The Latest
وحدت نیوز (کراچی) مجلس وحدت مسلمین پاکستان سندھ کے زیر اہتمام شہر قائد میں بڑھتی ہوئی شیعہ ٹارگٹ کلنگ و ملک بھر میں دہشتگردی کے سانحات کے خلاف کراچی سمیت صوبے بھر میں یوم سیاہ منایا گیا، اس سلسلے میں سندھ کے مختلف اضلاع کراچی،شکارپور،خیر پور، جیکب آباد،سجاول، بدین،لاڑکانہ،شہدادکوٹ میں بعد نماز جمعہ احتجاجی ریلیاں نکالی گئیں اور مظاہرے کیئے گئے،کراچی میں مرکزی احتجاجی مظاہرہ جامع مسجد نور ایمان ناظم آباد کے باہر کیا گیا، جبکہ جامع مسجد حیدری اورنگی ٹاو ن، جامع مسجد دربار حسینی برف خانہ ملیر، جامع مسجد ایم ایریا کورنگی و دیگر جامع مساجد کے باہر بھی احتجاجی مظاہرے کئے گئے۔ کراچی سمیت سندھ بھر میں احتجاجی مظاہروں سے خطاب کرتے ہوئے ایم ڈبلیو ایم کے رہنماو ں مولانا مرزا یوسف حسین، مولانا مقصودعلی ڈومکی ،مولانا مبشر حسن، مولانا علی انور جعفری، مولانا نشان حیدر، مولانا صادق جعفری، مولانا احسان دانش، مولانا غلام محمد فاضلی، مولانا دوست علی سعیدی،مولانا محمد نقی حیدری، مولانا اختر علی طاہری،مولانا محمد علی شر، مولانا مجاہد سعیدی،بشیر شاہ نقوی، مولانا نادر شاہ، مولانابہارمیمن،منور جعفری اور دیگر علمائے کرام نے کہا کہ شہر میں بڑھتی ہوئی شیعہ ٹارگٹ کلنگ کراچی آپریشن میں قانون نافذ کرنے والے اداروں کو حاصل ہونے والی کامیابیوں کو ناکام میں بدلنے اور امن و امان کی فضاءکو خراب کرنے کا باعث بن رہی ہے، شہر بھر میں ملت جعفریہ کے خلاف دہشتگرد کارروائیوں میں اضافے کی بڑی وجہ کالعدم دہشتگرد تنظیموں کے کھلے ہوئے دفاتر، جلسے، جلوس، سرگرمیاں اور عہدیداران و کارکنان کی آزادانہ فعالیت ہے، جس نے ایک طرف تو حکومت اور ریاستی اداروں کی کارکردگی پر سوالیہ نشان لگا دیا ہے اور دوسری جانب دہشتگردی کے خاتمے کیلئے بنائے گئے نیشنل ایکشن پلان کی دھجیاں اڑانے کے مترادف ہے۔
علمائے کرام نے کہا کہ آخر حکمرانوں و ریاستی اداروںکو کالعدم تنظیموں کی کھلے عام سرگرمیاں نظر نہیں آتیں، کیا وجہ ہے کہ اب بھی دہشتگرد عناصر کے حوالے سے اچھے اور برے کی تمیز باقی رکھی ہوئی ہے، آخر قانون و آئین سے بالاتر وہ کون سی قوت ہے، جو کالعدم دہشتگرد جماعتوں کے خلاف نتیجہ خیز کارروائیوں میں رکاوٹ کا باعث ہے، چند سیاسی فوائد کے حصول کی خاطر ملک دشمن عناصر کے ساتھ حکومت کی بے جا لچک نے آج ملک کے ہر شہری کو غیر محفوظ کر رکھا ہے، بلند و بانگ حکومتی دعوو ں کے کچھ ہی دیر بعد کوئی نیا سانحہ رونما معمول بن چکا ہے، ملک دشمن عناصر کے ساتھ لچک نے ملکی سالمیت و بقاءکو خطرے سے دوچار کر دیا ہے۔ علمائے کرام نے مطالبہ سے کیا کہ سندھ حکومت اور قانون نافذ کرنے والے ادارے شہر کراچی میں بڑھتی ہوئی شیعہ ٹارگٹ کلنگ کا نوٹس لیں، دہشتگردی کے واقعات میں ملوث عناصرکو فوری گرفتار کیا جائے، کالعدم دہشتگرد تنظیموں، انکے سیاسی و مذہبی سہولت کاروں اور دہشتگردی میں ملوث نام نہاد مدارس کیخلاف مو ثر حکمت عملی کے تحت فیصلہ کن آپریشن کا آغاز کیا جائے، دہشتگرد عناصر کے بجائے محب وطن شیعہ مسلمانوں کی بلاجواز گرفتاریوں و اغوا کے سلسلے کو فی الفور بند کروایا جائے، دہشتگردی کی شکار ملت جعفریہ پر بیلنسنگ پالیسی کے ذریعے ستم توڑنے کا سلسلہ بند کیا جائے۔
وحدت نیوز(لاہور) مجلس وحدت مسلمین پاکستان کے سربراہ علامہ راجہ ناصر عباس جعفری سنٹرل پنجاب کے تنظیمی دورے کے آخر ی روز آج(28جنوری) کو لاہور پہنچیں گے،وہ لاہور میں ورکرز اجلاس سے شاہدر اور غازی آباد میں خطاب کریں گے،علامہ راجہ ناصرعباس جعفری ایم ڈبلیوایم شعبہ خواتین ونگ کے زیر اہتمام تقریب سے ٹاون شپ میں بھی خطاب کریں گے،سہ پہر 4:30 بجے علامہ راجہ ناصر عباس جعفری صوبائی سیکرٹریٹ شادمان لاہور میں ایک اہم پریس کانفرنس سے خطاب اور ذرائع ابلاغ کے نمائندگان سے خصوصی ملاقات بھی کریں گے۔
وحدت نیوز(کوئٹہ) مجلس وحدت مسلمین کوئٹہ ڈویژن کے زیر اہتمام پارہ چنار میں دھماکے اور کراچی میں حالیہ ٹارگٹ کلنگ کے خلاف پرنس روڈ سے ایک احتجاجی ریلی نکالی گئی جس میں عوام کی کثیر تعداد نے شرکت کر کے اپنے شدید غم وغصہ کا اظہار کیا , ریلی کے شرکاء سے خطاب کرتے ہوئے مجلس وحدت مسلمین کے مرکزی رہنما اور امام جمعہ کوئٹہ علامہ ہاشم موسوی کہا کہ ایک سازش کے تحت پارہ چنار کی سر زمین کو لہولہان کرکے درجنوں کی تعداد میں نہتے عوام کو شہید اور زخمی کیا گیا حکومت کی جانب سے پارہ چنار کے عوام کو تحفظ اور طبی سہولیات فراہم کرنے میں مسلسل غفلت برتی جا رہی ہے , لگتا ہے کہ حکومت پارہ چنار کے محب وطن عوام کو اپنا نہیں سمجھتی کیونکہ اپنوں کے لیے انسان کے دل میں درد ہوتا ہے لیکن حکمرانوں کے دل میں پارہ چنار کے عوام کے لئے کوئی درد نہیں پایا جاتا ۔ پارہ چنار ایک حساس علاقہ ہے جو تین اطراف سے افغانستان میں گھرا ہوا ہے اور یہاں کے عوام کی اکثریت شیعہ مکتبہ فکر سے تعلق رکھتی ہے جس کی وجہ سے یہ علاقہ مسلسل طالبان اور داعش جیسی عالمی دہشتگرد تنظیموں کے نشانے پر ہے اسی طرح افغانستان میں انڈیا کے بڑھتے ہوئے اثر و رسوخ کی وجہ سے را اور خاد بھی اسے پاکستان سے الگ کرنے کی سازشیں کر رہے ہیں اور اس علاقے کے امن کو تہہ و بالا کرنے کی کوشش کر رہے ہیں ۔
