وحدت نیوز(اسلام آباد) مجلس وحدت مسلمین پاکستان کے وائس چیئرمین علامہ سید احمد اقبال رضوی نے میڈیا سیل سے جاری مذمتی بیان میں کہا ہے کہ پیٹرولیم مصنوعات کی قیمتوں میں اضافے کو یکسر مسترد کرتے ہیں، عوام پہلے سے ہی مہنگائی کی چکی میں پس رہے ہیں، ڈیزل اور پیٹرول کی قیمتوں میں اضافہ ملک میں مزید مہنگائی کے طوفان کا باعث بنے گا۔

انہوں نے کہا کہ حکومت کے اس ظالمانہ اقدام نے عام آدمی کے لیے جینا دوبھر کر دیا ہے اور دو وقت کی روٹی کا حصول مشکل بنا دیا ہے، جس سے مہنگائی میں ریکارڈ کمی کے حکومتی دعووں کی بھی قلعی کھل گئی ہے، ایک طرف لوگ اپنی گھریلو اشیاء اور اثاثے بیچ کر یا قرض لے کر زندگی گزارنے پر مجبور نظر آتے ہیں تو دوسری طرف عوام پر پیڑول بم گراکربےدرد اور بے حس حکمران ملکی وسائل اور قومی خزانے کو اپنی عیاشیوں پر لٹانے میں مصروف ہیں۔

وحدت نیوز(اسلام آباد) تحریک تحفظ آئین پاکستان کا سربراہی اجلاس محمود خان اچکزئی کی صدارت میں منعقد ہوا جس میں مجلس وحدت مسلمین پاکستان کے چیئرمین سینیٹر علامہ راجہ ناصر عباس، سابق اسپیکر قومی اسمبلی اسد قیصر، تحریک انصاف کے سیکرٹری جنرل سلمان اکرم راجہ، قومی اسمبلی میں اپوزیشن لیڈر عمر ایوب خان، سینیٹ کے اپوزیشن لیڈر شبلی فراز اور اپوزیشن اتحاد کے ترجمان اخونزادہ حسین نے شرکت کی۔

اجلاس کا بنیادی ایجنڈا 8 فروری کو مینڈیٹ پر ڈاکہ ڈالنے والی اس جعلی حکومت کے خلاف ملک گیر احتجاج کی کال تھی۔ اس حوالے سے مختلف آپشنز زیر غور آئے۔ ہم آئندہ چند دنوں میں باقاعدہ طور پر اپنی ان سیاسی سرگرمیوں کا اعلان کرنے جا رہے ہیں۔ اپوزیشن اتحاد کے کراچی دورے کا حتمی شیڈول بھی جلد ہی ترتیب دیا جائے گا۔  اپوزیشن اتحاد کی سب سے بڑی تشویش یہی ہے کہ اس جعلی فسطائی حکومت اور ان کے ہینڈلرز سے انصاف کی توقع نہیں رکھی جا سکتی مگر ستم یہ ہے کہ ملک کی موجودہ عدلیہ انصاف کی راہ میں رکاوٹ بن کر کھڑی ہوگئی ہے!

26 نومبر کو تحریک انصاف کے گرفتار 350 کارکنوں کو لاہور ہائی کورٹ راولپنڈی بینچ نے دو مہینے بعد جیل بھیج دیا لیکن پنجاب پولیس نے ان کارکنوں کو اٹک جیل سے نکال کر راولپنڈی ڈویژن کے مختلف تھانوں میں منتقل کر دیا ہے اور ان پر اٹک میں چار چار اور ایف آئی آرز کاٹے گئے ہیں۔ ان سب کو واپس پولیس تحویل میں دے دیا گیا۔ یہ ہے ان کی فسطائیت کا عالم کہ عدالت کا حکم ان کے سامنے کوئی وقعت نہیں رکھتا جبکہ عدلیہ آنکھیں موندے بیٹھی ہے۔

ہماری انسانی حقوق کی تنظیموں سے اپیل ہے کہ پنجاب حکومت کی ان غیر قانونی تصرفات پر ان کا سخت نوٹس لیں۔پاکستان تحریک انصاف اور اپوزیشن اتحاد اپنے کارکنوں کو ان کے اس ظلم اور فسطائیت سے آزادی دلائی گی۔ یہ جعلی حکومت ہمارا حوصلہ ان ہتھکنڈوں سے پست نہیں کرسکتی۔حال ہی میں صدر آصف علی زرداری کے دستخط کے بعد پیکا آرڈیننس کا اطلاق کرنا بھی ان کی ہماری رہی سہی جمہوری آزادیوں کا گلہ گھونٹ دینے کی ایک بزدلانہ کوشش ہے جس کے مدمقابل اپوزیشن اتحاد صحافتی برادری کے ساتھ ڈٹ کر کھڑے رہیں گے۔

وحدت نیوز(گلگت) صدر ایم ڈبلیو ایم ضلع کھرمنگ اور ممبر گلگت بلتستان اسمبلی علامہ شیخ اکبر علی رجائی کی پیش کی گئی تجویز صوبائی کابینہ سے منظور، سرکاری سکیموں میں چھوٹے سکیل تعیناتیوں کیلئے لینڈ ڈونرز کو ترجیح دینے کا فیصلہ ہوگیا۔

گلگت بلتستان بھر میں سرکاری تعمیرات کیلئے صرف زمین کا معاوضہ ناکافی تھا جسکی وجہ سے اکثر منصوبے تاخیر کا شکار اور عوام میں اختلاف کا سبب بن رہا ہوتا تھا۔

 اس اہم فیصلے کے تناظر میں ایک طرف اراضی کے حصول کا مسئلہ آسان ہو جائیگا تو دوسری جانب چھوٹے سکیل کی ملازمتوں پر لینڈ ڈونرز کو نوکریاں مل سکیں گی۔

اس فیصلے کےبعد عوام میں خوشی کی لہر ملاحظہ کی گئی ہے ، عوام نے شیخ اکبر رجائی اور ایم ڈبلیوایم کی اس کوشش کو غریب عوام کے حق میں ایک اہم اقدام قرار دیا ہے ۔

وحدت نیوز(سکردو) ایم ڈبلیو ایم گلگت بلتستان کے صدر سید علی رضوی نے ایک بیان میں کہا ہے کہ پیکا ایکٹ کے خلاف صحافیوں کے دھرنے کی حمایت اور اس سیاہ قانون کی شدید مذمت کرتے ہیں۔ ملک بھر میں صحافی برادری کے دھرنوں کی مکمل حمایت کرتے ہیں اور پیکا ایکٹ جیسے آمرانہ قوانین کی شدید مذمت کرتے ہیں۔ آزاد صحافت کسی بھی جمہوری معاشرے کی ریڑھ کی ہڈی ہوتی ہے، اور اسے دبانے کی ہر کوشش بنیادی انسانی حقوق اور آزادی اظہار پر حملہ ہے۔ حکومت سے مطالبہ کرتے ہیں کہ وہ فوری طور پر اس غیر منصفانہ قانون کو واپس لے اور صحافیوں کو ان کے فرائض کی انجام دہی میں آزادانہ ماحول فراہم کرے۔