وحدت نیوز(لاہور)سید حسن رضا کاظمی صوبائی جنرل سیکریٹری مجلس وحدت مسلمین پاکستان صوبہ پنجاب کی خصوصی دعوت پر علامہ سید احمد اقبال رضوی وائس چیئرمین مجلس وحدت مسلمین پاکستان اپنے وفد کے معزز اراکین سید اسد عباس نقوی مرکزی سیکریٹری سیاسیات ،سید آغا حسین شاہ زیدی صوبائی سیکریٹری سیاسیات ، برادر رانا کاظم کے ہمراہ امامیہ کالونی میں شب عاشور جلوس عزاء تشریف لائے ۔ کافی دیر تک وہ عزاداروں ، ماتمیوں اور امامیہ کالونی کے بانیان مجالس و جلوس کے ہمراہ رہے اور ماتم داری کرتے رہے ۔

عزاداروں نے علامہ صاحب اپنے درمیان پا کر اطمینان کا احساس کیا ۔ اور علامہ صاحب کی خدمت میں  شہدائے کربلا کے حضور پرسہ و تعزیت پیش کرتے رہے ۔ علامہ سید احمد اقبال رضوی نے کہا کہ اے عزادران حسینی آپ کے پاکیزہ جذبوں کو سلام ۔علامہ سید احمد اقبال رضوی نے شیعہ امامیہ بورڈ رجسٹرڈ کے رہنما علامہ وقارالحسنین نقوی سے ملاقات کی آخر میں علامہ صاحب سید حسن رضا کاظمی کے گھر پر تشریف لے گئے جہاں علاقے کی معروف اور معزز شخصیات کے لئے نیاز و لنگر حسینی کا اہتمام کیا گیا تھا ۔

وحدت نیوز(اسلام آباد)مسجد حضرت زہرا علی پور اسلام آباد میں منعقدہ عشرہ محرم کی مجالس سے خطاب کرتے ہوئے نوجوان عالم دین علامہ شیخ محمد جان حیدری نے فرمایا۔عصر حاضر میں نئی نسل خصوصا تعلیمی اداروں میں نسل نو مغربی تہذیب کی یلغار میں ہے پورے ملک میں پری پلان مغربی اقدار کو پروموٹ کیا جارہاہے۔کارٹون،ٹی وی ڈرامے،ٹاک شوز،پیکنک،کلچرل شو،کلچرل فیسٹول یہ سب اسی تہذیب کو مسلط کرنی کی سازش ہے۔اسلام دنیا میں سب سے زیادہ ترقی پسند اور ماڈرن دین ہے لیکن حدود اور قیود میں رہتے ہوئے۔امام خمینی رہ نے گورباچوف سے کہاتھا کہ روسی نظام کا طلسم بہت جلد ٹوٹ جائے گا۔سو ٹوٹ گیا۔آج دنیا میں سکولرزم کمیونزم سوشلزم ، کپٹلزم اور خصوصا مارکسزم کے نظام نے خاندانی زندگی کو تباہ کیاہے۔

انہوں نے مزید کہا کہ آج بے پدر نسل کی برمار ہے یورپ میں ایک رپورٹ کے مطابق امریکہ میں شرح طلاق دنیا کی کسی بھی ریاست کی نسبت سب سے زیادہ ہے فحاشیت اور عریانیت کے نتیجہ میں پیدا ہونے والے بچے بھی بہت زیادہ ہیں۔لہذا تعلیمی اداروں میں سٹوڈنٹس کو متوجہ ہونے کی ضرورت ہے اور اس شیطانی نظام کا مقابلہ کرناہے۔امام حسین علیہ السلام کا قیام اسی بے راہ روی پر مشتمل تہذیب کا مقابلہ کرناتھا۔ماڈرن جاھلانہ نظام تہذیب عصر حاضر کی یزیدیت ہے اس تہذیب کے کھوکھلے خاندانی نظام کے نتیجہ میں معاشرہ میں ابن زیاد اور یزید پیدا ہوتے ہیں لہذا ہر دور کے یزید سے مقابلہ کا نام کربلا ہے۔

