The Latest
وحدت نیوز (کوئٹہ) مجلس وحدت مسلمین بلوچستان کے سیکریٹری جنرل علامہ مقصود علی ڈومکی نے کہا ہے کہ دہشت گردوں کے خوف سے تعلیمی اداروں کی بندش شرمناک عمل ہے ۔حکومت کی جانب سے دہشت گردی کے خلاف منا فقانہ طرز عمل دہشت گردی کے خاتمہ میں سب سے بڑی رکاوٹ ہے ،دشمن کے بچوں کو پڑھانے والے اب اپنے بچوں کو جاہل بنا رہے ہیں ۔حکومت اور ریاستی اداروں کی کمزوری اس سے بڑھ کر کیا ہوگی کہ وفاقی دارلحکومت اسلام آباد میں بیٹھے ہوئے دہشت گرد کو گرفتار کرنے کی بھی ان میں ہمت نہیں ہے۔
انہوں نے کہا کہ اب وقت آچکا ہے کہ اب ریاست دہشتگردوں کے خلاف اعلان جنگ کرے، اور عراق کی طرز پر دہشت گردوں سے لڑنے کے لیے عوام سے مدد لی جائے۔
انہوں نے کہا کہ جنرل راحیل شریف اور پاک فوج، ملک بھر میں دہشتگردوں کے خلاف آپریشن ضرب عضب کا آغاز کریں۔اس ملک کے کروڑوں شہری اپنی بہادر افواج کے شانہ بشانہ دہشت گردوں کے خلاف لڑنے کے لیے تیار ہیں ۔دہشتگردوں سے زیادہ ان کے سیاسی اور مذہبی سہولت کار ریاست کے لیے خطرہ ہیں ۔ جو ہر مشکل وقت میں دہشت گردوں کے وکیل صفائی بن جاتے ہیں۔انہوں نے جرئت اور بہادری کے ساتھ کراچی میں آپریشن جاری رکھنے پر آرمی چیف ،ڈی جی رینجرز اور ان کی ٹیم کو خراج تحسین پیش کرتے ہوئے، امید ظاہر کی کہ شہر قائد میں پائیدار امن جلد قائم ہوگا۔
وحدت نیوز (کوئٹہ) مجلس وحدت مسلمین کوئٹہ ڈویژن کے سیکریٹری مالیات رشید طوری نے اپنے بیان میں کہا ہے کہ ایک اسلامی مملکت میں سود کا نظام نہیں ہونا چاہئے، بلکہ اس کے خلاف اقدامات اٹھائے جانے چاہئے، ہمارے ملک میں بعض بینکیں سود کے نظام سے فائدہ اٹھاتے ہیں اور یہی کام کہیوں نے اپنے روزگار کے طور پر اپنا لیا ہیں، جو کہ حکم الٰہی کی خلاف ورزی اور ایک بڑا گناہ ہے، سود کے خاتمے سے ہمارے ملک میں معاشی خوشحالیاں آئیں گی۔اسلام سود خوری کو برا فعل سمجھتا ہے اور ایسا کرنے والوں کو ہرگز پسند نہیں کرتا۔ حکومت اسلامی ملک کے نظام کو مد نظر رکھتے ہوئے اس فعل کے خلاف قرار داد پیش کرے۔
انہوں نے کہا کہ دین سے دوری ہمارے لئے بہت سے مشکلات کا سبب بن رہی ہے،عوام میں دینی شعور پیدا کرنے اور انہیں آگاہی فراہم کرنے کی ضرورت ہیں تاکہ وہ خود اس قابل ہوجائے کہ اچھے برے کا فیصلہ کر سکے۔ احکامات الٰہی سے غفلت ہمیں بربادی کی سمت ڈکھیل رہی ہے اس وقت ہمارے علماء کی ذمہ داریاں بڑھ گئی ہیں اس بات پر تو شک نہیں کیا جاسکتا کہ وہ اسلامی معاشرے کی تکمیل کیلئے جدوجہد نہیں کر تے مگر ان کے کام کا نتیجہ ضرورت سے کم تر نکل رہا ہے لہٰذا لوگوں کو موجودہ صورتحال سے آگاہ رکھنا ہوگاکیونکہ اگر لوگوں میں آگاہی پیدا کی جائے تو لوگ خود بھی ایسے بینکوں کے خلاف اٹھ کھڑے ہونگے جو سود کا نظام چلاتے ہیں اور ان کے خلاف جدوجہد کا سلسلہ شروع ہو جائے گا۔