انہو ں نے مزید کہا کہ پارہ چنار کے محب وطن غیور عوام نے صبر اور جرائت کا مظاہرہ کرتے ہوئے ہمیشہ سے ان سازشوں کو از خود بغیر کسی امداد کے ناکام بنایا ہے یہ علاقہ اس سے پہلے بھی تقریباً پانچ سال تک تکفیری دہشتگردوں کے محاصرے میں رہا لیکن وہاں کی عوام نے بے مثال قربانیاں دے کر مادر وطن کے ایک ایک انچ کا دفاع کرتے ہوئے دہشت گردوں کو شکست دی ۔ افسوس کیساتھ کہنا پڑ رہا ہے کہ اب سیکورٹی اداروں اور حکومت کی طرف سے ان کے قانونی دفاع کے آلات کو ان سے چھینا جا رہا ہے جس سے خدشات پیدا ہو رہے ہیں وہاں کی عوام اپنے آپ کو غیر محفوظ سمجھتے ہیں اس اقدام سے داعش , طالبان اور انڈیا کی طرف سے پارہ چنار میں ایک بڑے قتل عام کا خدشہ پیدا ہوگیا ہے لہذا حکومت اور ادارے وہاں کے قبائل سے چھینے گئے دفاعی آلات جلد از جلد واپس کرتے ہوئے ان خدشات کا ازالہ کریں, اسی طرح کراچی میں مسلکی بنیادوں پر شروع ہونے والے ٹارگٹ کلنگ کی روک تھام کی جائے اور تکفیری دہشتگردوں کے خلاف بھر پور آپریشن کرکے انکا خاتمہ کیا جائے ۔
وحدت نیوز (کراچی) سانحہ پارا چنار، کراچی سمیت ملک بھر میں شیعہ مسلمانوں کی بڑھتی ہوئی ٹارگٹ کلنگ، ملک بھر میں ہونے والے دہشتگردی کے سانحات، سندھ حکومت کے وارثان شہداءسے کئے گئے مئاہدے پر عمل درآمد نہ ہونے کے خلاف مجلس وحدت مسلمین سندھ کے تحت جمعہ 27 جنوری کو کراچی سمیت صوبے بھر یوم احتجاج و یوم سیاہ منایا جائے گا، اس بات فیصلہ وحدت ہاو س میں صوبائی سیکریٹری جنرل علامہ مقصود علی ڈومکی کے زیر صدارت ہنگامی اجلاس میں کیا گیا۔
علامہ مقصود ڈومکی نے کہا کہ گزشتہ کئی دہائیوں سے وطن عزیز پاکستان دہشتگردی کی آگ میں جل رہا ہے، دہشتگردوں کے ہاتھوں اب تک 80 ہزار پاکستانی شہری شہید ہوچکے ہیں، کراچی سمیت سندھ بھر میں ملت جعفریہ کے خلاف دہشتگرد کارروائیوں میں ایکبار پھر اضافہ ہو گیا ہے، جس کی سب سے بڑی وجہ کراچی سمیت سندھ کے مختلف شہروں میں دہشتگردوں کے ٹریننگ کیمپس اور اڈوں کی موجودگی اور چپے چپے پر دہشتگردوں کی نرسریاں قائم ہونا ہے، جبکہ صوبے بھر میں کالعدم دہشتگرد تنظیمیں ناصرف آزادانہ فعالیت جاری رکھے ہوئے ہیں بلکہ آئے روز محب وطن اہل تشیع مسلمانوں کو دہشتگردی و بربریت کا نشانہ بنائے ہوئے ہے، جو سندھ حکومت اور ریاستی اداروں کی کارکردگی پر سوالیہ نشان اور نیشنل ایکشن پلان کی دھجیاں اڑانے کے مترادف ہے۔ انہوں نے مطالبہ کیا کہ صوبائی حکومت اور قانون نافذ کرنے والے ادارے شہر کراچی میں بڑھتی ہوئی شیعہ ٹارگٹ کلنگ کا نوٹس لیں، دہشتگردی کے واقعات میں ملوث عناصرکو فوری گرفتار کیا جائے، کالعدم دہشتگرد تنظیموں، انکے سیاسی و مذہبی سہولت کاروں اور دہشتگردی میں ملوث نام نہاد مدارس کیخلاف مو ثر حکمت عملی کے تحت آپریشن کریں۔
