وحدت نیوز (نصیرآباد) مجلس وحدت مسلمین بلوچستان کے سیکریٹری جنرل اور شہداء کمیٹی کے چیئرمین علامہ مقصود علی ڈومکی نے ایک وفد کے ہمراہ کمشنرنصیر آباد ڈویژن احمد عزیز تارڑسے ملاقات کی۔ ملاقات میں سانحہ چھلگری آٹھ محرم خود کش حملے سے متعلق مسائل پر تفصیلی تبادلہ خیال کیا گیا۔ ملاقات میں صوبائی ڈپٹی سیکریٹری جنرل مولانا سید ظفر عباس شمسی و دیگر موجود تھے۔

اس موقع پرگفتگو کرتے ہوئے علامہ مقصود علی ڈومکی نے کہا کہ چار ماہ گذر جانے کے باوجود دھشت گردوں کی عدم گرفتاری ریاستی اداروں کی کارکردگی پر سوالیہ نشان ہے۔ وارثان شہداء آج بھی مجرموں کی گرفتاری کے لئے حکمرانوں سے انصاف کی امیدف لئے بیٹھے ہیں۔

انہوں نے کہا کہ نصیر آباد ڈویژن سمیت بلوچستان بھر میں دہشت گردی کے مراکز اور سہولت کار موجود ہیں جن کے خلاف بھرپورآپریشن کی ضرورت ہے۔ بلوچستان اور سندہ میں دھشت گردی کے لئے مستونگ کے دھشت گرد آتے ہیں۔ مستونگ دھشت گردی کا گڑہ بن چکا ہے، پاک فوج مستونگ میں دھشت گردی کے مراکز کے خلاف آپریشن کرے۔

اس موقع پر کمشنر رفیق احمد تارڑ نے کہا کہ دھشت گرد عوام اور ملک کے دشمن ہیں جن کا خاتمہ ضروری ہے۔ ہم دھشت گردی کا خاتمہ چاہتے ہیں، اور اس سلسلے میں بھرپور کوشش کریں گے۔ انہوں نے کہا کہ زخمیوں کے علاج معالجے کے لئے صوبائی حکومت کو باضابطہ طور پر مراسلہ ارسال کیا ہے، جبکہ یادگار شہداء ٹاور کی تعمیر کے سلسلے میں پیش رفت کی جائے۔

وحدت نیوز (سکردو) مجلس وحدت مسلمین پاکستان گلگت بلتستان کے رہنما اور رکن گلگت بلتستان قانون ساز اسمبلی کاچوامتیاز حیدرخان نے اپنے ایک بیان میں کہا ہے کہ پاک چین اقتصادی راہداری میں گلگت بلتستان کو متناسب حصہ نہ دیا گیا تو جو حالات پیش آئیں گے اس کی ذمہ داری صوبائی اور وفاقی حکومت پرعائد ہوگی۔ گلگت بلتستان کے عوام کا صبر کا پیمانہ لبریز ہوچکا ہے، کہیں ایسا نہ ہو کہ یہ عوام ایسا اقدام اٹھانے پر مجبور ہوجائے جسکے نتیجے وطن عزیز کا سب سے بڑا منصوبہ تعطل کا شکار ہو۔ سی پیک کمیٹی میں گلگت بلتستان کو نمائندگی نہ دینا اس بات کی دلیل ہے کہ جی بی کے حصے میں کچھ بھی نہیں ہے۔ شریف برادران کے قصائد پڑھنے والے بتائیں کہ بلیک اینڈ وائٹ میں سی پیک میں جی بی کے لیے کیا ہے اور سی پیک کمیٹی میں نمائندگی کیوں نہیں ہے۔ اکنامک کوریڈور نہ پورے ہونے والا خواب بننے سے قبل گلگت بلتستان کے محرومیوں کا ازالہ کیا جائے۔

