The Latest
وحدت نیوز (سکردو) شہید ومقاومت شہید حسن نصراللہ، شہید ہاشم صفی الدین ودیگر شہدائے القدس کی لبنان میں تدفین اور نماز جنازہ کے موقع پر سکردو میں ایک عوامی اجتماع منعقد کیا گیاجس میں ہزاروں عاشقان شہید نے بھرپور جوش وجذبے کے ساتھ شرکت کی، یہ شہید سید مقاومت کی یاد میں پاکستانن کا سب بڑا عوامی اجتماع تھا ۔
اس عوامی اجتماع کی میزبانی ایم ڈبلیو ایم نے کی اس موقع پر خطاب کرتے ہوئےانجمن امامیہ بلتستان کے صدر آغاباقر حسین الحسینی، ایم ڈبلیو ایم کے صوبائی صدر آغا سید علی رضوی، اپوزیشن لیڈر گلگت بلتستان اسمبلی کاظم میثم،سید مظاہر الحسینی، شیخ جواد حافظی، شیخ رضا بہشتی،علامہ شیخ اعجازحسین بہشتی ودیگر نے کہاہے کہ شہید مقاومت شہید حسن نصراللہ، شہید سید ہاشم سفی الدین ودیگر شہدائے مقاومت اسلامی نے اپنی جانوں کوقربان کر کے ثابت کرتے کہ محمد واآل محمد کے ماننے والے ظالم کے ماننے والے ظالم کے سامنے جھکنے سے شہادت کو ترجیح دیتے ہیں کیونکہ ظالم، جابر طاقتوں کے سامنے جھکنے سے بہتر ہے کہ امام حسین ؑ کی طرح شہیدہو جاوں آج ہمیں چاہئے کہ ہم ان شہداء کو سمجھیں کہ انہوں نے اپنی جانوں کا نذرانہ کیوں پیش کیا جو ہمیشہ زندہ رہنا چاہتے ہیں وہ اپنی جانیں قربان کرکے زندہ رہ جاتے ہیں باقی جو زلت وخواری کے ساتھ زندہ رہتاہے ان کا نام نشان مٹ جاتا ہے ان کے اپنے انہیں یاد نہیں رکھتے شہید حسن نصراللہ اور دیگر شہداء القدس سے دشمن ان کی شہادت کے بعد جتنا خوف زدہ ہوئے جتنا ان کی زندگی میں خوف نہیں کھایا تھا ہم بھی ان کے نقش قدم پر چلتے ہوئے ہمارے اور ہونے والے زیادتیوں پر خاموش نہیں رہیں گے سیاچن سے لے کر دیامر تک کے ایک ایک انچ زمینوں کا ہم حفاظت کریں گے کسی کو عوام پر ظلم ڈھانے کی اجازت نہیں دیں گے ظالم کے سامنے ہم سیسہ پلائی دیوار بن کر کھڑے ہوجائیں گے۔
اس موقع پر مختلف ایریاز سے لوگ ریلیوں کی شکل میں جلسے میں پہنچے سب سے بڑی ریلی علامہ شیخ اعجازحسین بہشتی کی قیادت میں کچورا سے برآمد ہوئی ،سینکڑوں گاڑیوں میں ہزاروں کی تعداد میں ریلی میں شریک ہوئے، ریلی میں شرکاء ہاتھوں میں شہید حسن نصراللہ ودیگر شہداء کی تصاویر بینرز اور پلے کارڈ اٹھائے ہوئے تھے جن پر امریکہ ، اسرائیل اور دیگر صہیونی طاقتوں کے خلاف نعرے درج تھے یادگار شہداء لبیک یاحسین ؑ ، لبیک خامنہ، لبیک یانصراللہ کے نعروں سے گونج اٹھے۔
وحدت نیوز (اسلام آباد) غاصب اسرائیلی افواج کے فضائی بمباری کے نتیجے میں شہید ہونے والے حزب اللہ لبنان کے سربراہ سید مقاومت شہید حسن نصراللہ ؒ اور ان کے جانشین سید ہاشم صفی الدینؒ کی تشیع جنازہ کے موقع پر مجلس وحدت مسلمین پاکستان کے سربراہ سینیٹر علامہ راجہ ناصرعبا س جعفری کی ہدایت پر ملک بھرمیں مجالس ترحیم، تعزیتی تقاریب اور عوامی اجتماعات منعقد ہوئےجن میں غیور پاکستانی عوام اور عاشقان شہداء نے عقیدتی اور مذہبی جوش وجذبے کے ساتھ بھرپور شرکت کی۔
