وحدت نیوز(گلگت) مجلس وحدت مسلمین گلگت بلتستان کے ترجمان محمد الیاس صدیقی نے اپنے ایک بیان میں کیا ہے دیامر کے رہنماء ڈاکٹر زمان کی گرفتاری بلاجواز ہے فوری طور پر رہا کیا جائے۔ ڈاکٹر زمان کی گلگت بلتستان میں امن و امان کے قیام کے سلسلے میں بیش بہا خدمات ہیں جو دیامر کی عوام کو ترقی کی راہ پر گامزن کرنے اور علاقے میں ترقی کی نئی راہیں کھولنے میں مصروف عمل ہیں۔ ڈاکٹر زمان کی ملی اور قومی خدمات اور سیاسی افق پر ان کے بڑھتے ہوئے اثر رسوخ سے علاقے کے سیاسی پنڈت انتہائی خوفزدہ ہیں اور وہ ڈاکٹر زمان کو اپنے راستے کی دیوار سمجھتے ہیں۔ انہوں نے کہا کہ ڈاکٹر زمان دیامر کی واحد شخصیت ہیں جو علاقے کے سیاسی پنڈتوں کو ناکوں چنے چبوانے کی صلاحیت رکھتے ہیں۔ ڈاکٹر زمان کی گرفتاری کے خلاف دیامر میں احتجاج کرنے والوں کی مکمل حمایت کرتے ہیں۔
انہوں نے کہا کہ ڈاکٹر زمان کے خلاف قائم مقدمات جھوٹ اور انتقامی سیاست پر مبنی ہیں اور نگران حکومت سیاسی دباؤ کا شکار نظر آ رہی ہے۔ وفاق میں براجمان مسلم لیگ نواز اپنی مرضی کی نگران حکومت کو گلگت بلتستان کے عوام پر مسلط کر کے مرضی کے نتائج حاصل کرنے کی ناکام کوشش کر رہی ہے۔ انہوں نے کہا کہ نگران حکومت جو مسلم لیگ نواز کی مرضی سے تشکیل پائی ہے اور علاقے کے عوام کے امنگوں کے بالکل برعکس ہے۔ نگران حکومت میں ایسے افراد کو شامل کیا گیا جو کسی نہ کسی طرح سے مسلم لیگ نواز کے خیر خواہ ہیں۔ انہوں نے کہا کہ ڈاکٹر زمان کو فوری طور پر الزامات سے بری کر کے رہا نہ کیا گیا تو علاقے میں شدید بے چینی پیدا ہوگی اور ہم گلگت بلتستان میں ان کی رہائی کیلئے تحریک چلانے پر مجبور ہونگے۔
وحدت نیوز (اسلام آباد) مجلس وحدت مسلمین نے گلگت بلتستان کی نگران حکومت اور چیف الیکشن کمشنر کو مسترد کرتے ہوئے احتجاجی تحریک شروع کرنے کا فیصلہ کیا ہے۔اسلام آباد میں مجلس وحدت مسلمین کی کور کمیٹی کا اجلاس ہوا جس میں ایم ڈبلیوایم کے مرکزی سیکریٹری امور سیاسیات ناصر عباس شیرازی، اسد عباس نقوی سمیت دیگر کور کمیٹی کے ممبران نے شرکت کی۔ کورکمیٹی کے اجلاس میں گلگت بلتستان کے الیکشن اور آئندہ کے اتحاد پر غور کیا گیا۔ اسلام آباد سے جاری اعلامیے کے مطابق، کورکمیٹی ایم ڈبلیو ایم نے گلگت بلتستان نگران حکومت اور الیکشن کمشنر کو مسترد کرتے ہوئے کہا ہے کہ موجودہ سیٹ اپ میں غیر جانبدار الیکشن ممکن نہیں ہیں۔ ترجمان ایم ڈبلیو ایم کا کہنا ہے کہ اٹھائیس جنوری کو اسلام آباد میں ہم خیال جماعتوں کا اجلاس طلب کرلیا گیا ہے جس میں آئندہ کے لائحہ عمل کا اعلان کیا جائیگا۔ کورکمیٹی کے ا جلاس سے گفتگو کرتے ہوئے سیکرٹری سیاسیات ناصر عباس شیرازی کا کہنا تھا کہ ہمارا مطالبہ ہے کہ نگران حکومت کو ایسے افراد پر مبنی ہونا چاہیے جن کی ساکھ پر کوئی سوال نہ اٹھا سکے اور ان افراد میں شفاف الیکشن کرانے کی اہلیت ہو، الیکشن میں تاخیر کو بھی برداشت نہیں کیا جائیگا۔ انہوں نے کہا کہ نون لیگ کو کسی صورت الیکشن ہائی جیک نہیں کرنے دیں گے۔ اگر ایسا کیا گیا تو گلگت بلتستان کو جام کرکے رکھ دیں گے اور ملک بھر میں احتجاج کریں گے، مجلس وحدت مسلمین اس ساری تحریک کو لیڈ کریگی۔ انہوں نے کورکمیٹی کو بتایا کہ گلگت بلتستان کے الیکشن کے حوالے سے مسلم لیگ ق سمیت تمام اتحادی جماعتیں رابطے میں ہیں۔