انہوں نے کہا کہ حکومت جس طرح دیگر معاملات پر غور و فکر کر رہی ہے اسی طرح اس چیز کو بھی اہمیت دے اور اسلامی ملک میں ہونے والے کفریہ فعل کے خلاف اقدامات اٹھائے ، اسلام ایک مکمل ضابطہ حیات ہے اوراس پر عمل پیرا ہونے کی صورت میں ہمیں زندگی گزارنے میں کسی قسم کی دشواریوں کا سامنا نہیں ہوتا تو پھر حکم الٰہی کی خلاف ورزی کرتے ہوئے شورٹ کٹ مارکر پیسے کمانے کا کیا فائدہ، کاروبار کے بہت سے دیگر زرائع بھی ہیں سینکڑوں لوگ مختلف کاروبار اور پیشوں سے تعلق رکھتے ہیں جو کہ سود سے بہتر ہیں،اور جو اپنی محنت سے کماتے ہیں ان کے کام کا فائدہ وطن عزیز اور حکومت کو بھی پہنچتا ہے۔
وحدت نیوز (کوئٹہ) مجلس وحدت مسلمین بلوچستان کے سیکریٹری جنرل علامہ مقصود علی ڈومکی نے پاکستان تحریک انصاف بلوچستان کے صوبائی صدرسابق وفاقی وزیر سردار یار محمد رند سے ملاقات کی اس موقع پر گفتگو کرتے ہوئے علامہ مقصود علی ڈومکی نے کہا کہ سانحہ چھلگری کے متاثرین سے متعلق حکومت نے اپنے وعدے پورے نہیں کیے اس لیے زخمی اپنے علاج کے سلسلے میں شدید مشکلات کا شکار ہیں ۔سانحے میں ملوث دہشت گردوں کی عدم گرفتاری پر شدید تشویش ہے ۔انہوں نے کہا کہ اقتصادی راہداری کے فوائد بلوچستان کے عوام کو ملنے چاہیے ،بلوچستان میں غربت ،پسماندگی اور محرومیت کا خاتمہ بہت ضروری ہے۔
اس موقع پر گفتگو کرتے ہوئے سردار یار محمد رند نے کہا کہ ہماری ساری ہمدردیاں سانحے کے متا ثرین کے ساتھ ہیں ،بلوچستان حکومت متاثرین چھلگری کے مسائل حل کرے۔ عوام کے نمائندے کی حیثیت سے ہم ہر سطح پر عوامی مسائل اور مشکلات کے حل کے لیے اپنا کردار ادا کریں گے،انہوں نے کہا کہ بہتر سیاسی قیادت کے ذریعے بلوچستان سمیت پورے ملک کی قسمت کو بدلا جا سکتا ہے۔
درایں اثناء علامہ مقصود علی ڈومکی نے ایک وفد کے ہمراہ کمشنر نصیر آباد نوید شیخ سے ملاقات کی ۔ ملاقات میں سانحہ چھلگری کے متاثرین کو حکومت کی جانب سے اعلان کردہ رقم نہ ملنے پر تشویش کا اظہار کرتے ہوئے علامہ مقصود علی ڈومکی نے کہا کہ زخمیوں کا مکمل علاج کرایا جائے اور یادگار شہداء ٹاور کی جلد تعمیر کی جائے ۔انہوں نے مطالبہ کیا کہ دہشت گردوں کے نیٹ ورک کے خلاف بھر پور آپریشن شروع کیا جائے۔
