وحدت نیوز (سکھر) مجلس وحدت مسلمین ضلع سکھر کی شوری کا اجلاس  مرکزی امام بارگاہ میں منعقد ہوا،جس میں مرکزی ڈپٹی سیکریٹری جنرل علامہ سید احمد اقبال رضوی اور صوبائی سیکریٹری جنرل علامہ مقصود ڈومکی نے خصوصی شرکت کی ،ضلعی سیکریٹری جنرل چوہدری اظہر حسن نے ضلعی کابینہ کے اراکین کا اعلان کیا اور صوبائی سیکریٹری جنرل علامہ مقصودعلی ڈومکی نے  نامزد اراکین ضلعی کابینہ سے حلف لیا، اس موقع پر ضلعی سیکریٹری جنرل چوہدری اظہر کاکہنا تھا کہ ایم ڈبلیوایم ضلع سکھر علامہ راجہ ناصرعباس جعفری کے فکر اور فلسفے کی روشنی میں ہمیشہ مظلوموں کے حقوق کی جدوجہد جاری رکھے گی۔

وحدت نیوز (شکارپور) مجلس وحدت مسلمین پاکستان ضلع شکارپور کے زیراہتمام دہشتگردی کے خلاف ڈکھن سے 72 حسینیوں کا پیدل قافلہ شہدائے راہ حق سے اظہار عقیدت کے لئے روانہ ہوا۔ قافلے میں صوبائی سیکرٹری جنرل علامہ مقصود علی ڈومکی، ضلعی سیکرٹری جنرل فدا عباس لاڑک، ڈپٹی سیکرٹری محبوب علی ابڑو، صوبائی مشیر امور شہداء و زخمی مولانا سکندر علی دل، مولانا ظہورالدین میکھو، مولانا عبداللہ مطہری، زوار غوث بخش و دیگر نے خصوصی طور پر شرکت کی۔ پیدل قافلے کے شرکاء سے علی خان کے مقام پر گفتگو کرتے ہوئے علامہ مقصود علی ڈومکی نے کہا کہ پاراچنار اور کراچی سمیت ملک بھر میں دہشت گردی کے سانحات کے خلاف ملک گیر احتجاج منایا گیا۔ مجلس وحدت مسلمین اور اس کے بہادر قائد نے ملت کو بیداری، بصیرت اور قیام کا راستہ دکھایا، کفن پوش جلوس اس بات کی علامت ہے کہ ہم حسینی موت سے نہیں ڈرتے۔

وحدت نیوز (کوئٹہ) مجلس وحدت مسلمین کوئٹہ ڈویڑن کے سکریٹری جنرل عباس علی نے اپنے بیان میں کہا ہے کہ معزور افراد معاشرے کا مفید شہری بننے کی مکمل صلاحیت رکھتے ہیں اگر وہ جسمانی طور پر کسی ایک عضو سے معزور ہیں تو خدا وند عالم ان کے دیگر اعضاء کو دگنی صلاحیت عطا کرتا ہے لہذا انھیں کسی صورت دوسروں سے کم نہیں سمجھنا چاہیئے جس طرح عام انسانوں کی صلاحیتوں کو اجاگر کرنے کیلیے مناسب ماحول اور سہولیات کی ضرورت ہے اسی طرح معزور افراد کی صلاحیتوں کو  بروئیکار لانے کیلئے بھی مناسب ماحول کی ضرورت ہے جسے مہیا کرنا حکومت کی زمہ داری ہے  دنیاکے تمام مہزب و ترقی یافتہ ممالک نے معزوروں کو انکے حقوق دیکر انہیں معاشرے کا مفید شہری بنا لیا ہے بد قسمتی سے اسلام کے نام پر بننے والی مملکت عزیز پاکستان میں آج تک ان سپیشل افراد کو فعال ومفید بنانے کے لیے کوئی منصوبہ بندی کی گئی نہ ہی بے حس حکمرانوں نے اس طرف کوئی توجہ دی جس کی وجہ سے معاشرے کے یہ افراد در بدر کی ٹھوکریں کھاتے پھیر رہے ہیں حد تو یہ ہے جب یہ بیچارے اپنے حقوق کے لیے آواز اٹھاتے ہوئے احتجاج کرتے ہیں تو ان پر بھی لاٹھیاں برسائی جاتی ہیں امید ہے آج ہونے والے معزوروں کے دھرنے پر حکومت بلوچستان لاٹھیاں نہیں برسائے گی. آواز معزوران کی جانب سے آج معزوروں کے حق کے لیے دیئے جانے والے دھرنے کی مکمل حمایت کرتے ہوئے حکومت بلوچستان سے مطالبہ کرتے ہیں کہ سرکاری نوکریوں کے لیے معزور افراد کیلئے مناسب کوٹہ مختص کیا جائے ان کی صلاحیتوں کو اجاگر کرنے کے لیے مفت و معیاری تعلیم کا انتظام کیا جائے اور ان کی تیکنکی تربیت کے لئے مخصوص ٹیکنیکل ٹریننگ سنٹر کا قیام عمل میں لایا جائے بلوچستان میں معزوروں کو سپورٹس کے شعبے میں بھی سہولیات فراہم کی جائے۔

