وحدت نیوز(کراچی) مجلس وحدت مسلمین پاکستان کے مرکزی رہنما علامہ سید حسن ظفرنقوی نے دیگر رہنماؤں کے ہمراہ کراچی پریس کلب میں میڈیا سے گفتگو کرتے ہوئے کہا ہے کہ ملک کی معاشی صورتحال اس حدتک خراب ہوچکی ہے کہ ملک دیوالیہ کے قریب پہنچ چکا ہے ملک اربوں ڈالر کا مقروض ہو چکا ہے موجودہ حکمران ساری دنیا میں کشکول لے کر گھوم رہے ہیں کہ کسی سے دو،چار ارب ڈالر مل جائیں لیکن کوئی ہمارے حکمرانوں پر اعتبار کرنے کو تیار نہیں ہیں اس پر ستم ظریفی یہ ہے کہ حکمرانوں کو اپنی ذلت کا احساس نہیں ہے اپنے ساتھ دو سو  افراد کے ماہرین معاشیات کو ساتھ لے کر آنے کا دعوی کرنے والوں کا حال یہ ہے کہ صرف چھ مہینے میں مہنگائی کے 75 سالہ ریکارڈ ٹوٹ چکے ہیں اور ان کے پاس صرف ایک بہانہ ہے جو کیا پچھلی گورنمنٹ نے کیا دہشت گردی پہلے سے زیادہ زور سے دستک دے رہی ہے  لیکن یہ بھی پچھلی حکومت نے کیا موجودہ حکومت کے پاس صبح سے شام تک سوائے پچھلی حکومت کا رونا رونے کے اور کوئی کام نہیں ہے ان کا ہر وزیر اپنا اپنا کام کرنے کے بجائے 24 گھنٹے اپنی اپنی پارٹی کا ترجمان بن کر مخالفین پر گولا باری کرتا رہتا ہے ۔

انہوں نے کہا کہ کراچی کے حالات سدھرنے کے بجائے بگڑتے چلے جارہے ہیں یہ شہر تباہی اور بربادی کی تصویر بنا ہوا ہے اور صوبائی حکومت کے پاس صرف ایک بہانہ ہے وہ یہ ہے کہ جو  کیا دوسروں نے کیا14 سال سے سندھ میں حکومت کرنے والی جماعت کو شرم نہیں آتی جب وہ کام کرنے کے بجائے الزام تراشیاں کرتی ہے۔

 ان کا کہنا تھا کہ کراچی کی عوام کو لٹیروں اور ڈاکوؤں کے رحم و کرم پر چھوڑ دیا گیا ہے روزانہ کی بنیاد پر شہر کراچی میں ڈاکو لٹیرے عوام کی املاک کو لوٹتے ہوئے بے گناہ شہریوں کو قتل کر دیتے ہیں اس شہر کا کوئی والی وارث نہیں ہے جو کراچی کے ٹھیکیدار بنے ہوئے تھے آج معمولی اور بے وقت اقتدار کی خاطر کراچی کے مسائل پہ بات کرتے ہوئے بھی کتراتے ہیں ایسا لگتا ہے کہ ان کا اتحاد صرف اور صرف کراچی کو لوٹنے کے لئے ہے لینڈ مافیا حکمرانوں کی فرنٹ مین بن کر کراچی کے لوگوں کی زمینوں پر قبضہ کر رہے ہیں بھتہ مافیا بےخوفی سے کام کر رہے ہیں ہر روز ہزاروں موبائل چھینے جاتے ہیں اور کھلم کھلا بازاروں میں فروخت کیے جاتے ہیں کراچی کو لوٹنے والے ایک جگہ جمع ہو گئے ہیں کوئی نہیں جو کراچی کے زخموں کا مرہم بن سکے ۔

علامہ حسن ظفر نقوی نے کہا کہ ایک عجب تماشا ہو رہا ہے پہلے مذہبی عبادات کے خلاف مہم چلائی گئی اور قتل و غارت گری کا بازار گرم کیا گیا اور اب فرضی باتوں پر علمائے کرام کے خلاف مقدمات قائم کر کے انہیں گرفتار کیا جارہا ہے،کوئٹہ کے امام جمعہ حجت الاسلام و المسلمین علامہ حسنین وجدانی کو ایک ایسے ہی پرانے مقدمے میں ملوث کر کے گرفتار کر لیا گیا ہے یہ صورتحال ناقابل برداشت ہے اگر ان کو رہا نہ کیا گیا توہم احتجاج پر مجبور ہوں گے ۔

انہوں نے مزید کہا کہ عبداللہ شاہ غازی کے مزار سے گرفتار کیے جانے والے عزاداران امام حسین جن کا تعلق شیعہ وسنی مکتبہ فکر سے ہے اب تک پابند سلاسل ہیں اور انتظامیہ کے کانوں پر جوں تک نہیں رینگ رہی حکومت کیا چاہتی ہے ؟ کیا جب تک ہم سڑکوں پر نہیں نکلیں گے احتجاج نہیں کریں گے دھرنے نہیں دیں گے ہماری کوئی بات نہیں سنی جائیں گی حکومت سندھ کو چاہیے کہ وہ بیلنس پالیسی کو ختم کرکے عبداللہ شاہ غازی کے مزار پر بے گناہ گرفتار کیے گئے عزاداران امام حسین کو رہا کرے اور اپنی صفوں میں سے ان کالی بھیڑوں کو باہر نکالے جن کی ایما پر بے قصور عزادار چار ماہ سے قید میں ہیں.حکومت عبد اللہ شاہ غازی مزار پر عزاداری کرنے والے نوجوانوں کو فی الفور رہا کرے بصورت دیگر احتجاج کی کال دیں گے۔