وحدت نیوز(پشاور)مجلس وحدت مسلمین صوبہ خیبر پختونخواہ کے جنرل سیکریٹری شبیر حسین ساجدی نے کہا ہے کہ خار باجوڑ میں جمعیت علمائے اسلام کے کنوینشن پر دھماکے کی پرزور الفاظ میں مذمت کرتے ہیں، اللہ تعالیٰ جانبحق افراد کے لواحقین کو صبر جمیل اور زخمیوں کو شفاء نصیب کرے۔ اپنے ایک بیان میں انہوں نے کہا کہ مجلس وحدت مسلمین جانبحق اور زخمیوں کے غم میں برابر کی شریک ہے، آئی جی سے گزارش ہے کہ صوبے میں بڑھتی ہوئی دہشتگردی کے خلاف عملی اقدامات کریں۔ انہوں نے مزید کہا کہ کسی بھی سیاسی جماعت یا عوام کے خلاف دہشتگردی کی مذمت کرتے ہیں، دہشتگردوں کو ملک کے اندر کچلے بغیر امن و سکون اور تعمیر و ترقی ممکن نہیں ہے۔

انہوں نے کہا کہ ریاست کو اس حوالے سے سنجیدہ اقدامات اٹھانے ہونگے، دہشتگردوں کیخلاف روایتی اور غیر سنجیدہ آپریشن اور اقدامات سے دیر پا امن قائم کرنا ممکن نہیں۔ پی ڈی ایم اور اسٹیبلیشمنٹ جاتے جاتے ملک پر یہی ایک رحم کرے کہ دہشت گردوں کو گود سے اتار کر سختی سے نمٹنے کیلئے اقدات کریں کیونکہ دہشتگرد کسی شخصیت، پارٹی، گروہ، فرقے یا ملک کے دوست اور خیر خواہ نہیں ہوسکتے، جوکہ پی ڈی ایم کے سربراہ مولانا فضل الرحمان بہتر جانتے ہیں۔

وحدت نیوز(کراچی) مجلس وحدت مسلمین سندھ کے صدر علامہ باقر زیدی، علامہ صادق جعفری، علی حسین نقوی، چوہدری اظہر، زین رضا، رضی حیدر اور علامہ مبشر حسن نے ماہ محرم الحرام کے پہلے عشرہ میں کراچی سمیت سندھ بھر میں سندھ پولیس، سندھ رینجرز اور قانون نافذ کرنے والے دیگر اداروں کی کارکردگی کو سراہا۔ وحدت ہاؤس سے جاری اپنے بیان میں رہنماؤں نے یکم تا یوم عاشورہ عزاداری نواسہ رسول (ص) مولا حسینؑ و شہداء کربلا کی مجالس اور جلوس عزا  کے لئے فول پروف سیکورٹی اور سہولیات کی فراہمی پر سندھ حکومت، آئی جی سندھ پولیس غلام نبی میمن، ڈی جی رینجرز میجر جنرل اظہر وقاص اور کراچی پولیس چیف جاوید اوڈھو سمیت قانون نافذ کرنے والے تمام اداروں کی کوششوں کی قدر دانی کی۔ انہوں نے کہا کہ اس دفعہ بھی گذشتہ سالوں کی طرح سیکورٹی پہ مامور اداروں نے عشرہ محرم الحرام میں عزاداری امام حسین علیہ السلام کے لئے منعقد ہونے والی مجالس اور جلوس ہائے عزاء میں سیکوریٹی کے بہترین انتظامات کئے گئے تھے جس کی وجہ سے ملک بھر کی طرح سندھ بھر میں کوئی ناخشگور واقع پیش نہیں آیا۔ انہوں نے کہا کہ ایام عزاء کا سلسلہ محرم، صفر اور ربیع الاول تک جاری ہے، امید ہے کہ قانون نافذ کرنے والے ادارے ان ایام میں بھی عزاداری امام حسین علیہ السلام کے اجتماعات کے لئے اسی طرح اپنے فرائض کی ادائیگی انجام دیتے رہیں گے تاکہ سندھ بھر کے شہریوں کی جان و مال کے تحفظ کو یقینی بنایا جائے گا۔