وحدت نیوز (اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری کی جانب سے گلگت بلتستان کے ممبران اسمبلی کو ایک پرتکلف عشائیہ دیا گیا۔جس میں گلگت بلتستان اسمبلی کے اسپیکر فدا محمد ناشاد، ڈپٹی اسپیکر جعفر اللہ خان اور سینئر وزیر اکبر تابان سمیت پاکستان پیپلز پارٹی ،پاکستان تحریک انصاف،اسلامی تحریک ،مسلم لیگ نون اور ایم ڈبلیو ایم کے اراکین اسمبلی نے شرکت کی۔عشائیہ میں متفقہ طور پر اس عزم کا اعادہ کیا گیا کہ گلگت بلتستان کے آئینی حقوق کے حصول کے لیے مشترکہ جدوجہد کی جائے گا۔
مجلس وحدت مسلمین کے سربراہ علامہ ناصر عباس جعفری نے اپنی غیر مشروط حمایت کا اعلان کرتے ہوئے کہا کہ اقتصادی راہداری سمیت گلگت بلتستان کے حقوق کے تحفظ کے لیے ہم ایک انچ پیچھے ہٹنے کے لیے تیار نہیں ۔خطے کی ترقی و استحکام اور عوامی فلاح و بہبور کے تمام پروجیکٹس پر جی بی کی حکومت کو ہماری بھرپور حمایت حاصل رہے گی۔انہوں نے کہا کہ یہ خطہ قدرتی وسائل اور معدنی دولت سے مالا مال ہے۔ ان وسائل سے استفادے کے لیے اپنی توانائیاں تعمیری انداز میں صرف کی جائیں تو خطے کی تقدیر کو بدلا جا سکتا ہے۔تعلیم کے شعبے میں اشد توجہ ازحد ضروری ہے۔ اعلی تعلیم کے حصول کے لیے نوجوانوں کو پاکستان کے دوردراز شہروں میں جانا پڑتا ہے ۔بیشتر باصلاحیت افراد وسائل کی عدم دستیابی کے باعث اعلی تعلیم سے محروم رہ جاتے ہیں۔ہمیں اس خلا کو پُر کرنا ہو گا۔اعلی تعلیمی اداروں کا قیام ہماری ترجیحات میں سرفہرست ہونا چاہیے۔
سینئر وزیر اکبر تابان نے کہا کہ خطے کی ترقی کے لیے ایم ڈبلیوایم کی یہ کاوش بلاشبہ مخلصانہ اور لائق تحسین ہے۔گلگت بلتستان کی موجودہ حکومت علاقے کی تعمیر و ترقی کے لیے پوری تندہی سے کوشاں ہے۔وزیر اعظم پاکستان نواز شریف اس علاقے کے عوام کے لیے انتہائی درد رکھتے ہیں ۔تمام جماعتوں کو چاہیے کہ وہ ہماری حکومت کی تائید کریں۔اگر مسلم لیگ نون عوامی توقعات پر پورا اترنے میں ناکام رہی تو اس کا انجام پیپلز پارٹی سے بھی بدتر ہو گا۔جی بی اسمبلی کے سپیکر فدا محمد ناشاد نے کہا کہ اس خطے کی آئینی حیثیت کے تعین کے لیے اس سے قبل کسی بھی حکومت میں حوصلہ پیدا نہ ہو سکا۔یہ نواز شریف کی حکومت کو اعزاز جاتا ہے کہ وہ اس سلسلے میں ذاتی دلچسپی لے رہے ہیں۔اکنامک کوریڈور منصوبہ میں گلگت بلتستان کو نظر انداز کر کے کامیابی حاصل کرنے کی امید خام خیالی ہے۔ روشن مستقبل کے لیے ماضی کی تلخیوں کو فراموش کر کے مشترکہ جدوجہد کرنا ہو گی۔ڈپٹی سپیکر جعفر اللہ نے کہا کہ تحریک پاکستان کی حمایت اور ڈوگرا راج کے خلاف اس خطے کی عوام کا کردار غیر معمولی رہا ہے۔