وحدت نیوز: (لاہور) علامہ سید علی اکبر کاظمی صوبائی صدر مجلس وحدت مسلمین صوبہ پنجاب نے مرکزی سیکرٹری سیاسیات مجلس وحدت مسلمین پاکستان ، سید اسد عباس نقوی سے ملاقات کی اس ملاقات میں برادر آفتاب ہاشمی ضلع سنئر نائب صدر مجلس وحدت مسلمین ضلع لاہور و ظہیر کربلائی صوبائی آفس سیکرٹری بھی موجود تھے ۔

ملاقات میں قومی اور سیاسی امور پر تفصیلی گفتگو ہوئی جس پر صوبائی مجلس وحدت مسلمین صوبہ پنجاب نے کہا کہ مجلس وحدت مسلمین کی پہلی ترجیح قومی مفادات کے حصول کے لئے سو فیصد اپنا کردار ادا کرنا ہے ۔

تاریخ گواہ ہے کہ قرآن بورڈ ،علماء بورڈ میں تشیع نمائندگی کی بات ہو یا نصاب پاکستان اہلبیت اطہارعلیہم السلام کے تذکرے کی بات ہو یا متنازعہ بل کے خلاف آواز حق بلند کرنے کی بات ہو ہمیشہ ہم نے اور ہماری بابصیرت قیادت نے بہترین فیصلے کیے جس پر قوم کا سر فخر سے بلند ہوا ۔

مرکزی سیکریٹری سیاسیات جناب سید اسد عباس نقوی نے موجودہ قومی و سیاسی صورتحال سے تفصیلا آگاہ کیا اور انہوں نے کہا کہ متنازعہ بل کا مسترد ہونا قائد وحدت کی مدبرانہ اور بابصیرت شیر دل قیادت کا منہ بولتا ثبوت ہے جنہوں اپنی ذات کو فراموش کر کے قومی مفادٹ کو ترجیح دی اور قوم کا سر ہمیشہ فخر سے بلند کیا ۔

مزید اسد عباس نقوی مرکزی سیکرٹری سیاسیات نے کہا کہ ان شاءاللہ آئندہ قومی انتخابات میں پوری سیاسی اور قومی قوت کے ساتھ میدان میں اتریں گے اور ملت جعفریہ کے حقوق کا ہمیشہ ایوان اور ایوان سے باہر دفاع کرتے رہیں گے ۔ ان شاءاللہ۔

وحدت نیوز: (گلگت بلتستان ) لیڈر آف دی اپوزیشن گلگت بلتستان اسمبلی و پارلیمانی لیڈر ایم ڈبلیو ایم جی بی کاظم میثم نے مجلس وحدت مسلمین کے رہنما شیخ علی محمد کریمی اور عمائدین گمبہ سکردو کے ہمراہ گمبہ سکردو میں ساڑے 25 کروڑ کی لاگت سے زیرتعمیر گرلز ڈگری کالج کا دورہ کیا۔

اس موقع پر متاثرین کے تحفظات سے سابق کمشنر بلتستان شجاع عالم، ڈپٹی کمشنر سکردو شہریار شیرازی اور اسسٹنٹ کمشنر گمبہ سکردو انیلہ مہدی کو آگاہ کیا۔ ضلعی انتظامی سربراہان نے متاثرین کے تمام مسائل سنے اور جلد تحفظات دور کرانے کی یقین دہانی کرائی۔

واضح رہے کہ اس تاریخی پروجیکٹ کی منظوری میں سابق وزیراعلٰی خالد خورشید کی خصوصی معاونت شامل رہی ہے۔

پروجیکٹ کے فیز ون ون میں ایڈمن بلاک اور انٹر بلاک اور بی ایس بلاک کے ساتھ ساتھ دو بسیں موجود ہیں جن پر 25 کروڑ کی لاگت آئے گی جبکہ کم و بیش 40 کنال زمین پر محیط اس تاریخی پروجیکٹ کے فیز ٹو میں ہاسٹل اور سٹاف کالونی پر بھی کام ہوگا۔

