وحدت نیوز(جیکب آباد)علامہ مقصود علی ڈومکی نے کہا کہ اسرائیل اور امریکہ نے غزہ اور فلسطین میں جو مظالم ڈھائے ہیں۔ اس پر عالم انسانیت اور پوری امت مسلمہ سراپا احتجاج ہے۔ ایسے میں کچھ خائنین امریکہ اور اسرائیل کی خوشنودی کے لئے فلسطین بیت المقدس اور امت مسلمہ کا سودا کر رہے ہیں۔ غزہ پر قبضے کا امریکی منصوبہ ناکام ہوگا، کیونکہ غیرت مند فلسطینی عوام حماس، حزب اللہ اور انصار اللہ کے ہوتے ہوئے اسرائیل کا فلسطین اور غزہ پر قبضہ ایک خواب رہے گا۔ ان خیالات کا اظہار انہوں نے مدرسہ خاتم النبیین صلی اللہ علیہ وآلہ وسلم کوئٹہ کے زیر اہتمام ماہ مبارک رمضان اور مظلوم فلسطینیوں کی حمایت میں منعقدہ تقریب سے خطاب کرتے ہوئے کیا۔ تقریب میں مجلس وحدت مسلمین پاکستان کے بلوچستان کے صوبائی صدر علامہ سید ظفر عباس شمسی، علامہ سید علی عمران نقوی و دیگر شریک ہوئے۔

اس موقع پر تقریب سے خطاب کرتے ہوئے انہوں نے کہا کہ شام میں اسرائیلی ایجنٹ جولانی کے آتے ہی اسرائیل کے توسیع پسندانہ عزائم کھل کر سامنے آ گئے ہیں۔ اسرائیل شام کے وسیع رقبے پر قابض ہو چکا ہے، مگر جولانی اور عرب حکمران خاموش تماشائی بنے ہوئے ہیں۔ کٹھ پتلی جولانی حکومت کے خلاف عوامی بغاوت شروع ہو چکی ہے اور اس میں ہر گزرتے دن کے ساتھ اضافہ ہوگا۔ انہوں نے کہا کہ اتوار 9 مارچ کو کوئٹہ میں فلسطین فاؤنڈیشن بلوچستان کے زیر اہتمام سالانہ فلسطین کانفرنس منعقد ہوگی۔ جس میں بلوچستان کے سیاسی مذہبی اور قبائلی رہنماء شریک ہوں گے۔

انہوں نے مطالبہ کیا کہ حکومت پاکستان کو چاہئے کہ وہ عالمی یوم القدس کو سرکاری طور پر منائے۔ یہ بات خوش آئند ہے کہ پاکستان کی تمام سیاسی، مذہبی، قوم پرست جماعتیں اور پاکستان کے عوام فلسطین اور غزہ کے مسلمانوں کے ساتھ کھڑے ہیں۔ دو ریاستی حل کا فارمولا بانی پاکستان قائداعظم محمد علی جناح اور حکیم الامت حضرت علامہ اقبال رحمتہ اللہ علیہ نے اس وقت مسترد کر دیا تھا، لہٰذا پاکستان کے عوام دو ٹوک الفاظ میں اس موقف کا اعادہ کرتے ہیں کہ پورے کا پورا فلسطین فلسطینیوں کا ہے اور سرزمین فلسطین کا ایک انچ بھی ہم غاصب اسرائیل کو دینے کے لئے تیار نہیں ہے۔

وحدت نیوز(اسلام آباد)مجلس وحدت مسلمین پاکستان کے سربراہ سینیٹر علامہ راجہ ناصرعباس جعفری نےاپنے مزمتی بیان میں کہا کہ میں سابق سینیٹر مشتاق احمد کے بھائی کے بے رحمانہ قتل پر گہرے دکھ اور افسوس کا اظہار کرتا ہوں۔ یہ المناک واقعہ انسانیت سوز اور قابلِ مذمت ہے۔ میں حکومت سے مطالبہ کرتا ہوں کہ قاتلوں کو فوری گرفتار کر کے شفاف تحقیقات کو یقینی بنایا جائے اور مجرموں کو سخت سے سخت سزا دی جائے۔‏ریاست کی اولین ذمہ داری اپنے شہریوں کی جان و مال کا تحفظ ہے، اور ایسے واقعات کا تدارک کرنا ضروری ہے تاکہ کوئی اور خاندان اس طرح کے صدمے سے دوچار نہ ہو۔‏میں اللہ تعالیٰ سے دعا کرتا ہوں کہ مرحوم کی مغفرت فرمائے، انہیں جنت الفردوس میں اعلیٰ مقام عطا کرے، اور پسماندگان کو صبرِ جمیل عطا فرمائے۔الٰہی آمین۔

