The Latest
علامہ ناصرعباس جعفری کی المصطفیٰ ہائوس لاہور میں آئی ایس اوکے مرکزی صدر اور اراکین کابینہ سے ملاقات
وحدت نیوز (لاہور) مجلس وحدت مسلمین پاکستان کے مرکزی سیکرٹری جنرل علامہ ناصرعباس جعفری نے ایک وفد کے ہمراہ امامیہ اسٹوڈنٹس آرگنائزیشن پاکستان کے مرکزی سیکرٹریٹ المصطفٰی ہائوس لاہور میں آئی ایس او پاکستان کے مرکزی صدر علی مہدی اور مرکزی کابینہ سے ملاقات کی۔ آئی ایس او پاکستان کے مرکزی صدر نے مجلس وحدت مسلمین کے رہنمائوں کو مرکزی سیکرٹریٹ میں خوش آمدید کہتے ہوئے کہا کہ اس طرح کی ملاقاتوں کا سلسلہ جاری رہنا چاہیے، تاکہ ملت کے اجتماعی معاملات بطریق احسن آگے بڑھ سکیں۔ اُنہوں نے کہا کہ ملت کو درپیش مسائل کا حل باہمی وحدت میں ہے۔ علی مہدی نے مزید کہا کہ دشمن انقلابی حلقوں کیخلاف سازشیں کرکے نظریاتی و انقلابی لوگوں کے مابین دوریاں پیدا کرکے اپنے مذموم ایجنڈے کو آگے بڑھانا چاہتا ہے، پاکستان میں موجود انقلابی قوتوں کو ایک دوسرے کی تقویت کا سبب بن کر دشمن کی سازش کو ناکام بنانا ہوگا، تاکہ پاکستان میں رہبریت کی آرزو (وحدت) پوری ہو سکے۔ اس موقع پر شہید ڈاکٹر محمد علی نقوی کی 21 ویں برسی کی مرکزی تقریب میں شرکت کیلئے مرکزی صدر نے ایم ڈبلیوایم کے سربراہ کو مدعو کیا۔ علامہ راجہ ناصر عباس نے برسی شہید ڈاکٹر محمد علی نقوی، شہید مظفر کرمانی کے روز شہادت اور کشمیر ڈے پر بھی تبادلہ خیال کیا، ملاقات کے آخر پر شہداء کشمیر و شہید مظفر کرمانی کیلئے فاتحہ خوانی کی گئی۔
وحدت نیوز (کوئٹہ) مجلس وحدت مسلمین کوئٹہ ڈویژن کے رہنما و صوبائی اسمبلی کے رکن آغا رضا نے کہا ہے کہ ملکی سلامتی اور قیام امن کیلئے ہر فرد کو اپنا کردار ادا کرنا ہوگا، قومیں اپنی اصلاح کرکے آگے بڑھتی ہیں۔پاکستان اس وقت بد ترین حالات سے دو چار ہے ہمارا اتحاد ملک کو اس سنگین حالات سے نکال سکتا ہے ۔
انہوں نے کوئٹہ میں قیام امن کے حوالے سے منعقدہ دو روزہ سیمینار کے بارے میں اپنے خیالات کا اظہار کرتے ہوئے کہاکہ یہ بات خوش آئند ہے کہ امن کی بحالی کیلئے اقدامات کئے جا رہے ہیں، دہشتگردی کے علاوہ طبقاتی نظام، سیاسی کرپشن، اختیارات کے ناجائز استعمال، مہنگائی، بے روزگاری، توانائی بحران اور زندگی گزارنے کی سہولیات کے فقدان کے باعث لوگ مایوس ہو چکے ہیں مگر اس بات کی توقع کی جاسکتی ہے کہ امن کے قیام کے بعد ان مسائل کو بھی زیر بحث لایا جائے گا۔
