وحدت نیوز(لاہور) امامیہ اسٹوڈنٹس آرگنائزیشن پاکستان کے پچاسویں "جہد مسلسل و عزم نو" کنونشن میں قرآن و اہلبیت کانفرنس کا انعقاد ہوا، جس میں مجلس وحدت مسلمین پاکستان کے سربراہ علامہ راجہ ناصر عباس جعفری نے اپنے خصوصی خطاب میں کہا کہ آئی ایس او پاکستان کے بانیان باشعور اور بابصیرت، باہمت اور باحوصلہ تھے۔ مشکلات کے باوجود آئی ایس او پاکستان نے صراط مستقیم پر سفر جاری رکھا، جو ہدف تک پہنچانے والا ہے۔ اس دور پرفتن میں بھی رہبریت کا علم بلند کئے آگے بڑھ رہی ہے۔ آئی ایس او کے نوجوان قابل تحسین ہیں، جو مشکلات کے با وجود مایوس، ناامید اور کچھ نہیں ہوسکتا کے وسوسہ کا شکار نہیں ہوئے۔ آئی ایس او پاکستان نے مظلومین کی حمایت اور امید کے چراغ جلانے کا پرچم اٹھایا۔

انہوں نے مزید کہا کہ پاکستان میں ملت تشیع جن مشکلات کا شکار ہے، اس میں عالمی استکباری قوتیں اور بکے ہوئے گھس بیٹھیئے ملوث ہیں۔ مسلم ممالک بالخصوص پاکستان کو مختلف بحرانوں کا شکار کیا جا رہا ہے، ہمیں دشمن اور دوست کا تعین کرنا ہوگا، خدانخواستہ ہم کسی بحران کا حصہ نہ بن جائیں۔ ہمیں ایک پاکستانی اور کربلائی ہونے کے ناطے اس کے خلاف اپنا کردار ادا کرنا چاہیئے اور غیر آئینی اقدامات کی مخالفت کریں گے۔ پاکستان میں مشکوک سرگرمیاں ہو رہی ہیں۔ وقت کا تقاضہ ہے کہ ہم دشمن کے مقابلے میں بیدار رہیں۔

وحدت نیوز(کوئٹہ) مجلس وحدت مسلمین کوئٹہ کے سیکرٹری جنرل ارباب لیاقت علی ہزارہ نے اپنے ایک بیان میں کوئٹہ میں مقیم اقوام کے حوالے سے کہا ہے کہ گزشتہ بیس سال میں دہشتگردی کے بعد ہم نے جس بڑے نقصان کا سامنا کیا ہے، وہ یہ ہے کہ ہمارے بچوں کیلئے تعلیمی نظام مکمل طور پر تباہ ہو چکا ہے اور ہماری نسلیں ضائع ہو رہی ہیں۔ انہوں نے کہا کہ ایک زمانہ ایسا تھا کہ ہزارہ قوم کے افراد سیکرٹریٹ میں چیف سیکرٹری، ایڈیشنل سیکرٹری اور دیگر اہم عہدوں پر فائز تھے۔ اس کے علاوہ ہر فیلڈ میں ہم دیگر اقوام کے شانہ بشانہ کام کر رہے تھے اور شہر کے اہم کاروباری سرگرمیوں کا بھی حصہ تھے۔ مگر گزشتہ بیس برسوں کے واقعات نے ہماری نوجوان نسل کو دلبرداشتہ کر دیا ہے۔ ان کے اندر تعلیم حاصل کرنے کا جذبہ دن بدن ختم ہوتا جارہا ہے۔

