دے۔ انہوں نے کہا کہ ملک دشمنوں نے ہمیشہ ملت جعفریہ کو ہی نشانہ بنایا ہے ۔ اس حوالے سے حکومت کو سکیورٹی کے سخت انتظامات کرنا ہوں گے۔ انہوں نے کہا کہ ملت جعفریہ کا مزید امتحان نہ لیا جائے۔ انہوں نے کہا کہ دہشتگردی کی اس لہر کے تدارک کیلئے ٹھوس اقدامات کئے جائیں۔