وحدت نیوز(اسلام آباد)سینیٹ اجلاس سے خطاب کرتے ہوئے مجلس وحدت مسلمین پاکستان کے سربراہ سینیٹر علامہ راجہ ناصرعباس جعفری نے کہا کہ اسلام نے خواتین کو ان کے حقوق فراہم کیے ہیں اور اگر ہم خواتین کے وراثتی حق کو سلب کرتے ہیں تو ہم ظالم ہیں۔ خواتین پر ہونے والے مظالم کی بنیادی وجہ قانون کی حکمرانی کا فقدان ہے۔ تاریخ میں بدترین ظلم اس وقت غزہ کی مظلوم خواتین پر ہو رہا ہے اور ان پر ظلم ڈھانے والے وہی ہیں جو خود کو خواتین کے حقوق کے علمبردار کہتے ہیں۔ یاد رکھیں، کبھی بھی ظالموں پر اعتماد نہ کریں۔ امریکہ ہمیشہ اپنے مفادات کے لیے ہمیں استعمال کرتا ہے، اور ہمیں اپنی خودمختاری اس کے ہاتھ میں نہیں دینی چاہیے۔

انہوں نے مزید کہا کہ اس ملک کا ایک بڑا المیہ منافقت ہے۔ ضلع کرم کی صورت حال دیکھیں آج بھی وہاں ظلم ہو رہا ہے۔ 1500 دہشت گردوں نے وہاں کی خواتین اور عوام کو یرغمال بنا رکھا ہے۔ پاراچنار کی موجودہ صورت حال پاکستان میں ایک اور غزہ کی مانند ہے۔ ضلع کرم میں مجلس وحدت مسلمین کے تحصیل چیئرمین، مزمل فصیح، جو امن اور بھائی چارے کے سفیر تھے، کو جھوٹے دہشت گردی کے مقدمات میں قید کر دیا گیا ہے۔ ہمیںتمام مظلوموں کے حق میں بولنا چاہیے، چاہے وہ کسی بھی مکتبۂ فکر سے تعلق رکھتے ہوں ۔پاراچنار کے محاصرے کو چھ ماہ ہو چکے ہیں، لیکن صوبائی و مرکزی حکومت اور سیکیورٹی ادارے اس ظلم و بربریت کے ذمہ دار ہونے کے باوجود خاموش ہیں۔

وحدت نیوز(اسلام آباد) سفیرانقلاب ،بانی آئی ایس او پاکستان شہید ڈاکٹر محمد علی نقویؒ کی 30ویںبرسی کے موقع پر سربراہ مجلس وحدت مسلمین پاکستان سینیٹر علامہ راجہ ناصر عباس جعفری نے اپنےسماجی رابطے کے ایکس اکاؤنٹ سے تعزیتی پیغام جاری کیا ہے جس کا متن پیش خدمت ہے ۔

بسم اللہ الرحمن الرحیم

‏“وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا ۚ بَلْ أَحْيَاءٌ عِندَ رَبِّهِمْ يُرْزَقُونَ”

‏“اور جو لوگ اللہ کی راہ میں قتل کیے گئے انہیں ہرگز مردہ نہ سمجھو، بلکہ وہ زندہ ہیں، اپنے رب کے ہاں رزق پا رہے ہیں۔” (آل عمران: 169)

‏آج 7 مارچ، شہید ڈاکٹر محمد علی نقوی کی برسی کے موقع پر ہم اس عظیم رہنما کو خراجِ عقیدت پیش کرتے ہیں، جنہوں نے اپنی زندگی اسلام، حق و صداقت، اور مستضعفین کی خدمت کے لیے وقف کردی۔ شہید نقوی ایک فکر، ایک مشن، اور ایک نظریہ تھے، جو آج بھی نوجوانوں کے دلوں میں زندہ ہے۔

‏انہوں نے امامیہ اسٹوڈنٹس آرگنائزیشن کی بنیاد رکھ کر نوجوانوں کو بیداری، خودسازی اور سماجی خدمت کا درس دیا۔ وہ نہ صرف ایک مثالی انقلابی تھے بلکہ اتحادِ امت کے سچے داعی بھی تھے۔ ان کی شہادت ہمارے لیے ایک پیغام ہے کہ ہم بھی اپنی زندگی کو دینِ حق کی خدمت، علم کی روشنی پھیلانے، اور مظلوموں کے دفاع میں وقف کریں۔

‏شہداء کا خون کبھی رائیگاں نہیں جاتا، بلکہ وہ ایک ایسی روشنی ہے جو رہنمائی کرتی ہے اور آنے والی نسلوں کے لیے چراغ راہ بنتی ہے۔ آج ہم عہد کرتے ہیں کہ شہید محمد علی نقوی کے مشن کو جاری رکھیں گے ان شااللہ وطن عزیز کی سربلندی اور اسلام کی حقیقی تعلیمات کو عام کرنے میں اپنا کردار ادا کریں گے۔

‏اللّٰہ تعالیٰ شہید کے درجات بلند فرمائے اور ہمیں ان کے نقشِ قدم پر چلنے کی توفیق عطا کرے۔ الہی آمین!

‏شہداء کی یاد ہمیشہ زندہ رہتی ہے!