انہوں نے مزید کہا کہ دیامر کے غیور عوام، غذر کے عوام، ہنزہ نگر کے عوام اور گلگت بلتستان کے عوام اپنے حقوق چھیننے کے لیے تیار رہیں، موجودہ حکومت سے حقوق ملنا ممکن نہیں ہے۔ اگر گلگت بلتستان کے عوام کسی قسم کی سازش کا شکار ہوئے بغیر متحد ہوجائیں تو کسی بھی غاصب کی ہمت نہیں ہوگی کہ جی بی کے حقوق پر ڈاکہ ڈالے۔ گلگت بلتستان کی صوبائی اور وفاقی حکومت اکنامک کوریڈور میں حصہ کے نام پر لولی پاپ دینے کی کوشش کرے گی اور عوام کو تقسیم کرکے اپنا الو سیدھا کرے گی، جس کے لیے عوام کو ہشیار رہنے کی ضرورت ہے۔ میں گلگت بلتستان کے غیور عوام سے گزارش کرتا ہوں کہ اپنے حقوق کے لیے حصول کے لیے میدان میں نکلنے کے لیے آمادہ رہیں، بغیر کسی رنگ و نسل اور فرقے کی تمیز کے سب بھائی بھائی بن کر آگے بڑھنے کی ضرورت ہے۔ اگر اس موقع پر بھی عوام خاموش رہے اور صوبائی حکومت کی جھوٹی تسلیوں اور کھوکھلے دعووں پر یقین کرتے رہے تو آنے والی نسلیں ہمیں نہیں بخشیں گی۔

وحدت نیوز (سکردو) مجلس وحدت مسلمین بلتستان کے رہنماء اور ممتاز سماجی کارکن جی ایم پاروی نے اسلام آباد میں ڈاکٹر کاظم سلیم سے ملاقات کی اور بلتستان خصوصاً کھرمنگ کی سیاسی اور سماجی صورتحال پر گفتگو کی۔ ملاقات میں جی ایم پاروی نے کھرمنگ میں مسلم لیگ نون کے بعض عناصر کی طرف سے سرکاری محکموں میں بے جا مداخلت کی طرف اشارہ کرتے ہوئے کہا کہ اقتدار مافیا پچھلے پانچ سال پیپلز پارٹی کا پلیٹ فارم استعمال کرکے کرپشن اور لوٹ مار کرتے ہے، اب یہ لوگ نون لیگ کی حکومتی چھتری استعمال کرکے اپنی کرپٹ روایت کو زندہ رکھنا چاہتے ہیں اور محکمہ تعمیرات عامہ کے بعض کرپٹ آفیسران سے ملکر سرکاری ٹھیکوں میں بندر بانٹ کررہے ہیں۔ انہوں نے مزید کہا کہ نون لیگ نے فوٹو سیشن کے ذریعے کھرمنگ کو جنت بنا دیا ہے لیکن عملی طور کارکرگی صفر ہے۔ تقریبا سال گزرنے کو ہے لیکن سیلاب متاثرین کی ابتک بحالی نہیں ہوسکی، بعض جگہوں پر اپنی پارٹی کے لوگوں کو نوازنے کیلئے غلط سروے کے ذریعے کروڑوں کے تخمینے بنوائے گئے۔ ڈاکٹر کاظم سلیم نے اس موقع پر کہا کہ کرپشن اور بدعنوانی معاشرتی بیماری ہے، اس کا تعلق کسی خاص پارٹی سے نہیں بلکہ بیمار لوگ ہر معاشرے میں پائے جاتے ہیں، ضرورت اس امر کی ہے کہ معاشرہ ایسے افراد کی حوصلہ شکنی کرے تاکہ معاشرے میں اچھی روایات کو پنپنے کا موقع مل سکے۔ اگر ایسا نہیں کیا گیا تو یہ من حیث القوم ہم سب کی بدبختی ہوگی۔

وحدت نیوز(کوئٹہ)مجلس وحدت مسلمین کے رہنما و ممبر بلوچستان اسمبلی آغاسید محمد رضا نے  ( Glow )گلو آرگنائزیشن کے صدر عباس علی کو مبلغ ایک لاکھ تیس ہزار روپے کا چیک دےدیا.یاد رہے کہ پچھلے سال ( Glow )گلو آرگنائزیشن کی جانب سے فوٹوگرافرز ورکشاپ کا انعقاد کیا گیا تھا.جن میں 15 فوٹوگرافرز نے حصہ لیا. ایم پی اے آغا رضا نے نیو جنریشن فوٹو گرافرز کی حوصلہ افزائی کے لیے فی کس پانچ ہزار روپے کا اعلان کیا تھا. علاوہ ازیں گلو آرگنائزیشن کے لیے ایک عدد ملٹی میڈیا پروجیکٹر دینے کا وعدہ بھی کیا تھا.