وحدت نیوز (اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے کہا ہے کہ نو منتخب امریکی صدر دونلڈ ٹرمپ کی طرف سے بھارت کو حقیقی دوست قرار دینا اوردہشت گردی کے خلاف مشترکہ کوششوں کے عزم کااظہار امریکی صدر کی خطے میں ترجیجات کو واضح کررہاہے۔بھارت کی طرف امریکہ کا غیر معمولی جھکاؤ واحد اسلامی ایٹمی قوت پاکستان کو محض نیچا دکھانے کے لیے ہے۔انہوں نے کہا کہ دہشت گردی کے خلاف جنگ میں سب سے زیادہ نقصان پاکستان نے اٹھایا اور امریکہ کی طرف سے ’’ڈو مور‘‘ کے مطالبے کا ہمیشہ مثبت جواب دیا گیا۔پاکستان کو دانستہ نظرانداز کرنا خطے میں طاقت کے توازن کو بگاڑنے کی کوشش سمجھا جائے گا۔پاکستان کو اپنی خارجہ پالیسی کا از سر نو تعین کرنے کی ضرورت ہے۔ چین اور روس کے ساتھ ہمارے پائیدار تعلقات دانشمندانہ خارجہ پالیسی کاتقاضہ اور ٹرمپ کی بھارت نوازیوں کا جواب ہے ۔
انہوں نے کہا کہ ان استعماری قوتوں کا مقابلہ کرنے کے لیے عالم اسلام کا اتحاد ناگزیر ہے۔یہود و نصارٰی امت مسلمہ کے ازلی دشمن ہیں۔عالم اسلام کے خلاف ان کے اہداف واضح ہیں۔دنیا بھر میں صرف مسلم ممالک ہی دہشت گردوں کے نرغے میں ہیں ۔امت مسلمہ کو انتشار کا شکار کرنے والے عناصر کی باگ ڈور سامراجی ایجنٹوں کے ہاتھ میں ہے۔ہم تاریخ کے نازک ترین دور سے گزر رہے ہیں۔مسلمان حکمرانوں کی پالیسیاں محض کسی مخصوص ملک یا قوم کے لیے نہیں بلکہ امت مسلمہ کے اجتماعی مفاد کو سامنے رکھ کر طے ہونی چاہیے۔اسلامی ممالک کو اپنا مذہبی تشخص قائم رکھنے کے لیے موثر اقدامات کرنا ہوں گے اور امریکہ کی طرف دوستی کا ہاتھ دوطرفہ وقار اور تعاون کو مدنظر رکھ کر بڑھانا ہو گا۔ 7اسلامی ممالک پر امریکہ میں داخلے پر پابندی کا فیصلہ یہود و نصاری کی عالم اسلام کے خلاف جاری سرد جنگ کا حصہ ہے۔ سپر پاور ہونے کے زعم میں مبتلا امریکی صدر کا متعصبانہ رویہ امت مسلمہ کی آنکھیں کھولنے کے لیے کافی ہے۔ مستقبل میں امریکہ کی طرف سے مسلمانوں کے خلاف مزیذ سخت فیصلوں کی توقع ہے۔
وحدت نیوز (اسلام آباد) بحرین کے ممتاز مذہبی رہنما آیت اللہ شیخ عیسیٰ قاسم کی گرفتاری کے لئے بحرینی سیکورٹی فورسز کے دھاوا کے نتیجہ میں شہریوں پر حملہ کے وحشیانہ اور ظالمانہ اقدام کی مجلس وحدت مسلمین پاکستان نے شدید مذمت کرتے ہوئے کہا ہے کہ ظالم آل خلیفہ حکومت کو اپنے ہر ظلم کا حساب ایک دن دینا ہی پڑے گا ۔
