وحدت نیوز(کراچی)اجتماعی دعائے توسل اور محفل میلاد بسلسلہ ولادت باسعادت حضرت امام علی نقی علیہ السلام اور یوم تکمیل دین ولایت امام علیؑ عید غدیر خُم کا انعقاد محفل شاہ خراسان روڈ پر کیا گیا، دعائے توسل کی تلاوت کی سعادت مولانا زاہد حسین ہاشمی نے حاصل کی، جس میں ماتمی انجمنوں، سماجی، سیاسی، اسکاؤٹس کے نمائندوں کی کثیر تعداد اور مومنین و مومنات نے شرکت کی۔ محفل میں معروف شعرائے کرام، منقبت خواں حضرات نے نذرانہ عقیدت پیش کیا، جن میں ناصر آغا، ثاقب رضا ثاقب، اریب ہادی، علی رضا جعفری، محمد رضا، علی حیدر، رضی زیدی، محمد علی جلالوی، ریاست میر، راشد جلالوی، محمد تقی ایڈووکیٹ، عروج واسطی، نقی لاہوتی نے بارگاہ امامت میں نذرانہ عقیدت پیش کیا۔ اس موقع پر مولانا مختار علی، ندیم حسین رضوی، بوبی شاہ، عظیم جاوا، ضامن عباس، جاوید حسین نقوی اور قمر عباس رضوی بھی موجود تھے۔

علامہ اظہر حسین نقوی، علامہ سجاد شبیر رضوی، ناصر حسینی نے عید غدیر خم کے موضوع پرخطاب کرتے ہوئے کہا کہ حضرتِ محمد مصطفیؐ  نے حج سے واپسی پر حجاج کرام کو جمع کیا اور اعلان کیا کہ جس کا میں مولا اس کے علیؑ مولا، تو ہمیں سیرت محمد مصطفیؐ پر عمل پیرا ہو کے غدیر خم کے پیغام کو یاد رکھنا چاہیئے اور اس غدیری اعلان پر عمل پیرا ہوکر دنیا کی ظالم طاقتوں سے مقابلہ کرنا چاہیئے۔ انہوں نے کہا کہ اجتماعی ذمہ داریوں سے دستبردار کسی صورت نہیں ہونا چاہیئے، آج عالم اسلام غدیر خم سے توسل کرکے مسائل کے حل کے لئے دعا کریں۔ مقررین نے مشہور ترانہ سلام فرماندہ پر حکومت کی جانب سے ممکنہ پابندی کی شدید مذمت کی اور کہا کہ سلام فرماندہ میں ایسا کوئی مواد نہیں جس سے مذہبی منافرت یا فرقہ واریت ظاہر ہو۔ مقررین نے مسنگ پرسنز کی بازیابی اور شاتم امام زمانہؑ باکسر کو کیفر کردار تک پہنچانے کا حکومت سے مطالبہ کیا۔ آخر میں دعا کے اختتام پر مومنین و مومنات میں نیاز تقسیم کی گئی۔

وحدت نیوز(کوئٹہ)مجلس وحدت مسلمین کوئٹہ سٹی کے صدر ارباب لیاقت علی ہزارہ نے کہا ہے کہ کوئٹہ کے علاقے علمدار روڈ کے مکینوں کو کیسکو کی جانب سے مناسب سہولیات فراہم نہ ہونے کی وجہ سے شدید مشکلات کا سامنا ہے۔ علاقے کو بجلی فراہم کرنے کیلئے تاحال ان پرانے ٹرانسفارمرز کا استعمال کیا جا رہا ہے جنکی کپیسٹی آخری درجے تک پہنچ چکی ہے۔

انہوں نے کہا کہ ناقص ٹرانسفارمرز کی وجہ سے بجلی کی ترسیل میں مشکلات کے باعث علاقے میں نہ صرف روز مرہ کی زندگی متاثر ہوئی ہے، بلکہ اسکول، مدارس اور کاروبار بھی شدید متاثر ہوا ہے۔

