وحدت نیوز(اسلام آباد)پاکستان میں تعینات فلسطین کے سفیر احمد جواد امین ربیعی سے ممبران گلگت بلتستان کونسل ایوب شاہ،شیخ احمد علی نوری (صوبائی پولیٹیکل سیکریٹری ایم ڈبلیوایم)اور سید شبیہ الحسنین نے ملاقات کی۔اس موقع پر ممبران جی بی کونسل نے حالیہ اسرائیلی دہشتگردی کے شکار مظلوم فلسطینیوں کے ساتھ اظہار یکجہتی کرتے ہوئے کہا پوری امت مسلمہ فلسطینی مسلمان بھائیوں کے ساتھ کھڑی ہے۔فلسطین میں بیہیمانہ جارحیت کی شدید مذمت کرتے ہوئے ممبران جی بی کونسل نے کہا کہ اسرائیل کی غیر قانونی اور غیر انسانی جارحیت کسی طور قابلِ قبول نہیں ہے۔گلگت بلتستان کے عوام کے دل بھی فلسطینی عوام کے ساتھ دھڑکتے ہیں۔مشکل کی اس گھڑی میں فلسطینی عوام کی ہمت حوصلے اور جذبے کو سلام پیش کرتے ہیں۔

انہوں نے کہا کہ ہم اسرائیل کی بےگناہ فلسطینی عوام پر مظالم کی مذمت کرتے ہیں اور اقوام متحدہ سے مطالبہ کرتے ہیں کہ فوری جنگ بندی کے لئے اقدامات اٹھائے۔انہوں نے مزید کہا کہ فلسطینی مجاہدین کے عزم و حوصلے بلند ہیں اور وہ دن دور نہیں جب اسرائیل کو عبرتناک شکست دے کر فلسطینی اپنی سرزمین واپس لیں گے اور پاکستانی مسلمانوں سمیت تمام دنیا کے مسلمان قبلہ اول مسجد اقصی میں باجماعت نماز اداء کریں گے۔فلسطینی سفیر نے فلسطینی عوام سے اظہار یکجہتی پر ممبران جی بی کونسل کا شکریہ ادا کیا۔فلسطینی سفیر نے ممبران جی بی کونسل اور گلگت بلتستان کے عوام کی جانب سے فلسطینی عوام کے لیے جذبات اور احساسات کے اظہار کو سراہا۔

وحدت نیوز(اسلام آباد)وفاقی سیکریٹری کشمیر افیئرز و گلگت بلتستان جواد رفیق ملک سے چیئرمین قائمہ کمیٹی گلگت بلتستان کونسل ایوب شاہ کی سربراہی میں اراکین جی بی کونسل شیخ احمد علی نوری ،اقبال نصیر ،سید شبیہہ الحسنین، عبدالرحمن اور حشمت اللہ نے ملاقات کی۔ملاقات میں اراکین کونسل نے جواد رفیق ملک کو سیکریٹری امور کشمیر و گلگت بلتستان کے قلمدان سنبھالنے پر مبارکباد پیش کی اور نیک خواہشات کا اظہار کیا۔اس موقع پر گلگت بلتستان کے مختلف ایشوز پر تبادلہ خیال کرتے ہوئے اراکین کونسل نے پی ایس ڈی پی کے پروجیکٹس کے ٹینڈرز میں بار بار تاخیر پر سخت تشویش کا اظہار کیا اور مطالبہ کیا کہ پی ایس ڈی پی کے پروجیکٹس شغرتھنگ استور روڈ،غواڑی پاور پراجیکٹ اور دیگر پی ایس ڈی پی کے پروجیکٹس پر ہنگامی بنیادوں پر کام شروع کروائے۔

اراکین کونسل نے اس بات پر بھی زور دیا کہ اراکین کونسل کے ترقیاتی  بجٹ کو  فوری طور پر ریلیز کرنے کیلئے سیکرٹری امور کشمیر و گلگت بلتستان اپنا کردار ادا کرے۔اس موقع پر سیکرٹری امور و کشمیر و گلگت بلتستان جواد رفیق ملک نے اراکین کونسل کا شکریہ ادا کرتے ہوئے کہا کہ وفاقی حکومت کی جانب سے گلگت بلتستان کے پی ایس ڈی پی کے پروجیکٹس پر ہنگامی بنیادوں پر کام شروع کروانے اور اراکین کونسل کے ترقیاتی بجٹ کے فوری ریلیز کے لئے جلد ہی نگران وزیراعظم انور الحق کاکڑ سے ملاقات کر کے انشاء اللہ جلد پیشرفت ہوگی ساتھ ہی انہوں نے اس عزم کا اظہار کیا کہ گلگت بلتستان کی تعمیر و ترقی کے لیے ارکین کونسل کے ساتھ ہر ممکن تعاون ہوگی۔

