وحدت نیوز(لاہور) پاکستان عوامی تحریک کے سربراہ ڈاکٹر طاہرالقادری کا لاہور میں نیوز کانفرنس سے خطاب میں کہنا تھا کہ 17 جنوری سے پنجاب حکومت کیخلاف ملک گیر احتجاج ہوگا، اس سلسلے میں احتجاج کا طریقہ کار طے کرنے کیلئے ایک ایکشن کمیٹی بھی بنا دی گئی ہے،آل پارٹیز کانفرنس کے نتیجے میں بنے والی سٹیرنگ کمیٹی اپنی جگہ قائم رہے گی، مجلس وحدت مسلمین کے مرکزی ڈپٹی سیکریٹری جنرل سید ناصرعباس شیرازی سٹیرنگ کمیٹی سمیت ایکشن کمیٹی کے رکن بھی نامزد  ہوگئے ہیں،ایکشن کمیٹی کا پہلا اجلاس 11 جنوری کو ہوگا، جو فیصلہ کرے گی اس احتجاج کا طریقہ کار کیا ہوگا۔ ڈاکٹر طاہر القادری کا کہنا تھا کہ ہم استعفی مانگیں گے نہیں بلکہ لے گے، دباﺅ کیساتھ لیں گے، اب صرف ہم شہباز شریف، رانا ثنااللہ اور دیگر کے استعفے نہیں بلکہ پورے ملک میں جہاں، جہاں ان کی حکومت قائم ہے، وہاں سے ان کا حکومت کا خاتمہ ہوگا، ہمارے پاس سارے آپشن کھلے ہیں، ہم کسی بھی حد تک جائیں گے۔ انہوں نے کہا حکمرانوں کو ماڈل ٹاﺅن کے شہدا کے خون، ملک میں قتل و غارت اور لوٹ مار کا حساب دینا ہوگا، ان کے گریبان ہوں گے اور عوام کے ہاتھ ہوں گے۔ ڈاکٹر طاہر القادری کا کہنا حکمرانوں کو ختم نبوت(ص) کے قانون میں ترمیم کرنیوالوں کو بھی سامنے لانا ہوگا، وہ ابھی تک ان کی صفوں میں موجود ہیں۔ پاکستان عوامی تحریک کے سربراہ کا کہنا تھا کہ آل پارٹیز کانفرنس کے نتیجے میں بننے والی سٹیرنگ کمیٹی اپنی جگہ پر قائم ہے، آج ہم نے ایکشن کمیٹی بنا دی ہے جس میں تمام جماعتوں کے نمائندے شامل ہیں۔

انہوں نے بتایا کہ ایکشن کمیٹی میں مجلس وحدت مسلمین کی جانب سے ناصر شیرازی، پاکستان پیپلز پارٹی کی جانب سے قمر زمان کائرہ، پی ٹی آئی کی طرف سے عبدالعلیم خان، عوامی مسلم لیگ کے سربراہ شیخ رشید، مسلم لیگ (ق) سے کامل علی آغا، پی اے ٹی کے خرم نواز گنڈا پور شامل ہوں گے۔ ڈاکٹر طاہر القادری کا کہنا تھا کہ اس کمیٹی کا کام یہ ہوگا کہ وہ احتجاج کے تمام امور دیکھے گی، اس کمیٹی کے پاس یہ اختیارات بھی ہوں گے کہ کبھی بھی سٹیرنگ کمیٹی کا اجلاس بھی بلا سکتے ہیں، 17 جنوری کے احتجاج میں شرکت کیلئے آصف زرداری، عمران خان، سراج الحق، چودھری شجاعت حسین سمیت تمام اپوزیشن جماعتوں کے سربراہان کو دعوت دی گئی ہے۔ قبل ازیں ڈاکٹر طاہرالقادری سے پاکستان تحریک انصاف کے رہنما جہانگیر ترین، پیپلز پارٹی کے میاں منظور احمد وٹو، سنی اتحاد کونسل کے سربراہ صاحبزادہ حامد رضا اور پاکستان عوامی مسلم لیگ کے سربراہ شیخ رشید احمد نے ملاقات کی۔ ملاقاتوں میں ملک کی سیاسی صورتحال، احتجاجی تحریک اور دیگر امور پر تبادلہ خیال کیا گیا۔

وحدت نیوز(کوئٹہ) مجلسِ وحدت مسلمین شعبہ خواتین کوئٹہ ڈویژن کی ایک اہم نشست ایم ڈبلیوایم کے ممبر صوبائی اسمبلی آغا رضا کے ساتھ ہوئی۔جسمیں خصوصیت کیساتھ آغا رضا نے صوبہ بلوچستان اور ملک کے سیاسی حالات و واقعات پر تفصیلی روشنی ڈالی اور آئیندہ آنے والے الیکشن کے حوالے سے لائحہ عمل اور پری الیکشن تیاری کے آغاز کے حوالے سے گفتگو کی۔

وحدت نیوز(کراچی) مجلسِ وحدت مسلمین شعبہ خواتین کراچی ضلع ملیر کی جانب سے اہلِ علاقہ کے لئے ولادتِ امام حسن عسکری ع کی مناسبت سے میلاد کا اہتمام کیا گیا، جس سے مجلسِ وحدت مسلمین شعبہ خواتین پاکستان کی مرکزی جنرل سیکرٹری محترمہ زہرہ نقوی نے خطاب کیا اور زندگانی و سیرتِ امام حسن عسکری ع پہ تفصیلی روشنی ڈالی ۔انہوں نے کہاکہ معاشرتی انحطاط کا مقابلہ سیرت آئمہ معصومین ؑ کی پیروی سے ہی ممکن ہے، خواتین اچھے گھر کی تربیت کریں تاکہ ایک اچھے معاشرے کا قیام عمل میں آئے ۔