 انہوں نے کیسکو حکام سے مطالبہ کرتے ہوئے کہا کہ عوام کی مشکلات کے حل کیلئے علمدار روڈ کے ٹرانسفارمرز کو تبدیل کرکے نئے ٹرانسفارمرز لگائے جائے، تاکہ لوڈشیڈنگ کے مسائل بھی حل ہو سکے۔

انہوں نے کہا کہ کیسکو ایک پروفیشنل ادارہ ہونے کا ثبوت دے اور جن علاقوں میں ایک ہی ٹرانسفارمر کا استعمال کرکے متعدد محلوں کو بجلی فراہم کی گئی ہے، وہاں اعلیٰ معیار کو مدنظر رکھ کر ٹرانسفارمر کی تعداد میں اضافہ کرے۔

وحدت نیوز(لاہور)عید غدیر خم کی مناسبت سے مرکزی صدر مجلس وحدت مسلمین شعبہ خواتین سیدہ معصومہ نقوی نے کہا کہ عید غدیر کے پر مسرت موقع پر تمام عالم اسلام اور بالخصوص امام زمانہ عج کی خدمت میں تہنیت و تبریک پیش کرتی ہوں  خداوند عالم نے اس دن اپنے دین کو مکمل کیا اور امت رسول اللہ صلی اللہ علیہ وآلہ وسلم پر اپنی نعمتوں کو تمام کیا۔ غدیر اسلام کے ایک اہم ترین مسئلے ولایت اور اسے قبول کرنے کو بیان کرتا ہے مسلمانوں کیلئے رسول اکرم صل اللہ علیہ وآلہ وسلم کے بعد ان کے جانشین کو جاننا بہت اہم موضوع تھا اور خداوند عالم نے عید غدیر خم میں حکم اعلان ولایت امیرالمومنین علی علیہ کے ساتھ ان کیلئے اس مسئلے کو واضح کردیا ۔

انہوں نے کہا کہ غدیر اسلامی ممالک کے لئے بہترین نمونہ عمل ہے، غدیر کے دن پیغمبر اکرم صلی اللہ علیہ و آلہ وسلم نے اسلامی حکومت کی ذمہ داریوں کو بیان کیا ہے کیونکہ حکومت کا مطلب عدالت کا قائم کرنا ہے، اسی وجہ سے پروردگار نے رسول خدا صلی اللہ علیہ و آلہ وسلم کے بعد حضرت علی علیہ السلام کو عدالت کے اجرا کے لئے انتخاب کیا ہے۔

انہوں نے مزید کہا کہ اس دن کو منانا اور اسکے پیغام کو زندہ رکھنا ہم سب کی ذمہ داری ہے آئیے غدیر منائیں، اس کی یاد تازہ کریں، اس دن کا حقیقی مفہوم بتائیں، اس کی یاد میں لوگوں کی خبر گیری کریں، یتیم پروری اور مسکین نوازی کریں، جشن منائیں، لوگوں کی امداد کریں غرباء کا خیال رکھیں، عدل و انصاف کا عملی ثبوت دیں یہ سب کچھ کریں کہ اس دن ان تمام اعمال کا بےانتہا اجر و ثواب ہے لیکن یہ ضرور یاد رہے کہ ہمارے کردار میں مولا علی (ع) کی سیرت جلوہ گر ہو اور ہم زبانی کلامی نہیں بلکہ عملی طور پر غدیری ہوں۔

وحدت نیوز(اسلام آباد) چیئرمین مجلس وحدت مسلمین پاکستان علامہ راجہ ناصر عباس جعفری کی اپیل پر آج ملک بھر میں یوم حرمت قرآن الحکیم منایا گیا، جس میں ملک کے چاروں صوبوں سمیت گلگت بلتستان اور آزاد جموں و کشمیر کے چھوٹے بڑے شہروں میں بڑی تعداد میں عاشقان قرآن الحکیم نے شرکت کی اور سویڈن میں قرآن مجید کو جلائے جانے کے خلاف اپنا بھرپور احتجاج ریکارڈ کروایا، اس سلسلے میں جہاں آئمہ جمعہ والجماعت نے اپنے خطبوں میں اسلام کی مقدس کتاب کی بے حرمتی پر گفتگو کی، وہاں بعد از نماز جمعہ اس گھناؤنے عمل کے خلاف احتجاجی مظاہرے اور ریلیاں بھی نکالی گئیں۔