وحدت نیوز(کراچی)مجلس وحدت مسلمین اور دعا کمیٹی کی جانب سے شہدائے فلسطین کی یاد میں محفل شاہ خراساں روڈ پر دعائیہ اجتماع و شمع روشن کی گئیں ۔جس میں رہنما ایم ڈبلیو ایم علامہ ملک غلام عباس نے شہدائے فلسطین اور زخمیوں کی جلد از جلد صیحیابی کیلئے خصوصی دعا کرائی۔بعد ختم دعا شہدائے حماس، حزب اللہ اور بے گناہ فلسطینی عوام و مجاہدین کو خراج عقیدت پیش کرنے کیلئے شمع روشن کی گئی جس میں مختلف سیاسی و مذہبی جماعتوں کے رہنماوں سمیت سماجی تنظیموں کی ذمہ داران نے فلسطینیوں سے اظہار یکجہتی کرتے ہوئے شمع روشن کی اسرائیلی مظالم کے خلاف نعرے بازی کی۔

شرکاء سے خطاب میں صوبائی رہنما ایم ڈبلیوایم سید علی حسین نقوی کا کہنا تھا کہ فلسطینی عوام پناہ گزین کیمپوں میں بھی محفوظ نہیں مساجد، چرچ، اسپتالوں، پناہ گزین کیمپوں سمیت رہائشی عمارتوں پر صہیونی افواج کی جانب سے وحشانہ بمباری جاری ہے امریکہ،برطانیہ،فرانس نے اسرائیل کی کھلی مدد کی ایسی طرح مسلم ممالک مظلوم فلسطینیوں کا ساتھ دیں۔مسلم ممالک صہیونی ریاست کاسیاسی، سفارتی، سماجی، معاشی بائیکاٹ کریں اسرائیلی جرائم میں امریکا میں برابر کا شریک ہے ملک سے امریکی سفیر کو بے دخل کرنے کا مطالبہ کرتے ہیں اور مسلم ممالک سے بھی اپیل کرتے کہ وہ بھی اپنے ملکوں سے امریکی سفارتخانے ختم کریں۔اور حکومت پاکستان اسرائیل جارحیت کے خلاف عالمی عدالت میں مقدمہ قائم کروائے۔

انہوں نے کہا کہ قوام متحدہ،عالمی برادری غزہ جانے والی انسانی امداد کی رسائی ممکن بنائیں۔تقریب میں جمیعت اہل حدیث کے رہنما غلام مرتضی خان رحمانی،ہاکستان تحریک انصاف کے رہنما سلیم سچوانی۔پاکستان عوامی تحریک کے رہنما شفقت علی ،مجلس وحدت مسلمین کے رہنما سجاد شبیر رضوی، ناصر الحسینی  سمیت دیگر موجود تھے۔

وحدت نیوز(اسلام آباد)چیئرمین مجلس وحدت مسلمین پاکستان علامہ راجہ ناصر عباس جعفری نے میڈیا سیل سے جاری اپنے بیان میں کہا ہے کہ فلسطینی عوام کی استقامت نے اسرائیلی گھمنڈ کو خاک میں ملا دیا ہے، غزہ میں داخل ہونے اسرائیلی فورسز کا خواب چکنا چور ہو چکا، شوق شہادت سے لبریز فلسطینی جوانوں نے غاصب صہیونی ریاست کو ناکوں چنے چبوا دیئے، سترہ روزہ بارود کی بارش کے باوجود اسرائیلی فورسز غزہ میں داخل ہونے کی جرأت نہیں کر پا رہیں، امریکی بیساکھیوں کے بغیر اسرائیل کی بزدل افواج اپنے مرکاوہ ٹینک چھوڑ کر بھاگنے پر مجبور نظر آتی ہے، شجاع فلسطینیوں نے بہادری اور جانبازی کی نئی مثال قائم کردی ہے، اسرائیل کے ناقابل شکست ہونے کے گھمنڈ کو خاک میں ملا دیا ہے، فاتح خیبر و خندق کے ماننے والوں کے حملوں کی اسرائیل تاب نہیں لا سکا، اپنی سبکی کا بدلہ وہ اسپتال، مساجد، چرچ اور پناہ گزین کیمپوں پر سفاکانہ اور غیر انسانی حملوں کی صورت میں لے رہا ہے، انسانی حقوق کی علمبردار تنظیمیں اس ظلم وبربریت پر خاموش تماشائی بنی ہوئی ہیں، اقوام متحدہ اور او آئی سی غزہ پر اسرائیلی درندگی کو رکوانے میں مکمل ناکام ہیں۔

انہوں نے کہا کہ جس طرح یہود ونصاریٰ اسرائیلی مظالم کی پشت پناہی کر رہے ہیں اسی طرح مسلم دنیا سے بھی واضح اور جرآت مندانہ پیغام اسرائیل کو جانا  چاہیے، پوری دنیا میں آزادی خواہ اور انسانیت کا درد رکھنے والے لاکھوں افراد اپنے ممالک میں احتجاج کر کے فلسطین کے معصوم بچوں اور خواتین کے ساتھ اظہار یکجہتی کر رہے ہیں، تمام اہل درد اقوام فلسطینیوں کی نسل کشی پر سراپا احتجاج ہیں، آج غزہ کے مظلومین جہاں پوری دنیا کے منصفوں کی طرف دیکھ رہے ہیں وہاں پاکستان کی طرف بھی امید بھری نظریں لگائے ہوئے ہیں، پاکستان سمیت پوری مسلم ورلڈ کی جانب سے اسرائیلی کے درندہ صفت حکمرانوں کو سخت اور دو ٹوک پیغام جانا چاہیے کہ غزہ میں غیر انسانی مظالم کو فی الفور روک دے، مسلم دنیا کی یک زبان ہو کر ایک دھمکی اسرائیلی حکومت برداشت نہیں کر سکے گی اور خونخوار ریاست خس وخاشاک کی طرح بہہ جائے گی۔

