وحدت نیوز(قم)تکفیری بِل کو نہیں مانتے، ہم فرزندانِ قائداعظم ہیں، تکفیری سازشوں کا ڈٹ کر مقابلہ کریں گے۔ ہم قائداعظم اور علامہ اقبال کے پاکستان کے محافظ ہیں۔ ہمارے ہوتے ہوئے اس ملک کو تکفیری ملک نہیں بنایا جا سکتا۔ تفصیلات کے مطابق مجلس وحدت مسلمین شعبہ امور خارجہ کا ایک اہم اجلاس ایم ڈبلیو ایم کے سیکرٹری امورِ خارجہ حجۃ الاسلام ڈاکٹر سید شفقت حسین شیرازی کی زیرِ صدارت قم المقدس میں منعقد ہوا۔ اجلاس میں علمائے کرام نے نام نہاد ناموسِ صحابہ بِل کے مختلف پہلووں کا جائزہ لیا۔ علمائے کرام کا کہنا تھا کہ یہ بِل صریحاً دینِ اسلام اور آئینِ پاکستان کے خلاف ہے۔ انہوں نے اس موقع پر کھل کر اس بات کا اظہار کیا کہ فرزندانِ پاکستان ہونے کے ناطے ہم اس غیر دینی تکفیری بِل کو نہیں مانتے۔

اس موقع پر ایم ڈبلیو ایم کے خارجہ سیکرٹری حجۃ الاسلام ڈاکٹر شفقت شیرازی نے اپنی گفتگو میں کہا کہ ہم فرزندانِ قائداعظم ہیں اور کانگرسی لیڈروں کی اولاد نیز تکفیری سازشوں کا ڈٹ کر مقابلہ کریں گے۔ ہم قائداعظم اور علامہ اقبال کے پاکستان کے محافظ ہیں۔ ہمارے ہوتے ہوئے اس ملک کو گانگرسی لیڈروں کی تمنّا کے مطابق نہ تو توڑا جا سکتا ہے اور نہ ہی تکفیری ملک بنایا جا سکتا ہے۔ انہوں نے کہا کہ اس ملک کی جغرافیائی اور نظریاتی سرحدوں کی حفاظت ہماری دینی ذمہ داری ہے اور اس ذمہ داری کو ادا کرنے کیلئے ہماری جان و مال سب کچھ حاضر ہے۔

وحدت نیوز(قم) ورکشاپ کا مقصد مختلف تنظیمی شعبہ جات کے مسئولین کی پیشہ وارانہ مہارتوں میں اضافہ تھا۔ اس مقصد کیلئے ماہر اور جیّد اساتذہ کرام کی خدمات حاصل کی گئیں۔ تفصیلات کے مطابق مجلس وحدتِ مسلمین کے شعبہ امورِخارجہ کے زیرِ اہتمام قم المقدس میں مختلف تنظیمی شعبہ جات کے مسئولین کی پیشہ وارانہ مہارتوں میں اضافے کیلئے موسسہ باقرالعلوم میں ایک چھ روزہ تربیتی ورکشاپ کا انعقاد کیا گیا۔ ورکشاپ میں مجلس وحدت مسلمین قم المقدس، مشہد اور اصفہان کے سربراہان اور تنظیمی شعبہ جات کے مسئولین نے شرکت کی۔ تربیتی کلاسز کا دورانیہ صبح سات بجے سے نمازِ مغرب تک تھا۔ درمیان میں کھانے اور نماز کے بعد مختصر استراحت کا وقفہ بھی کیا جاتا رہا۔ ورکشاپ میں پاکستان شناسی، ذرائع ابلاغ، جدید اسلامی تمدن کی تشکیل، استعمار کی چالوں اور ثقافتی مدیریت کے حوالے سے کلاسیں منعقد ہوئیں۔

ورکشاپ کے آخری روز اختتامی تقریب کا انعقاد کیا گیا، جس سے مجلس وحدت مسلمین کے شعبہ امورِ خارجہ کے سیکرٹری حجۃ الاسلام  ڈاکٹر شفقت حسین شیرازی نے خطاب کیا۔ انہوں نے اپنے خطاب کے دوران مختلف تنظیمی و تربیتی نکات پر روشنی ڈالی اور مسئولین کے اعزاز میں عشائیہ دیا گیا۔ ورکشاپ کے شرکاء نے تربیتی ورکشاپ کی افادیت کو سراہا اور اپنے معزز میزبان کا شکریہ ادا کیا۔ تقریب کے آخر میں ورکشاپ کے منتظمین اور نمایاں کارکردگی دکھانے والے مسئولین کو تعریفی اسناد بھی عطا کی گئیں۔

