وحدت نیوز(قم)سرزمین قم المقدس میں ایم ڈبلیو ایم شعبہ خواتین لاہور کی جانب سے زائرین کے لیے تربیتی ورکشاپ کا انعقاد ،سیکرٹری جنرل مجلس وحدت مسلمین شعبہ خواتین لاہور محترمہ حنا تقوی کی سربراہی میں زائرین خواتین کا قافلہ شہر قم المقدس پہنچا جہاں محترمہ حنا تقوی کی جانب سے ان کے لیے ورکشاپ کا انعقاد کیا گیا جس میں محترمہ لبنی زیدی نے خصوصی شرکت کی ورکشاپ سے جناب مولانا سید حسین زیدی صاحب نے ھدف زیارت اور زائر کے عنوان پر خطاب کرتے ہوئے کہا کہ زائرین کو ان مقامات مقدسہ میں اپنے وقت کے امام کو یاد رکھنا اور ان سے قربت حاصل کرنے کی کوشش کرنی چایئے ہمارا یہاں آنے کا مقصد معرفت محمد و آل محمد اور ظہور امام زمان کے لیے آمادگی ہونا چاہئے۔

 ان کا مزید کہنا تھا ‎ہر چیز کا ایک ہدف ہوتا ہے جب کوئی انسان سونے سے پہلے اپنے تمام کام سوچتا ہے کے صُبح میں نے اپنے کون سے کام سر انجام دینے ہیں یعنی کے اس نے اپنا ایک ہدف بنا لیا کے یہ میں نے کرنا تو وہ اس کام کو سر انجام دیتا ہے۔ اسی طرح ہمیں زیارات پہ جانے سے پہلے اپنے آپ سے وعدہ کر کے نکلنا چاہیے کے ہم زیارات پہ جا رہے ہیں اور ہمارا ھدف معرفت امام زمان عج ہوگا اور ہماری دعاوں کو مرکز و محور ظہور امام زمان عج ہوگا۔

وحدت نیوز(اسلام آباد)شیریں مزاری کی گرفتاری پر چیئرمین مجلس وحدت مسلمین پاکستان علامہ راجہ ناصر عباس جعفری کی شدید مذمت، میڈیا کو جاری اپنے بیان میں انہوں نے کہاکہ انتقامی سیاست نون لیگ کا وطیرہ ہے۔ماڈل ٹاؤن جیسے بھیانک واقعات نون لیگ کی شناخت بن چکے ہیں ۔

انہوں نے کہا کہ ملک پہلے ہی بدترین بحرانوں کا شکار ہے۔سیاسی مخالفین کے ساتھ انتقامی کارروائیاں ریاست کے لیے نقصان دہ ثابت ہوں گے،امریکہ کی خوشنودی کے لیے شیریں مزاری کو گرفتار کیا گیا ہے،امریکہ کے جو یار ہیں وہ ملک کے غدار ہیں۔ڈاکٹر شیریں مزاری پر بےبنیاد مقدمات کے اندراج پر اعلی عدلیہ سے نوٹس لینے کا مطالبہ کرتا ہوں۔

وحدت نیوز(ملتان)الحمداللہ! ملتان میں جلوس یوم علیؑ پر ہوئی ایف- آئی-آر میں نامزدمجلس وحدت مسلمین جنوبی پنجاب کے صوبائی سیکرٹری سیاسیات مہرسخاوت علی سیال سمیت 4 عزادارباعزت بری ہو گئے۔

تفصیلات کے مطابق مرکزی جلوس یوم علیؑ پر ریاستی مدعت میں درج ایف آئی آر کے کیس کی سماعت کے دوران معزز عدالت نے 4 عزاداروں کو باعزت بری کردیا۔

ایم ڈبلیوایم جنوبی پنجاب کے پولیٹیکل سیکریٹری مہر سخاوت سیال، محمد اکرم ، مرید حسین اور الطاف حسین جنہیں جلوس یوم علیؑ نکالنے کے جرم میں مقدمہ میں نامزد کیا گیا تھا آج عدالت کے روبرو پیش ہوئے ۔

مقدمہ میں نامزد عزاداروں کی جانب سے وحدت لیگل ایڈ کمیٹی کے ڈپٹی سیکریٹری عون رضا انجم گوپانگ ایڈوکیٹ معزز عدالت میں پیش ہوئے اور دلائل کے ساتھ عزاداروں کا مقدمہ لڑا ۔

