وحدت نیوز(اسلام آباد)چیئرمین مجلس وحدت مسلمین پاکستان علامہ راجہ ناصر عباس جعفری نے اپنے بیان میں کہا ہے کہ سینٹ مراعات میں بے تحاشہ اضافہ غریب عوام کے ساتھ کھلم کھلا مذاق ہے، سابقہ اور موجودہ حکمران ملک کو دونوں ہاتھوں سے لوٹ رہے ہیں، ان ناعاقبت اندیش حکمرانوں نے ملکی مفاد میں کونسا قابلِ ذکر کارنامہ انجام دیا ہے، اس کرپٹ نظام اور اس کے پروردہ افراد نے عوام کے منہ سے نوالہ تک چھین لیا ہے، موجودہ حکومت اور سہولت کاروں کی ناکامی نوشتہ دیوار ہے، جس کا فیصلہ عوامی عدالت میں ہو گا، مافیاز کی پشت پناہی کرنے والے کٹھ پُتلی حکمران عوام کو دلدل سے نکالنے کی صلاحیت سے عاری ہیں، غربت سے تنگ آکر خود کشیاں کرنے والی عوام کے پیسے حکمرانوں کی عیاشیوں اور پروٹوکول پر خرچ ہونا اخلاقاً اور شرعاً جرم ہے۔

انہوں نے کہا ہے کہ سینٹ مراعات میں ہوشربا اضافہ کرنا غریت کی چکی میں پسے عوام کے زخموں پر نمک چھڑکنے کے مترادف ہے، یہ بل آئین کے بھی متصادم ہے جسے عوامی مفاد کے خلاف پاس کیا گیا ہے، اس شرمناک اور ذاتی مفادات کے تحفظ پر مبنی بل سے جھوٹے جمہوری نعروں کی قلعی کھل گئی ہے، قومی مفادات کو پس پشت ڈال کر آسائش پسند حکمران قومی دولت کو بے دردی سے لوٹنے کی روش پر قائم ہیں، ہچکولے کھاتی ملکی معیشت ان بھاری بھرکم سہولیات کی ہرگز متحمل نہیں ہو سکتی، یہ سنگ دل حکومتی ٹولہ عوامی مشکلات میں کمی کی بجائے مسلسل اضافے کا باعث بن رہا ہے، سوشل میڈیا کے اس دور میں عوام بیدار ہیں اور اس طرح کے مفاد پرستانہ اقدامات سے باخبر ہیں، اب ماضی کی طرح اس طرح کا غیر منصفانہ اور امتیازی سلوک ہرگز برداشت نہیں کیا جاسکتا۔

وحدت نیوز(سکردو)مجلس وحدت مسلمین پاکستان گلگت بلتستان کے زیر اہتمام سکردو میں ناصران مہدی عجل اللہ تعالیٰ فرجہ الشریف کے عنوان سے ایک میڈیا ورکشاپ کا انعقاد کیا گیا، جس میں صوبائی عہدیداران نے شرکت کی، ورکشاپ کا باقاعدہ آغاز تلاوت کلام مجید سے ہوا جس کی سعادت شیخ محمد کاظم سروری نے حاصل کی۔ناصران مہدی عجل اللہ تعالیٰ فرجہ الشریف ورکشاپ کے شرکاء سے دور حاضر میں میڈیا کی اہمیت عنوان پر صوبائی صدر ایم ڈبلیو ایم گلگت بلتستان علامہ سید آغا علی رضوی نے سیر حاصل گفتگو فرمائی۔

عصری تقاضوں کے مطابق سوشل میڈیا کی افادیت اور غرض وغایت کے موضوع پر مجلس وحدت مسلمین پاکستان کے مرکزی ڈپٹی سیکرٹری اطلاعات مظاہر علی شگری نے روشنی ڈالی۔سوشل و ڈیجیٹل میڈیا کے اہداف اور میڈیا کی تمام تر جہتوں کے مؤثر طریقہ کار اپنانے کے حوالے سے شرکائے ورکشاپ سے مرکزی میڈیا آفس انچارج شجاعت علی بلتی نے نپے تلے انداز میں روشنی ڈالی۔ صوبائی سیکرٹری تربیت رسول میر نے بھی تعلیم و تربیت کے اہم موضوع پر خوبصورت گفتگو کی۔شرکاء ورکشاپ نے اس پروگرام کو انتہائی موزوں اور وقت کی اشد ضرورت قرار دیتے ہوئے اس پروگرام سے مستفید ہونے اور اسے سراہا۔