وحدت نیوز(قم) مجلس وحدت مسلمین شعبہ امورِ خارجہ میں دو نئے مسئولین کا اضافہ کیا گیا ہے۔ تفصیلات کے مطابق ایم ڈبلیو ایم پاکستان شعبہ امورِ خارجہ کے سیکرٹری حجۃ الاسلام ڈاکٹر شفقت شیرازی نے قم المقدس، مشہد مقدس اور اصفہان کے مسئولین کے ایک مشترکہ اجلاس میں شعبہ امورِ خارجہ میں دو نئے مسئولین کو نامزد کیا ہے۔ انہوں نے مختلف شعبہ جات کے مسئولین کے اجلاس سے کہا کہ مجلس وحدت مسلمین پاکستان کا شعبہ امورِ خارجہ اپنے نظریاتی و تنظیمی دوستوں کو صلاحیتوں کے اظہار کیلئے بھرپور مواقع فراہم کرنے پر یقین رکھتا ہے۔ اس موقع پر انہوں نے حجۃ الاسلام مولانا محمد عادل علوی صاحب کو شعبہ امور خارجہ کے مسئول روابط کے طور پر نامزدگی کا اعلان کیا۔ انہوں نے اس موقع پر قبلہ عادل علوی صاحب کی سابقہ تنظیمی خدمات اور تنظیم کیلئے جدوجہد کو بھی سراہا۔

یاد رہے کہ حجۃ الاسلام عادل علوی صاحب مجلس وحدِت مسلمین شعبہ قم کے سابق مسئول بھی رہ چکے ہیں اور تنظیمی حلقوں میں تمام احباب ان کی خدمات اور خلوص کے معترف ہیں۔ ان کے بعد ایم ڈبلیو ایم شعبہ امورِ خارجہ کے شعبہ ابلاغ (میڈیا) کے  مسئول کے طور پر حجة الاسلام مولانا نذر حافی کی نامزدگی کا بھی اعلان کیا۔ آقای نذر حافی کو بھی تنظیمی و نظریاتی حلقوں میں دوست احباب اچھے طریقے سے جانتے ہیں اور وہ بھی مختلف صورتوں میں اس سے پہلے شعبہ قم میں اپنی خدمات انجام دیتے رہے ہیں۔ شرکاء نے اس اعلان کا خیر مقدم کیا اور دعا کی کہ خداوند عالم مذکورہ بالا مسئولین کو کامیابی نصیب فرمائے۔

وحدت نیوز(کراچی)مجلس وحدت مسلمین پاکستان کے مرکزی رہنما علامہ سید حسن ظفر نقوی نے کہا ہے کہ جس معاشرے میں عدالت نہ ہو وہ معاشرہ خوشحالی کے باوجود بدحالی کا شکار ہوجاتا ہے اور اچھی سے اچھی قوم تباہی سے دوچار ہو جاتی ہے آج ہم مارشل لاء سے بھی زیادہ سخت دور کا سامنا کر رہے ہیں۔ کراچی میں عہدیداران کی تربیتی نشست سے خطاب کرتے ہوئے ان کا کہنا تھا کہ عام آدمی عدل و انصاف کے لئے ترس رہا ہے، کرپشن نے معاشرے کی بنیادوں کو کھوکلا کردیا ہے، عدالتیں غریبوں کو انصاف فراہم کرنے میں ناکام ہیں، طاقتور اپنی مرضی کے فیصلے کروالیتے ہیں۔

علامہ حسن ظفر نقوی نے کہا کہ امیرالمومنین علی ابن ابی طالب علیہ السلام اسی عدالت کے قیام کی راہ میں شہید ہوگئے، اسلام کی بنیاد عدالت پر ہے، اگر حکمران طبقہ عدالتوں کو اپنے اقتدار بچانے اور مخالفین کو کچلنے کے لئے استعمال کرے تو معاشرہ آگے بڑھنے کے بجائے زوال کا شکار ہو جاتا ہے، پاکستان میں گزشتہ 75 سالوں کی یہی داستان ہے کہ طاقتوروں کو ان کی مرضی کا انصاف مل جاتا ہے اور غریب آدمی کو اس کا حق بھی نہیں ملتا۔ اس موقع پر علامہ صادق جعفری، رضی رضوی، زین رضوی سمیت دیگر ذمہ داران موجود تھے۔