رہنماؤں نے ٹریفک پولیس سمیت سول اداروں کا شکریہ ادا کرتے ہوئے شہری حکومت کے تعاون کو بھی سراہا اور کہا کہ نو منتخب میئر کراچی شہر میں باقی ماندہ کاموں کو جلد از جلد مکمل کروائیں تاکہ آئندہ دو ماہ تک جاری رہنے والے عزاداری سید الشہداء امام حسین علیہ السلام کے اجتماعات میں کسی قسم کی مشکلات کا سامنا نہ ہو۔ رہنماؤں نے سندھ بھر میں عوام کے باہمی تعاون اور اتحاد کو مثالی قرار دیتے ہوئے کہا کہ عشرہ محرم الحرام کے دوران سندھ بھر کے شہریوں نے بلا تفریق نواسہ رسول (ص) حضرت امام حسین علیہ السلام کی عزاداری میں اپنی شرکت کو یقینی بنایا اور سندھ بھر میں امن و محبت اور یکجہتی کے ساتھ تمام مسالک کا عزاداری اور سوگ منانا بہترین مثال ہے۔ انہوں نے تمام منتظمین اور اسکاوٹس رضاکاروں کا بھی شکریہ ادا کیا کہ جو دن و رات عزاداروں کی خدمت و حفاظت کرتے رہے۔ رہنماؤں نے باجوڑ میں جے یو آئی (ف) کے جلسے میں ہونے والی دہشتگردی کی مذمت کی واقع میں جاں بحق ہونے والے افراد کے اہل خانہ و جے یو ائی کے قائدین سے اظہار افسوس کرتے ہوئے دہشتگردی کی شدید مذمت کی۔

وحدت نیوز(اسلام آباد)وائس چیئرمین مجلس وحدت مسلمین پاکستان علامہ سید احمد اقبال رضوی نے باجوڑ دھماکے کی مذمت کرتے ہوئے، قیمتی جانوں کے ضیاع پر دکھ اور افسوس کا اظہار کیا ہے اور زخمیوں کی جلد صحت یابی کیلئے دعا کی ہے، انہوں نے کہا ہے کہ دہشت گرد کسی بھی رعایت کے مستحق نہیں، ان کے ساتھ آہنی ہاتھوں سے نمٹا جائے، خیبر پختونخواہ اور بلوچستان میں دہشت گردی کے مسلسل ہونے والے واقعات انتہائی تشویشناک ہیں، ملک دشمن عناصر کی بیخ کنی کے لیے صوبائی اور وفاقی حکومت سمیت سیکورٹی اداروں کو ٹھوس اقدامات کرنے چاہئیں، دہشت گردی میں ملوث مجرموں اور ان کے سرپرستوں کو گرفتار کر کے انہیں کیفرِ کردار تک پہنچانے میں کوئی کسر نہ اٹھا رکھی جائے۔

انہوں نے کہا کہ گزشتہ چار پانچ ماہ سے دہشت گردی کی وحشیانہ کاروائیاں جاری ہیں، جس کی زد میں سینکڑوں پولیس اہلکاروں سمیت کئی معصوم افراد کی جانیں جا چکی ہیں، کے پی کے کی موجودہ حکومت نگران کم اور پی ڈی ایم کی زیادہ ہے، اس حکومتی ٹولے کی جانب سے دہشت کے خلاف کارکردگی صفر ہے، اقتدار کو طول دینے کی کوششوں میں حکمرانوں نے عوام کو دہشت گردوں کے رحم و کرم پر چھوڑ دیا ہے، آج تک کسی ایک دہشت گرد کو بھی قانون کے کٹہرے میں لا کھڑا نہیں کیا گیا۔

