وحدت نیوز(سکردو) مجلس وحدت مسلمین پاکستان کے گلگت بلتستان کے سیکریٹری جنرل آغا علی رضوی نے اپنے ایک بیان میں کہا ہے کہ گلگت بلتستان کے عوام پاکستان کی نظریاتی و جغرافیائی سرحدوں کے محافظ ہیں۔ کلمہ لا الہ الا اللہ کی بنیاد پر اسی عوام نے ڈوگرہ راج کو مار بھگایا تھا اور اس خطے کو آزاد کرایا تھا۔ یہاں کے عوام کی 70 سالہ جدوجہد پاکستان کا آئینی حصہ بننے کے لیے تھا۔ گلگت بلتستان کے عوام سے بڑھ کر کسی اور نے پاکستان کی سالمیت کے لئے قربانی نہیں دی۔

انہوں نے کہاکہ معرکہ کارگل میں یہاں کے عوام نے جو قربانی دی وہ تاریخ کا روشن باب ہے۔ یہاں کے سپوت ہی تھے جنہوں نے معرکہ کارگل میں انڈیا کو ناکوں چنے چبوائے تھا۔ گلگت بلتستان کے عوام کو حب الوطنی کے سرٹیفکیٹ کسی سے نہیں لینا اور نہ ہی ریاستی اداروں بالخصوص پاکستان آرمی کو اس خطے میں کمزور ہونے دینا ہے۔ یہاں کے عوام پاک فوج اور تمام ریاستی اداروں کے شانہ بشانہ کھڑی ہے۔ یہاں کے عوام پاکستان کی سالمیت کے لئے ہر طرح کی قربانی کے لئے تیار ہے۔

 آغا علی رضوی نے مزید کہا کہ منفی طاقتوں کا بیانیہ گلگت بلتستان کے عوام کی امنگوں کے برعکس ہے اور گلگت بلتستان میں اس سمیت دیگر ملک مخالف بیانیے کو جس سے وطن عزیز پاکستان کی سالمیت کے اداروں کو نقصان پہنچتا ہو ہم یکسرمسترد کرتے ہیں۔ ہم ہندوستان سمیت امریکہ و اسرائیل اور دیگر عالمی طاقتوں کو یہ پیغام دینا چاہیں گے کہ تم لاکھ کوششیں کرو نہ سی پیک جیسا گیم چینجر فارمولا جس سے گلگت بلتستان اور پاکستان کی تقدیر بدلنا ہے کو نقصان پہنچانے دیں گے اور نہ ہی پاکستان کی سالمیت پر آنچ آنے دیں گے۔

وحدت نیوز (اسلام آباد) مجلس وحدت مسلمین پاکستان کے سربراہ علامہ راجہ ناصرعباس جعفری نے معروف عالم دین ، خطیب اہل بیت ؑ  علامہ سید حسن ظفرنقوی کی والدہ محترمہ کے سانحہ ارتحال پر دلی رنج وغم وافسوس کا اظہار کیاہے۔ علامہ حسن ظفر نقوی سےکوئٹہ سے ٹیلیفونک گفتگو کرتے ہوئے انہوں نے کہاکہ مرحومہ ایک عظیم عالم کی بیٹی ،ایک حکیم عالم کی بہن اور ایک عالم  دین کی والدہ تھیں ، مرحومہ نے دینی ماحول میں اپنے فرزندوں کی تربیت کی ۔

انہوں نے کہاکہ دنیا میں ماں سے زیادہ عظیم ہستی کوئی نہیں،جس کی دعاؤں کے سہارے انسان ہر آفت وبلا سے محفوظ رہتا ہے، ماں کاوجود ایک گھنے سایہ دار درخت کی مانند ہوتا ہے، ایک ماں کی جدائی ایک فرد نہیں بلکہ پورے گھرانے کیلئے عظیم صدمہ ہوتا ہے، دکھ کی اس گھڑی میں آقائے حسن ظفر اور تمام پسماندگان کے غم میں برابر کا شریک ہوں۔