لیکن ہماری قربانیوں کو ہر دور میں نظر انداز کیا گیا۔ہمیں دانستہ طور پر مراعات سے محروم رکھا گیا۔دنیا کے اسی فیصد معدنیات اس علاقے میں پائے جاتے ہیں ۔ ہمیں مسلکی حدبندیوں سے نکل کر اس علاقے کے لیے سعی کرنا ہو گی تاکہ یہاں کے وسائل سے مستفید ہوا جا سکے۔امن و امان کے قیام اور علاقے کی ترقی کے لیے ہم مجلس وحدت مسلمین کے ہم قدم رہیں گے۔
عشائیہ میں ایم ڈبلیو ایم کے مرکزی ترجمان علامہ حسن ظفر نقوی، وزیر تعلیم ابراہیم سنائی، پارلیمانی سیکرٹریز اورنگزیب جوئیہ،فدا خان،اقبال حسین ،اسماعیلی ریجنل کونسل کے چیئرمین امان اللہ، ممبران اسمبلی حاجی رضوان، کاچو امتیازحیدرخان ،راجہ جہانزیب،عمران ندیم،محمد علی شیخ، کیپٹن (ر)محمدشفیع، کیپٹن (ر)سکندر،میجر(ر) امین،محمد شفیق،غلام حسین ،ایم ڈبلیوایم گلگت بلتستان کے ڈپٹی سیکریٹری جنرل علامہ آغا علی رضوی سمیت گلگت بلتستان کی نامورسیاسی وسرکاری شخصیات بھی موجود تھیں۔
وحدت نیوز (اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس کی سربراہی میں تنظیمی وفد نےا سٹینڈنگ کمیٹی برائے چائنا پاکستان اکنامک کوریڈور کے چیئرمین مشاہد حسین سید سے ان کی رہائش گاہ پر ملاقات کی۔ اس موقعہ پر مسلم لیگ قاف کے سربراہ چوہدری شجاعت حسین بھی موجود تھے۔ ملاقات میں باہمی دلچسپی کے امور پر تبادلہ خیال کیا گیا۔چیئرمین کمیٹی نے منصوبے سے آگاہ کرتے ہوئے بتایا کہ اقتصادی راہدری میں گلگت بلتستان کی شمولیت ایک مصدقہ حقیقت ہے۔ اس خطے کو کسی بھی صورت نظر انداز نہیں کیا جا سکتا۔ مشاہد حسین سید نے کہا کہ میری دلی خواہش تھی کہ مجلس وحدت مسلمین گلگت بلتستان کے اراکین اسمبلی مجھے جی بی میں مدعو کریں تاکہ اس منصوبے کے تمام نکات سے انہیں پوری طرح آگاہ کیا جا سکے۔
چوہدری شجاعت حسین نے کہا کہ مجلس وحدت مسلمین کی گلگت بلتستان کے عوام کے لیے مخلصانہ تگ و دو کو ہم تحسین کی نگاہ سے دیکھتے ہیں۔جی بی کے حقوق کے لیے ہماری طرف سے انہیں بھرپور تائید حاصل رہے گی۔انہوں نے گلگت بلتستان کے ممبران اسمبلی کو اس سلسلے میں اہم تجاویز بھی دیں۔وفد میں ایم ڈبلیو ایم گلگت بلتستان کے ڈپٹی سیکرٹری جنرل علامہ آغا سید علی رضوی،ممبر جی بی اسمبلی کاچو امتیازحیدر خان، ڈاکٹر حاجی رضوان،سیکریٹری سیاسیات جی بی غلام عباس،ڈاکٹرکاظم سلیم، محمد علی اور معاون مرکزی سیکرٹری سیاسیات آصف رضا بھی موجود تھے۔