کراچی ، لاہور، اسلام آباد، سکردو، گلگت، پشاور، حیدرآباد، ملتان، کوئٹہ سمیت ملک کے مختلف چھوٹے بڑے شہروں میں منعقدہ تقاریب میں شرکاء نے شہداء کے پاکیزہ لہو سے تجدید عہد کیا ، عالمی استعمارامریکا اور اسرائیل سے اظہار نفرت کرتے ہوئے شہداء کی یاد میں شمع بھی روشن کیں۔
مقررین نے شہدائے راہ قدس کی عظیم اور بے مثال قربانیوں کو خراج تحسین پیش کرتے ہوئے کہا کہ شہید سید حسن نصراللہ ؒ اور شہید ھاشم صفی الدین نے غزہ کے مظلوم اہل سنت مسلمانوں کے دفاع اور قبلہ اوّل کی آزادی کی راہ میں اپنی قیمتی جانیں قربان کی ہیں۔ ان قربانیوں کی بدولت دشمنان اسلام کی فرقہ واریت کیلئے کھربوں ڈالر کی سرمایہ کاری خاک میں مل چکی ہے ۔
مقررین نے اس عزم کا اعادہ کیا کہ ہم خون کے آخری قطرے تک شہدائے اسلام کے مشن کو زندہ رکھیں گے، یہ کربلا کا راستہ ہے جس میں سخت امتحانات سے گذرنا پڑتا ہے لیکن باآخر اس معرکہ حق وباطل میں فتح ہمیشہ حق اور اہل حق کا مقدر ہوتی ہے ۔
وحدت نیوز(لندن) بمناسبت برسی ڈاکٹر شہید محمد علی نقوی ودیگر شہدائے اسلام کو بھرپور انداز میں خراج تحسین پیش کرنے کیلئےتکریم شہداء سیمینارلندن میں منعقد ہوا۔
تفصیلات کے مطابق مجلس وحدت مسلمین برطانیہ و امامینز یو کے ، کے زیر اہتمام تکریم شہداء سمینار بمناسبت برسی بانی آئی ایس او ڈاکٹر شہید محمد علی نقوی کا انعقاد کیا گیا۔ جسمیں برطانیہ بھر سے علماء کرام، دانشوران و مومنین و مومنات و تنظیمی افراد و زعماء نے بھرپور شرکت فرمائی۔
اس سیمینار میں نظامت کے فرائض ایم ڈبلیو ایم لوٹن کے آرگنائزر جناب غلام عباس صاحب و مولانا ہاشم الحسینی نے احسن انداز میں سرانجام دیئے اور مولانا ہاشم الحسینی نے تلاوت قرآن پاک سے سیمینارکا آغاز کیا۔
تکریم شہداء سمینار سے حجت الاسلام مولانا ہادی شبیری صاحب نے استقبالیہ خطاب فرمایا۔ اس کے علاوہ حجت الاسلام مولانا سید قمبر عباس صاحب، حجت الاسلام والمسلمین مولانا سید رضا حیدر رضوی صاحب، ایم ڈبلیو ایم برطانیہ کے صدر جناب حجت الاسلام مولانا ابرار حسین حسینی صاحب، حجت الاسلام والمسلمین مولانا غلام حر شبیری صاحب، نے خطاب فرمایا جناب شجاعت حسین صاحب نے ترانہ پیش کیا۔ شہداء کی یاد سے شرکا کی انکھیں اشکبار اور روح پرور مناظر تھے۔