مظاہرین کی جانب سے سویڈن حکومت کے خلاف شدید نعرہ بازی کی گئی اؤر سویڈن کے پرچم بھی نذر آتش کیئے گئے، اس بہیمانہ جرم کے مرتکب شخص اور سویڈن حکومت کے خلاف قراردادیں بھی منظور کی گئیں،احتجاجی مظاہروں اور ریلیوں کے شرکاء سے خطاب کرتے ہوئے مقررین نے قرآن کریم کی سویڈن میں ہونے والی توہین کی شدید مذمت کرتے ہوئے، جہاں اسے اسلام کے خلاف ایک منظم سازش قرار دیا وہاں عالمی اداروں اور انسانی حقوق کی تنظیموں سے اس شرمناک حرکت کا سختی سے نوٹس لینے کا بھی مطالبہ کیا اور حکومت سے بھی مطالبہ کیا کہ جب تک مجرم کو قرار واقعی سزا نہیں دی جاتی، وہ سویڈن حکومت سے اپنے سفارتی تعلقات منقطع کرے، اس مسئلے کو اقوام متحدہ سمیت دیگر اسلامی ممالک کے فورمز پر بھی اٹھایا جائے، اس طرح کے واقعات کے خلاف پوری قوت کے ساتھ امت مسلمہ اقدامات اٹھائے اور عالمی سطح پر قانون پاس کروایا جائے کہ آئندہ کوئی بھی اسلام یا دیگر مذاھب کے مقدسات کی توہین بارے سوچ بھی نہ سکے۔

وحدت نیوز(کراچی) مجلس وحدت مسلمین کراچی کے تحت 18 ذوالحجہ روز غدیر کی مناسبت سے شہر کے مختلف علاقوں میں چراغان ، محافل اور جشن میلاد کے ساتھ ساتھ بچوں کے لئے جھولوں،بچیوں کے لئے مہندی اور فیس پینٹنگ سمیت عیدی کا بھی خصوصی انتظام کیا گیا تھا۔اس موقع پر مومنین و مومنات باالخصوص بچوں کی کثیر تعداد پروگرامات میں شریک تھی۔سولجر بازار ، انچولی ، نیورضویہ اور جعفر طیار میں منعقدہ جشن اور محافل سے ایم ڈبلیو ایم کراچی ڈویژن اور ضلعی ذمہ داران نے خصوسی شرکت کی اور بچوں میں عیدی بھی تقسیم کی۔

جشن سے خطاب کرتے ہوئے مجلس وحدت مسلمین کراچی  کے صدر علامہ صادق جعفری ،علامہ حیات عباس،علامہ ملک غلام عباس و دیگر کا کہنا تھا کہ ولایت اہل بیت دین اسلام کی روح ہے اور امامت و ولایت کے بغیر دین نا مکمل ہے اسی لئے قرآن کریم نے اعلان ولایت کے موقع پر فرمایا آج تمہارے لئے دین مکمل ہوا اور نعمتیں تمام ہوئیں۔انہوں نےکہا کہ نظام ولایت آج عالمی قوت بن چکا ہے جس سے شیاطین عالم خائف ہیں حضرت امام خمینی نے پیغام غدیر اور نظام ولایت کی روشنی میں ایک الہی حکومت قائم کی جو نور کی کرن بن کر دنیا سے ظلمتوں کا خاتمہ کر رہی ہے۔