آخر میں انہوںنے کہا کہ عزاداری ہمارا آئینی حق ہے اور کسی کو یہ اختیار نہیں کہ آئینی حقوق پر شب خون مارے۔ عبد اللہ شاہ غازی مزار پر عزاداری کرنے کو دہشتگردی بنا کر من گھڑت مقدمہ قائم کیا گیا جو بنیادی انسانی حقوق کی کھلم کھلا خلاف ورزی ہے۔ قانون نافذ کرنے والے اداروں نے مذہب کو دہشتگردی بنا کر رکھا ہوا ہے جبکہ ملک دشمن دہشت گردوں کی سرپرستی کے تانے بانے قانون نافذ کرنے والے اداروں میں موجود کالی بھیڑوں سے جا ملتے ہیں۔اس موقع پرایم ڈبلیوایم کراچی کے صدر علامہ صادق جعفری، علامہ حیات عباس نجفی،مولانا حمید حسین الحسینی اور سید رضی حیدر بھی موجود تھے۔

وحدت نیوز(نصیر آباد)ایم ڈبلیو ایم بلوچستان کے رہنما علامہ سید ظفر عباس شمسی نے کہا ہے کہ اللہ تعالیٰ کے نیک اور صالح بندوں نے ہی دین مبین اسلام کی تبلیغ و ترویج اور انسانیت کی خدمت کیلئے اپنی زندگیاں وقف کر دی۔ ان خیالات کا اظہار مجلس وحدت مسلمین بلوچستان کے صوبائی صدر علامہ سید ظفر عباس شمسی نے درگاہ سید حسن شاہ ابدال نوتال ضلع نصیر آباد پر حاضری دیتے ہوئے درگاہ کے متولی جعفر فقیر و دیگر فقراء و زائرین سے گفتگو کرتے ہوئے کی۔

 اس موقع پر ایم ڈبلیو ایم کے صوبائی نائب صدر سہیل اکبر شیرازی اور صوبائی سیکرٹری تنظیم سید حسن ظفر شمسی بھی انکے ہمراہ تھے۔ انہوں نے کہا کہ اللہ تعالیٰ کے نیک اور صالح بندوں نے ہی دین مبین اسلام کی تبلیغ و ترویج و انسانیت کی خدمت کرنے کیلئے اپنی زندگیاں وقف کر دی اور ہمیشہ لوگوں کو راہ راست اور نیک اعمال کرنے کی ہدایت کرتے ہوئے برائی سے روکنے کی تلقین کی۔ انہوں نے کہا کہ ہمیں بزرگان دین کے فرامین پر عمل کرنا چاہیے۔

وحدت نیوز(لاہور)ضلعی آرگنائزر جناب نقی مہدی صاحب کے طےشدہ پروگرام کے مطابق شمالی لاہور کے تمام یونٹس کے دورہ جات کئے جائیںگے ۔اس پروگرام کے تحت آج سلطان پورہ یونٹ کا دورہ کیاگیا، یونٹ کے صدر جناب سید علی ہمدانی صاحب نے اپنے یونٹ کی فعالیت کے متعلق رپورٹ پیش کی اور اپنی کابینہ کا تعارف کرایا اس موقع پر ضلعی آرگنائزر نے یونٹ کی کابینہ کے افراد سے حلف لیا اور اپنے تعاون کی یقین دھانی کرائی۔

 اس تقریب میں ضلعی آرگنائزر جناب نقی مہدی صاحب اور صوبائی ورکنگ کمیٹی کے ممبر جناب حسین زیدی صاحب، سابقہ ضلعی سیکرٹری جنرل جناب نجم عباس خان اور سابقہ ضلعی سیکرٹری روابط جناب علمدار زیدی صاحب اور شالیمار ٹاؤن کے سیکرٹری جنرل جناب رانا آصف صاحب نے شرکتِ کی  ۔

وحدت نیوز(کوئٹہ)مجلس وحدت مسلمین بلوچستان کے صوبائی نائب صدر سہیل اکبر شیرازی نے بلوچستان شیعہ کانفرنس کے صدر انجینئرحاجی محمد جواد رفیعی کے والد محترم حجتہ الاسلام و المسلمین الحاج علامہ شیخ حسین علی رفیعی کی وفات پر دلی تعزیت و تسلیت پیش کرتے ہوئے کہا کہ ایک عالِمِ دین کی موت پورے عالَم کی موت ہے۔“اگر ایک عالِمِ دین دنیا سے رخصت ہو جاتا ہے تو اس علاقہ کی عوام اس عالِم کی موت کے باعث علمی روشنی سے محروم ہو جاتی ہے،ایک عالِم کی موت ایک مصیبت ہے جس کی تلافی ممکن نہیں ہوسکتی اور ایسا نقصان ہے جو پورا نہیں ہوسکتا.دعا گو ہیں کہ رب العالمین مرحوم کو جوار اہل بیت علیھم السلام میں جگہ مرحمت فرمائے اور جملہ پسماندگان کو صبر جمیل عنایت فرمائے ۔آمین یا رب العالمین وَالسَّلَامُ عَلٰى مَنِ اتَّـبَعَ الْـهُدٰى”