تفصیلات کے مطابق مجلس وحدت مسلمین کے شعبہ خارجہ امور کے مرکزی سیکریٹری علامہ ڈاکٹرسید شفقت شیرازی نے اپنے بیان میں بحرینی عوام پر ہونے ہوالے ظلم اور آل خلیفہ کی فورسز کے آج فجر کے وقت ہونے والے حملے کی پرزور مذمت کرتے ہوئے بین الاقوامی برادری اورامت مسلمہ اور حکومت پاکستان سے اپنی ذمہ داری ادا کرنے کا مطالبہ کیا گیا ہے ۔
انہوں نے مذید کہا کہ پاکستانی عوام بحرینی حقیقی قیادت اور عوام کی اس پر امن تحریک کی مکمل حمایت کرتے ہیں۔ ڈاکٹر شفقت شیرازی کا کہنا تھا کہ صبح فجر کے وقت آل خلیفہ کی ظالم فورسز نے بحرین کے عظیم قائد آیت اللہ عیسی احمد قاسم کی گرفتاری کے لئے حملہ کر دیااورنہتے عوام پر سیدھی فائرنگ کر دی نہتے عوام نے اپنے جسموں پر گولیاں کھا کر پیش قدمی کو روک دیااوراسکے نتیجہ میں بڑی تعداد میں لوگ زخمی ہوئے جن میں بعض کی حالت تشویشناک ہے۔
ہم ان عظیم اورباہمت بحرینی عوام کو خراج عقیدت پیش کرتے ہیں ۔ شفقت شیرازی نے اپنے بیان میں کہا ہے کہ ان ظالم فورسز میں ایک بڑی تعداد پاکستانیوں کی ہے جو سیکورٹی گارڈز کے نام پر بحرین بھیجوائے گئے وہ بھی بحرینی سیکورٹی فورسز کے ساتھ مل کر نہتی عوام پر ظلم وجورمیں شریک ہیں ۔
ایم ڈبلیو ایم کے رہنما نے کہا کہ پاکستانی حکومت اور عوام کی ذمہ داری ہے کہ وہ نہ صرف پاکستانیوں کو بحرینی عوام کے قتل میں شریک ہونے سے فورا روکیں بلکہ بحرینی فورسز میں موجود پاکستانیوں کو واپس بھی بلائیں۔
انہوں نے انسانی حقوق کے علمبرادر نام نہاد ممالک اورا قوام پر تنقید کرتے ہوئے کہا ہے کہ جمہوریت کے نام پر مختلف ممالک کو تباہ کرنے والی طاقتیں بحرینی عوام پر ہونے والے ظلم پر مجرمانہ طور پرخاموش کیوں ہیں.؟
اس ظالم نظام کے مجرمانہ اقدامات اورریاستی دہشتگردی پربین الاقوامی برادری اور امت مسلمہ کے لبوں سے خاموشی کا تالا کب ٹوٹے گا۔ بحرینی اپوزیشن اورحکومت کے مذاکرات کے لئے کیوں پریشر نہیں ڈالا جا رہا.؟ یہ بین الاقوامی مسائل کے حل کے لئے دھرے معیار کب تک قائم رہیں گے؟