انہوں نے خداوند متعال کی بارگاہ میں دعا کی کہ وہ مرحومہ کی مغفرت فرمائے ، انہیں جوار آئمہ معصومینؑ میں محشورفرمائے ، تمام پسماندگان کو اپنی بارگاہ سے صابرین کا اجر عظیم مرحمت فرمائے ۔دوسری جانب ایم ڈبلیوایم کے مرکزی ڈپٹی سیکریٹری جنرل علامہ سید احمد اقبال رضوی، سید ناصرشیرازی، علامہ مختارامامی، علامہ اعجازبہشتی، علامہ مبارک موسوی، علامہ شبیر بخاری، اسدعباس نقوی، ملک اقرارحسین، نثار فیضی، علامہ اقبال بہشتی سمیت تمام مرکزی ، صوبائی  وضلعی عہدیداران نے علامہ حسن ظفرنقوی کی والدہ محترمہ کی رحلت پر افسوس وتعزیت کا اظہاکیا ہے۔

وحدت نیوز(سکردو)صوبائی وزیر زراعت کاظم میثم کی نادرا ریجنل آفس آمد پر ریجنل ڈپٹی ڈائریکٹر نادرا اکبر شگری نے انکا خیرمقدم کیا۔ اس موقع پر صوبائی وزیر زراعت نے کہا کہ حلقہ نمبر دو کے عوام کو شناختی کارڈ اور ب فارم بنانے میں بڑی مشکلات پیش آتی ہیں لہذا ان مسائل کو مد نظر رکھتے ہوئے گمبہ سکردو میں نادرا آفس کا قیام فوری طور پر عمل میں لایا جائے تاکہ دور دراز سے آنے والوں کے لئے مشکلات میں کمی کے ساتھ ساتھ ریجنل آفس پر بھی بوجھ کم ہو۔اس موقع پر ڈپٹی ڈائریکٹر نادرا اکبر شگری نے کہا کہ نادرا گمبہ سکردو میں آفس کھولنے پر آمادہ ہے تاہم مرکز سے اپرول کی ضرورت ہے۔اس سلسلے میں ہم یہاں پہ کردار ادا کریں گے۔

صوبائی وزیر زراعت نے مزید کہا کہ حلقے کے عوام کی مسائل کے حل کے لیے ہر ممکن تعاون کے لیے آمادہ ہے اور اس سال کے شروعات میں ہی تحصیل گمبہ سکردو نادرا آفس فعال ہونا چاہیے۔ اکبر شگری نے کہا کہ اپنی ریکمنڈیشن کو فوری طور پر ہیڈکوارٹر بھیجا جائے گا اور سال کے شروعات میں ہی آفس کھولنے کی کوشش کی جائے گی۔

وحدت نیوز (کراچی) شہر قائدمیں مجلس وحدت مسلمین کا مچھ سانحہ کے خلاف احتجاجی دھرنے تیسرے روزبھی جاری ہے،کراچی مچھ سانحہ ورثاء سے اظہار یکجہتی کیلئے 20سے زیادہ مقامات احتجاجی دھرنے جای ہیں۔احتجاج دھرنے میں پی پی پی،ایم کیو ایم،پی ایس پی،مسلم لیگ ن سمیت دیگر ر سیاسی و مذہبی جماعتوں کے رہنماوں کی شرکت کی اور ورثاء شہدائے سانحہ مچھ سے اظہار یکجہتی کیا۔