جسٹس نجیب اللہ خان مجسٹریٹ تھانہ شاہ شمس ملتان نے  عون رضا انجم گوپانگ ایڈوکیٹ کے دلائل سننے کے بعد فیصلہ سناتے ہوئے چاروں عزاداروں کو مقدمے سے باعزت بری کرنے کا فیصلہ سنادیا۔

باعزت بری ہونے والوں عزاداروں کا مومنین کی جانب سے پرتپاک استقبال کیا گیاانہیں پھولوں کے ہار پہنائے گئے۔ اس موقع پر بری ہونے والے عزاداروں نے کہا کہ عزاداری ہماری شہہ رگ حیات ہے جس سے ہم دستبردار کسی صورت نہیں ہوسکتے۔

اس موقع پر انہوں نے عون رضا انجم گوپانگ ایڈوکیٹ کی خدمات کو بھی خراج تحسین پیش کیا جنہوں نے اس کیس کی کامیابی کی لئے شب وروز جدوجہد کی۔

وحدت نیوز(لاہور) لاہور میں مسجد صاحب الزمان اسلام پورہ کے باہر نماز جمعہ کے بعد مجلس وحدت مسلمین اور امامیہ سٹوڈنٹس آرگنائزیشن کے زیراہتمام احتجاج مظاہرہ کیا گیا۔ مظاہرین سے خطاب کرتے ہوئے مقررین کا کہنا تھا کہ ریاستی اداروں کی طرف سے جبری لاپتہ کئے گئے افراد کی بازیابی کیلئے پوری قوم سراپا احتجاج ہے۔ انہوں نے کہا کہ ملت جعفریہ پاکستان ملک کی محب وطن قوم ہے، اس کے باوجود ہمارے ساتھ امتیازی سلوک روا رکھا جا رہا ہے، جو افسوسناک ہے۔ انہوں نے کہا کہ جن افراد کو لاپتہ کیا گیا ہے، اگر انہوں نے کوئی جرم کیا ہے تو انہیں عدالت میں پیش کرکے سزائیں دلوائی جائیں، اس طرح ماورائے عدالت اقدامات سے ملت جعفریہ میں اضطراب پایا جا رہا ہے۔

مقررین کا کہنا تھا کہ آئین اور قانون ملک میں موجود ہے، مجرموں کو سزائیں دینے کیلئے عدالتیں موجود ہیں، اس کے باوجود ماورائے عدالت اقدامات اداروں کی کارکردگی پر بہت بڑا سوالیہ نشان ہیں۔ رہنماوں نے حکومت سے مطالبہ کیا کہ صرف ایک ماہ کے دوران لاہور سے لاپتہ ہونیوالے چاروں افراد کو بازیاب کروایا جائے۔ انہوں نے کہا کہ اگر مذکورہ افراد کو رہا نہ کیا گیا تو احتجاج کا دائرہ کار پورے ملک تک بڑھا دیا جائے گا۔ مقررین کا کہنا تھا کہ ملت جعفریہ نے وطن عزیز کیلئے سب سے زیادہ قربانیاں دی ہیں، اس کے باوجود امتیازی سلوک تشویشناک ہے۔

وحدت نیوز(سکردو) سب ڈویژن گمبہ سکردو کے اسسٹنٹ کمشنر سیکریٹریٹ کی افتتاحی تقریب منعقد ہوئی۔ تقریب کے مہمان خصوصی، مجلس وحدت مسلمین گلگت بلتستان کے صوبائی صدر آغا علی رضوی اور وزیر زراعت گلگت بلتستان کاظم میثم نے اپنے دست مبارک سے باقاعدہ افتتاح کیا۔

 اس موقع پر کمشنر بلتستان ڈویژن شجاع عالم، ڈپٹی کمشنر سکردو حافظ کریم داد چغتائی ، معززین علاقہ و دیگر علماء کرام ساتھ تھے۔اس تقریب میں عمائدین علاقہ، مذہبی ،سیاسی، سماجی اور عوام کی کثیر تعداد نے شرکت کی۔ تقریب سے خطاب کرتے ہوئے مقررین نے کہا کہ گمبہ سکردو سب ڈویژن گلگت بلتستان کا سب سے خوبصورت سب ڈویژن ہیں، یہاں ملکی سطح پر مشہور و معروف تفریحی سیرگاہیں بھی اسی میں واقع ہے۔