وحدت نیوز(کراچی)دعا کمیٹی صوبائی سکریٹریٹ مجلس وحدت مسلمین سندھ کے تحت ہفتہ وار مرکزی اجتماعی دعائے توسل و مجلس شہادت حضرت امام محمد تقی الجواد علیہ السلام اور برائے مرحوم مومنین و مومنات کے ایصال ثواب، بیماروں کی شفایابی، لاپتہ افراد کی بازیابی، مظلوم فلسطینی ، کشمیری مسلمانوں کے ظلم سے نجات سمیت وطن عزیز پاکستان کے استحکام کیلئے خصوصی دعا کا انعقاد محفل شاہ خراسان روڈ پر کیا گیا، دعا کی تلاوت کی سعادت مولانا سید علی رضا نجفی نے حاصل کی اور امام جوادؑ کی زندگی و سیرت پر روشنی ڈالی۔زیارت عاشورہ اور دعائے امام زمانہؑ کی تلاوت مولانا مختار حسین جبکہ سلام علی رضا جعفری، شیزاز شاہ زیدی نے پیش کیا، مومنین و مومنات نے شرکت کی ۔

دعا کے اختتام پر مومنین و مومنات کے درمیان نیاز تقسیم کی گئی، اس دوران شہدائے ملت جعفریہ،رہنما ایم ڈبلیو ایم مولانا تصور حسین جوادی صاحب اور دیگر مرحومین کے لئے فاتحہ خوانی کی گئی، اس موقع پر برادر ناصر الحسینی نے اعلان کیا کہ 4 جولائی بروز منگل بعد نماز مغربین محفل شاہ خراسان روڈ پر جشن ولادت باسعادت امام محمد باقر علیہ السلام اور عید غدیر کے سلسلے میں محفل میلاد منعقد ہوگی جس میں شہر کے مشہور شعراء کرام، منقبت خواں حضرات نذرانہ عقیدت پیش کریں گے،.جبکہ اہلیان سولجر بازار کی جانب سے 6 جولائی بروز جمعرات بعد نماز مغربین محفل شاہ خراسان روڈ سے عزاخانہ زہراؑ سولجر بازار تک جلوس و جشن بسلسلہ شب عید غدیر و یوم تکمیل دین برآمد ہوگا۔

وحدت نیوز(گلگت)وزیر اعلیٰ گلگت بلتستان کے معاون خصوصی و رہنما ایم ڈبلیو ایم جی بی محمد الیاس صدیقی نے کہا ہے کہ ملک کی دیگر یونیورسٹیوں کے مقابلے میں زیادہ فیس لینے والی قراقرم یونیورسٹی کا دیوالیہ ہونا وائس چانسلر کی مجرمانہ غفلت یا کرپشن کا نتیجہ ہے۔

ایک بیان میں رہنما مجلس وحدت مسلمین کا کہنا تھا کہ صدر پاکستان اس صورتحال کا نوٹس لیتے ہوئے وائس چانسلر کو برطرف کر کے کارروائی کریں۔

وحدت نیوز(لاہور)آفس ایس پی صدر ڈویژن لاہور میں زیر صدارت وقار عظیم کھرل ایس پی صدر ڈویژن بسلسلہ محرم الحرام میٹنگ ہوئی جس میں آغا علی شیر جنرل سیکرٹری عزاداری ونگ مجلس وحدت المسلمین لاہور و چیف کوآرڈینیٹر امن کمیٹی صدر ڈویژن ، سید عمار نقوی ممبر امن کمیٹی لاہور ڈویژن ، سید خرم نقوی ممبر ایگزیکٹو امن کمیٹی لاہور سید عارف حسین گیلانی سنئیر وائس چیئرمین صدر ڈویژن، اور ایس ڈی پی اوز و ایس ایچ اوز  صدر ڈویژن کے لائسنس ہولڈرز بانیان امام بارگاہ ، بانیان مجالس ممبران امن کمیٹی صدر ڈویژن نے شرکت کی۔