علامہ احمد اقبال رضوی نے مزید کہاکہ ان دہشت گردوں کی نرسریوں کو سختی سے ختم کرنا ہوگا، محرم الحرام سے پہلے کرم پارہ چنار میں افغانستان سے بھاری ہتھیاروں سے حملے کیئے گئے، ان دل خراش اور جان لیوا واقعات پر موجودہ حکمرانوں میں سے کسی کے کان پر جوں تک نہیں رینگی، پشاور سمیت خیبر پختونخواہ کے کئی علاقوں میں کالعدم تنظیموں میں افراد شمولیت اختیار کر رہے ہیں لیکن ان کے خلاف کسی قسم کی کوئی کاروائی کا عمل میں نہ لایا جانا افسوس ناک ہے، ہمیں اچھے یا برے دہشت گردوں کی بحث سے نکل کر ٹھوس اور واضح کاروائی کے ساتھ ان انسان دشمن درندوں کا خاتمہ کرنا ہوگا۔

وحدت نیوز(اسلام آباد) چیئرمین مجلس وحدت مسلمین پاکستان علامہ راجہ ناصر عباس جعفری نے یوم عاشورہ کی مناسبت سے اپنے پیغام میں کہا ہے کہ یوم عاشور امام عالی مقام حضرت امام حسین علیہ السلام عظیم قربانی پوری انسانیت کے لیے حق وصداقت کا استعارہ بن گئی، کربلا ہمارے لیے ایک مدرسہ و مکتب ہے، ہمارے دکھوں کی دوا ہے، کربلا تمام مسائل و مشکلات کا حل ہے، کربلا ہمارے لیے اسوہ و نمونہ عمل ہے، کربلا کی یاد تمام انسانی فضیلتوں کی یاد ہے، عاشور کے دن امام حسین علیہ السلام اور آپ کے باوفا ساتھیوں نے تمام بشریت کی مسیحائی کی ہے، وہ تمام اقدار جو معاشرے میں مر چکی تھیں، لوگ دنیا و پیسے کے پیچھے لالچی ہو گئے تھے، مقام و منصب کے لیے مست ہو چکے تھے، بے وفا، خود غرض اور دھوکے باز ہو جانا، وفا کے بغیر انسانی معاشرہ نہیں رہتا، خود غرضیوں کا معاشرہ بن جاتا ہے، امام حسین علیہ السلام نے کربلا میں وفا جیسی عظیم قدر کو زندگی دی ہے دوبارہ سے وفا کو حیات بخشی ہے لوگ بزدل ہو گئے تھے، کربلا میں شجاعت کو زندگی بخشی گئی ہے، لوٹ و فساد کی جگہ کربلا والوں نے ایثار و فداکاری کو زندہ کیا، عشق خدا، قرآن اور بندگی کو زندہ کیا یعنی خدا کی بندگی کے سوا کسی کی بندگی نہیں۔

انہوں نے کہا کہ کربلا والوں کا غم منانا درحقیقت ان تمام انسانی فضیلتوں کا غم منانا ہے جنہیں پامال کیا گیا تھا، یہ خنجر امام کے گلے پر نہیں بلکہ کہ حق کے گلے پر چلا تھا، انسانی شرافت و وقار اور کرامت پر چھری چلی تھی یہ امام اور انکے باوفا اصحاب کی لاشیں پامال نہیں ہوئیں، بلکہ تمام دینی و انسانی فضیلتیں پامال کی گئی تھیں، ہم عزادار ہیں کیونکہ کہ انسانی وقار اور حق کا گلا کاٹ دیا گیا ہے, ہم ماتمی اور سیاہ پوش اس لیے ہیں کہ حق کو روندہ گیا، امام حسین علیہ السلام تمام دینی و انسانی فضیلتوں اور اقدار کا مجسم نمونہ تھے، غیرت و حمیت جیسی عظیم اقدار کی آبیاری مولا حسین علیہ السلام اور آپ کے باوفا اصحاب ع نے اپنے پاکیزہ خون سے کی ہے۔