 انہوں نے مزید کہا کہ اس سب ڈویژن کے قیام میں صوبائی حکومت، ڈویژنل اینڈ ڈسٹرکٹ انتظامیہ، سیاسی، مذہبی اور سماجی شخصیات بالخصوص ایم ڈبلیوایم کا اہم کردار ہے۔ اور آج اللّٰہ کے فضل سے باقاعدہ افتتاح بھی کیا گیا۔

انہوں نے کہا کہ سب ڈویژن کے قیام سے یہاں کے لوگوں کو گھر کی دہلیز پر ہر قسم کی سہولیات میسر ہونگی اور ان کے مسائل یہاں حل ہوں گے۔عوام نے سب ڈویژن کے قیام کے دیرینہ مطالبے کی تکمیل پر مجلس وحدت مسلمین کے قائدین کی خصوصی کاوشوں کو خراج تحسین پیش کیا ہے۔

وحدت نیوز (اسلام آباد) متنازعہ نصاب تعلیم پر مجلس وحدت مسلمین پاکستان کی نصاب کمیٹی کے مرکزی کنوینرعلامہ مقصود ڈومکی نےصدر مملکت، وزیراعظم، آرمی چیف ،وزرائے تعلیم و اراکین اسمبلی کو کھلا خط لکھ دیا جس متن پیش خدمت ہے۔

بسم اللہ الرحمن الرحیم
 محترم جناب صدر اسلامی جمہوریہ پاکستان
محترم جناب وزیراعظم اسلامی جمہوریہ پاکستان
محترم جناب چیف آف آرمی سٹاف
محترم جناب وفاقی وزیر داخلہ
 محترم جناب وفاقی وزیر تعلیم
جناب صوبائی وزرائے تعلیم
 اراکین صوبائی وقومی اسمبلی و سینیٹ
 جناب ڈائریکٹر و اراکین یکساں نصاب تعلیم کونسل

 السلام علیکم
عنوان آئین پاکستان و قانون کو پامال کرتے ہوئے متنازعہ یکساں نصاب تعلیم کے ذریعے کروڑوں شیعہ طلبہ و طالبات پر جبر کے ذریعے تکفیری تعلیمات مسلط کرنا

جناب عالی جیسا کہ آپ جانتے ہیں کہ وطن عزیز پاکستان شیعہ سنی مسلمانوں نے قربانیاں دے کر مشترکہ جدوجہد کے ذریعے حاصل کیا بانی پاکستان بابائے قوم قائد اعظم محمد علی جناح رحمتہ اللہ علیہ اور مادر ملت محترمہ فاطمہ جناح رحمتہ اللہ علیہا شیعہ مسلمان تھے۔ شیعہ سنی مسلمانوں اکابرین و بانیان پاکستان اور عوام نے متحد ہو کر وطن عزیز پاکستان حاصل کیا اور آج بھی الحمدللہ شیعہ سنی مسلمانوں کے درمیان محبت اخوت کا رشتہ قائم ہے۔ مگر افسوس کہ ایک سوچی سمجھی سازش کے تحت وطن عزیز پاکستان میں کروڑوں شیعہ مسلمانوں کو دیوار سے لگانے کی سازش کی جارہی ہے ہماری مذہبی عبادات پر قدغن لگاتے ہوئے ملک بھر میں گزشتہ چند سالوں میں مذہبی عبادت عزاداری مجلس عزا اور جلوسوں کو جرم قرار دے کر ہزاروں شیعہ مسلمانوں کے خلاف مذہبی عبادت کے جرم میں سینکڑوں ایف آئی آرز درج ہوئی ہیں جبکہ اس ملک میں سب سے زیادہ جس مکتبہ فکر کو دہشت گردی کا نشانہ بنایا گیا وہ اہل تشیع ہی ہیں مگر اس مکتب فکر کی حب الوطنی کو داد دینی چاہیے کہ انہوں نے ہمیشہ اپنے عظیم شہداء کو پاکستانی پرچم کے سائے میں دفن کیا۔

