وحدت نیوز(اسلام آباد) چیئرمین مجلس وحدٹ مسلمین پاکستان سینیٹر علامہ راجہ ناصر عباس جعفری نے عالمی یوم مزدور کی مناسبت سے اپنے پیغام میں کہا ہے کہ مزدوروں کی عزت اور وقار کا تحفظ ہم سب کا فرض ہے، مزدور اللہ کا دوست ہے، جس کی محنت کا جائز معاوضہ وقت پر دینا لازم ہے، وطن عزیز کی اقتصادی ترقی اور خوشحالی محنت کشوں کی انتھک کوششوں کے بغیر ممکن نہیں، آج بھی وطن عزیز میں مزدوروں کی بڑی تعداد استحصال، جبری مشقت اور خطرناک حالات میں کام کرنے پر مجبور ہے، حکومتیں اپنی ہی اعلان کردہ کم از کم ماہانہ اجرت کی پالیسی پر عمل نہیں کروا سکتیں ہیں، آج کسان کی مشکلات کا ادراک نہ کرنے والے وطن عزیز کو معاشی دلدل میں دھکیل رہے ہیں، مزدوروں پر سرمایہ داروں کی جانب سے استحصال پر مبنی ہتھکنڈوں کا جواب دینے کی ٹھوس حکمت عملی اپنائی جائے، بیرونی ممالک میں بھی اپنے محنت کشوں کے حقوق کے تحفظ کو یقینی بنایا جائے اور انکے مسائل کو حل کیا جائے۔

انہوں نے کہا کہ وقت کا تقاضا ہے کہ لیبر ڈے کو عملی اقدامات کے عزم کے طور پر منایا جائے، بدقسمتی سے ملک میں چیک اینڈ بیلنس کا نظام سرے سے موجود ہی نہیں ہے، مہنگائی کا شکار سب سے زیادہ مزدور طبقہ ہوتا ہے، جو بھی نئی حکومت آتی ہے، اس کی ترجیحات میں مزدوروں کے حقوق شامل نہیں ہوتے، ہماری ٹریڈ یونینز کو بہت کمزور کردیا گیا ہے، پاکستان میں جمہوریت مضبوط نہیں ہے، جب بھی کوئی آمر یا آمرانہ سوچ پر مبنی حکومت آتی ہے وہ لیبر اور ٹریڈ یونینز پر حملہ آور ہوتی ہے، ان سرمایہ داروں کو مزدوروں کی مشکلات سے کوئی سروکار نہیں ہے، محنت کشوں کی یہ مانگ رہی ہے کہ تمام سیاسی پارٹیاں پارلیمنٹ میں اپنا کردار آئین کی روشنی میں ادا کریں اور محنت کشوں کو انصاف فراہم کرنے کا مشترکہ لائحہ عمل اپنائیں، تاکہ ملک بھر کے اداروں میں انصاف کی رٹ قائم ہو سکے۔

وحدت نیوز(گلگت)چیئرمین قائمہ کمیٹی گلگت بلتستان کونسل ایوب شاہ اور دیگر ممبران کونسل شیخ احمد علی نوری ،سید شبیہ الحسنین، عبد الرحمن ،اقبال نصیر اور حشمت اللہ نے اپنے ایک بیان میں کہا ہے کہ پہلگام میں ہونے والے واقعے میں قیمتی جانوں کے نقصان پر افسوس کا اظہار کرتے ہیں۔عالمی اداروں سے پہلگام حملے کی جلد شفاف و منصفانہ تحقیقات کا مطالبہ کرتے ہیں۔پاکستان کے برعکس بھارت ہمیشہ دہشتگردی میں ملوث رہا ہے اور اس کو فروغ بھی دیا ہے۔انہوں نے کہا کہ مودی کی دھمکیاں قابل مذمت،پاکستان کی خودمختاری پر کوئی سمجھوتہ نہیں ہو گا۔ہر پاکستانی مادرِ وطن کے دفاع میں اداروں کے شانہ بشانہ ہے۔