وحدت نیوز (لاہور) مجلس وحدت مسلمین پاکستان کے مرکزی رہنما علامہ اعجاز حسین بہشتی نے اپنے تنظیمی دورہ لاہور پر گرین ٹاون میں عمائدین شہر سے خطاب کرتے ہوئے کہاکہ ملت جعفریہ کو درپیش مشکلات اور چیلنجز کا مقابلہ کرنے کے لئے اس غیور قوم کو متحد ہونا ہوگا،آج گلگت بلتستان سے لے کر بلوچستان تک ملت تشیع افتخار و سربلندی کیساتھ مظلومین وطن کی آواز بن کر سامراجی قوتوں اور ظالموں کیخلاف سینہ سپر ہے،آج شہید قائد علامہ عارف حسین حسینی کی روح شاد ہونگے،ہمیں خانقاہوں میں بیٹھ کر مظلوموں کے مدد گاروں پر سنگ ریزی نہیں کرنا بلکہ اس قافلہ عشق میں شامل ہوکر ملت کے مظلوموں اور یتیمان آل محمدؑ کا مدد گار بننا ہے،وقت کا تقاضہ ہے کہ ہم میداں عمل میں اتریں اور اپنی ذمہ داری کو عین شرعی و دینی ذمہ داری سمجھ کر ملک و قوم کے لئے ادا کرے،تاکہ بروز محشر ہم اپنے آئمہ طاہرینؑ کے سامنے شرمندہ نہ ہوں۔

وحدت نیوز (مظفرگڑھ) مجلس وحدت مسلمین جنوبی پنجاب کے قائمقام سیکرٹری جنرل سلیم عباس صدیقی نے کہا ہے کہ ٹرمپ کی امن دشمن پالیسی سے پورے دنیا کا امن خطرے میں پڑگیا ہے، پاکستان نے دنیا کے امن کی خاطر 70ہزار سے زائد قربانیاں دیں، جس کی قدر کی جانی چاہئے، ہم پاک فوج کے ٹرمپ کے بیان کے بروقت جواب کو خراج تحسین پیش کرتے ہیں، لیکن اس بات کا افسوس بھی ہے کہ جو لوگ وزارت خارجہ سنبھالے ہوئے ہیں ان کے منہ سے ایک لفظ بھی نہیں نکلتا۔ ہونا تو یہ چاہئے تھا کہ وزارت خارجہ فورا ٹرمپ کے بیان پر ردعمل دیتے لیکن لگتا ہے کہ ان نااہل حکمرانوں کے ذاتی مفادات امریکہ سے وابسطہ ہیں، جس کی وجہ سے امریکہ کے خلاف ہونٹ نہیں ہلتے۔ ان خیالات کا اظہار اُنہوں نے مظفرگڑھ میں ایم ڈبلیو ایم کی ضلعی کابینہ کے اجلاس سے خطاب کرتے ہوئے کیا۔ اجلاس میں 13 ,14 جنوری کو ملتان میں ہونے والی ورکشاپ میں شرکت کے حوالے سے دعوت دی گئی، اس موقع پر تنظیم سازی کے مرحلے کو تیز کرنے کے حوالے سے عمران رضا ایڈووکیٹ کی سربراہی میں کمیٹی تشکیل دی گئی، اجلاس میں ضلعی سیکرٹری علی رضا طوری، سید عمران کاظمی ایڈوکیٹ، سید شفقت کاظمی، آغا عابد فاطمی، سید مظہر نقوی، تفسیر خمینی، ایڈوکیٹ عدنان حیدر، عامر عباس، شوکت بک، عظم بخاری، نذر عباس، اظہر چانڈیہ، اقبال حسین اور دیگر اراکین نے شرکت کی۔

وحدت نیوز( اسلام آباد) مجلس وحدت مسلمین پاکستان کے سربراہ علامہ راجہ ناصرعباس جعفری نے شیعہ علماءکونسل کے مرکزی رہنما اور علامہ سید ساجد علی نقوی کے دامادعلامہ سید عبدالجلیل نقوی کی رحلت پر دلی افسوس اور دکھ کا اظہارکیا ہے ، مرکزی سیکریٹریٹ سے جاری اپنے تعزیتی پیغام میں انہوں نے کہا کہ مرحوم کا انتقال ملت جعفریہ کے لئے بہت بڑا نقصان ہے، مرحوم انتہائی فعال قومی شخصیت تھے ، علامہ راجہ ناصرعباس نے کہا کہ تمام پسماندگان کی خدمت میں تعزیت اور تسلیت پیش کرتے ہیں ،خدا مرحوم کو جوار معصومین ؑمیں محشور فرمائے اور پسماندگان کو صبر جمیل عنایت فرمائے  ، بعد ازاں معروف عالم دین شیعہ علماء کونسل کے مرکزی رہنماعلامہ سید عبد الجلیل نقوی مرحوم کی نماز جنازہ یادگارِ حسین راولپنڈی میں علامہ شیخ محسن علی نجفی کی اقتدار میں ادا کی گئی ،مجلس وحدت مسلمین کے وفد میں علامہ حسنین گردیزی، علامہ اصغر عسکری ، علامہ علی اکبر کاظمی ، اور علامہ علی شیر انصاری  نے شرکت کی۔