وحدت نیوز(کراچی)مجلس علماء مکتب اھل بیت ع پاکستان صوبہ سندھ کے زیر اہتمام 18 جون 2023 کو کراچی میں افکارِ امام خمینی رح کانفرنس منعقد کرنے کا اعلان، مجلس علماء مکتب اھل بیت ع پاکستان صوبہ سندھ کے صدر علامہ عبداللہ مطھری نے اپنے بیان میں کہا کہ امام خمینی رح ایک عظیم شخصیت تھی جو ابھی ہمارے درمیان موجود نہیں ہے جس کو ہمیشہ یاد رکھا جائے گا، 18جون 2023 کو کراچی میں افکارِ امام خمینی رح کانفرنس کا انعقاد کیا ہے، جس میں ملک بھر کے نامور علماء کرام شرکت کریں گے اور خطابات بھی فرمائیں گے۔

تفصیلات کے مطابق علامہ عبداللہ مطھری نے اپنے ایک جاری کردہ بیان میں کہا ہے کہ 4 جون انقلاب اسلامی حضرت آیت اللہ العظمی' امام خمینی رح کی برسی ہے جس کی مناسبت سے مجلس علماء مکتب اھل بیت ع پاکستان صوبہ سندھ کے زیر اہتمام 18 جون 2023 کو کراچی میں صوبہ سطح پر افکارِ امام خمینی رح کانفرنس کے عنوان سے عظیم الشان کانفرنس منعقد کرنے جارہے ہیں جس میں خصوصی شرکت  و خطابات مرکزی صدر حجتہ الاسلام والمسلمین علامہ سید حسنین عباس گردیزی، علامہ شیخ صلاح الدین، علامہ غلام عباس رئيسی، علامہ اصغر حسین شہیدی، علامہ علی نقی ہاشمی، مجلس وحدت مسلمین صوبہ سندھ کے صدر علامہ سید باقرعباس زیدی،علامہ حیدر عباس عابدی کریں گے۔

 مزید کہا کہ افکارِ امام خمینی رح کانفرنس میں سندھ کے علماء کرام و اہم شخصیات شرکت کریں گے، امام خمینی رح کی لازوال قربانیوں کو فراموش نہیں کیا جا سکتا ہے امام خمینی رح امت مسلمہ کا ایک عظیم سرمایہ تھا عالمی سطح کا لیڈر تھا جس ہم ابھی محروم ہیں، ہم نے امام خمینی رح کی یاد کو زندہ رکھتے ہوئے 18 جون کو انقلاب اسلامی کے پاسبان امام خمینی رح کے عنوان سے کراچی میں افکارِ امام خمینی رح کانفرنس منعقد کریں گے۔

وحدت نیوز(اسلام آباد)چیئرمین مجلس وحدت مسلمین پاکستان علامہ راجہ ناصر عباس جعفری نے حضرت امام خمینی رضوان اللہ علیہ کی 34 ویں برسی کی مناسبت سے انہیں شاندار انداز میں خراج عقیدت وسلام پیش کرتے ہوئے کہا کہ نادر و نایاب، خورشید تابناک ہمہ جہت خصوصیات کی حامل شخصیت ہمارے لیے عظیم عطیہ خداوندی تھا، آپ ایمان و عمل صالح کی مصداق آفاقی شخصیت کے مالک تھے، خمینی بت شکن عالم اسلام کی وہ عظیم ہستی ہیں جنہوں نے اپنی علمی و عملی جد و جہد سے مسلمین و مستضعفین جہاں کا سر بلند کر دیا، آپ کی دین ناب کی فکر ہی مرہون منت بنی کہ دنیا بھر کی تحریکوں اور نہضتوں نے طاغوتی قوتوں کو ہر میدان میں شکست فاش سے دوچار کیا۔

انہوں نے کہا کہ حضرت امام خمینی رح کی تعلیمات و افکار میں ہی ملت پاکستان کے مسائل کا حل پوشیدہ ہے، جن پر عمل پیرا ہو کر ہم اپنے ملک کو درپیش چیلنجز سے باطریق احسن نبردآزما ہو سکتے ہیں، آپ نے ذاتِ باری تعالیٰ پر کامل یقین کے ساتھ نہ صرف ملت ایران کو بلکہ ملت اسلامیہ کو خود اعتمادی عطا کی، امام خمینی رض نے عملی طور پر ثابت کیا کہ اگر دین سے صحیح استفادہ کیا جائے، تو یہ قوموں کو بیدار کرنے کا بہت ہی مؤثر اور فعال ترین ذریعہ ہے، آپ نے کمزور اور پسے ہوئے طبقات کی کامیابی کے لیے زمینہ سازی کی، اپنی عملی زندگی سے ہم سب پر یہ بات ثابت کر دی کہ دنیا کی استکباری طاقتوں کے مقابلے میں پوری طاقت سے ڈٹ جانے میں ہی کامیابی ہے اور اصولوں کی خاطر ان کے مقابلے میں کبھی خاموش نہیں رہنا چاہیے۔