وحدت نیوز(جھنگ) مجلس وحدت مسلمین پاکستان کے سربراہ علامہ راجہ ناصر عباس جعفری کا 7 روزہ دورہ سنٹرل پنجاب جاری ہے، تنظیمی دورے کے تیسرے روز منڈی بہاوالدین سے فیصل آباد پہنچنے پر کارکنان نے بھرپور انداز میں ڈپٹی والا موٹروے انٹر چینج پر والہانہ استقبال کیا۔ بارش اور موسم میں سردی کی شدت کے باوجود بڑی تعداد میں کارکنان استقبالی ریلی میں شریک تھے۔ علامہ راجہ ناصر عباس نے فیصل آباد میں ورکرز اجلاس سے خطاب اور میڈیا ہاوسزز کے دورہ کے موقع پر صحافیوں سے ملاقات کے بعد سنی اتحاد کونسل کے چئیرمین صاحبزادہ حامد رضا کے ہمراہ فیصل آباد پریس کلب میں مشترکہ پریس کانفرنس سے بھی خطاب کیا۔ انہوں نے کہا کہ کرپشن کے پیداوار نااہل حکمرانوں کی غلط پالیسیوں کے سبب ملک بحرانوں کا شکار ہے، پنجاب میں عوام کو بنیادی انسانی حقوق اور سہولیات میسر نہیں، پنجاب میں ہسپتال اور سکولز ویران ہیں، میٹرو پروجیکٹس کے نام پر حکمران کمیشن کمانے میں مصروف ہیں، پنجاب میں سیاسی مخالفین کو انتقامی کارروائیوں کا سامنا ہے، نیشنل ایکشن پلان کی آڑ میں پنجاب میں دہشتگردی سے متاثرہ فریق کو دہشتگردوں کی خوشنودی کیلئے نشانہ بنایا جا رہا ہے۔
صاحبزادہ حامد رضا چیئرمین سنی اتحاد کونسل کی جانب سے علامہ راجہ ناصر عباس کے اعزاز میں عشائیہ کا اہتمام کیا گیا، جس میں فیصل آباد کے معززین شہر سمیت دیگر جماعتوں کے رہنما بھی شریک ہوئے۔ قبل ازیں جھنگ پہنچنے پر علامہ راجہ ناصر عباس جعفری کا شاندار استقبال کیا گیا۔ انہوں نے جھنگ بار کونسل میں وکلاء سے ملاقات اور خطاب بھی کیا۔ انہوں نے کہا کہ قانون پر عملدرآمد نہ ہونے کے سبب ملک مشکلات کا شکار ہے، وکلاء قانون کی حکمرانی کیلئے اپنا کردار ادا کریں، طبقاتی نظام نے ہمیں کھوکھلا کر دیا ہے، دہشتگردی کے سب سے بڑے سہولت کار اور فنانسر کرپٹ مافیا ہے، کرپشن کیخلاف پوری قوم کی نظریں اعلٰی عدلیہ پر ہیں، اگر کرپٹ عناصر کیخلاف کارروائی نہ کی گئی تو عوام کسی کو بھی معاف نہیں کریں گے، ملکی وسائل لوٹنے والوں کو عبرت کا نشان بنائے بغیر نظام کی درستگی ممکن نہیں۔ علامہ راجہ ناصر عباس جعفری 27 جنوری کو ساہیوال اور 28 جنوری کو لاہور کا دورہ کرینگے۔
وحدت نیوز(لاہور) مجلس وحدت مسلمین کےسیکرٹری امور سیاسیات لاہور ڈویژن سید حسین زیدی نے قوم کو زمین سے زمین پر مار کر نے والے ابابیل میزائل کے کامیاب تجربےپر مبارک باد پیش کی۔ سید حسین زیدی نے اپنے ایک بیان میں کہا کہ پاکستان ایک ناقابل تسخیر ملک بن چکا ہے، جس کا دفاع انتہائی مضبوط اور دشمن کے لیئے خطرہ ہے۔ انہوں نے کہا کہ دفاعی ماہرین، سائنسدانوں اور حکومت کے شکرگزار ہیں جنہوں نے دفاعی نظام کی بہتری اور مضبوطی کیلئے جدوجہد جاری رکھی ہوئی ہے لیکن افسوس اس بات پر ہے کہ اتنا طاقتور ہوجانے کے باوجود وزارت خارجہ کی جانب سے ہمیشہ ڈرے، سہمے انداز میں بات کی جاتی ہے۔ حسین زیدی نے کہا کہ پاک فوج کی طرح وزارت خارجہ کو بھی اپنی طاقت کا اظہار دشمن کو ڈٹ کر بیان دے کر کرنا چاہیے۔