وحدت نیوز (کوئٹہ) پانچویں سالانہ سیرت مصطفیٰ (ص) کانفرنس سے خطاب کرتے ہوئے مجلس وحدت مسلمین بلوچستان کے سیکریٹری جنرل علامہ مقصود علی ڈومکی نے کہا ہے کہ پیغمبر رحمت (ص) کے ماننے والے دنیا کو امن، اخوت، محبت اور سلامتی کا درس دیتے ہیں، ظلم و ستم اور دہشت پھیلانے والوں کا دین مقدس اسلام اور پیغمبر رحمت (ص) سے کوئی تعلق نہیں ہے۔ دہشت گرد امت مسلمہ کے پاکیزہ کردار پر بدنما داغ ہیں، کیونکہ اسلام میں ہر کام کا آغاز بسم اللہ الرحمان الرحیم سے ہوتا ہے، یعنی رحمان اور رحیم کے تذکرے کا مقصد رحمت الٰہی کا احساس ہے اور نبی کریم (ص) کا پیغام بھی سراسر رحمت ہے۔ انہوں نے کہا کہ دنیائے اسلام اپنی مظلومیت کو طاقت میں بدلے، اور سامراجی سازشوں کو سمجھے۔ انسان دشمن سامراجی قوتیں اپنے استعماری عزائم کی تکمیل میں دین مقدس اسلام کی انقلابی تعلیمات کو سب سے بڑی رکاوٹ سمجھتی ہیں کیونکہ اسلامی بیداری اور احیائے اسلام کی تحریک اب عالمی تحریک میں بدل چکی ہے۔ انہوں نے لبنان کے ممتاز انقلابی رہنماء شہید اسلام عماد مغنیہ کے جواں سال فرزند جہاد مغنیہ کی غاصب اسرائیل کے ہاتھوں شہادت پر گہرے دکھ کا اظہار کرتے ہوئے کہا ہے کہ اسرائیل اپنی شیطانیت کے باعث جلد ہی عبرتناک انجام سے دوچار ہوگا۔ توہین رسالت (ص) سے تکفیری گروہ کی سرپرستی تک، مزارات انبیاء کی توہین سے دہشت گردی تک ہر فساد میں بلواسطہ اور بلاواسطہ اسرائیلی ہاتھ نظر آتا ہے۔ سیرت مصطفیٰ (ص) کانفرنس میں معروف نعت خوان سید عرفان حیدر، اور سعید احمد براہوی نے بارگاہ رسالت (ص) میں نذرانہ عقیدت پیش کیا۔
وحدت نیوز (مظفرآباد) اولیاء اللہ کے مزارات منبع رشد و ہدایت ہیں ، سر زمین کشمیر فیضان اولیاء کی نسبت مشہور، برصغیر کے خطے میں اولیاء اللہ کی اسلام کے لیئے بے بہا خدمات ہیں ، ان خیالات کا اظہار سیکرٹری جنرل مجلس وحدت مسلمین آزاد جموں و کشمیر علامہ سید تصور حسین نقوی الجوادی نے اپنی کابینہ کے ہمراہ عرس سخی سائیں سہیلی سرکارؒ میں شرکت و سجاد نشین دربار عالیہ پیر سید عابد حسین بخاری سے ملاقات کے دوران کیا۔