آخر میں پینل ڈسکشن کے حجت الاسلام مولانا جناب مشرف حسین الحسینی صاحب، جناب ملک تبرید حسین صاحب، جناب ڈاکٹر حماد نقوی صاحب، جناب ڈاکٹر سید رضا حسین صاحب نے شہید ڈاکٹر محمد علی نقوی کی زندگی پر گفتگو فرماتے ہوئے سامعین کے سوالات کے موثر جواب دیئے۔ سمینار کا اختتام دعائے وحدت سے ھوا۔
وحدت نیوز(اسلام آباد) فارم 47 کی مسلط شدہ نااہل اور متعصب پی ڈی ایم 2 حکومت سیاسی انتقام سے باز نہ آئی،سربراہ مجلس وحدت مسلمین پاکستان سینیٹر علامہ راجہ ناصرعباس جعفری حفظہ اللہ کے حق و سچ کا ساتھ دینے ، آئین کی بالادستی ، پارلیمان کی مضبوطی اور عوامی حقوق کی جدوجہد کے جرم میں ایک بار بھر وارنٹ گرفتاری جاری کردیئے گئے۔
تفصیلات کے مطابق ڈسٹرکٹ اینڈ سیشن کورٹس اسلام آباد نے پاکستان تحریک انصاف ( پی ٹی آئی) کی جانب سے 2014ء میں دھرنوں کے کیس میں ڈاکٹر طاہر القادری کی اشتہاری قرار دینے کی کارروائی شروع کردی۔
ڈسٹرکٹ اینڈ سیشن کورٹس اسلام آباد میں پی ٹی آئی کیجانب سے 2014ء میں دھرنوں سے متعلق کیس کی سماعت جوڈیشل مجسٹریٹ شہزاد خان نے کی۔
دوران سماعت غیر حاضری پر عدالت نے ایم این اے خرم شہزاد، سربراہ ایم ڈبلیوایم پاکستان علامہ راجہ ناصر عباس جعفری سمیت دیگر کارکنوں کے وارنٹ گرفتاری جاری کردیئے۔
عدالت نے ڈاکٹر طاہر القادری کی اشتہاری قرار دینے کی کارروائی شروع کرتے ہوئے کیسز کی مزید سماعت 5 مئی تک ملتوی کردی۔
عمران خان متعلقہ مقدمات میں حاضری سے مستقل استثنیٰ پر ہیں، بانی پی ٹی آئی ودیگر کے خلاف تھانہ سیکرٹریٹ میں 2 مقدمات درج ہیں۔
واضح رہے کہ یہ وارنٹ گرفتاری ایسے وقت میں جاری کیئے گئے ہیں کہ جب سربراہ ایم ڈبلیوایم سینیٹرعلامہ راجہ ناصرعباس جعفری ان دنوں لبنان کے دورے پر ہیں جہاں وہ سید مقاومت شہید حسن نصراللہ ؒ کی آخری رسومات میں شریک ہیں۔
وحدت نیوز(لاہور)مجلس وحدت مسلمین پاکستان ضلع لاہور کے زیراہتمام دختران ملت اسلامیہ کی اجتماعی شادیوں کی تقریب منعقد ہوئی، جس میں تمام مکاتب فکر کے علماء، دانشور، ڈاکٹرز، وکلاء اور سول سوساٹی کے افراد نے بھرپور شرکت کی۔ تقریب میں مرکزی وائس چیئرمین ایم ڈبلیو ایم پاکستان علامہ سید احمد اقبال رضوی، صوبائی صدر پنجاب علامہ سید علی اکبر کاظمی، علامہ سید حسن رضا ہمدانی نے خصوصی شرکت کی۔ اجتماعی شادیوں کی تقریب سے خطاب کے دوران علامہ سید احمد اقبال رضوی نے کہاکہ ہم آج خدا کا شکریہ ادا کرتے ہیں، کہ پاک پروردگار نے آج ہم سے اہم کام سرانجام کروایا اور ملت کی دختران کی شادیوں کی تقریب منعقد ہوئی۔ انہوں نے کہاکہ درحقیت جو سکون اور راحت خدمت انسانیت میں ہے، وہ اور کہیں نہیں، اللہ پاک اپنی مخلوق کی خدمت میں مصروف عمل رہنے والوں سے راضی اور خوش ہوتا ہے۔
