وحدت نیوز(اسلام آباد)مجلس وحدت مسلمین پاکستان کے چیئرمین علامہ راجہ ناصر عباس جعفری نے ولایت و امامت کے چھٹے تاجدار حضرت امام جعفر صادق علیہ السلام کے یوم شہادت کے موقع پر اپنے پیغام میں کہا ہے کہ امام برحق نےجس عظیم علمی و فکری تحریک کی بنیاد ڈالی  آج سارا  عالم انسانیت اس سے استفادہ کر رہا ہے۔جو قومیں اہل بیت اطہار علیہم السلام کی تعلیمات  پر حقیقی معنوں میں عمل کر رہی ہیں وہ آج دنیا بھر کے سامنے سرخرو اور سربلند  ہیں ۔آل محمد  صلی اللہ علیہ والہ وسلم  سے محبت کا تقاضا ہے کہ ان کے احکامات  پر من و عن عمل کیا جائے۔

انہوں نے کہا کہ چھٹے امام ؑ کے دور میں اسلامی افکار و نظریات کی ترویج  اور علمی بحث و مباحثوں سے اہل بیت اطہار علیہم السلام کی تعلیمات کو فروغ حاصل ہوا۔ اختلاف رائے  پر عدم برداشت کا رویہ مثبت بحث مباحثہ کے راہ کی دیوار بن جاتا ہے۔ آئمہ اطہار علیہم السلام نے دین حقہ کی ترویج و تبلیغ کے لیے جو طرز عمل اختیارکیا موجودہ دور میں اس کی شدت سے ضرورت ہے۔امام جعفر صادق علیہ السلام اپنے دور کی طاغوتی طاقتوں کے سامنے خاموش نہیں رہے بلکہ ظالموں کے ہر ظلم سے عوام کو آگاہ کرتے رہے۔ان کی بلند سیرت اور اخلاقی کمالات کا اعتراف ان کے مخالفین کو بھی تھا۔اگر ہم دنیا وآخرت میں سرخروی حاصل کرنا چاہتے ہیں تو اہل بیت ؑ کے سیرت و کردار کو مشعل راہ بنانا ہو گا۔

وحدت نیوز (لاہور) حالیہ دہشت گردی کے واقعات پر معصوم جانوں کے ضیاع پر اظہار افسوس کرتے ہوئےمرکزی صدر مجلس وحدت مسلمین شعبہ خواتین و رکن پنجاب اسمبلی محترمہ سیدہ زہرا نقوی نے اپنے ایک پیغام میں کہا کہ وطن عزیز سنگین ترین دور سے گزرا رہا ہے ایک ماہ میں دہشت گردی کے تین واقعات سے معلوم ہوتا ہے کہ ملک دشمن عناصر منظم انداز میں دہشت گردی کے ذریعے ملک کو کمزور کرنا چاہ رہے ہیں۔

انہوں نے کہا کسی بھی ملک کے عوام کی جان و مال کی حفاظت ریاستی اداروں کی اولین ذمہ داری ہے ان واقعات کے خاتمے کے لیے دہشت گردوں سے آہنی ہاتھوں سے نمٹنا ضروری ہے ملک پاکستان کو اس وقت بے شمار سنگین مسائل اور دشوار ترین حالات کا سامنا ہے ایسے میں دہشت گردی کے پے در پے واقعات نہایت تشویشناک ہیں ۔

انہوں نے مذید کہا کہ پاکستان کی سالمیت و بقا اور عوام کی حفاظت کے لیے ریاست کو سنجیدگی سے ان دہشت گردانہ واقعات کی روک تھام کے لیے سخت اقدامات اٹھانے ہونگے اور قاتلوں کو انصاف کے کٹہرے میں پیش کرنا ہوگا۔

سیدہ زہرا نقوی نے میرانشاہ میں خودکش حملے کے نتیجے میں تین سیکورٹی اہلکار اور بچوں کی ہلاکت کی شدید الفاظ میں مذمت کرتے ہوئے کہا ہے کہ ملک میں جاری دہشت گردی کی نئی لہر پر توجہ دینے کی ضرورت ہے اور اس کے اسباب کو جاننے کی ضرورت ہے ہماری بہادر فوج نے ہمیشہ کی طرح اپنی جانوں کی پرواہ نہ کرتے ہوئے عام لوگوں کے تحفظ کو یقینی بنانے کے لیے کام کیا ہے۔

انہوں نے مزید کہا کہ دہشت گردی کی لہر نے ایک بار پھر وطن عزیز کو اپنی لپیٹ میں لے لیا ہے ۔ کئی سال قبل دہشت گردی کے خلاف شروع ہونیوالے ملک گیر اور غیر معمولی آپریشن کے بعد بھی دہشت گردوں کا مکمل صفایا نہیں ہو سکا ہے اور وہ آج بھی اپنی مذموم کارروائیاں کر رہے ہیں ۔ اس صورتحال کا ازسر نو جائزہ لینے اور نئی حکمت عملی وضع کرنے کی ضرورت ہے ۔