جناب عالی گذشتہ حکومت کی جانب سے ایک قوم ایک نصاب کے نعرے کے تحت یکساں نصاب تعلیم تیار کیا جانے لگا تو اس کے تمام مراحل میں اہل تشیع کو مکمل طور پر نظر انداز کیا گیا نصابی کتابیں تحریر اور نظرثانی کرتے ہوئے پاکستان میں موجود سات کروڑ شیعہ مسلمانوں کے عقائد اور مذہبی تعلیمات کو مکمل طور پر نظر انداز کیا گیا۔ شیعہ علماء اکابرین قومی تنظیموں اور عوام نے مسلسل احتجاج کیا مگر پتہ نہیں کیوں ریاست اور حکومت جبر کے ذریعے کروڑوں شیعہ طلبہ و طالبات پر ان کی دینی تعلیمات کے خلاف نصاب تعلیم مسلط کرنے پر بضد رہی۔ تعجب ہے کہ پاکستان میں بسنے والے ایک فیصد ہندو سکھ اور مسیحی اقلیتوں کے عقائد اور تعلیمات کا خیال رکھا جاتا ہے مگر ملک کی دوسری بڑی اکثریت یعنی 30 فیصد آبادی یعنی سات کروڑ شیعہ مسلمانوں کے اس بنیادی انسانی اور آئینی حق کو پامال کیا جارہا ہے۔

 جناب عالی قائد اعظم محمد علی جناح رحمتہ اللہ علیہ اور وطن عزیز پاکستان کے یہ باوفا بیٹے آج 74 سال بعد بھی اپنے شہری اور آئینی حقوق کے لئے احتجاج پر مجبور ہیں گزشتہ ایک سال سے صدر وزیراعظم وزیر تعلیم نصاب کونسل غرض ہر سطح پر ہم نے اپنا احتجاجی موقف دلائل کے ساتھ پیش کیا مگر کوئی بھی ہماری آواز سننے کے لیے تیار نہیں ہے۔ مجلس وحدت مسلمین پاکستان نے اسلام آباد میں منعقدہ ملک گیر اجتماع اور قومی شیعہ کانفرنس میں ملک بھر کے علماء کرام اکابرین ملت ذاکرین عظام اور تنظیمی نمائندگان نے بالاتفاق موجودہ متنازعہ نصاب تعلیم کو فرقہ وارانہ اور غیر آئینی قرار دیتے ہوئے مکمل طور پر رد کیا اور متفقہ طور پر 1975 کے نصاب تعلیم کی بحالی کا مطالبہ کیا۔

جناب عالی ہم امید کرتے ہیں کہ آئین پاکستان کی شق نمبر 22 کے مطابق ایسا نصاب تعلیم ترتیب دیا جائے گا جو تمام مسلمانوں کے لئے قابل قبول ہو۔

 لیکن اگر آپ متنازع فرقہ وارانہ نصاب تعلیم اور دینیات پر بضد ہیں تو برائے کرم ملک میں آباد 7 کروڑ شیعہ طلباء و طالبات کے لئے ان کی مذہبی تعلیمات کے مطابق اسلامیات ترتیب دیں جو شیعہ اساتذہ کے ذریعے ہمارے بچوں کو تعلیم دی جائے۔

ہمیں اس بات پر بھی حیرت ہے کہ آخر ریاست اور حکومت کیوں اس ملک میں فرقہ واریت کی آگ دوبارہ جلانا چاہتی ہے کبھی نصاب تعلیم میں تبدیلی اور کبھی صدیوں سے رائج مسنون درود شریف میں تبدیلی کر کے متنازعہ درود سب پر مسلط کرکے نفرتوں کو ہوا دینا چاہتی ہے۔

 امید ہے کہ ہماری ان گذارشات پر ہمدردانہ غور کرتے ہوئے فی الفور نصاب تعلیم اور متنازعہ درود شریف کا مسئلہ حل کرکے کروڑوں شہریوں میں موجود تشویش کو دور کریں گے۔ ہم یہ بھی توقع رکھتے ہیں کہ ہماری مذہبی عبادت عزاداری مجالس عزا اور عزاداری کے خلاف ہر سال سینکڑوں ایف آئی آرز کا ظالمانہ سلسلہ روکنے میں بھی اپنا کردار ادا کریں گے۔
اللہ تعالی وطن عزیز پاکستان کو سلامت رکھے اور پاکستانی عوام کے درمیان اتحاد اخوت اور محبت کی فضا کو مزید فروغ ملے۔
 والسلام
مقصود علی ڈومکی
کنوینیر نصاب کمیٹی
مجلس وحدت مسلمین پاکستان
03003840789