وحدت نیوز (کراچی) گزشتہ رات کراچی کے علاقے گلستان جوھر میں کالعدم تکفیری جماعت کے سفاک دہشتگردوں کی فائرنگ سے شھید ہونے والے قاری محمد کاظم کی نمازِ جنازہ علامہ مرزا یوسف حسین کی اقتداء میں نمائش چورنگی پر ادا کردی گئی، نمازِ جنازہ میں شھید کے سسر اور مجلس وحدت مسلمین کراچی ڈویژن کے سابق ڈپٹی سیکریٹری جنرل علامہ محمد حسین کریمی اور دیگر اہلِ خانہ سمیت مجلس وحدت مسلمین کراچی ڈویژن کے رہنماؤں علامہ سید علی انور جعفری،علامہ مبشر حسن،مولانا صادق جعفری،میر تقی ظفر،صوبائی رہنماء ناصر حسینی سمیت مجلس وحدت مسلمین کے دیگر ذمہ داران و کارکنان سمیت عوام کی کثیر تعداد شریک تھی بعد ازاں شھید قاری محمد کاظم کی تدفین قبرستان وادی حسین ؑ میں عمل میں آئی۔
وحدت نیوز (کراچی) مجلس وحدت مسلمین پاکستان کے مرکزی ڈپٹی سیکریٹری جنرل علامہ سید احمد اقبال رضوی نے وحدت ہاؤس کراچی میں ہنگامی پریس کانفرنس کرتے ہوئے شہر کراچی میں ایک بار پھر بڑھتی ہوئی شیعہ ٹارگٹ کلنگ کی مذمت کرتے ہوئے کہا ہے کہ سفاک تکفیری دہشتگردوں نے دو روز قبل قصبہ کالونی میں ذوالفقار عابدی اور گزشتہ شب ایم ڈبلیو ایم کے رہنما علامہ محمد حسین کریمی کے داماد قاری قرآن محمد کاظم کو گلستان جوہر میں ٹارگٹ کلنگ کا نشانہ بنایا ہے، دہشت گردی کے دونوں واقعات کی جتنی مذمت کی جائے کم ہے، چوپیس گھنٹوں کے اندر تکفیری دہشتگردوں دو شیعہ وجوانوں کو ٹارگٹ کلنگ کا نشانہ بنایا جانا حکومتی و ریاستی اداروں کی کارکردگی پر سوالیہ نشان ہے، حکومت پْرامن ملت جعفریہ کی جان و مال کے تحفظ میں مکمل طور پر ناکام جبکہ دہشتگردی کے مکمل خاتمہ کا حکومتی دعویٰ محض طفل تسلیاں ثابت ہو رہی ہیں۔
علامہ مبشر حسن، علامہ صادق جعفری، علامہ علی انور و میر تقی ظفر کے ہمراہ پریس کانفرنس کرتے ہوئے علامہ احمد اقبال رضوی نے کہا کہ کراچی سمیت ملک بھر میں پے در پے بے گناہوں بالخصوص ملت جعفریہ کے جوانوں کا قتل عام جاری ہے۔ وفاقی و صوبائی حکومتوں نے تکفیری دہشت گردوں کو آزاد چھوڑ رکھا ہے، کالعدم دہشتگرد جماعتیں کراچی سمیت ملک بھر میں کھلے عام اپنی سرگرمیاں جاری رکھے ہوئے ہیں، کالعدم جماعتوں کے دفاتر کھلے ہوئے ہیں، جلسے جلوس و اجتماعات کا سلسلہ تسلسل سے جاری ہے۔ کراچی کے در و دیوار کالعدم تکفیری دہشتگرد تنظیموں کے جلسے، جلوس، اجتماعات کے اشتہارات و بینرز سے بھرے پڑے ہیں، حیرت کی بات ہے کہ حکومرانوں و ریاستی اداروں کو کالعدم تکفیری دہشتگرد تنظیموں کی سرگرمیاں کیوں نظر نہیں آتیں۔