انہوں نے کہا کہ گذشتہ برسوں میں ہم بحثیت ایک قوم ملک کی فلاح کیلئے کام نہیں کررہے تھے اور امن کی بحالی کی امیدیں ختم ہو چکی تھی مگر آج ہم نے ثابت کردیا کہ ہم کسی بھی مشکلات کا سامنا کرسکتے ہیں اور یہ اس بات کی واضح دلیل ہے کہ ہم دہشتگردوں کے خلاف متحد ہیں۔ انہوں نے مزید کہا کہ ہمیں ایسے معاشرے کے قیام کیلئے جدو جہد کرنا چاہئے جہاں ہم آہنگی، برداشت، امن، خوشحالی کا راج ہو اور جہاں لوگ سکون سے رہ سکے اور اپنی ترقی کا سفر طے کریں۔ حکمرانوں کو عوام کے مسائل کے حل کیلئے عملی کاؤشیں کرنا ہوگی تاکہ عوام کو ریلیف مل سکیں اور وہ معاشی آسودگی کے بعد ملکی ترقی و خوشحالی میں اپنے کلیدی کردار ادا کرتے ہوئے استحکام پاکستان میں اپنا حصہ ڈال سکیں کیونکہ معاشی طور پر خوشحال عوام ہی ریاست کی ضمانت فراہم کر سکتے ہیں۔
وحدت نیوز (گلگت) حکمرانوں کو گلگت بلتستان کے عوام کے بنیادی حقوق ہر صورت دینے پڑینگے عرصہ دراز سے اس علاقے کے عوام وطن عزیز سے اپنی بے پناہ محبت کی سزا بھگت رہے ہیں۔بنیادی انسانی حقوق کاحصول ہر معاشرے کا اولین حق ہے ہم ریاست سے بھیک نہیں حق مانگ رہے ہیں۔
مجلس وحدت مسلمین گلگت بلتستان شعبہ خواتین کی کوآرڈینٹرسائرہ ابراہیم نے بیداری و آگاہی مہم کے دوسرے اجلاس میں شریک خواتین سے گفتگو کرتے ہوئے کہا کہ آج بیداری کا وقت ہے اور خواتین کو اپنا کردار ادا کرنا پڑیگا ۔انہوں نے کہاکہ سانحہ 13 اکتوبر 2005 میں رینجرز کی بلا اشتعال فائرنگ سے دو سیدانیاں شہید ہوگئیں لیکن ان کی ایف آئی آرتک درج نہ ہوسکی۔اس ناخوشگوار سانحے کی عدالتی کمیشن رپورٹ کو درخور اعتناء کرتے ہوئے حکومت نے بیگناہ نوجوانوں کو پابند سلاسل کیا ہوا ہے۔ملت تشیع پاکستان نے آج تک نہ اس ملک کے خلاف بغاوت کا علم بلند کیا ہے،نہ حکومتی رٹ کو چیلنج کیا ہے اور نہ ہی پاک وطن کے رکھوالوں کے خلاف کسی دہشت گردی میں ملوث ہے باوجود اس کے ہمارے مردوں اور بیٹوں کو ناکردہ جرم میں عدالتوں میں کیسز چلتے رہے۔حکومت ہمارے ساتھ سوتیلی ماں والا سلوک روا رکھے ہوئے ہے اوراگر ہم نے ان ناانصافیوں کے خلاف خاموشی اختیار کی تو ہم بھی مجرم ہونگے۔
انہوں نے خواتین سے اپنے اپنے علاقوں میں بیداری و آگاہی مہم کو تیز کرنے کی ہدایت کی تاکہ اس علاقے کے ساتھ ہونے والے مظالم کا راستہ روکنے کیلئے مردوں کے شانہ بشانہ خواتین بھی میدان عمل میں رہیں۔اس اجلاس میں نلتر، جلال آباد، دنیور، کے آئی یو کھاری، برمس بالااور جوٹیال کے تنظیمی عہدیداروں نے شرکت کی۔انہوں نے مزید کہا کہ ہم اس پرامن خطے کو جنت نظیر بنانے کیلئے کسی بھی قربانی سے دریغ نہیں کرینگے۔