وحدت نیوز(کراچی)صوبائی سیکریٹریٹ مجلس وحدت مسلمین سندھ و دعا کمیٹی کی جانب سے شعراء کرام، منقبت، نعت خواں، صحافی، سماجی شخصیات کے اعزاز میں وحدت ہاؤس سولجر بازار میں عید ملن پارٹی کے سلسلے میں عشائیہ کا اہتمام کیا گیا، جس میں مولانا نعیم الحسن، آغا سجاد شبیر رضوی، میجر (ر) قمر عباس رضوی، ایم ڈبلیو ایم رہنما تقی ظفر، محمد فیضان رضا قادری، ناصر آغا، ثاقب رضا ثاقب، ظہیر رضوی، نقی لاہوتی، حسین موسیٰ، محمد علی جلالوی، محمد ضامن، علی رضا جعفری، دانش عابدی، جہاں زیب زیدی، وصی حسن، خالد حسین صحافی، نوشاد علی، ناصر علی صحافی، اورعلی عباس نے شرکت کی، مولانا نعیم الحسن، علامہ سجاد شبیر رضوی، ناصر حسینی، محمد فیضان قادری، ناصر آغا، حسین موسی نے علامہ راجہ ناصر عباس جعفری کو مجلس وحدت مسلمین پاکستان کا چیئرمین منتخب ہونے پر مبارکباد پیش کی اور امید کی کہ جس احسن طریقے سے علامہ راجہ ناصر عباس نے سیکریٹری جنرل کی حیثیت سے ملک، عوام، و ملت جعفریہ کی بہترین خدمات انجام دی اس سے بہتر انداز میں چیئرمین کی حیثیت سے اپنا فرائض ادا کریں گے۔

اس موقع پر خطاب کرتے ہوئے مولانا نعیم الحسن، علامہ سجاد شبیر رضوی، ناصر حسینی نے کہا کہ پاک فوج کو ٹارگٹ کرنے کی حکمت عملی ملک کے لئے تباہ کن ہے، سیاستدان فوج کیخلاف بیان بازی کی پالیسی کو ترک کریں اور عوام و ملک کی صحیح معنوں میں خدمت کریں۔ ناصر حسینی نے ملک بھر میں ملت جعفریہ کے نوجوانوں کے گھروں پر بلاجواز چھاپوں اور گرفتاریوں کی بھرپور مذمت کرتے ہوئے کہا کہ ملت جعفریہ کے نوجوانوں کو فی الفور رہا کیا جائے، کئی سالوں سے لاپتہ افراد پر اگر کوئی مقدمات ہیں تو عدالتوں میں پیش کیا جائے، نہیں تو انکو فوری طور پر آزاد کیا جائے۔ آخر میں مولانا نعیم الحسن نے ملک کے ترقی و استحکام و پاک افواج کی سلامتی کیلئے اور تمام مریضوں باالخصوص ایم ڈبلیو ایم کے سیکریٹری سیاسیات علی حسین نقوی، ارشداللہ مکتبی کی صحت و سلامتی کے لئے دعا کی۔

وحدت نیوز(اسلام آباد) مجلس وحدت مسلمین پاکستان کے رہنماء علامہ مقصود علی ڈومکی نے کہا ہے کہ ایم ڈبلیو ایم پاکستان ایک جمہوری سیاسی مذہبی جماعت ہے، جو ایک شفاف جمہوری آئینی طریقہ کار کے مطابق فیصلے کرتی ہے اور شفاف جمہوری انداز سے مرکزی سربراہ کا انتخاب کرتی ہے۔ جس ملک میں کونسلر اور یوسی چیئرمین تک کے لئے اخلاقی اصولوں کو پامال کیا جاتا ہو اور سیاسی جماعتوں میں خاندانی بادشاہت اور موروثی نظام کے سبب داخلی جمہوریت کا فقدان ہو، وہاں مجلس وحدت مسلمین کی 12 سالہ تاریخ ایک ایسی جمہوری جماعت کے طور پر دیکھی جاتی ہے جو اسلامی اصولوں سے مزین ہے۔ لابنگ اپنے امیدوار کے حق میں ورک اور دیگر اخلاقی کمزوریوں سے پاک اہلیت اور میرٹ کی بنیاد پر شفاف انتخابی عمل کے ذریعہ مسلسل چوتھی مرتبہ ایک ملک گیر جماعت کا بھاری اکثریت کے ساتھ سربراہ منتخب ہونا علامہ راجہ ناصر عباس جعفری سے کارکنوں اور قوم کی والہانہ محبت کا آئینہ دار ہے۔