وحدت نیوز(ملتان)مجلس وحدت مسلمین پاکستان کے مرکزی سیکرٹری تنظیم اور نصاب کمیٹی کے سربراہ علامہ مقصود علی ڈومکی کی ملتان میں وکلاء سے مشاورتی نشست۔اس موقع پر مرکزی ڈپٹی جنرل سیکرٹری سلیم صدیقی صوبائی سیکرٹری تنظیم سید دلاور عباس زیدی اور صوبائی سیکرٹری قانون سمیع گردیزی ایڈووکیٹ بھی موجود تھے۔

اس موقع پر گفتگو کرتے ہوئے علامہ مقصود علی ڈومکی نے کہا کہ متنازعہ نصاب تعلیم میں پیغمبر اسلام صلی اللہ علیہ وآلہ وسلم اور ایل بیت اطہار علیہم السلام کی توہین کی گئی ہے پاکستان میں بسنے والے کروڑوں شیعہ سنی مسلمان اس متنازعہ اور فرقہ وارانہ نصاب تعلیم کو مسترد کر چکے ہیں۔ کل تک جو اختلافات دینی مدارس تک محدود تھے انہیں سرکار کی زیر سرپرستی سرکاری اسکولوں میں لا کر پاکستانی قوم کو فرقہ واریت میں گھسیٹا جا رہا ہے۔انہوں نے کہا کہ متنازعہ نصاب تعلیم آئین پاکستان اور بنیادی شہری حقوق سے متصادم ہے۔ ملت جعفریہ متفقہ طور پر فرقہ وارانہ نصاب تعلیم کو رد کر چکی ہے۔ مگر حکومت اپنی ضد انا اور ھٹ دھرمی چھوڑنے کے لئے تیار نہیں۔

انہوں نے کہا کہ نصاب تعلیم کے حوالے سے ملت جعفریہ کے مطالبات اقوام متحدہ کے انسانی حقوق کے چارٹر اور آئین پاکستان کی رو سے سو فیصد درست ہیں۔ متنازعہ نصاب تعلیم پر نظر ثانی کے حکومت نے جو وعدے کئے وہ سب جھوٹے ثابت ہوئے۔ 80 فیصد اصلاح کا وعدہ کرکے حکومت نے ایک فیصد بھی اصلاح نہیں کی اور ملت جعفریہ کے احتجاج اور اعتراضات کو نظر انداز کر کے یک طرفہ متنازعہ نصاب تعلیم ملک بھر میں رائج کر دیا۔ اب ملت جعفریہ کے پاس ایجی ٹیشن کے سوا کوئی راستہ نہیں بچا۔

وحدت نیوز(اسلام آباد) مجلس وحدت مسلمین پاکستان کے مرکزی ڈپٹی سیکریٹری اطلاعات مظاہر شگری کے سسر محترم حجت الاسلام شیخ عبدالرحمن مقدسی شگری قضائے الہیٰ سے وفات پا گئےوہ قم المقدسہ میں مقیم تھے۔ مرحوم علامہ شیخ عبدالرحمن مقدسی کے انتقال پر ایم ڈبلیوایم کے قائدین علامہ راجہ ناصرعباس جعفری، علامہ احمد اقبال رضوی، سید ناصرشیرازی اور دیگر نے دلی افسوس اور دکھ کا اظہار کیا ہے ۔

قائدین نے اپنے تعزیتی پیغام میں مرحوم علامہ شیخ عبدالرحمن مقدسی کی دینی وعلمی خدمات کو خراج تحسین پیش کرتے ہوئے کہا کہ مرحوم اعلیٰ کردار بلند اخلاق خوش مزاج مخلص حلیم الطبع اور عالم باعمل تھے،آپ کی پوری زندگی حصول علوم آل محمد علیہم السلام اور تبلیغ و ترویج دین اسلام میں گزری ،صبر وتحمل قناعت اور سادہ زندگی گزارنے کے ساتھ مہمان نوازی اور خدمت خلق میں آپ بے مثال تھے،آپ سب سے خوش اخلاقی اور خندہ پیشانی سے ملتے تھے،انسان دوستی اور تعلقات کے حوالے سے بھی آپ کا کردار بہت بلند تھا،اللہ تعالیٰ محمد وآل محمد علیہم السلام کے صدقے میں آپ کو اعلیٰ علیین میں جوار معصومین علیہم السلام میں جگہ عطا فرمائے،پسماندگان کو صبر جمیل عطا فرمائے،صبر جمیل پران کو اجر عظیم عطا فرمائے۔