وحدت نیوز (ملتان) مجلس وحدت مسلمین پاکستان کے وفد نے ملتان میں پی آئی اے کے ملازمین کی جانب سے نجکاری اور کراچی میں ہونے والی شہادتوں کے خلاف دیے گئے احتجاجی دھرنے میں شرکت کی۔ وفد کی قیادت صوبائی ڈپٹی سیکرٹری جنرل علامہ سید اقتدار حسین نقوی، صوبائی سیکرٹری تعمیر ملت زوہیب حسین، ضلعی سیکرٹری جنرل علامہ قاضی نادر حسین علوی نے کی۔ اس کے علاوہ وفد میں سیکرٹری سیاسیات انجینیئر مہر سخاوت، سید وسیم عباس زیدی، سید جاوید حسین الحسینی، سرائیکستان نوجوان تحریک کے چیئرمین مہر مظہر عباس کات، سید دلاور عباس زیدی، علی رضا بخاری اور ثقلین نقوی شامل تھے۔ اس موقع پر علامہ اقتدار حسین نقوی نے پی آئی اے کے رہنمائوں سے گفتگو کرتے ہوئے کہا کہ مجلس وحدت مسلمین ہر مظلوم کے ساتھ ہے، جس طرح یہ حکومت کسانوں، مزدوروں، ورکروں اور دیگر شعبہ ہائے زندگی سے تعلق رکھنے والے دیگر افراد کے حقوق غصب کر رہی ہے یہی اس کی تباہی کا سبب بنے گا۔ اُنہوں نے کہا کہ اگر قوم ڈاکٹر طاہرالقادری اور عمران خان کا دھرنے میں ساتھ دیتی تو معاملہ اس حد تک نہ پہنچتا، کراچی میں پی آئی اے کے ملازمین کی شہادت اس حکومت کے تابوت میں آخری کیل ثابت ہوگا۔ اس موقع پر علامہ قاضی نادر حسین علوی نے کہا کہ یہ حکومت ظلم پہ ظلم کر رہی ہے، آج اس ملک کے ہر ادارے کو بیچنے کی بازگشت ہو رہی ہے، یہ حکمران اگر واقعی ملکی اداروں سے مخلص ہیں تو کرپٹ افراد کے خلاف کاروائی کریں، ان حکمرانوں سے نئے اداروں کے بننے کی کوئی اُمید نہیں ہے۔ اس موقع پر علامہ اقتدار نقوی نے کراچی میں شہید ہونے والے ملازمین کے ایصال ثواب کے لیے فاتحہ خوانی کی اور زخمیوں کی صحتیابی کے لیے دعا کرائی۔
وحدت نیوز (لاہور) مجلس وحدت مسلمین پاکستان کے سربراہ علامہ راجہ ناصر عباس جعفری نے لاہور قومی مرکز شادمان میں سعودی حکومت کے ہاتھوں انسانی و بنیادی شہری حقوق کیلئے آواز اُٹھانے کی جرم میں موت کی سزا پانیوالے جید عالم دین آیت اللہ شیخ نمرباقر النمر کے چہلم کی تقریب سے خطاب کرتے ہوئے کہا کہ کہ شیخ نمر محض کسی فرد یا شخصیت کانام نہیں بلکہ ایک ایسی بلند و پائیدار فکر کا نام ہے، جس کا درس ہمیں آئمہ اطہار علیہم السلام کی زندگیوں سے ملتا ہے، شیخ نمر باطل و جبر کیخلاف ایک غیر معمولی للکار بن کر اس وقت منظر عام پر آئے جب ہر طرف گھٹن کا ماحول اور خوف کے سائے منڈلا رہے تھے۔
انہوں نے کہا کہ شیخ نمر نے بادشاہوں کے جابرانہ تسلط پر استحصال کیخلاف آواز بلند کرنے کا حوصلہ صرف انہی لوگوں کو ہوتا ہے جن کے دل میں خوف خدا کے سوا کسی کے ڈر کی جگہ نہیں ہوتی۔ شیخ نمر کا نام تاریخ میں سنہرے لفظوں سے رقم ہو چکا ہے اور سعودی عرب کی حکومت ملامتی القاب سے منہ چھپاتی پھر رہی ہے، آج سعودی ایوانوں میں مایوسی اور بے اطمینانی کی فضا ہے، شہزادوں کے مابین طویل عرصہ سے جاری اختیارات کی سرد جنگ کھل کر سامنے آنا شروع ہو گئی۔ انہوں نے کہا کہ مظلوم کے خون کا حساب اللہ کے انتقام سے آل سعود کی حکومت کے خاتمے کی صورت میں بہت جلد سامنے آئے گا۔