انہوں نے کہا کہ ہماری اول دن سے یہ کوشش رہی ہے کہ ہم دکھی انسانیت کیلئے بڑھ چڑھ کر حصہ لیں، تاکہ ملت کیلئے خدمات سرانجام دے سکیں اور ہمیں یہ اعزاز حاصل ہے کہ اجماعی شادیوں کی تقریب رنگ نسل کے بغیر تمام مکاتب فکر کی بیٹوں کی شادی انجام پذیر ہوئی اور اپنے گھر کو رخصت ہوئیں۔ انہوں نے کہا کہ ان شاءاللہ اگلے سال یہ تقریب اور بھی شایان اور اضافہ کیساتھ منعقد ہوگی، جس میں جوڑوں کی تعداد کو بڑھایا جائے گا اور ان شاءاللہ جہیزپیکچ کے علاوہ سلامی دی جائے گی، ہم آپ سب کے شکرگزار ہیں کہ آپ نے ہم پراعتماد کیا اور ہم کامیاب و کامران ہوئے اور آپ کے اعتماد پر پورا اترے جس پر خدا کا شکریہ ادا کرتے ہیں۔
وحدت نیوز(مانٹرنگ ڈیسک) سید حسن نصر اللّہ کو اسرائیل نے 27 ستمبر 2024 کو شہید کر دیا تھا، اسرائیل نے اس بمباری میں تقریباً دو ٹن کے 85 مورچہ شکن بم استعمال کیے، پانچ ماہ بعد آج انکی بیروت میں لاکھوں سوگواروں کی موجودگی میں نماز جنازہ ادا کی گئی، یہ بلاشبہ دنیا کی تاریخ کے چند بڑے جنازوں میں ایک تھا جس کی کوریج کیلئے دنیا بھر سے صحافی موجود تھے، میں بھی اس بین الاقوامی صحافتی وفد کا حصہ تھا۔
لبنانی قوم نے خون جما دینے والی سردی میں کمال عشق، بہتے اشکوں، فلک شگاف نعروں، پرچموں اور عہد وفا کے ساتھ اپنے مزاحمتی لیڈر کو شایان شان انداز سے سپرد خاک کیا ہے، نماز جنازہ سٹیڈیم میں ادا کی گئی جہاں لوگ رات پہنچنا شروع ہو گئے تھے، سٹیڈیم بھر جانے پر دروازے بند کر دیئے گئے اور پھر سٹیڈیم کی طرف جانیوالی تمام شاہراہوں پر انسانی سر ہی سر تھے، اہل لبنان پورے پورے خاندان اور چھوٹے بچوں کو بھی ساتھ لائے، لوگ ایران، امریکہ، یمن، عراق، بھارت، بیلجئیم، جنوبی افریقہ، انڈونیشیا، بُرکینا فاسو، یورپ، ایتھوپیا، مصر، کیوبا، تیونس سمیت کئی ملکوں سے شریک ہوئے، بغداد سے تو بیروت کی پروازوں کے تمام ٹکٹ ہی فروخت ہو چکے تھے۔
حسن نصر اللہ کو 2000 میں 22 سال کے بعد اسرائیلی قبضے سے جنوبی لبنان کی آزادی اور 33 روزہ جنگ کی فتح میں کردار کی وجہ سے "سیدِ مُقاومت" کا لقب دیا گیا۔ انہوں نے حزب اللہ کے اہم ترین کمانڈر کے طور پر اس مزاحمتی تنظیم کو نہ صرف دفاعی طور پر مضبوط کیا بلکہ لبنان کی سیاست میں بھی اہم کردار دلوایا، وہ 1992 سے حزب اللہ کے سربراہ رہے۔
اُن کا بڑا بیٹاسید ہادی نصراللہ1997 میں 18 برس کی عمر میں اسرائیلی حملے میں شہید ہو گیا تھا۔
زندگی میں کئی مشاہدات بالخصوص آج کے مشاہدہ کے بعد میرا حاصل زندگی یہ ہے کہ زندگی وہی ہے جو ظلم، ناانصافی، فسطائیت کے خلاف اور انسانی عزت و وقار کے حق میں مزاحمت کرتے ہوئے گزاری جائے، جو زندگی اسکے برعکس ظلم و بربریت اور طاقتور حکمرانوں کے دلال اور ٹاوٹ بن کر گزرے تو ایسی زندگی پر نہ صرف لعنت بلکہ وہ دھرتی پر بوجھ ہے۔