نمائش چورنگی مرکزی احتجاجی دھرنے سے خطاب میں مجلس وحدتِ مسلمین سندھ کے سیکرٹری جنرل علامہ باقر عباس زیدی نے کہا ہے کہ ہزارہ کمیونٹی کے شہداء کے اہل خانہ سے اظہار یکجہتی کے لیے پورے ملک میں اس وقت تک پُرامن دھرنے جاری رہیں گے جب تک ورثاء کی طرف سے خود دھرنے کے خاتمے اور لاشوں کی تدفین کا اعلان نہیں کیا جاتا۔ انہوں نے کہا کہ دھرنے کے خاتمے کا منفی پروپیگنڈہ ان عناصر کی کارستانی ہے جن کی ساری ہمدردیاں قاتلوں کے ساتھ ہیں۔عوام ایسی گمراہ کن اطلاعات پر کان نہ دھریں۔

انہوں نے کہا ملت تشیع ایک منظم اور مہذب قوم ہے جو انسانیت کا احترام کرنا جانتی ہے۔کسی بھی شہر میں دیے گئے دھرنے کسی ایمبولینس یا مریض کی راہ میں رکاوٹ نہیں بنے۔بعض شہروں میں دھرنوں کے دوران اشتعال انگیز واقعات کا بیان کیا جانا غیر حقیقی اور خود ساختہ ہے۔عوام کو من گھڑت خبروں کے ذریعے گمراہ کرنا پیشہ وارانہ فرائض کے منافی اور افسوسناک ہے۔

انہوں نے کہا ملت تشیع کے اعلی کردار کو ماضی میں بھی عالمی ذرائع نے سراہتے ہوئے کہا کہ طویل دھرنوں کے دوران اس قوم نے کسی ایک پتے کو بھی نقصان نہیں پہنچایا۔ انہوں نے کہا کہ وزیر اعظم کے کوئٹہ جانے میں جتنی زیادہ تاخیرہوتی جائے گا مسائل اتنے ہی زیادہ پیچیدہ اور سنگین ہوتے جائیں گے۔پی ڈی ایم میں شامل جماعتیں کوئٹہ دھرنے کے شرکاء سے اظہار یکجہتی کے لیے پہنچ گئی ہیں لیکن وزیر اعظم ابھی تک شش و پنج میں مبتلا ہیں۔ حکومت یہ بات ذہن نشین کر لے کہ کوئٹہ دھرنے میں وزیر اعظم کی آمد کے بغیر مسائل جوں کے توں رہیں گے۔حکومت ان خاندانوں کے مطالبات تسلیم کرے جو اپنے پیاروں کی لاشیں لے کر سڑکوں پر منفی سات کی شدید سردی میں بیٹھے ہوئے ہیں۔

نمائش چورنگی احتجاجی دھرنے میں پاکستان پیپلز پارٹی کے رہنما صوبائی وزیر ناصر حسین شاہ،شہلا رضا،سعید غنی،وقار مہدی،ایم کیو ایم رہنما کشور زہرا،پاک سرزمین پارٹی کے وائس چیئر مین شبیر قائم خانی،ڈاکٹر ارشد وہرا،قمر نقوی،جعفر الحسن،نجم مرزا،فرحان خان،دلاو رانصاری  نے خطاب کرتے ہوئے متاثرین سے تعزیت اور حکومت سے قاتلوں کی گرفتاری کا مطالبہ کیا۔ دریں اثناء شہر قائد میں جاری دھرنوں میں ایم ڈبلیو ایم رہنماؤں بشول علی حسین نقوی،علامہ علی انور جعفری،علامہ صادق جعفری،علامہ مبشر حسن،علامہ اظہر نقوی،علامہ نشان حیدر،علامہ گلزار شاہدی،،علامہ غلام محمد فاضلی، یعقوب الحسینی،ناصر الحسینی،زین رضا،احسن عباس سمیت دیگر رہنماؤں نے خطاب کرتے ہوئے دہشتگردی کی مذمت کرتے ہوئے قاتلوں کی گرفتاری اور وزیر اعظم کو ورثا نے شہداء مچھ کی قہاں جا کرداد رسی کریں اور ان کے مطالبات کو منظوری کی جائے۔