وحدت نیوز(اسلام آباد)مجلس وحدت مسلمین شعبہ خواتین کی مرکزی صدر سیدہ معصومہ نقوی نے بانی انقلاب داعی اتحاد بین المسلمین رہبر کبیر امام خمینی رحمتہ اللہ علیہ کی چونتیسویں برسی کے موقع پر اپنے پیغام میں کہا کہ امام راحل امام خمینی رح وہ تاریخ ساز شخصیت ہیں جنہوں نے دور حاضر کی حسینیت کو زندہ کیا تاریخ ہمیشہ باکردار لوگوں کو یاد رکھتی ہے۔امام خمینی نے اپنی قوم کی فکری آبیاری کی اور ان کے مردہ ضمیروں کو زندہ کیا،آج ایران عالم کفر کیخلاف ایک مضبوط طاقت بن کر اسلامی مقدسات کی حفاظت کے لئے کمر بستہ ہے ،یہ آیت اللہ خمینی کی تربیت کا مظہر ہے ۔

انہوں نے کہا کہ امام خمینی صرف ایک عالم نہیں بلکہ کردار ساز تھے انہوں نے مظلوم اور محروم طبقے کی آواز بن کر دنیا میں ان کے حقوق کے لیے آواز بلند کی آپ نے سالوں سال بہادری سے مقابلہ کرکے شہنشاہی نظام کا تختہ الٹایا جس کے بعد ایران میں اسلامی جمہوریہ کے عظیم اور مضبوط نظام کو قائم کردیا ان کا مزید کہنا تھا آج رہبر معظم سید علی خامنای دامت برکاتہ امام خمینی رح کے افکار کے ترجمان بن کر انقلاب اسلامی کی محافظت فرما رہے ہیں اور ان شاء اللہ تا ظہور امام زمان عج انقلاب اسلامی کی یہ روشنی تاریک دنیا کو منور کرتی رھے گی۔

وحدت نیوز(لاہور) لاہور میں فرزند زہرا س حضرت امام مہدی عج کی شان میں گستاخی کرنے والے ملعون احسن باکسر کو سزا موت دینے کا ملت جعفریہ پاکستان نے مطالبہ کردیا ۔ مجلس علماء مکتب اھل بیت ع پاکستان صوبہ سندھ کے صدر علامہ عبداللہ مطھری نے اپنے مذمتی بیان میں کہا کہ امام مہدی عج کے شان اقدس میں گھٹیا زبان استعمال کی گئی، ہم پاکستان کے ریاستی اداروں سے مطالبہ کرتے ہیں گرفتار کر کے پھانسی کی سزا دی جائے،ہمارے آقا و مولا حجت خدا ج فرزند زہرا س حضرت امام مہدی عج کی شان میں احسن باکسر نے گھٹیا زبان استعمال کرکے پاکستان کے امن کے فضا کو سبوتاژ کرنے کی کوشش کی ہے۔ہم نے ہمیں اپنے کانڈھوں پر شہداء کی لاشیں اٹھا کر بھی پاکستان میں شیشہ نہیں توڑا پرامن پاکستانی آج ملعون کے گرفتاری کا مطالبہ کرتے ہیں۔

تفصیلات کے مطابق مجلس علماء مکتب اھل بیت ع پاکستان صوبہ سندھ کے صدر علامہ عبداللہ مطھری نے پریس ریلیز جاری کرتے ہوئے کہا کہ پاکستان کے حالات پہلے سے ہی خراب ہیں اور پھر ایک لاہور سے تعلق رکھنے والے ملعون احسن باکسر نے حضرت امام مہدی عج کے شان اقدس میں گھٹیا زبان استعمال کرکے ہماری دلوں پر کھنجر لگایا ہے بدبخت شخص نے ایسی زبان استعمال کی ہے جو ہم برداشت نہیں کرسکتے ہیں پورے ملک میں ملت جعفریہ پاکستان میں غم و غصہ کی فضا ہے ہم پاکستان سے محبت کرنے والے پرامن محب وطن پاکستانی ہیں جس نے ہمیشہ لاشیں اٹھائیں لیکن پاکستان میں ایک شیشہ نہیں ٹوڑا ہے ہم نے ہمیں پاکستان زندہ باد کے نعرے لگائے ہم  پاکستان کے اداروں کے ساتھ کھڑے رہے۔

انہوں نے مزید کہاکہ آج پوری ملت پاکستان کے ریاستی اداروں سے مطالبہ کررہی ہے کہ ہمارے آقا و مولا حجت خدا ج نواسہ رسول ﷺ فرزند زہرا س حضرت امام مہدی عج کی شان میں گستاخی کرنے والے ملعون احسن باکسر کو فل فور گرفتار کر کے قرار واقعی سزا دی جائے اور ہمارے زخموں پر مرہم رکھی جائے اس نے مزید کہا کہ ملعون گرفتار نہیں ہوا تو یہ ملک بھر ہونے والے احتجاجی مظاہرے وسیع پیمانے پر کیئے جائیں گے۔