وحدت نیوز (اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے جے آئی ٹی اورمختلف میڈیا رپورٹس میں سانحہ عاشورہ کراچی میں ایک سیاسی جماعت کے ملوث ہونے کے انکشاف پر ردعمل کا اظہار کرتے ہوئے کہا ہے کہ سانحہ عاشورہ کراچی کے حوالے سے تحقیقاتی اداروں کی متضاد رپورٹیں تفتیشی عمل کو مشکوک بنا رہی ہیں۔اس واقعہ میں ملوث ایک کالعدم مذہبی جماعت کے کچھ کارکنوں کی ماضی میں بھی گرفتاری ظاہر کی گئی ہے۔تحقیقاتی اداروں کی حالیہ رپورٹ سے مزید پیچیدگیاں اور ابہام پیدا ہو رہے ہیں۔یہ بات سمجھ سے بالاتر ہے کہ جوگرفتاریاں پہلے عمل میں لائیں گئیں انہیں درست تسلیم کیا جائے یا جے آئی ٹی کی موجودہ رپورٹ کو قابل اعتبار سمجھا جائے۔حکومت ملت تشیع کے بے گناہ افراد کے قتل میں ملوث ان افراد کو منظر عام پر لائے جن کے خلاف ٹھوس شواہد موجود ہیں۔سانحہ عاشورہ میں ملوث دہشت گرد مذہبی ہوں یا سیاسی ملٹری کورٹ میں اسپیڈی ٹرائل کے زریعے فوری عبرت ناک سزادی جائے۔

انہوں نے کہا کہ قاتل کسی بھی رعایت کے قطعی مستحق نہیں ان کا تعلق چاہے کسی بھی سیاسی یا مذہبی جماعت سے ہو ۔دہشت گردی میں ملوث ہر شخص کا کیس فوجی عدالت میں بھیجا جائے تاکہ کڑے احتساب کا عمل بغیر کسی دباو کے بلاتاخیر اپنے انجام کی طرف بڑھے۔علامہ ناصر عباس نے حکومت سے مطالبہ کیا ہے سانحہ عاشور کراچی،سانحہ علمدار روڈ کوئٹہ،سانحہ ہزارہ ٹاون کوئٹہ، سانحہ حیات آباد اور سانحہ شکارپورسمیت ملک بھر میں ہونے دہشت گردی کے تمام واقعات کا ٹرائیل فوجی عدالتوں میں کیا جائے ان واقعات میں ملوث افراد اور ان کے سہولت کاروں کو عبرت ناک سزائیں دی جائیں۔ جب تک ان مذموم عناصر کی بیخ کنی نہیں ہوتی تب تک ملک میں پائیدار امن کا قیام اور دہشت گردی کے عفریت سے چھٹکارا ممکن نہیں۔

وحدت نیوز (روہڑی )مجلس وحدت مسلمین پاکستان کے مر کزی رہنماء اور شہداء کمیٹی کے چیئرمین علامہ مقصود علی ڈومکی نے روہڑی میں منعقدہ شہدائے وقار اسلا م کا نفرنس سے خطاب کیااور سید عاطف رضاشاہ کی رہائش گاہ پرصحافیوں سے گفتگو کی۔

اس موقع پر علامہ مقصود علی ڈومکی نے کہا کہ آج دنیا بھر میں وقار اسلام کے خلاف ، انسان دشمن سامراجی قوتیں بر سر پیکار ہیں، کیوں کہ اسلام کا وقارعالمی استعماری ایجنڈا کی راہ میں سب سے بڑی رکاوٹ ہے۔ دہشت گرد گروہ امریکہ اور اسرائیل کے پیدا کردہ ہیں، جنہیں آل سعود اور سامراجی ممالک کی مکمل سر پرستی حاصل ہے۔ مزاحمتی بلاک کاسامراج دشمن کردار عالم انسانیت کے لیے امن کی امیداور روشنی کی کرن ہے۔حزب اللہ لبنان،ایک مہذب اوراعلیٰ انسانی اقدار کی علمبردار جماعت ہے۔جس نے کبھی ظلم و تشدد اور دہشت گردی نہیں کی ۔ حزب اللہ، امت مسلمہ اور عالم عرب کے لئے فخر و زینت ہے۔

انہوں نے کہا کہ شکارپور اور جیکب آبادسمیت سندہ بھر میں دہشت گردی کے مراکز اور سہولت کار موجود ہیں جن کے خلاف فوجی آپریشن کی ضرورت ہے۔ سندہ میں دھشت گردی کے لئے مستونگ کے دھشت گرد آتے ہیں۔ مستونگ دھشت گردی کا گڑہ بن چکا ہے، پاک فوج مستونگ میں دھشت گردی کے مراکز کے خلاف آپریشن کلین اپ کرے۔