ریاست کو اب اچھے اور برے دہشت گردوں کی تمیز ختم کرنا ہو گی، ملک دشمن عناصر کے ساتھ حکومت کی بے جا لچک نے آج ملک کے ہر شہری کو غیر محفوظ کر رکھا ہے، حکومت کی طرف سے بلند و بانگ دعووں کے کچھ ہی دیر بعدکوئی نیا سانحہ رونما ہو جاتا ہے، جب تک نیشنل ایکشن پلان پراس کی روح کے مطابق عمل نہیں کیا جائیگا، تب تک بے گناہ لاشیں یونہی گرتی رہیں گی۔
انہوں نے مزید کہا کہ عوام کے سامنے واضح کیا جائے کہ آخر قانون و آئین سے بالا وہ کون سی قوت ہے، جو کالعدم دہشتگرد جماعتوں کے خلاف کارروائیوں میں رکاوٹ کا باعث ہے، دہشت گردی کا خاتمہ کالعدم دہشتگرد جماعتوں کی بیخ کنی سے مشروط ہے، لہٰذا حکومت و ریاستی ادارے قاتلوں سمیت تکفیری دہشتگردوں، کالعدم جماعتوں کے سیاسی و مذہبی سہولت کاروں اور بالخصوص وہ نام نہاد مدارس جو ان تکفیری دہشتگردوں و کالعدم جماعتوں کے سہولت کار ہیں، ان کے خلاف بھرپور آپریشن کیا جائے، ، دہشتگردوں کو کچلنے کے لیے ضرب عضب کو پوری قوت سے اہداف کی طرف بڑھنا ہو گا۔ملک دشمن عناصر کے ساتھ معمولی سی لچک نہ صرف ان کے حوصلوں کو تقویت دے گی بلکہ ملک کی سالمیت و بقا کے لیے بھی خطرہ بن جائے گی، نیشنل ایکشن پلان جس مقصد کے لیے تشکیل دیا گیا تھا اسے اس مقصد کے لیے استعمال نہیں کیا جا رہا۔دہشت گردی کا خاتمہ تبھی ممکن ہے، جب عسکری و سیاسی قوتیں ایک پیج پر ہوں گی۔ ضرب عضب کی مکمل کامیابی کے لیے نیشنل ایکشن پلان پر اس کی روح کے مطابق عمل انتہائی ضروری ہے۔
اس سے قبل گزشتہ شب گلستان جوہر میں شہید کئے گئے قاری قرآن محمد کاظم کی نماز جنازہ نمائش چورنگی پر علامہ مرزا یوسف حسین کی زیر اقتدا ادا کی گئی، اس موقع پر ایم ڈبلیو ایم کے مرکزی رہنما علامہ احمد اقبال،علامہ مرزا یوسف، علامہ علی انور، علامہ صادق جعفری، علامہ مبشر حسن، علامہ اصغر شہیدی، علامہ شبیرمیثمی سمیت دیگر علمائے کرام، رہنماؤں سمیت ہزاروں کی تعداد میں لوگ شریک تھے، نماز جنازہ کے بعد ایم ڈبلیو ایم کے تحت بڑھتی ہوئی شیعہ ٹارگٹ کلنگ کے خلاف احتجاجی دھرنا دیا گیا، احتجاجی مظاہرین نے شیعہ کلنگ میں ملوث تکفیری دہشتگردوں کی گرفتاری، کالعدم جماعتوں، انکے رہنماؤں، کارکنان وسرگرمیوں پر فی الفور پابندی کا مطالبہ کیا، جبکہ ایم ڈبلیو ایم کی جانب سے جمعہ کو کراچی سمیت سندھ بھر میں احتجاجی مظاہرے کا بھی اعلان کیا گیا۔ بعد ازاں شہید محمد کاظم کی تدفین وادی حسین قبرستان سپر ہائی وے میں آہوں و سسکیوں کے ساتھ ادا کی گئی۔