گمبہ سکردو گرلز ڈگری کالج بلتستان ریجن میں اپنی نوعیت کا اہم ترین تعلیمی ادارہ بنے اور آئندہ سال ہی اسکی بنیادی تعمیرات مکمل کرنے کی کوشش جاری ہے۔ جیسے ہی تعمیر مکمل ہوجائے کلاسز شروع ہوجائے گی، جس کے لیے تین سالوں کی ایچ آر کی تنخواہیں بھی پی سی ون کا حصہ ہے۔ اس کالج میں طالبات کے لیے عہد حاضر کے چیلنجز سے نمٹنے کے لیے دور جدید کے تعلیمی شعبوں کو شامل کیا جائے گا۔ اس سے حلقہ دو سکردو بلخصوص اور بلتستان ریجن بالعموم میں اعلی سطحی اور معیاری تعلیم کی فراہمی یقینی ہوجائے گی۔

اس اہم مادر علمی کے لیے زمین کی فراہمی یقینی بنانے والے شگریکلاں اور گمبہ سکردو کے تمام عمائدین و سرکردگان کی کاوشیں بھی لائق تحسین ہیں۔ محکمہ تعلیم کے ٹیکنیکل سیل کی دلچسپی بھی قابل داد ہے۔

وحدت نیوز: (اسلام آباد ) چیئرمین مجلس وحدت مسلمین پاکستان علامہ راجہ ناصر عباس جعفری نے 28 صفر المظفر خاتم المرسلین حضرت محمد مصطفی ص کے یوم وصال اور نواسہ رسول حضرت امام حسن مجتبیٰ ع کے یوم شہادت کے موقع پر تمام مسلمین جہان کی خدمت میں تعزیت و تسلیت پیش کرتے ہوئے کہا ہے کہ اگر امت مسلمہ بالخصوص اور عالم انسانیت بالعموم حضور اکرم ص کی پاکیزہ سیرت و فرامین پر عمل پیرا ہو جائے تو تمام مشکلات حل اس میں مضمر ہے، ہمیں بحیثیت مسلمان آپس کے فروعی اختلافات کا حل شائستہ اور علمی انداز سے نکالتے ہوئے تمام مسالک و مکاتب فکر کے مقدسات کا احترام کرنا چاہیے، اسلام کے حقیقی داعی ہونے کی حیثیت سے غیر مسلموں کے ساتھ ہمارا سلوک مثالی اور خیر والا ہونا چاہیے، امت مسلمہ وحدت کے ساتھ ہی اپنا کھویا ہوا وقار دوبارہ حاصل کر سکتی ہے، انتشار و خلفشار کی روش کو چھوڑ کر امت مسلمہ کا یکجا ہونا وقت کا اولین تقاضا ہے، مسلمان پیغمبر اسلام ص کے اخلاق حسنہ اور حقوق انسانی کی انجام دہی اور اسوۂ حسنہ کی تقلید سے سربلندی و سرفرازی حاصل کرسکتے ہیں۔

انہوں نے کہا کہ ہم اگر سیرت رسول اکرم ص کے عملی مشاہدے اور سنت نبوی کی حقیقی تعبیر و تشریح کو دیکھنا چاہتے ہیں تو ہمیں سیرت امام حسن علیہ السلام کا گہرا مطالعہ کرنا ہوگا، آپ کے دور حکومت میں مسلمانوں کے درمیان اختلافات پیدا ہو گئے تھے، تو امام حسن ع نے اپنے جد امجد حضرت محمد مصطفی ص کی سیرت پر عمل پیرا ہو کر صلح کا راستہ اپنایا اور یہ ثابت کر دیا کہ اہل بیت علیہم السلام دین اسلام کی نگہبانی کا فریضہ انجام دینا جانتے ہیں اور دین خدا کے حقیقی وارث ونگہبان ہونے کی حیثیت سے انہیں کسی بھی صورت میں اسلام کا نقصان گوارہ نہیں ہے، لہذا آج کے حالات بھی ہم سب سے اسی ذمہ داری کا مظاہرہ کرنے کے متقاضی ہیں تاکہ اسلام دشمن قوتوں کے ناپاک عزائم کو خاک میں ملایا جا سکے۔