انہوں نے مزید کہا کہ یہ ایک اہم مسئلہ ہے۔ جس پر دھیان دینے کی اشد ضرورت ہے۔ کیونکہ اگر یہی سلسلہ جاری رہا، تو یہ ہمیں مزید تباہی کے دہانے پر لاکر کھڑا کر دیگا۔ ایک طرف ہماری نوجوان نسل کا دھیان پڑھائی سے ہٹ رہا ہے، تو دوسری طرف ان کیلئے علاقے میں کوئی ٹیکنیکل سینٹر موجود ہے اور نہ ہی کوئی ایسا ادارہ جو ہماری نوجوان نسل کو عالمی تعلیمی معیار کیلئے تیار کر سکے۔ ایک مناسب رہنمائی نہ ہونے کی وجہ سے نہ تو ہمارے نوجوان آئلٹس، ٹوفل، سیلٹا، ٹیف، سیٹ، نیٹ، اور جی آر ای جیسے عالمی ٹیسٹوں کیلئے تیار ہو سکتے ہیں اور نہ ہی بہتر تعلیم کی طرف قدم بڑھا سکتے ہیں۔ ہمارے بڑوں کو اس مسئلہ پر سر جوڑ کر بیٹھنا ہوگا۔

انہوں نے مزید کہا کہ گزشتہ کئی برسوں دہشتگردی کی وجہ سے جہاں ہم اعلیٰ تعلیم یافتہ افراد سے محروم ہوئیں ہیں، وہیں ہمارے متعدد اعلیٰ عہدیداران جان کی امان لینے کیلئے ملک سے باہر چلے گئے ہیں۔ انہوں نے کہا کہ ابھی بھی کچھ نوجوان اس انتظار اور امید میں ہیں کہ یورپ کا رخ کریں گے، جو کہ ایک فیل اسٹریجڈی ہے۔ انہوں نے کہا کہ تعلیم ہی وہ واحد زیور ہے جو ہمیں ہر مشکل سے نجات دلا سکتی ہے۔ ہم تعلیم کا راستہ اپنا کر ہی دوبارہ اسی مقام پر پہنچ سکتے ہیں۔

انہوں نے کہا کہ نوجوانوں میں تعلیم کا رجحان کم ہونے کی وجہ سے وہ میٹرک، انٹر یا گریجویشن کی ڈگری حاصل کرنے کے بعد اپنی تعلیم روک دیتے ہیں۔ جو ہماری قوم کیلئے مفید ثابت نہیں ہوتا۔ انہوں نے نوجوان نسل سے تعلیم کی طرف دھیان دینے کی تلقین کرتے ہوئے کہا کہ طلباء انٹرنیشنل ٹیسٹوں کی طرف آئیں، اور اپنی صلاحیتوں پر کام کرتے ہوئے اعلیٰ تعلیم حاصل کریں۔

وحدت نیوز (جیکب آباد) مجلس وحدت مسلمین پاکستان کے مرکزی ترجمان علامہ مقصود علی ڈومکی نے کہا ہے کہ آج تک عرب شہزادوں کی نوکری کرکے قوم کی عزت اور ناموس کے دلالوں نے ترقی کی ہے لہذا گورنر صاحب کچھ دلالوں کی ترقی کو قوم کی ترقی نہ کہیں، پوری قوم یہ سوال پوچھ رہی ہے کہ عرب شہزادے شکار پر اکیلے کیوں آتے ہیں اپنی فیملی کے ساتھ کیوں نہیں آتے، گورنر سندھ عمران اسماعیل کا یہ بیان قومی عزت و وقار کے منافی ہے کہ عرب شہزادوں کی آمد سے خوشحالی اور پیسا آتا ہے، قوم کی ناموس عزت اور غیرت کا سودا کرکے جو پیسا حاصل کیا جائے ہم اس پر لعنت بھیجتے ہیں۔

انہوں نے کہا کہ کہ سندھ کے ایک ایم پی اے کے ہاتھوں قرآن کریم کی بے حرمتی قابل مذمت ہے، جس خاتون نے قرآن کریم اٹھایا اس پر گولیاں چلا کر وڈیرہ شاہی نے ظلم و جبر کی نئی تاریخ رقم کی، پیپلز پارٹی سمیت ملک کی سیاسی جماعتوں کو اب اس بات پر غور کرنا چاہیئے کہ وہ پست کردار کے حامل افراد ہی کو ٹکٹ دے کر اسمبلی میں کیوں بھیجتے ہیں۔ انہوں نے مطالبہ کیا کہ وطن عزیز پاکستان کو عرب شہزادوں کی شکارگاہ بننے سے بچایا جائے اور قومی عزت و وقار کے منافی لائسنس کے اجراء کو روکا جائے۔