وحدت نیوز(کوئٹہ) مجلس وحدت مسلمین کوئٹہ ڈویژن کے میڈیا سیل سے جاری شدہ بیان میں مجلس وحدت مسلمین کوئٹہ کے ڈویژنل سیکریٹری جنرل جناب عباس علی نے کہا ہے کہ عوام زندگی کے بنیادی ضروریات سے محروم ہیں ، اعلیٰ تعلیم کی عدم دستیابی صوبے میں غربت، جہالت اور پسماندگی کی اصل وجہ ہے۔ حکومت ترقی کیلئے کام کرنے کے وعدے تو کرتی ہے مگر وعدہ وفائی کیلئے وقت نہیں نکال پاتی۔ انہوں نے مزید کہا کہ صوبے کے رہایشی شہری اپنے بنیادی حقوق سے محروم ہیں، جو کہ تعلیم سے محرومی کا نتیجہ ہے اور ان کے حقوق دلانے والے ادارے بھی اپنی ذمہ داریاں ادا نہیں کر رہی ہیں۔ جمہوری حکومت میں عوام کو تمام تر سہولیات میسر ہونے چاہئے مگر یہاں تو ضروریات کے حصول میں بھی دشواریاں ہیں۔مہنگائی اور غربت کی وجہ سے عوام کو زندگی گزارنے میں مشکلات کا سامنا ہے اور دوسری طرف حکومت مہنگائی ختم کرنے کیلئے کام کرتی نظر نہیں آ رہی ، دن بہ دن ٹیکسوں میں اضافہ ہورہا ہے اور ہر شے مہنگی ہو رہی ہے۔
ان کا مزید کہناتھا کہ صوبے میں عوام اپنی جان و مال کو محفوظ نہیں سمجھتے ، دہشتگرد کاروائیاں کر رہے ہیں اور آزاد پھیر رہے ہیں۔ دہشتگردوں کے خلاف کاروائیاں کرکے ان کے خوف کو عوام کے دلوں سے ختم کیا جائے اور عوام کے تحفظ کو یقینی بنایا جائے۔ بیان کے آخر میں کہا گیا کہ اگرصوبے کو غربت اور پسماندگی کے دلدل سے نکالنا ہے تو حکومت کو کمر بستہ ہونا پڑے گا۔ جمہوری حکومت کے تمام اراکین عوام کے نمائندے ہوتے ہیں اگر ذاتی مفادات کو اڑے نہ آنے دیا جائے تو صوبے میں خوشحالی کی آمد یقینی ہے، صوبے کو ترقی کے بہت سے مواقع مل رہے ہیں لہٰذااس وقت ان چیزوں سے فائدہ اٹھایا جانا چاہئے۔
وحدت نیوز (کوئٹہ) مجلس وحدت مسلمین کوئٹہ ڈویژن کے میڈیا سیل سے جاری شدہ بیان میں کونسلرعباس علی عوام کو پانی کی اہمیت کا احساس دلاتے ہوئے کہا ہے کہ ہمیں اللہ تعالیٰ کے اس نعمت کیلئے شکر گزار ہونا چاہئے ہمارے ملک میں ایسے شہر بھی ہیں جہاں پینے کا صاف پانی بھی دستیاب نہیں وہاں کے لوگوں میں سے جہاں بعض لوگ پانی خرید کر استعمال کرتے ہیں وہی بعض لوگوں کو گندہ پانی ہی پینا پڑتا ہے۔
انہوں نے مزید کہاکہ سردیوں میں چونکہ پانی فریواں ہوتا ہے تو بعض لوگ اسکا نا جائز استعمال کرتے ہوئے اسے بہا دیتے ہیں جس سے ایک طرف پانی کے بہاو سے سڑک پر بہت سے مشکلات کا سامنا ہوتا ہے اور دوسری طرف پانی ضائع ہوتا ہے جو کہ ایک عقلمندانہ فعل نظر نہیں آتا جبکہ اگر ہم اسے ضائع ہونے کے بجائے اسے زخیرہ کرے تو گرمیوں میں ہمیں اسکی کمی کا سامنا نہیں ہوگا۔ بیان میں مزید کہا گیا کہ عوام کی ذمہ داری بنتی ہے کہ اس بات کا وہ بخود جائزہ لے اور پانی ضائع ہونے سے روکھے اس طرح مستقبل میں پیش آنے والی پانی کی قلت سے بچا جا سکتا ہے، جس کا فائدہ الٹ کر عوام کی طرف ہی آئے گا۔ اللہ تعالیٰ کا ہمیں پانی جیسے نعمت سے نوازنا ہمارے دانشمندی کا امتحان بھی ہوسکتا ہے لہٰذا پانی زخیرہ کرکے آئیندہ استعمال کیا جائے تو بہتر رہے گا۔