وحدت نیوز(اسلام آباد)مجلس علماء مکتب اہلبیت پاکستان کے مرکزی صدر علامہ سید حسنین عباس گردیزی نے اپنے بیان میں کہا ہے کہ مظلوم فلسطینیوں کے قتل عام پر مسلم امہ کی خاموشی شرمناک ہے، اس غارت گری کے جس طرح مغربی ممالک ذمہ دار ہیں اسی طرح مسلم دنیا بھی تماشائی کا کردار ادا کر رہی ہے، آج اگر فلسطینیوں کی نسل کشی پر مجرمانہ خاموشی اختیار کی جا رہی ہے تو کل کو کشمیر میں بھی ہندوستان کی جانب سے عام شہریوں پر ظلم وبربریت کے خلاف آواز اٹھانا بے معنی سا ہو جائے گا، آج فلسطینی عوام پر دن رات ظلم و استبداد کے پہاڑ توڑے جا رہے ہیں، جنہیں روکنا ہر انسانیت سے ہمدردی رکھنے والے افراد کا فریضہ ہے۔

انہوں نے کہا کہ اسرائیل کو وحشیانہ کارروائیوں کی کھلی چھٹی دے دی گئی ہے، صیہونی ریاست امریکی پشت پناہی اور مغربی ممالک کی ایماء پر غزہ میں دن رات بے رحمی سے بمباری کر رہا ہے، مائیں اپنے بچوں کے ہاتھوں پر نام لکھ رہی ہیں کہ اچانک بمباری میں شہید ہونے والوں کی پہچان ممکن ہو سکے، اسرائیل کے غیر انسانی سلوک کو روکنے کی بجائے الٹا اسے امریکہ کی طرف سے شہہ دی جا رہی ہے جس کی بدولت اسرائیل مسلسل جنگی جرائم کا مرتکب ہو رہا ہے اور اسپتالوں، سکولز اور مساجد کو نشانہ بنا کر یو این کے چارٹر کی کھلم کھلا خلاف ورزی کی جارہی ہے جسے اسلامی دنیا اور عرب ممالک کو آگے بڑھ کر بازور بازو روکنا  ہو گی ۔

وحدت نیوز(اسلام آباد)چیئرمین مجلس وحدت مسلمین پاکستان علامہ راجہ ناصر عباس جعفری نے ولادت باسعادت حضرت امام حسن عسکری علیہ السّلام کے پر مسرت موقع تمام محبان محمد و آل محمد علیہم السلام کی خدمت میں مبارکباد پیش کرتے ہوئے کہا ہے کہ آپ کا جلال و ہیبت اس قدر تھا کہ دلوں کو آپ کی نورانیت اور ملکوتی چہرہ کے سامنے خاضع کر دیتا تھا، آپ کے چاہنے والوں کے ساتھ ساتھ مخالفین بھی احترام کرنے پر مجبور نظر آتے تھے، آپ نے اپنے جدِ امجد کی طرح علم و حکمت کے سلسلے کو تمام تر مشکلات اور سختیوں کے باوجود جاری رکھا، بے شک آپ کا علم منبع وحی سے ماخوذ تھا جو اس قدر وسیع تھا کہ بیان کے دائرے میں نہیں سماتا، آپ دیگر ائمہ اطہار ع کی طرح وقت کے تقاضوں کے مطابق فرائض امامت ادا کرتے رہے اور امت مسلمہ کی ہدایت و رہنمائی میں مکمل طور پر سرگرم عمل رہے،انہوں نے کہا کہ حضرت امام حسن عسکری علیہ السّلام نے جہاں مسلمانوں کے دینی و اعتقادی مسائل کو حل کرنے کا فریضہ انجام دیا وہاں آپ معاشرتی اور معاشی مسائل کو حل کرنے کے لیے بھی مسلسل کوشاں رہے، آپ ع کی حیات طیبہ خدائے مہربان سے انس و محبت اور صبر و شکر کا اعلی نمونہ تھی، جب کبھی حکومت وقت کی طرف سے مومنین و مسلمین کے لئے ایسی مشکلات اور مسائل پیش آتے تھے کہ انہیں صرف امام حسن عسکری ہی حل کر سکتے تھے، تو اس موقع پر امام معصوم اپنے علمِ امامت اور حیرت انگیز تدبیر و کمالات کے ذریعے سخت ترین مشکل کو حل کر دیتے تھے۔