علامہ صادق جعفری نے مزید کہا کہ آج مجلس وحدت مسلمین پاکستان کے ذمہ داران و کارکنان سمیت تمام شیعہ جوانوں ،ملی اداروں،ماتمی انجمنوں،مساجد و امام بارگاہوں کی ذمہ داران نے ناصرف کراچی بلکہ سندھ کے گوشے گوشے کو نور ولایت سے منور کیا ہوا ہے،انھوں نے کہا کہ آج مولا علی ع کے ماننے والوں نے پاکستان سمیت پوری دنیا کو میدان خم غدیر میں بدل دیا ہے۔جہاں دیکھیں نور ولایت کے پروانے اعلان ولایت پر جشن منا رہے ہیں۔

علامہ رشید ترابی پارک انچولی میں خطاب کرتے ہوئے مجلس وحدت مسلمین کراچی کے رہنما مولانا حیات عباس،مولانا ملک غلام عباس  نے جشن عید غدیر کے شرکاء سے خطاب کرتے ہوئے کہا کہ اللہ رب العزت نے پوری کائنات میں جو ایک نور پھیلایا ہے وہ نور مولا علی اور ان کی آل کے وسیلے سے قائم ہے،پاک پروردگار نے کائنات کی خلقت سے قبل اپنی حبیب حضرت محمد ، مولا علی اور بی بی فاطم الزھراء سلام علیہا کے نور کو خلق کیا تھا،یعنی خالق کائنات نے اس کائنات اس میں موجود ہر شئے اور اپنے پیغمبروں کی خلقت سے پہلے محمد و اہلبیت محمد کے نور کو خلق کیا تھااور اسی نور کی بدولت آج پوری کائنات روشن ہے۔

وحدت نیوز(اسلام آباد)چیئرمین مجلس وحدت مسلمین پاکستان علامہ راجہ ناصر عباس جعفری نے 18 ذی الحجہ عید سعید غدیر کے خوشیوں اور مسرت بھرے عظیم دن کے موقع پر تمام پیروان ولایت اور بالخصوص حجت دوراں حضرت امام زمانہ عجل اللہ تعالیٰ فرجہ الشریف کی خدمت میں ہدیہ تبریک و تہنیت پیش کرتے ہوئے کہا ہے کہ عید غدیر ولایت کے پروانوں اور تمام محبان محمد و آل محمد علیہم السلام کے لیے بھائی چارے اور عقیدت کا دن ہے، یہ دن اتمام دین اور تمام خوبیوں کے عروج کا دن ہے، غدیر ایک الہیٰ تفکر و حکمت کا نام ہے۔ عید غدیر پوری انسانیت کے لیے تقدیر ساز دن ہے، غدیر ایک پاکیزہ تہذیب و تمدن کا نام ہے، تمام مومنین کو وحدت کی لڑی میں پرونے کا یوم ہے۔

انہوں نے کہا کہ عید غدیر منانے کے ساتھ ساتھ اس عید کے اہم ترین پیغام کو بھی مد نظر رکھنا چاہیے کہ ہر پیغمبر کے بعد ایک ایسی معصوم ہستی کا ہونا مہم ہے جو ان کے پیغام کو آگے بڑھائے اور ان کے اغراض و مقاصد کو لوگوں تک پہنچائے اور دین و شریعت کی پاسداری کرے۔ اٹھارہ ذی الحجہ کا دن ہمیں  اطاعت و فرمانبرداری کا درس دیتا ہے، ہم سب کو بھی اپنے منصب و عہدے کے تقاضوں کے مطابق ذمہ داری اور پیروی کو ملحوظ رکھنا چاہیے، غدیر کاروان رسالت کا کاروان امامت سے متصل ہونے کا دن ہے، غدیر امت رسول اکرم صلی اللہ علیہ وآلہ وسلم کے لیے عالی ترین عید ہے، غدیر عالم خلقت کا ثمرہ اور تمام مکاتب توحید کا نتیجہ ہے، غدیر ایک بہترین آغاز کا خوبصورت انجام ہے۔