انہوں نے کہا شیخ نمر کا جرم یہ تھا کہ وہ سعودی عرب میں رائج غیر اسلامی شاہانہ طرز حکومت کیخلاف تھے وہ لوگوں کے استحصال کیخلاف آواز بلند کرتے تھے، انہیں سعودیہ عرب میں انسانی حقوق کے سب سے بڑے علمبردار کی حیثیت حاصل ہو گئی ہے۔ انہوں نے کہا کہ شہدا کا خون کبھی رائیگاں نہیں جائے گا۔ علامہ راجہ ناصر نے نائجرین حکومت سے بھی مطالبہ کیا کہ وہ ممتاز عالم دین شیخ ابراہیم زکزکی فوری رہا کریں، نائجیرین میں ایک طرف مسلح افواج اور دوسری دہشتگرد تنظیم بوکو حرام اہل تشیع کا خون بہانے میں مصروف ہیں۔ انہوں نے کہا پرامن لوگوں کو اس طرح ظلم و بربریت کا نشانہ بنانا عالمی انسانی قوانین کی بدترین پامالی ہے، چہلم کی تقریب سے امامیہ آرگنائزیشن پاکستان کے چئیرمین لال مہدی خاں، امامیہ اسٹوڈنٹس آرگنائزیشن کے مرکزی صدرعلی مہدی سمیت علمائے امامیہ و دیگر نے بھی خطاب کیا۔
وحدت نیوز (کوئٹہ) مجلس وحدت مسلمین کے آفس سیکریٹری جناب حاجی ناصر علی نے گیس کی غیر ضروری لوڈ شیڈنگ کے بارے میں کہا ہے کہ موسم سرما میں عوام گیس کے لئے ترستے ہیں، موسم کے کروٹ لینے اور سردی کے بڑتے ہی دوبارہ گیس کی لوڈ شیدنگ شروع کر دی گئی ہے، محکمہ گیس کے ملازمین عوام کو تنگ کرنے میں مصروف ہیں۔ جب تک ہم شکایت لے کر انکے سر پر کھڑے نہیں ہوتے انہیں عوام کو انکے حقوق دلانے کا خیال ہی نہیں آتا۔ جب گیس کی شدید ضرورت ہوتی ہے اس وقت عوام کو گیس کی لوڈشیڈنگ کا سامناکرنا پڑتا ہے اور ٹھیک یہی حال گرمیوں میں بجلی کا ہے ۔جہاں ملک ترقی کی راہ میں گامزن ہونے کو بے تاب ہے وہی سرکاری اداروں میں موجود ملازمین عوام کی دلآزاری میں مصروف ہیں۔
انہوں نے کہا کہ محکمہ گیس عوام کو کھیلونا سمجھ کر انکے ساتھ کھیل رہی ہے ، صوبے میں گیس کی ضرورت ہے مگر پھر بھی فراہم نہیں کی جارہی ہے، گیس کی عدم دستیابی مسائل کی وجہ بن رہی ہے۔ عوام گیس کے مہنگے سلنڈروں کے استعمال اور مختلف طریقوں سے گزارہ کرنے پر مجبور ہو گئے ہیں۔ جس کی وجہ سے عوام کو بڑے نقصان کا سامنا ہورہا ہے۔ شہریوں کو انکے حقوق فراہم نہیں کی جارہی ہے۔ شہری ہر چیز کیلئے احتجاج کرتے کرتے تھک چکے ہیں پھر بھی انہیں انکے بنیادی ضروریات نہیں مل رہے۔