انہوں نے کہا کہ اولیاء اللہ نے برصغیر میں اسلام کے حوالے سے بے بہا خدمات سرا نجام دیں ہیں ، اسلام کی تبلیغ و ترویج کے سلسلہ میں بزرگان کی خد مات تا زیست یاد رکھی جائیں گی، لاکھوں لوگ انہی کی وجہ سے اسلام کے دائرے اندر آئے ، آج بھی ضرورت اس امر کی ہے کہ ہم اولیاء کے اس پہلو کی روشنی میں اسلام کے لیئے اپنے آپ کو وقف کر دیں ، انہوں نے کہا کہ مزارات اولیاء اللہ منبع رشد و ہدایت ہیں ، ہزار ہا لوگ روزانہ کی بنیاد پر اپنی امیدیں لیکر ان کے مزارات پر حاضری دیتے ہیں ، سخی سائیں سہیلی سرکارؒ انہی بزرگان میں سے ایک ہیں ، سخی سائیں سہیلی سرکارؒ نے صرف مسلمانوں کے لیئے اپنی شخصیت کو نہیں منوایا بلکہ مہاراجہ ہری سنگھ جیسے لوگ آپ کے گرویدہ تھے، آپ کی مظفرآباد آمد سے شہر کی رونقیں دو بالا ہوئیں ، مظفرآباد میں آپ کے دربار عالی کو مرکزی حثیت حاصل ہے۔
انہوں نے کہا کہ کشمیر کی سرزمین اولیاء اللہ کی سرزمین ہے ، اسی لیئے تو اسے جنت نظیر کہا جاتا ہے، کشمیر کے لوگ مزارات و مزارات سے منسلک لوگوں کی بڑی قدر کرتے ہیں ، سرزمین کشمیر فیضان اولیاء کی نسبت انتہائی مشہور ہے، نہ صرف کشمیر کے لوگ ان مزارات و درباروں سے وابستہ ہیں بلکہ پاکستان سے بھی لوگ اپنی حاضری لگوانے آتے ہیں ۔آج بھی امت مسلمہ اگر صرف انہی کے تعلیمات اور خدمات کے وسیلے سے محمدؐ و آل ؑ محمدؐ سے وابستہ ہو جائے تو یقینی ہے کہ ہر طرح کی دہشت گردی و انتہاء پسندی کا خاتمہ ہو سکتا ہے، ناامنی جیسے مسائل حل ہو سکتے ہیں ، ہر مصیبت و مشکل ٹل سکتی ہے۔انہی اولیاء کی تعلیات جو کہ امن و محبت ، اخوت و بھائی چارے کی ہیں ان کو عام کیا جائے، سامان دشمنی جلا دیا جائے، اولیاء کے درس کو عام کرتے ہوئے باہم دست و گریبان ہونے کے بجائے کندھے سے کندھا ملا لیں ، اسی میں ہم سب کی بھلائی ہے۔
وحدت نیوز (اسلام آباد) مجلس وحدت مسلمین کے مرکزی سیکرٹری امور سیاسیات ناصرعباس شیرازی نے کہا ہے کہ دہشتگردی کیخلاف بے رحمانہ آپریشن ہونا چاہیے، دہشتگردوں کو کسی مسلک یا فرقہ کی آڑ یا شلٹر تلے چھپنے نہیں دینا چاہیئے۔ دہشتگردی کی لعنت نے پاکستان کو ناقابل یقین نقصان پہنچایا ہے، اسلام کے نام پر قتل و غارت گری کرنے والے سب سے بڑے گستاخ رسول ﷺ ہیں۔ ان خیالات کا اظہار انہوں نے نیشنل کونسل آف آرٹس اسلام آباد میں منعقدہ قومی سیرت کانفرنس سے خطاب کرتے ہوئے کیا۔ ناصر عباس شیرازی کا کہنا تھا کہ ہم حسین علیہ السلام ابن علی کی سیرت پر چلتے ہوئے موجودہ دور کے یزیدوں کو اسلام کا نقاب اڑ کر اسلام اور پاکستان کا قتل عام نہیں کرنے دیں گے۔ جو مدارس دہشتگردی میں ملوث ہیں ان کیخلاف کارروائی ہونی چاہیئے۔ خواہ کا تعلق کسی بھی مکتب فکر سے کیوں نہ ہو۔ انہوں نے کہا کہ سانحہ پشاور کے بعد پوری دہشتگردی کیخلاف متحد ہوچکی ہے لٰہذا کسی کو یہ اجازت نہیں دے سکتے کہ وہ اس اتفاق رائے کو توڑے۔
ناصرعباس شیرازی کا کہنا تھا کہ تمام مسالک کے مدارس کا احتساب ہو سکتا ہے اور وہ ریاست اور قوم کے سامنے جوابدہ ہیں۔ ریاست کا فرض ہے کہ وہ ایسے مدارس اور گراہوں کو پوائنٹ آوٹ کرے اور انہیں قانون کے شکنجے میں لائے جو دہشتگردی میں ملوث ہیں۔ دہشتگردی کیخلاف کارروائی میں مجلس وحدت مسلمین غیرمشروط مکمل تائید و حمائت کرتی ہے۔ سیکرٹری سیاسیات کا کہنا تھا کہ آج امت مسلمہ تفرقوں میں بٹ گئی ہے، یہی وجہ ہے کہ آج عراق و شام اور افغانستان میں بےگناہوں کا خون بہہ رہا ہے۔ پوری قوم کی نجات آنحضرت ﷺ کی سیرت پر عمل کرنے میں ہے۔ آپ ﷺ کی ذات گرامی انسانوں کو اعلیٰ اقدار تک پہنچانے کیلئے مبعوث ہوئی تھی، معاشرے کو جہالت سے نجات دلانے آئی تھی، انہوں نے کہا کہ شاتم قرآن ٹیری جونز اور شاتم رسول ﷺ چارلی ہیبڈو کے ساتھ ساتھ اسلام کے نام پر نعرہ تکبیر لگا کر بے گناہوں کو زبح پرنے والے بھی گستاخ رسول ﷺ ہیں ، پاکستان میں موجود تمام علمائے کرام، مدارس کے مہتمیمین کی ذمہ داری ہے کے اسلام کے نام پر بے گناہوں کا قتال کرنے والوں سے اظہار برائت کریں ، آج ہماری ذمہ داری ہے کہ سیرت پیغمبر اکرم ﷺکےنقش قدم پر چلتے ہوئے پاکستان کو اس کے قیام کے مقاصد کی طرف لے کر جائیں۔ اس موقع پرچیئرمین سینیٹ نیئر حسین بخاری، وزیر مملکت برائے مذہبی امورپیر امین الحسنات ،ناظم اعلیٰ جماعت اہلسنت پیر ریاض حسین شاہ،سابق آئی جی پنجاب ذوالفقار چیمہ،سربراہ جمیعت علمائےاسلام مولانا سمیع الحق، اورمرکزی رہنما جمیعت علمائے پاکستان شاہ اویس احمد نورانی بھی موجود تھے اور کانفرنس سے خطاب کیا۔
وحدت نیوز (اسکردو) مجلس وحدت مسلمین پاکستا ن بلتستان ڈویژن کے سیکرٹری جنرل علامہ آغا علی رضوی نے فرانس کے ہفت روزہ جریدے چارلی ہیبڈوکی جانب سے نبی پاک ؐکی شان اقدس میں جسارت کو افسوسناک ، قابل مذمت اور شرانگیزی قرار دیتے ہوئے اسے کنیساو کلیسا کی جانب سے اسلام کے خلاف سازش قرار دیا ہے۔ اسکردو بشو میں عوامی اجتماع سے خطاب کرتے ہوئے آغا علی رضوی نے کہا ہے کہ فرانس کی جانب ہونے والی اس شیطنیت کے خلاف عالم اسلام قیام کرنا چاہیے۔انہوں نے کہا کہ اس شیطانی رسالے کے ذریعے سوا ارب مسلمانوں کا دل دکھایا گیا ہے یہ آزادی صحافت نہیں بلکہ عالم اسلام کے مقدسات کی توہین اور اسلام کے خلاف غلیظ ترین پروپیگنڈہ ہے۔ شیطانی رسالہ چھاپنے والوں حملہ کرانا اور یمنی القاعدہ کا حملہ کی ذمہ داری قبول کرنا گہری سازش کا نتیجہ ہے۔یورپی اقوام اخلاقی طور پر پست ہوچکی ہے اور پورپ میں موجود باضمیر افراد حقیقت کی کھوج میں اسلام تک بڑی تعداد میں پہنچ رہے ہیں اور یورپ میں اسلام کی تیزی سے پھیلنا یہود و نصاری ٰ اور امریکہ واسرائیل کے لیے نیک شگون نہیں لہذا رسالے پر کیے گئے حملے کے آڑ میں اسلام کو بدنام کرنے کی کوشش زوروں پر ہے ۔انہوں نے کہا کہ وطن عزیز اسلام کے نام پر وجود میں آیا اور اسلامی ریاست ہے ۔ پاکستان کے ریاستی اداروں کو چاہیے کہ فرانس کی اس گستاخانہ عمل پر ان سے سفارتی بائیکاٹ کر کے سفیر کو ملک بدر کرنا چاہیے حضور اکرم ؐ کی شان سے بڑھ کر ہمیں کوئی تعلقات اور کوئی مفاد عزیز نہیں ہے۔اگر تمام اسلامی ممالک اپنے اپنے ملک میں موجود فرانس کے سفارت خانوں کو بند کرا کے سفیرون کو ملک بدر کرے اور فرانس میں موجود تمام اسلامی ممالک کے سفرا ء ک و واپس بلایا جائے تو آئندہ کسی بھی پورپی ریاست کو یہ جرائت نہیں ہوسکے گی۔