موت تو ویسے ہی برحق ہے
لہذا موت ہو تو حسن نصراللہ جیسی ہو
امیر عباس (بیروت)
وحدت نیوز(بیروت) شہدائے راہ القدس، سید مقاومت سید حسن نصراللہ ؒ ان کے جانشین اور حزب اللہ لبنان کے نامزر سیکریٹری جنرل سید ہاشم صفی الدینؒ کی نماز جنازہ اور تدفین کی مراسم آج بیروت میں ادا کردی گئیں، مجلس وحدت مسلمین پاکستان کے سربراہ سینیٹر علامہ راجہ ناصرعباس جعفری حفظہ اللہ کی زیر قیادت پاکستانی وفد نے بھی اس عظیم الشان اجتماع میں خصوصی شرکت کی اور شہدائے راہ قدس کو خراج تحسین پیش کیا۔
پاکستانی وفد میں سربراہ ایم ڈبلیوایم سمیت مرکزی سیکریٹری امور خارجہ ایم ڈبلیوایم علامہ ڈاکٹر سید شفقت حسین شیرازی، معروف عالم اہل سنت مفتی گلزار حسین نعیمی ،مرکزی صدر آئی ایس او پاکستان فخر عباس نقوی، سیکریٹری جنرل فلسطین فاؤنڈیشن پاکستان ڈاکٹر صابر ابومریم، معروف صحافی اور تجزیہ نگار امیر عباس ودیگر بھی شامل ہیں۔
واضح رہے کہ سرداران شہدائے مقاومت کی آخری رسومات بیروت شہر کے نیشنل اسٹیڈیم میں رہبر انقلاب کے لبنان میں موجود نمائندے کی زیر اقتداء ادا کی گئی جس میں دس لاکھ سے زائد افراد نے کئی درجن ملکوں سے شرکت کی ہے اس اجتماع کو دنیا کے بڑے جلوس جنازہ میں سے قرار دیا جارہا ہے۔
وحدت نیوز(کراچی) ترجمان تحریک تحفظ آئین پاکستان اخونزادہ حسین یوسفزئی کے مطابق تحریک تحفظ آئین پاکستان اور جی ڈی اے کی اعلی سطح میٹنگ میں مشترکہ سیاسی جدوجہد کے بنیادی نکات اور لائحہ عمل طے کرنے کے لئے ایک اہم کمیٹی تشکیل دی گئی جس میں جی ڈی اے سے سائیں زین شاہ، صفدر عباسی، سردار رحیم اور حسنین مرزا جبکہ تحریک تحفظ آئین پاکستان کے جانب سے سلمان اکرم راجہ، صاحبزادہ حامد رضا،جنرل سیکریٹری مجلس وحدت مسلمین پاکستان سید ناصرعباس شیرازی، حلیم عادل شیخ، ساجد ترین اور اخونزادہ حسین یوسفزئی کو نامزد کیا گیا ہے۔جی ڈی اے نے تحریک تحفظ آئین پاکستان کے سربراہ محمود خان اچکزئی اور سابق وزیر اعظم شاہد خاقان عباسی کی میزبانی میں اسلام آباد میں ہونے والی دو روزہ قومی کانفرنس کی دعوت قبول کرتے ہوئے اعلی سطح پر شرکت کا وعدہ کیا۔
علاوہ ازیں کمیٹی کا آئین کے تحفظ اور سیاسی استحصال کے خاتمے اور مشترکہ سیاسی جدوجہد کے نکات طے کرنے کے لئے اگلا اجلاس اسلام آباد میں منعقد ہوگا۔ اجلاس میں سندھ میں اپوزیشن کو منظم طریقے سے دیوار کے ساتھ لگانے کی حکومتی کوششوں کو مسترد کرتے ہوئے دھاندلی زدہ الیکشن پر مبنی جعلی اسمبلی کو تسلیم کرنے سے انکار کیا گیا۔ پورے ملک بشمول سندھ میں سیاسی قیدیوں کی رہائی کا مطالبہ کیا گیا جس میں سابق وزیر اعظم عمران خان اور تحریک انصاف کے کارکنوں سمیت سندھ سے مرتضی جتوئی اور دیگر سیاسی کارکنان شامل ہیں۔