انہوں نے مزید کہا کہ محکمہ گیس اپنی ذمہ داریاں صحیح طریقے سے ادا نہیں کر رہی ہے۔ گیس کے محکموں کا قیام عوام کی خدمت کیلئے کیا گیا ہے مگر وہاں کے عمارتوں تک عوام کی آواز بھی نہیں پہنچ رہی، حکومت محکمہ گیس سے انکی کارکردگی پر مشتمل رپورٹ طلب کرے۔ عوام گیس کے بل جمع کرنے کے باوجود اس سے استفادہ نہیں کر پا رہے ہیں، حکومت وقت حالات حاضرہ پر نظر رکھے، عوام کئی مسائل سے دوچار ہیں۔ عوام کو انکے روز مرہ زندگی کے بنیادی ضروریات فراہم کرکے انہیں کٹھن حالات سے نجات دلائے۔
وحدت نیوز(گلگت) کشمیرکے محروم و مظلوم عوام کے حق خود ارادیت اور کشمیری عوام کی پرامن جدوجہد کی مکمل حمایت کرتے ہیں۔مقبوضہ کشمیر پر بھارتی تسلط اورانسانی حقوق کی مسلسل خلاف ورزی کی مذمت کرتے ہیں،اقوام متحدہ کی عدم دلچسپی اور حکومت پاکستان کی کمزور خارجہ پالیسی کی وجہ سے کشمیری عوام مظالم کا شکار رہے ہیں۔
ان خیالات کا اظہارمجلس وحدت مسلمین گلگت بلتستان کے سیکرٹری امورسیاسیات غلام عباس نے مولانا عبدالسمیع کی زیر قیادت وحدت ہائوس گلگت میں ملاقات کیلئے آنے والے جماعت اسلامی کے وفدسے گفتگوکرتے ہوئے کیا، اس موقع پر ایم ڈبلیوایم کے رہنما عارف قمبری، ڈاکٹر علی گوہر اور شیخ عیسیٰ بھی موجود تھے۔
انہوں نے کہا کہ ظلم اور ظالم سے نفرت اور مظلوم کی حمایت ہمارا دینی فریضہ ہے ظلم و بربریت پر خاموشی اختیار کرنا ظالم کے ساتھ دینے کے مترادف ہے۔مقبوضہ کشمیر پر بھارت کا غاصبانہ قبضہ اقوام متحدہ کی قراردادوں کی صریحاً مخالفت ہے ،ہم کشمیری عوام کی اپنے حقوق کیلئے پرامن جدوجہد کی مکمل تائید و حمایت کرتے ہیں۔انہوں نے کہاکہ آزاد کشمیر کے رہنماؤں کے غیر ذمہ دارانہ بیانات نے گلگت بلتستان کے عوام کے دلوں میں نفرت کا بیج بویا ہے اور یہ نام نہاد رہنما ایک طرف گلگت بلتستان کے حقوق کی بات ہوتی ہے تو گلگت بلتستان کو کشمیر کا حصہ قرار دیتے ہوئے کسی بھی آئینی پیکج کی مخالفت میں کمر بستہ ہوجاتے ہیں۔یہی رہنما ایک طرف کشمیر بنے گا پاکستان کا نعرہ لگاتے ہیں تو دوسری طرف جب گلگت بلتستان کو پاکستان کا صوبہ بنانے کی بات ہوتی ہے تو اس کی مخالفت کرتے ہیں۔
انہوں نے کہا کہ آزاد کشمیر کے رہنماؤں کو آج تک یہ توفیق نصیب نہیں ہوئی کہ وہ گلگت بلتستان کے عوام کے ساتھ اظہار یکجہتی کرکے حقوق سے محروم عوام کی دلجوئی کرسکیں۔موجود حالات میں جب حکومت پاکستان گلگت بلتستان کے آئینی مسئلے کا کوئی حل نکالنے کی متلاشی ہوئی ہے تو یہی کشمیری رہنما راستے کی دیوار بن چکے ہیں اور گلگت بلتستان کے آئینی حقوق سے متعلق ان کی روش یہی رہی تو یہاں کے عوام ان کے توقعات پر قطعا نہیں اتریں گے بلکہ رد عمل پر مجبور ہونگے۔انہوں نے کہا کہ گلگت بلتستان کا خطہ یہاں کے غیور عوام نے اپنی مدد آپ کے تحت آزاد کروایا ہے اور پاکستان سے محبت کی بناء پر الحاق کیا ہے اور اب بھی یہاں کے عوام گلگت بلتستان کوملک کا پانچواں صوبہ بنانے کا مطالبہ کررہے ہیں جس کا ثبوت موجودہ اور سابقہ اسمبلی کی متفقہ قرادادوں اور اے پی سی میں شامل واضح اکثریتی پارٹیوں کی رائے سے ملتا ہے۔