وحدت نیوز (ملتان) حکمرانوں کی غلط پالیسیوں کی وجہ سے عوام مشکلات کا شکار ہے،جنوبی پنجاب کے عوام بنیادی انسانی حقوق اور سہولیات سے محروم ہے،میٹرو کے نام پر اربوں روپے کا ضیاع کیا گیا،نشتر ہسپتال اور چلڈرن ہسپتال میں مریضوں کا پرسان حال نہیں،صحت اور تعلیم کا شعبہ ابتری کا شکارہے،جس شہر کے ہسپتالوں میں ایک بیڈ پر تین تین مریضوں کا علاج ہو رہا ہو وہاں میٹرو کے نام پر 29 ارب روپوں کا ضیاع کرنا کہاں کی دانشمندی ہے،ہر دور کے حکمرانوں نے جنوبی پنجاب کے محروم عوام کا استحصال کیا، ان خیالات کا اظہار مجلس وحدت مسلمین پاکستان کے سربراہ علامہ راجہ ناصر عباس نے ملتان میں نیوز کانفرنس سے خطاب کرتے ہوئے کیا،انہوں نے کہا کہ جنوبی پنجاب میں کالعدم جماعتوں کیخلاف کاروائی نہ ہونے کے برابر ہے،نیشنل ایکشن پلان کے نام پر سیاسی مخالفین کو نشانہ بنایا جارہا ہے،جمہوری اقدار کو فراموش کر دیا گیاہے، فوجی عدالتیں سپیڈی ٹرائل کیلئے بنائی گئیں لیکن وہ نتائج نہیں دے سکیں۔

علامہ راجہ ناصر عباس نے کہا کہ سیاسی جماعتوں میں بھی دہشتگردوں کے سہولت کار موجود ہیں جو کارروائی نہیں ہونے دیتے۔انہوں نے کہا کہ پاکستان ایساملک بن چکا ہے جس کی دیواریں نہیں، جوچاہتا ہے گھس آتا ہے اور دوسرے ممالک کیلئے یہاں احتجاجی مظاہرے ہوتے ہیں۔ انہوں نے کہا کہ ملک میں ہر شعبہ میں کرپشن ہے، پاکستان کی کمزوری کی وجہ جمہوریت پر شب خون مارنا ہے، یہاں قدم قدم پر جمہوریت کا گلہ گھونٹا گیا۔ انہوں نے کہا کہ ملک کا آئین یہ کہتا ہے کہ ملک میں حاکمیت اعلیٰ اللہ تعالیٰ کی ذات ہے اور عوام کے منتخب نمائندے اسے بطور امانت استعمال کریں گے، لیکن یہاں حکمران آئین کے آرٹیکل 62اور 63پر پورا نہیں اترتے، انہوں نے اپنی اولادیں تیار کی ہوئی ہیں کہ وہ ان کے بعد اقتدار سنبھالیں گی۔

 علامہ راجہ ناصر عباس نے کہا کہ حکمران عوام کو دھوکادے کر اقتدار میں آتے ہیں، پارلیمنٹ میں جھوٹاخطاب کرتے ہیں، یہ اخلاقی طور پر کمزور لوگ ملک کو بحرانوں سے نہیں نکال سکتے، انہوں نے کہا کہ ہمارے بہت سے کارکن ایک طویل عرصے سے لاپتہ ہیں، لیکن کوئی ان کے بارے میں نہیں بتا رہا، یہ کس قسم کا قانون ہے، ڈی آئی خان سے ایک نوجوان کو غائب کیا گیا، پانچ برس گزر گئے ہیں ناصر حسین کا کوئی علم نہیں کہ زندہ ہے یا مار دیا گیا ہے،پنجاب سے ہمارے علماء اور پڑھے لکھے پرامن نوجوانوں کو غائب کیا گیا ہے،جن کا تاحال کوئی پتہ نہیں،یاد رکھیں حکومتیں کفر سے تو باقی رہ سکتی ہیں مگر ظلم سے نہیں،ہمارے چوبیس ہزار شہداء کے ورثا کو تو انصاف نہیں دے سکے لیکن دہشتگردوں اور ان کے سرپرستوں کی خوشنودی کے لئے ہم پر ریاستی جبر جاری ہیں،علامہ راجہ ناصر عباس نے کہا کہ انسان کی طرح وطن کی بھی ناموس ہوتی ہے، ملک کے دشمن ، عوام کے بھی دشمن ہوتے ہیں لیکن یہاں ملک کے دشمنوں کو گھربلایا جاتا ہے، مودی بنگلہ دیش میں کھڑے ہوکر تسلیم کرتا ہے کہ پاکستان توڑنے میں اس کا کردار تھالیکن نوازشریف اسے گلے لگاتا ہے،۔ انہوں نے کہا کہ دعویٰ کیا جاتا ہے کہ ملک سے دہشت گردی ختم ہو گئی ہے، لیکن یہ پارا چنار میں پھر دھماکہ ہو گیا، معصوم بچے بھی نشانہ بنے قبائلی علاقوں میں واحد کرم ایجنسی ہے جس کے لوگ سب سے زیادہ محب وطن ہیں، انہوں نے پاکستان کے جھنڈے لگا رکھے ہیں، لیکن ان کا جیناحرام کر رکھا ہے، پولیٹکل انتظامیہ بھی انہیں ریاستی تشدد کا نشانہ بنارہی ہے اور دہشت گردبھی انہی پر حملے کررہے ہیں۔ راستے میں درجنوں چیک پوسٹیں ہیں پھر بھی دہشت گردوہاں پہنچ جاتے ہیں۔ انہوں نے کہا کہ نیشنل ایکشن پلان ناکام ہو چکا ہے، ملک میں دہشتگردوں کیلئے کوئی روک ٹوک نہیں، وہ سرعام دندناتے پھر رہے ہیں۔