وحدت نیوز (لاہور) عوامی بنیادی ضروریات کو نظر انداز کر کے میٹرو پروجیکٹ کے نام کمیشن اور اپنے کاروبار کو وسعت دینے کے لئے کھربوں روپوں کا ضیاع ملکی وسائل پر ڈاکہ ڈالنے کے مترادف ہے،ملک بھر میں توانائی بحران کے سبب عوام مشکلات کا شکار ہے،گیس کی لوڈشیڈنگ نے غریب عوام کو اس ٹھٹھرتی سردی میں دو وقت کی روٹی سے بھی محروم کر دیا ہے،ان خیالات کا اظہار مجلس وحدت مسلمین پنجاب کے سیکرٹری جنرل علامہ عبدالخالق اسدی نے صوبائی سیکرٹریٹ میں جنوبی پنجاب سے آئے وفود سے گفتگو کرتے ہوئے کیا۔
انہوں نے کہا کہ توانائی کے بحران پر قابو پانے کے لئے ملکی تاریخ کا سب سے سستا اور منافع بخش میگھا پروجیکٹ پاک ایران گیس پائپ لائن کو اپنے بیرونی آقاوُں کی خوشنودی کے لئے پس پشت ڈال دیا گیا ہے،غیروں کی مفادات کی تکمیل کے لئے ملکی مفادات کو داوُ پر لگانے کا عمل ملکی ترقی و استحکام کے لئے خطرناک ثابت ہوگا۔
ان کا کہنا تھا کہ مجلس وحدت مسلمین قومی اداروں کی نجی کاری کے کیخلاف ہے،حکمران اپنی تجوریاں بھر نے کے لئے قومی اداروں کی نجکاری چاہتے ہیں،پی آئی اے ،ریلوے اور سٹیل مل سے کرپشن مافیا کا خاتمہ کریں تو یہ ادارے منافع بخش ثابت ہو سکتے ہیں،لیکن بدقسمتی سے ہمارے ان تمام اداروں پرکرپشن اور کمیشن مافیا کا راج ہے،مذہبی جنونی دہشت گردوں کیخلاف کاروائی کیساتھ ساتھ معاشی وسیاسی دہشت گردوں اور کرپشن مافیا کیخلاف بھی کاروائی کے بغیر ملکی ترقی و استحکام ممکن نہیں،پاکستان کی بقا کے لئے دہشت گردی کے خاتمے کیساتھ بے رحمانہ احتساب بھی ضروری ہے۔
وحدت نیوز (کوئٹہ) مجلس وحد ت مسلمین بلوچستان کے سیکریٹری جنرل علامہ مقصود علی ڈومکی نے کہا ہے کہ چار سدہ باچا خان یونیوورسٹی میں ملوث دھشت گردوں کی فوری گرفتاری قابل تحسین اقدام ہے، اگرملک میں ہونے والے ہر سانحے کے بعد اسی تیز رفتاری سے دھشت گردوں کا تعاقب کیا جاتا تو آج یہ ملک دھشت گردی کی آگ میں نہ جل رہا ہوتا۔ پاک فوج ملک کا مقتدر ادارہ ہے جسے دھشت گردی کے مکمل خاتمے کے لئے اپنا بھرپور کردار ادا کرنا ہوگا۔ آج کئی سال گذر جانے کے باوجود کوئٹہ کے مظلوم شہداء کے وارث ملک کے آئینی اداروں سے انصاف کی آس لگائے بیٹھے ہیں۔چھلگری، جیکب آباد اور شکارپور سمیت ملک کے طول وعرض میں بہنے والے خون ناحق کا حساب کون دے گا۔
