وحدت نیوز(اسلام آ باد) معروف خطیب اہل بیتؑ علامہ سخاوت علی قمی کے والد بزرگوار خالق حقیقی سے جاملے۔ مرحوم کی رحلت پر چیئرمین مجلس وحدت مسلمین پاکستان علامہ راجہ ناصرعباس جعفر ی نے جاری اپنے تعزیتی پیغام میں کہا کہ علامہ سخاوت علی قمی کے والد بزرگوار کے انتقال پر ملال پر ان کے اہل خانہ اور بالخصوص علامہ صاحب کے حضور تعزیت پیش کرتے ہیں دعا ہے کہ خدا مرحوم کی مغفرت فرمائے اور ان کے لواحقین کو صبر جمیل عطا فرمائے۔

وحدت نیوز(نگر)ممبر گلگت بلتستان کونسل و صوبائی رہنما مجلس وحدت مسلمین شیخ احمد علی نوری کا ایم ڈبلیو ایم کے رہنماؤں،صوبائی وزراء اور ڈیزاسٹر ٹیم کے ہمراہ ضلع نگر میں سیلاب زدہ علاقوں کا تفصیلی دورہ،اس موقع پر ڈیزاسٹر مینجمنٹ ٹیم نے سیلاب متاثرین کی بحالی کے لئے جاری حکومتی اقدامات سے آگاہ کیا۔

وفد میں صوبائی وزیر خزانہ جاوید منوا،وزیر برقیات مشتاق حسین،پارلیمانی سیکرٹری شیخ اکبر رجائی،وزیر اطلاعات فتح اللہ خان،شیخ نئیر عباس مصطفوی،معاون خصوصی وزیر اعلیٰ گلگت بلتستان الیاس صدیقی،سابق رکن اسمبلی و رہنما ایم ڈبلیو ایم حاجی رضوان،عارف حسین الجانی اور دیگر ہمراہ تھے۔

وحدت نیوز(اسلام آباد)مجلس وحدت مسلمین پاکستان کے مرکزی سیکرٹری تنظیم سازی علامہ مقصود علی ڈومکی کی قیادت میں وفد کی چیئرمین اسلامی نظریاتی کونسل ڈاکٹر قبلہ ایاز سے ملاقات نصاب تعلیم، درود شریف اور دیگر اہم موضوعات پر تفصیلی گفتگواس موقع پر گفتگو کرتے ہوئے علامہ مقصود علی ڈومکی نے کہا کہ اسلامی نظریاتی کونسل پاکستان کا وہ معتبر آئینی ادارہ ہے جس سے تمام مکاتب فکر کو یہ امید ہوتی ہے کہ وہ اتحاد بین المسلمین کے ساتھ ساتھ پاکستان میں بسنے والے تمام  مکاتب فکر کے عقائد ونظریات کا احترام کرے گا اسلامی نظریاتی کونسل نے اپنے حالیہ فیصلوں میں درود شریف اور نصاب تعلیم کے حوالے سے وسعت نظری اور حکمت و تدبر کا مظاہرہ کرتے ہوئے مختلف مکاتب فکر کی تعلیمات کو اہمیت دی ہے۔

انہوں نے کہا کہ وزارت مذہبی امور کے ایک رسمی لیٹر میں تحریر شدہ عبارت کے باعث ایک غلط فہمی نے جنم لیا جو کہ اسلامی نظریاتی کونسل کے حالیہ فیصلوں سے زائل ہوئی جس میں درود شریف کے حوالے سے اھل تشیع کے نقطہء نظر کو رسمی حیثیت دی گئی اور نصاب تعلیم کے حوالے سے کونسل کے سابقہ فیصلہ جات 1965 ڈھاکہ اجلاس اور 1966 لاہور اجلاس کی توثیق کی گئی۔