 اجلاس تلاوت قرآن پاک سے شروع ہوا اور آغاز میں آغا علی شیر نے اپنے خیالات کا اظہار کرتے ہوئے کہا کہ محرم الحرام کی آمد آمد ہے لہذا تمام مکاتب فکر کو امن بھائی چارے کا درس دینا ہوگا رواداری کو فروغ دینا ہوگا جہاں بھی عزاداری کے حوالے سے عزاداران کو کچھ مسئلے مسائل درپیش ہیں ان کی نشاندہی کریں انشاللہ جلد محرم سے پہلے ان کو حل کیا جائے گا عزاداری امام حسین علیہ السلام کے فروغ میں کسی بھی قسم کا قدغن برداشت نہیں کیا جائے گا اس موقع انہوں نے مزید کہا کہ میں ایس پی صدر سے گزارش کرونگا کہ تمام عزاداران کے مسائل کو ترجیحی بنیادوں پر حل فرمائیں جہاں پر بھی ضرورت پڑتی ہے مجلس وحدت مسلمین عزاداری ونگ آپ کے شانہ بشانہ کھڑی ہوگئی مجلس کے منشور کے مطابق انشاللہ ہم ایک لمحہ بھی اپنی عبادات میں خلل برداشت نہیں کرینگے علماء کرام ذاکرین عظام کو چاہیئے کہ اپنے خطابات میں امن بھائی چارے رواداری کا درس دیں ان کے علاؤہ سید عمار نقوی ،سید خرم نقوی اور سید عارف حسین گیلانی نے اپنے خیالات کا اظہار کرتے ہوئے کہا کہ ملک پاکستان لاالہ الااللہ محمد رسول اللہ کی بنیاد پر حاصل کیا گیا تھا اور اس میں تمام افراد کو اپنے مسلک و مذھب کے مطابق اپنی عبادات بجا لانے کا حق حاصل ہے ماسوائے قادیانی کے ہم اہل تشیع قوم ہمیشہ اداروں کے تحفظ اور ان کے احترام کو ملحوظ خاطر رکھتے ہیں مگر افسوس کہ گلی کی کسی نکڑ سے اٹھ کر کوئی درخواست دیتا ہے اور ہمارے مذہبی حقوق کو مجروح کرنے کی کوشش کی جاتی ہے حالانکہ کہ ہم نے ہمیشہ رواداری اور مذہبی ہم آہنگی کو فروغ دیا اور نفرتیں ختم کی۔

 آخر میں صدراتی خطاب کرتے ہوئے رائے وقار عظیم کھرل نے کہا کہ انشاللہ میں اپنی پیشہ ورانہ ذمہ داریاں نبھاتے ہوئے آپ کو پوری سیکورٹی مہیاء کرونگا اور میرا سٹاف ہمہ وقت آپ کے ساتھ پہلی صفوں میں تیار ہوگا ٹائمنگ کے حوالے سے پابندی کا خیال رکھیں اپنے مذہب کو چھوڑوں نہیں اور کسی کے مذہب کو چھیڑوں نہیں کی پالیسی پر گامزن رہیں انشاء اللہ جلد ممبران امن کمیٹی کے ساتھ ہر تھانہ کا روٹ وزٹ کیا جائے گا اور جو اس وقت کمی پیشی نظر آئی اس کو دور کیا جائے گا پنجاب پولیس آپ کے ساتھ آپکی محفاظ ہے آپ کی حفاظت میں کوتاہی نہیں برتی جائے گئی ممبران امن کمیٹی و علماء کرام عزاداران سربلندی اسلام ملک کے حفاظت میں اہم کردار ادا کر سکتے ہیں لہذا لوگوں میں امن آتشی کا درس دیا جائے۔

وحدت نیوز(پشاور)مجلس وحدت مسلمین خیبر پختونخواہ کے صوبائی صدر علامہ جہانزیب جعفری نے یونان میں کشتی حادثے پر گہرے دکھ کا اظہار کرتے ہوئے اسے قومی سانحہ قرار دیا ہے اور کہا ہے کہ ملک میں انسانی سمگلنگ گزشتہ کئی عشروں سے جارہی ہے، جس کا کوئی تدارک نہیں کیا جا سکا، حکمران طبقے کو ملک میں ڈالرز چاہیئں جسکی وجہ سے انسانی سمگلنگ روکنے کے لئے کوئی سخت قانون نہیں بنائے گئے اور نہ ہی اس سلسلے میں کوئی ٹھوس اقدامات اٹھائے گئے ہیں، بلکہ بنے ہوئے قوانین پر بھی عمل درآمد نہ ہونے کے برابر ہے۔ مجبور بے روزگار افراد زمین یا قرض لے کر غیر قانونی طریقے سے بیرونی ملک جاتے ہیں۔

انہوں نے کہا ہے کہ کئی بار سمندری حادثات کی وجہ سے ہزاروں جوانوں کی لاشیں پاکستان آئی مگر چند دن شور اور میڈیا کوریج کے بعد کوئی خاص ایکشن نہیں لیا جاتا، ہم حکومت وقت سے پرزور مطالبہ کرتے ہی کہ اپنے فائدے کے لئے جتنے قوانین بنائے ہیں ایک قانوں انسانی سمگلنگ روکنے کے لئے بنائیں جس سے غیر قانونی طور پر بیرونی ملک جانے والوں کا راستہ روکا جا سکے، مجبور لوگوں کی مجبوری سے فائدہ اٹھانے میں ملوث ملزمان کو قرار واقعی سزا دی جائے، تاکہ آئندہ کے لیے اس کا راستہ بند ہو سکے۔