وحدت نیوز(گلگت) کراچی میں پی آئے اے ملازمین کی نجکاری کے خلاف احتجاج پر وحشیانہ لاٹھی چارج اور فائرنگ ریاستی دہشت گردی اورجمہوریت کے منہ پر طمانچہ ہے۔اپنے حقوق کیلئے احتجاج کرنا ہر شہری کا حق ہے حکومت جبری طور پر عوام سے احتجاج کا بنیادی حق چھیننا چاہتی ہے۔
مجلس وحدت مسلمین گلگت بلتستان کے ترجمان محمد الیاس صدیقی نے کراچی میں پی آئی اے ملازمین کے احتجاج پر لاٹھی چارج اور فائرنگ شدید الفاظ میں مذمت کرتے ہوئے کہا کہ مسلم لیگ کی حکومت جمہوریت کی آڑ میں ملک میں بادشاہت قائم کرنا چاہتی ہے۔ماڈل ٹاؤن لاہور میں بیگناہ مرد و خواتین پر گولیوں کی بوچھاڑ کرکے درجنوں مرد و خواتین اور بچوں کو خون میں نہلادیا گیااور تو اور معذور افراد کو بھی لیگی حکومت نے نہیں بخشا۔انہوں نے کہا کہ احتجاج عوامی حق ہے جسے ریاستی جبر سے دبانا انسانی حقوق کی سنگین خلاف ورزی ہے پی آئی کے ملازمین آج اپنے حقوق کیلئے پرامن احتجاج پر ہونے کے باوجود ان پر گولیان چلائی گئیں حالانکہ ان ملازمین نے کوئی ناجائز مطالبہ نہیں کیا تھا۔پولیس کے ہاتھوں بیگناہ ملازمین کی ہلاکت پر ذمہ داروں کو قانون کے کٹہرے میں کھڑا کیا جائے۔
انہوں نے کہا کہ پی آئی اے کو سب سے زیادہ خسارہ حکومت نے خود پہنچایا ہے ،ہر نئی آنے والی حکومت نے کلیدی عہدوں پر نااہل افراد کی تعیناتی کرکے اس قومی ادارے کو تباہ کردیا ہے اور آج حکومت خود خسارے کا رونا رو رہی ہے۔حکومت قومی اداروں کے تحفظ اور معاشی طور پر ان داروں کو استحکام بخشنے میں بری طرح ناکام ہوچکی ہے اوران اداروں کو نفع بخش بنانے کی بجائے انہیں نیلام کرنا ملکی معیشت پر کاری ضرب لگانے کے مترادف ہے۔
وحدت نیوز (کوئٹہ) مجلس وحدت مسلمین کوئٹہ ڈویژن کے سیکریٹری جنرل عباس علی نے پی آئی اے ملازمین پر تشدد کی مذمت کرتے ہوئے کہا ہے کہ احتجاج کرنے والوں پر تشدد جمہوریت کی پامالی کے مترادف ہے۔ پی آئی اے کے ملازمین آئین و قانون کی خلاف ورزی نہیں کر رہے تھے۔ احتجاج ہر شہری کا قانونی حق ہے انہوں نے ان خیالات کا اظہار پی آئی اے ملازمین پر کئے گئے تشدد اور قتل کے رد عمل میں کیا انہوں نے کہا کہ وفاقی حکومت کو چاہئے کہ طاقت کے استعمال کی بجائے بات چیت سے مسئلے کے حل تک پہنچے ،انہوں نے پی آئی اے ملازمین کی ہلاکت پر افسوس کا اظہار کیا اور کہا کہ حکومت اس واقع کی مذمت کرے اور ساتھ ہی ساتھ ذمہ داران کو ان کے انجام تک پہنچائے۔ انہوں نے کہا کہ حکومت پی آئی اے کی نجکاری کی ضد چھوڑ دے اور ان سے بات چیت کرکے ان کے مطالبات کی منظوری کیلئے کام کرے۔ ہر روز ملک کو کروڑوں کا نقصان اٹھانا پڑ رہا ہے۔پی آئی اے ملازمین کے ساتھ گولی اور ڈنڈوں سے نہیں بلکہ افہام وتفہیم سے بات چیت کی جائے۔بیان میں کہا گیا کہ احتجاج ہر پاکستانی کا جمہوری حق ہے اور مجلس وحدت مسلمین حکومت کی آمرانہ سوچ اور عمل کی مذمت کرتے ہوئے پی آئی اے ملازمین کی بھر پور حمایت کرتی ہے اور حکمرانوں سے مطالبہ کرتی ہے کہ پی آئی اے کو اس اسٹیج پر پہنچانے والوں کے خلاف کاروائی کرے۔ بیان کے آخر میں ہلاک ہونے والے پی آئی اے ملازمین کے اہل خانہ سے دلی ہمدردی کا اظہار کیا گیا اور زخمیوں کی جلد صحت یابی کی دعا کی گئی۔
وحدت نیوز (کراچی) مجلس وحدت مسلمین کراچی کے سیکرٹری سیاسیات علی حسین نقوی نے پی آئی اے ملازمین پر ریاستی تشدد کی مذمت کرتے ہوئے بے گناہ افراد کے قتل کی ذمہ داری وفاق و صوئی حکوموتوں کو قرار دیا۔ان خیالات کا اظہار انہوں نے جناح انٹر نیشنل ایئر پورٹ پی آئی اے ہیڈ آفس کے سامنے جوانٹ ایکشن کمیٹی کی جانب سے دیئے جانے والے احتجاجی دھرنے سے خطاب میں کیاان کا کہنا تھا کہ پی آئی اے مزدوروں کی ملکیت ہے ادارے کی ترقی میں مزدوروں کو خون شامل ہے شہید ہونے والے ملازمین نے قومی اساسے کو تباہ ہونے سے بچانے کی خاطر اپنی جانوں کا نظرانہ پیش کیا ہے قومی ادارے کی نجکاری کے خلاف ہیں بے گناہ انسانی جانوں پر ریاستی جبر کی نئی داستان رقم کی گئی ہے قومی ایئر لائن کی نجکاری سے ہزاروں افراد کے گھروں کے چولے بجھ جائیں گے جس کی ان حکمرانوں کو اجازت نہیں دی جائے گی ان کا کہنا تھا کہ پر امن مظاہرین پر گولیاں چلانے والوں کو فوری گرفتار کیا جائے بے گناہ افراد کے قتل کی ذمہ داری وفاق و صوئی حکوموتوں پرعائد ہوتی ہے قاتلوں کی گرفتاری کیلئے جلد عدالتی کمیشن تشکیل دیا جائے اور ملزمان کو فوری گرفتار کیا جائے۔دریں اثناء ایم ڈبلیو ایم کے کراچی رہنماؤں علامہ علی انور ،علامہ مبشر حسن ،سید رضا امام نقوی،حیدر زیدی ،احسن عباس کے وفد نے ورکرزیونین کے عہدیداروں سہیل بلوچ ،صفدر انجم و دیگر سے ملاقات کی اور اپنے بھر پور تعاون کی یقین دہانی کرائی ملاقات میں گزشتہ روز احتجاج میں جاں بحق ہونے والے ملازمین کی بلندی درجات کیلئے فاتحہ خوانی اور زخمیوں کی جلد صحتیابی کیلئے دعاکی گئی ۔