وحدت نیوز(جیکب آباد) مجلس وحدت مسلمین بلوچستان اور انجمن حسینیہ خواجگان نارووال کے زیر اہتمام مدرسہ المصطفی خاتم النبیین صلی اللہ علیہ وآلہ وسلم جیکب آباد میں متاثرین سیلاب کے مکانات کی تعمیر کے سلسلے میں ایک پر وقار تقریب منعقد ہوئی تقریب میں متاثرین سیلاب بیوہ مستحقین اور سادات شریک ہوئے۔ اس موقع پر گیارہ متاثرین سیلاب کو تعمیر مکان کی پہلی قسط دی گئی جبکہ دو سو مستحقین میں رضائیاں تقسیم کی گئیں۔

تقریب سے مجلس وحدت مسلمین پاکستان کے مرکزی سیکرٹری تنظیم سازی علامہ مقصود علی ڈومکی ،مجلس علمائے شیعہ کے رہنما علامہ ارشاد علی سولنگی، ایم ڈبلیو ایم بلوچستان کے رہنما سید رضوان علی شمسی ،برادر عبدالرشید ،مولانا عبد الخالق منگی، مولانا منور حسین سولنگی ،حافظ غلام عباس بھٹی نے خطاب کیا۔

اس موقع پر گفتگو کرتے ہوئے علامہ مقصود علی ڈومکی نے کہا کہ انجمن حسینیہ خواجگان نارووال اور مجلس وحدت مسلمین کے باہمی تعاون سے متاثرین سیلاب کی خدمت اور تعمیرات کا سلسلہ قابل ستائش ہے۔ خدمت خلق اور دکھی انسانیت کی خدمت پر اللہ تعالیٰ کی توفیق پر ہمیں خدا کا شکر ادا کرنا چاہیے۔ سیلاب نے ہزاروں گھر اجاڑ دیئے کھڑی فصلیں اور زراعت تباہ ہوئی مگر اہل خیر نے جس ہمت اور خلوص کے ساتھ متاثرین سیلاب کا ساتھ دیا وہ لائق صد تحسین ہے۔ بدقسمتی سے اس مصیبت میں حکومت کہیں نظر نہیں آئی اور حکومتی کارکردگی صفر رہی  انہوں نے متاثرین سیلاب کی مدد پر انجمن حسینیہ خواجگان کا شکریہ ادا کرتے ہوئے کہا کہ مجلس وحدت مسلمین روز اول سے اب تک متاثرین سیلاب کے ساتھ رہی اور ہم ان کی مکمل بحالی تک حسب استطاعت ان کی مدد کریں گے۔

واضح رہے کہ اس سے قبل مجلس وحدت مسلمین بلوچستان اور انجمن حسینیہ خواجگان نارووال کی جانب سے ڈیرہ غازی خان کے سیلاب متاثرہ گھروں کی تعمیر نو کا آغاز بھی کیا جاچکا ہے۔

وحدت نیوز(لاہور) صدر مجلس وحدت مسلمین پنجاب علامہ سید علی اکبر کاظمی نے ہالینڈ کے بعد سویڈن میں قرآن پاک کی بے حرمتی کی شدید مذمت کرتے ہوئے آج بعد نماز جمعہ پنجاب بھر کی مساجد اور امام بارگاہوں کے باہر پر امن احتجاج کی اپیل کی ہے۔

علامہ علی اکبر کاظمی نے کہا کہ عالمی برادری انتہا پسندی کی جانب بڑھتے ہوئے قدم روکے، مسلمان سب کچھ برداشت کرسکتا ہے لیکن اپنے دین کے معاملے پر کوئی سمجھوتہ نہیں کرسکتا۔

انہوں نے اپیل کی کہ ملک گیر سطح پر زیادہ سے زیادہ پرامن احتجاج کے ذریعے عالمی برادری پر اپنا اتحاد اور اتفاق ظاہر کیا جائے اور انہیں مجبور کیاجائے کہ وہ مسلمانوں کے مقدسات کی توہین سے باز رہیں ۔