وحدت نیوز(کوئٹہ)مجلس وحدت مسلمین بلوچستان کے صوبائی نائب صدر و ملی یکجہتی کونسل کے رہنماء علامہ ولایت حسین جعفری کا کہنا ہے کہ ملی یکجہتی کونسل اور مجلس وحدت مسلمین اتحاد بین المسلمین کے فروغ میں اہم کردار ادا کر رہی ہیں۔ گزشتہ چند سال کے دوران غزہ کے مسئلے اور پاراچنار کے مسائل سمیت دیگر مواقع پر مثبت کردار ادا کئے۔
ان خیالات کا اظہار انہوں نے اسلام ٹائمز سے خصوصی گفتگو کرتے ہوئے کیا۔ علامہ ولایت حسین جعفری نے کہا کہ پاکستان میں شیعہ اور سنی اتحاد کو برقرار رکھنے میں ملی یکجہتی کونسل کا کردار اہم ہے۔ بعض عناصر ملک میں تفرقہ پھیلانے کی کوششیں کرتے ہیں، تاہم ملی یکجہتی کونسل کے پلیٹ فارم سے ان کی سازشیں ناکام کرتے ہوئے اتحاد کو برقرار رکھا ہے۔ انہوں نے کہا کہ غزہ کے مسئلے کے موقع پر متحد ہوکر فلسطین کے لئے آواز اٹھائی۔ شہید سید حسن نصر اللہ اور شہید اسماعیل ھنیہ کی شہادت پر دو تقریبات منعقد کیں اور فلسطین کے حق میں متعدد بار پریس کانفرنس اور دیگر سرگرمیوں کے ذریعے آواز بلند کی۔
وحدت نیوز( بنگل خان چانڈیو) مجلس وحدت مسلمین پاکستان کے مرکزی رہنماء علامہ مقصود علی ڈومکی نے کہا ہے کہ تشیع نے ملت اسلامیہ کی بیداری میں کلیدی کردار ادا کیا ہے۔ عصر حاضر میں حضرت امام خمینی رحمہ اللہ علیہ نے قوموں میں شعور بیداری اور قیام و استقامت کے پرچم کو بلند کیا۔ ان خیالات کا اظہار انہوں نے بنگل خان چانڈیو میں "بیداری ملت میں تشیع کا کردار" کے عنوان سے منعقد اصغریہ آرگنائزیشن پاکستان کے 37 ویں مرکزی کنونشن سے خطاب کرتے ہوئے کیا۔
کنونشن کے آخری روز یوم حسین علیہ السلام کے اجتماع سے خطاب کرتے ہوئے علامہ مقصود ڈومکی نے کہا کہ 23 فروری یوم سوگ اور یوم تجدید عہد ہے۔ اس عظیم انسان کی شہادت اور جدائی پر کہ جو پوری زندگی حق اور صداقت کا علم لے کر وقت کے فرعون اور یزید کے خلاف برسر پیکار رہا۔ سید مقاومت اتحاد بین المسلمین کے علمبردار، تحریک آزادی فلسطین کے نڈر رہنماء اور عالم اسلام کا ناز تھے۔ آج پوری دنیا کے مسلمان اور حریت پسند اس عظیم مجاہد کی جدائی پر سوگوار ہیں کہ جس نے فلسطین کے مسلمانوں سے اور اپنے اہل سنت بھائیوں سے یکجہتی کا اظہار کرتے ہوئے اپنے خون کا نذرانہ پیش کیا۔ وہ جو امریکہ اور اسرائیل کے لئے خوف کی علامت تھا اور پوری دنیا کے مظلوموں کے لئے امید کی کرن تھا۔ ہم عہد کرتے ہیں کہ سید حسن نصر اللہ کا راستہ جاری رہے گا۔ ہم عہد کرتے ہیں کہ سید کے مشن کو ان کی قربانی کو اور ان کے پیغام کو پائے تکمیل تک پہنچائیں گے۔