انہوں نے مزید کہا کہ دشمن ملک نے جنگ مسلط کرنے کی کوشش کی تو پوری قوم دفاع وطن کے لیے تیار ہے،بھارتی حکومت اپنی اندرونی ناکامیوں پر پردہ ڈالنے کے لیے خطے میں کشیدگی پیدا کر رہی ہے۔بھارت پاکستان کو مختلف دھمکیوں کے ذریعے ڈرانے کی کوشش کر رہے ہیں مگر پاکستانی قوم ان کی دھمکیوں سے خوفزدہ نہیں ہوں گے اور قوم کسی قربانی سے دریغ نہیں کرے گی۔پاکستانی قوم اور ریاست اپنی خودمختاری، سالمیت اور قومی وقار کے تحفظ اور دشمن کی جارحیت کا منہ توڑ جواب دینے کیلئے متحد اور تیار ہے۔

وحدت نیوز(ملتان)ولادت با سعادت شہزادی معصومہ قُم سلام اللہ علیہا و روزِ دختران کی مناسبت سے مجلس وحدت مسلمین شعبہ خواتین  جنوبی پنجاب (ملتان) کے زیر اہتمام نو سال کی بچیوں کےلیے جشن عبادت کا انعقاد کیا گیا جس میں مرکزی نائب صدر ایم ڈبلیو ایم وومن ونگ محترمہ سعیدہ موسوی نے خصوصی شرکت کی اور ننھی دختران سے خطاب کیا۔

 اس پُرنور محفل میں ننھی بچیوں کے لیے مختلف خاکوں اور ماڈلز کے ذریعے پردے کی اہمیت اور دینی واجبات کی ادائیگی کے بارے میں آگاہی دی گئی ۔ اس موقع پر بچیوں کے مابین  دلچسپ کوئز مقابلہ کا بھی انعقاد ہوا۔جشن میں شریک تمام نو مکلف بچیوں کو چادر اور جائے نماز ہدیہ کیے گئے ۔

وحدت نیوز(اصفہان) مجلس وحدت مسلمین شعبہ اصفہان کے زیر اہتمام، امام جعفر صادق علیہ السلام کی شہادت کی مناسبت سے ایک عظیم الشان مجلس عزاء اور عزاداری کا انعقاد بروز جمعہ 25 اپریل کو حسینیہ حضرت زہرا سلام اللہ علیہا، استاد جامعہ المصطفی میں کیا گیا۔ اس پُر وقار پروگرام میں طلاب کی کثیر تعداد نے شرکت کی۔پروگرام کا آغاز تلاوتِ کلام پاک سے ہوا، جس کی سعادت مجاہد حسین نے حاصل کی۔ اس کے بعد برادران ساجد علی مہدوی، شہزاد جعفری، غلام علی بلتستانی اور حبدار علی زرداری نے اہل بیت علیہم السلام کی شان میں نظرانہ عقیدت پیش کیامجلس عزا سے حجت الاسلام والمسلمین جناب سید حسن رضا نقوی نے خطاب فرمایا۔

 اپنے خطاب میں انہوں نے امام جعفر صادق علیہ السلام کی حقیقتِ نورانی اور رسول خدا صلی اللہ علیہ وآلہ وسلم اور دیگر آئمہ علیہم السلام کے ساتھ ان کی وحدت حقیقی کو اجاگر کیا۔انہوں نے آیتِ مبارکہ "کُونُوا مَعَ الصَّادِقِینَ" کے تحت قرآن کی نظر میں صدق کے معنی و مفہوم کو بیان کیا اور امام صادق علیہ السلام کی علمی عظمت، عبادت، ورع و تقویٰ اور طاغوتِ وقت کے خلاف جدوجہد کے مختلف پہلوؤں پر روشنی ڈالی۔خطاب کے بعد عزاداری برپا کی گئی، اور آخر میں پروگرام کا اختتام دعا و زیارت امام زمانہ عجل اللہ تعالی فرجہ الشریف سے کیا گیا۔ اختتامی مراحل میں حاضرین میں لنگر تقسیم کیا گیا۔