انہوں نے کہا کہ پوری قوم کامطالبہ ہے کہ ملک بھر میں دھشت گردوں کے خلاف آپریشن ضرب عضب شروع کیا جائے۔ حکومت نیشنل ایکشن پلان میں غیر سنجیدہ ہے، اس لئے کالعدم دھشت گرد تنظیمیں آج بھی ملک بھر میں نفرت انگیز سرگرمیوں کو جاری رکھے ہوئے ہیں۔ اسلام آباد میں داعش کا سرپرست آج بھی آزاد ہے جبکہ وفاقی وزیر داخلہ ان کے وکیل صفائی نظر آتے ہیں۔ دھشت گردوں کے خلاف منافقانہ رویہ دھشت گردی کے خاتمہ میں سب سے بڑی رکاوٹ ہے۔
انہوں نے کہا کہ نائیجریا کے ممتاز انقلابی رہنماء شیخ محمد ابراہیم زکزاکی عالم اسلام کے عظیم رہنماہیں۔ جن سے دنیا بھر میں کروڑوں لوگوں کی عقیدت ہے ،نائیجریا کی اسرائیل نواز حکومت کی جانب سے ان کی بلاجواز گرفتاری پر ہمیں تشویش ہے لہذا انہیں جلد رہا کیا جائے۔
وحدت نیوز (اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے کہا کہ حکومت کی بد انتظامی اور ناقص پالیسوں کے باعث ارض پاک غربت، دہشت گردی اور اقتصادی بحران کے ہاتھوں یرغمال بن چکا ہے۔ امن و امان کے قیام اور عوام کو بنیادی سہولتوں کی فراہمی میں ناکامی نے حکومت کا نااہلی کا پردہ چاک کر دیا ہے۔شاہراہوں کی تعمیر سمیت ان پر وجیکٹس پر سرکاری وسائل بے دریغ لٹائے جا رہے ہیں جن میں حکومتی اراکین کا مال بکتا اور بنتا ہے۔ تعلیم ، صحت اور بیروزگاری کے خاتمے سمیت دیگر توجہ طلب امور کو دانستہ طور پر نظر انداز کیا جا رہا ہے جو نئی نسل اور پاکستانی عوام کے ساتھ بدترین بددیانتی ہے۔انہوں نے کہا کہ وفاقی دارالحکومت میں بیٹھ کر حکومتی رٹ کو سرعام چیلنج کرنے والے ملا کو بیشتر مقدمات میں ملوث ہونے کے باوجود گرفتاری میں پس و پیش دہشت گردی کے خاتمے میں حکومت کی ’’سنجیدہ کوششوں‘‘ کو سمجھنے کے لیے کافی ہے۔نیشنل ایکشن پلان کے تمام نکات پر جب تک بلاتفریق عمل نہیں ہو گا تب تک دہشت گردی کا خاتمہ ممکن نہیں۔اگر حکومت ملک میں امن کی خواہاں ہے تو قانون کے نفاذ میں کسی بھی دباو یا مصلحت کو رکاوٹ نہ بننے دے۔چیف آف آرمی سٹاف جنرل راحیل شریف کا اپنی مدت ملازمت میں توسیع نہ لینے کا فیصلہ اصولی ،دانشمندانہ اور آئین پاکستان کی پاسداری کا بہترین اظہار اور قابل تعریف ہے تاہم دہشت گردی کے خلاف جنگ میں کسی بھی قسم کی لچک کا مظاہرہ ملک کو شدید ترین خطرات سے دوچار کر سکتا ہے۔ دہشت گردی کے خلاف جنرل راحیل کی پالیسیاں تسلسل کے ساتھ جاری رہنے کی ضرورت ہے تاکہ وطن عزیز کو دہشت گردی کی لعنت سے پاک کیا جائے۔