وحدت نیوز(کوئٹہ) مجلس وحدت مسلمین کے مرکزی رہنماء علامہ مقصود علی ڈومکی نے کہا ہے کہ مجلس وحدت مسلمین کل بھی کوئٹہ کے مومنین کی امیدوں کا مرکز تھی اور آج بھی عوام کی امیدوں کا مرکز ہے۔ ہم عوام کے خادم ہیں۔ ان خیالات کا اظہار انہوں نے مجلس وحدت مسلمین پاکستان ضلع ہزارہ ٹاؤن کوئٹہ کے ضلعی دفتر میں اہم اجلاس کے موقع پر کیا۔ اجلاس کی صدارت ایم ڈبلیو ایم کے ضلعی صدر سید ابراہیم شاہ کر رہے تھے۔ جبکہ مرکزی سیکرٹری تنظیم علامہ مقصود علی ڈومکی، رکن شوریٰ عالی سابق صوبائی وزیر قانون آغا سید محمد رضا، صوبائی نائب صدر علامہ شیخ ولایت حسین جعفری، مولانا سید عباس موسوی اور اراکین ضلعی کابینہ شریک ہوئے۔ اجلاس میں ایم ڈبلیو ایم ضلع ہزارہ ٹاؤن کی تنظیمی فعالیت اور عوامی رابطہ مہم کا جائزہ لیا گیا۔

اس موقع پر خطاب کرتے ہوئے علامہ مقصود علی ڈومکی نے کہا کہ دستوری طور پر ضلعی انتخابات کے بعد تمام یونٹس کی تنظیم نو ضروری ہے۔ یونٹس شوریٰ اجلاس کے ذریعے جمہوری اور دستوری پراسس کے مطابق یونٹس کی تنظیم نو کی جائے۔ مجلس وحدت مسلمین کل بھی کوئٹہ کے مومنین کی امیدوں کا مرکز تھی اور آج بھی عوام کی امیدوں کا مرکز ہے۔ ہم عوام کے خادم ہیں اور عوام کی خدمت کو عظیم عبادت اور اپنے لئے اعزاز سمجھتے ہیں۔ آئندہ انتخابات میں کوئٹہ سے بھرپور انداز میں حصہ لیں گے۔ اس موقع پر گفتگو کرتے ہوئے آغا سید محمد رضا نے کہا کہ مجلس وحدت مسلمین اقتدار کی بجائے اعلیٰ اسلامی و انسانی اقدار کے لئے میدان عمل میں ہے۔ قائد وحدت کی مدبرانہ قیادت میں ملت کے حقوق کے حصول کی جدوجہد جاری رہے گی۔ اس موقع پر عوامی رابطہ مہم یونٹس کی تنظیم نو اور برسی شہداء کے پروگرامز پر مشاورت کی گئی۔

وحدت نیوز(قم المقدسہ)مجلس وحدت مسلمین پاکستان شعبہ قم کے زیراہتمام مدرسہ حجتیہ قم میں حضرت امام خمینی (رہ) کی برسی کا انعقاد کیا گیا۔ برسی کی تقریب میں فرزندان انقلاب کی کثیر تعداد نے شرکت کی۔ برسی میں حضرت امام خمینی (رہ) کی تعلیمات، نظریات اور خدمات پر مختلف زاویوں سے روشنی ڈالی گئی۔ اس موقع پر نظریاتی و انقلابی اور تنظیمی شخصیات نے اپنی بھرپور شرکت کے ساتھ حضرت امام خمینی (رہ) کے ساتھ اپنے عشق کا اظہار کیا۔ برسی کے پروگرام سے خصوصی خطاب مجلس وحدت مسلمین پاکستان کے چیئرمین علامہ راجہ ناصر عباس جعفری نے کیا۔ اس موقع پر انہوں نے پاکستان کے جاری بحرانوں پر روشنی ڈالتے ہوئے حضرت امام خمینی (رہ) کی تعلیمات و افکار کو ملت پاکستان کے مسائل کا حل قرار دیا۔

یاد رہے کہ حضرت امام خمینی (رہ) کی برسی کے پروگرام مجلس وحدت مسلمین کی طرف سے متعدد ممالک میں جوش و خروش اور عقیدت کے ساتھ منعقد کئے جاتے ہیں۔ مجلس وحدت مسلمین کی دنیا بھر میں شناخت ہی حضرت امام خمینی (رہ) اور شہید علامہ عارف حسینی (رہ) کے افکار و نظریات ہیں۔ قم المقدس میں شہر علم و انقلاب ہونے کی وجہ سے مجلس وحدت مسلمین کا حضرت امام خمینی (رہ) کی برسی کا پروگرام خاص اہمیت کا حامل ہے۔