انہوں نے کہا کہ ملت جعفریہ کی نمائندہ جماعت کی حیثیت سے مجلس وحدت مسلمین پاکستان نے ہر فورم پر اھل تشیع کے آئینی حقوق کا حکمت و تدبر اور دلائل کے ساتھ دفاع کیا ہے۔انہوں نے کہا کہ اسلامی نظریاتی کونسل کے موجودہ چیئرمین قبلہ ایاز ایک بہترین منتظم ہیں جنہوں نے اسلامی نظریاتی کونسل کو بہتر انداز میں آگے بڑھایا ہے۔اس موقع پر گفتگو کرتے ہوئے اسلامی نظریاتی کونسل کے چیئرمین ڈاکٹر قبلہ ایاز نے کہا کہ آئین اور دستور کی رو سے پاکستان مسلکی اسٹیٹ نہیں بلکہ ایک مسلم ریاست ہے۔ یہ سنی اسٹیٹ نہیں بلکہ مسلم اسٹیٹ ہے ملکی آئین کسی خاص فقہ مثلاً فقہ حنفی یا فقہ جعفری کی بالادستی کی بجائے قرآن و سنت کی بالادستی کی بات کرتا ہے اور قرآن و سنت کی وہی تفسیر و تشریح معتبر ہے جو  اھل سنت ،اھل تشیع کے ہاں معتبر اور تسلیم شدہ ہو۔

انہوں نے کہا کہ اسلامی نظریاتی کونسل میں پاکستان میں بسنے والے تمام مکاتب فکر شیعہ سنی دیوبندی بریلوی اور اھل حدیث مکاتب فکر کے جید علماء موجود ہیں اور ہمارے فیصلے وسعت نظری اور اتحاد بین المسلمین کا عملی اظہار ہوتے ہیں تاہم اگر کسی مرحلے میں آپ کی رائے مختلف ہو یا آپ سمجھتے ہوں کہ کوئی فیصلہ آپ کے مکتبہ فکر کی رائے سے متصادم ہے تو آپ تحریری طور پر لکھ سکتے ہیں اور ہم اس پر غور کریں گے ۔ملاقات میں ایم ڈبلیو ایم کے رہنما علامہ چوہدری ضیغم عباس برادر شمس الدین کامل سیکرٹری اسلامی نظریاتی کونسل حافظ اکرام الحق ڈاکٹر اشفاق و دیگر شریک تھے۔

وحدت نیوز(گلگت)وزیر اعلی گلگت بلتستان کے معاون خصوصی الیاس صدیقی نے سوشل میڈیا پر گلگت بلتستان میں شراب نوشی اور افیون کے کاروبار کی منظور کے بل کے حوالے سے وائرل خبر کو من گھڑت اور شرپسند عناصر کی کارستانی قرار دیا ہے۔انہوں نے کہا ہے کہ گزشتہ دنوں جی بی اسمبلی نے ریونیو ایکٹ کی منظوری دی ہے۔ریونیو ایکٹ پاکستان بھر میں پہلے سے منظور شدہ ہے جس کے تحت مختلف اشیاء پر ٹیکس لاگو ہوتا ہے۔پاکستان میں چونکہ غیر مسلموں کو شراب کے استعمال کی اجازت ہے لہذا مذکورہ ایکٹ کے تحت جن چیزوں پر ٹیکس لگایا گیا ہےان میں الکوحلک اشیاء بھی شامل ہے۔

انہوں نے کہا کہ جی بی کی سو فیصد آبادی مسلمان ہے اور شراب کو مطلقاً حرام سمجھتی ہے۔ایسا کوئی بل اسمبلی میں پیش نہیں کیا گیا اور نہ ہی اسلامی تعلیمات سے متصادم کسی بل کو پیش کرنے کی کوئی مسلمان جسارت کر سکتا ہے۔کسی بھی مسلمان کو گلگت بلتستان کی سرزمین پر شراب کے کاروبار کی اجازت ہر گز حاصل نہیں۔مذہبی جماعتوں سے خائف عناصر اس طرح کے منفی پروپیگنڈےمیں مصروف ہیں۔اسمبلی کے تقدس اور مذہبی جماعتوں کی ساکھ کو نقصان پہنچانے والوں کے ساتھ کسی بھی قسم کی لچک کا مظاہرہ نہیں کیا جائے گا۔