انہوں نے کہا کہ علامہ راجہ ناصر عباس جعفری قوم ملک و ملت کا درد رکھنے والے ایک محب وطن شجاع، حق گو اور حق شناس رہنماء کے طور پر عوام کے محبوب رہنماء ہیں۔ جنہیں پاکستان کے عوام خصوصاً ملت جعفریہ نے ہمیشہ اتحاد بین المسلمین کے علمبردار ایک بہادر انقلابی رہنماء کے طور پر مشکل ترین حالات میں قوم کی درست سمت میں رہنمائی کرتے دیکھا ہے۔ جب وہ عالمی استکباری قوتوں کو بے خوف بن کر للکارتے ہیں تو ہمیں ان کی گفتگو میں قائد شہید کا لہجہ اور ان کے کردار سے شہید قائد کی خوشبو آتی ہے۔ انہوں نے کہا کہ میں علامہ راجہ ناصر عباس جعفری کے بطور چیئرمین ایم ڈبلیو ایم پاکستان انتخاب پر مجلس وحدت مسلمین کے بہادر کارکنوں، ملت جعفریہ اور پاکستانی قوم کو مبارکباد پیش کرتا ہوں۔ ان شاء اللہ ان کی قیادت میں مجلس وحدت مسلمین کے بہادر کارکن قائد شہید کے افکار کے مطابق ملک و ملت کی خدمت کریں گے اور مظلوموں کی نصرت اور ظالم استکباری قوتوں سے برسر پیکار رہیں گے۔

وحدت نیوز(اسلام آباد) مجلس وحدت مسلمین کے زیر اہتمام اسلام آباد میں جاری تین روزہ مرکزی راہیان کربلا کنونشن کے آخری روز وحدت کانفرنس سے خطاب کرتے ہوئےشیعہ سنی علماء و قائدین بشمول سربراہ ملی یکجہتی کونسل پاکستان ڈاکٹر ابوالخیر محمد زبیر،نائب امیر جماعت اسلامی پاکستان لیاقت بلوچ، سربراہ مرکزی جمعیت اہل حدیث علامہ ضیاءاللہ شاہ بخاری،مفتی گلزار نعیمی ودیگر نے علامہ راجہ ناصرعباس جعفری کو ایم ڈبلیوایم کا چیئرمین منتخب ہونے پر مبارکباد پیش کی اور ان کے انتخاب کو ملک اور امت مسلمہ کے لئے باعث خیر برکت قرار دیا اور نیک خواہشات کا اظہار کیا۔

سربراہ ملی یکجہتی کونسل صاحبزادہ ابوالخیر محمد زبیرنے کہا کہ علامہ راجہ ناصرعباس جعفری کو چیئرمین منتخب ہونے پر مبارک باد پیش کرتا ہوں، طویل عرصہ سے ان کے ساتھ ملی یکجہتی کونسل کے فورم پر کام کا موقع ملا انہیں علم اور تعلم کے لئے ہمیشہ فکر مند پایا ہےان کا انتخاب ایم ڈبلیوایم کے اراکین کی سیاسی دانشمندی کا منہ بولتا ثبوت ہے ۔

جماعت اہلحدیث کے امیرضیا اللہ شاہ بخاری نے کہا کہ ہمیں اپنی ذمہ داریوں کا درک کرتے ہوئے فکری ہم آہنگی کے لیے جدوجہد کرنا ہو گی۔فکری انتشار کا خاتمہ حکم ربی ہے۔انہوں نے کہا کہ علامہ راجہ ناصرعباس جعفری کے ساتھ مختلف نشستیں رہی ہیں ان کی محفل سے اٹھنے کا دل نہیں کرتا علوم کا سرچشمہ ہیں ، ان جیسی شخصیت کو ایم ڈبلیوایم کا تاحیات سربراہ ہونا چاہئے۔

نائب امیر جماعت اسلامی لیاقت بلوچ نے کہا کہ وحدت کانفرنس کے انعقاد اور علامہ راجہ ناصرعباس جعفری کو چیئرمین منتخب ہونے پر مبارکباد پیش کرتا ہوں، پاکستان میں اتحاد امت کی جتنی ضرورت آج ہے پہلے کبھی نہیں تھی۔ہمیں مل کر استعماری قوتوں کا مقابلہ کرنا ہوگا۔

مفتی گلزار نعیمی نے کہا کہ دین اسلام ہمیں خدا کی رسی کو مل کر مضبوطی سے تھامے رکھنے کی تلقین کرتا ہے، پاکستان کو موجودہ بحرانوں سے نکالنے کیلئے دینی طبقات کا اکھٹا ہونا ناگزیر ہے ۔ اسلام کی خدمت اور اتحاد امت کیلئے علامہ راجہ ناصرعباس جعفری کے شانہ بشانہ کھڑے ہیں۔

شیعہ علماء پاکستان کے صدر سید حسنین گردیزی نے کہا کہ مسلمانوں کے درمیان وحدت کی بنیاد دین ہے۔شیعہ علماء اتحاد و اخوت کو اپنا شرعی فریضہ سمجھتے ہوئے اس کے لیے کوشاں ہیں۔مسلمان جتنے ایک دوسرے کے قریب ہوں گے ان کامستقبل اتنا ہی زیادہ روشن ہو گا۔

گلگت بلتستان کے وزیر زراعت میثم کاظم نے کہا کہ مجھے مجلس وحدت مسلمین کا ادنی سا کارکن ہونے پر فخر ہے۔انہوں نے کہا کہ نظریہ اسلام پر معرض وجود میں آنے والی ریاست میں مذہبی جماعتوں کا سیاسی کردار محدود کر دیا گیا ہے۔ملت تشیع نے ہمیشہ وحدت اور مذہبی رواداری کی بات کی۔ وطن عزیز میں بیرونی مداخلت کو ملک وقوم کی عزت و حمیت کے منافی قرار دیا۔مجلس وحدت مسلمین اس خود مختار پاکستان کے لیے جدوجہد جاری رکھے گی جس کا خواب قائد و اقبال نے دیکھا تھا۔

پارا چنار کے تحصیل ناظم آغا مزمل نے خطاب کرتے ہوئے کہا کہ ملت تشیع کا سیاسی استحکام وقت کا اہم تقاضا ہے۔سیاسی نظام سے لاتعلق رہنا کسی بھی اعتبار سے درست نہیں۔کامیابی کے بعد ہماری ذمہ داری میں مزید اضافہ ہوا ہے جس سے غافل نہیں رہا جاسکتاپاراچنار میں اتحاد و وحدت بین المسلمین کے لئےکوشاں رہیں گے۔

وحدت نیوز(اسلام آباد) نومنتخب چیئرمین مجلس وحدت مسلمین پاکستان علامہ راجہ ناصرعباس جعفری نے ایم ڈبلیوایم کے زیر اہتمام اسلام آباد میں جاری تین روزہ مرکزی راہیان کربلا کنونشن کے آخری روز منعقدہ وحدت کانفرنس سے خطاب کرتے ہوئےکہا کہ امریکہ اور اُس کے حواری نہ صرف پاکستان بلکہ اُمت مسلمہ کے دشمن ہیں، وہ ہماری طاقت کو کمزور کرنا چاہتا ہے، ہماری مضبوطی اور کامیابی وحدت میں ہے، عزت کا راستہ اتحاد و وحدت کا راستہ ہے، پاکستان ہر دور میں امریکہ اور اُس کے حواریوں کی خواہش رہی ہے لیکن پاکستان کی محب وطن جماعتیں کل بھی امریکہ جیسے ناسور کے خلاف تھیں اور آج بھی اُسے درندہ سمجھتی ہیں، ہم چاہتے ہیں کہ ہمارے فیصلے واشنگٹن کی بجائے اسلام آباد میں ہوں، ہم ایک آزاد اور خود مختار ملک کے خواہ ہیں، ہم چاہتے ہیں ہماری خارجہ پالیسی آزاد ہو اور ہم خود اپنے مستقبل کا فیصلہ کریں ۔ امریکی اسٹیبلشمنٹ کو انسانیت کا دشمن سمجھتے ہیں، امریکہ کی ذات میں ظلم و بربریت ہے ، ہم امریکہ اور اس کے سسٹم سے نفرت کرتے ہیں۔

انہوں نےکہا کہ اسرائیل جسے امریکہ اور برطانیہ نے قائم کیا وہ انسانیت کا دشمن ہے ، فلسطینی مسلمانوں پر ہونے والی ظلم و بربریت میں اسرائیل کے ساتھ ساتھ امریکہ برابر کا شریک ہے۔ ہم پاک فوج کی دل و جان سے قدر کرتے ہیں، ہم دوبارہ کسی کو ملک توڑنے نہیں دیں گے، اس ملک کے مسائل کا حل فوری الیکشن ہیں، کسی سیاسی و مذہبی شخص قتل ہوا تو عوام کو کوئی نہیں روک سکے گا، ہم مزید کسی ایڈوانچر کے متحمل نہیں ہیں، ہمیں میدان میں حاضر رہنا ہے اور ملک دشمنوں کا راستہ روکنا ہے۔ ہم نے اپنی فوج کو بھی بچانا ہے، جو بھی پاک فوج کو کمزور کرنے کی کوشش کرے وہ ملک کا دشمن اور قوم کا خائن ہے، جن چوروں ، خائنوں اور لٹیروں کو جیلو ں میں ہونا چاہیے تھا اُنہیں حکومت دیدی ہے اور جو قوم کے محب وطن ہیں اُنہیں مسنگ کر دیا ہے۔