وحدت نیوز: (اسلام آباد ) چیئرمین مجلس وحدت مسلمین پاکستان علامہ راجہ ناصر عباس جعفری نے اپنے بیان میں کہا ہے کہ نیب ترامیم کے خلاف سپریم کورٹ کا فیصلہ عدل و انصاف کی فتح ہے، کرپٹ اشرافیہ پہلے بد عنوانی کرتی ہے اور پھر اسے قانونی طریقوں سے جائز بنانے کی مذموم کوشش کر کے عوام کا استحصال کرتی ہے، ان تمام سیاستدانوں اور طاقتور شخصیات کا کڑا احتساب ہونا چاہئے جنہوں نے قومی خزانے کو مال غنیمت سمجھ کر دونوں ہاتھوں سے لوٹا ہے، رجیم چینج کے ذریعے اقتدار پر قابض ہونے والوں نے مادر وطن کے ساتھ جو بے رحمانہ سلوک کیا، اس کی ملکی تاریخ میں مثال نہیں ملتی۔

انہوں نے کہا کہ قوم ہر اس شخص کو انصاف کے کٹہرے میں دیکھنا چاہتی ہے، جس جس نے ہماری نسلوں کے مستقبل کا سودا کیا، عالمی مالیاتی بینک سے اربوں روپے اچک کر خود دنیا بھر کے سیر سپاٹے میں مصروف ملک و قوم کے ازلی دشمن ہیں، قوم کو مہنگائی، بے روزگاری، سماجی ناانصافی اور جرائم پیشہ طبقات کے رحم و کرم پر چھوڑنے والے سیاست دان نہیں ہیں، بلکہ ان کا تعلق اس موقع پرست گروہ سے ہے جو انتخابات کو اپنے معاشی استحکام کا زینہ سمجھتے ہیں اور برسرِ اقتدار آ کر معاشی طور پر زبوں حالی کے شکار ملک وقوم کا خون چوستے ہیں، جب تک انہیں آہنی شکنجوں میں نہیں جکڑا جائے گا ملکی معیشت بہتر نہیں ہو گی۔

وحدت نیوز: (اسلام آباد ) مجلس وحدت مسلمین پاکستان کے مرکزی جنرل سیکرٹری سید ناصر عباس شیرازی نے عالمی یوم جمہوریت کے حوالے سے کہا ہے کہ اس دن کو دنیا میں منانے کا مقصد عوام میں جمہوریت اور جمہوری قدروں کا فروغ ہے، غیر جمہوری طاقتوں کا راستہ روکنے اور جمہوریت کیلئے ہر قسم کی قربانی دینے کیلئے عوامی شعور اجاگر کرنا اہم ہے، آئین کی بالادستی اور عوامی رائے کے احترام کو ملحوظ خاطر رکھے بغیر ملک میں جمہوریت مضبوط نہیں ہو سکتی، اظہار رائے کی آزادی اور بنیادی انسانی حقوق کی بلا تفریق فراہمی جمہوری عمل کو چار چاند لگاتے ہیں، تمام جمہوریت پسند طاقتوں کو ملکر ایسا عوامی لائحہ عمل بنانا ہوگا جس کی بدولت غیر جمہوری قوتوں اور شدت پسندانہ نظریات کو سیاسی عمل سے دور رکھا جا سکے، اس کے بغیر پاکستان میں جمہوری عمل کو دیرپا اور پائدار نہیں بنایا جاسکتا۔

انہوں نے کہا کہ ملک میں طاقت کا سر چشمہ عوام ہیں، لیکن ہمارے ملک میں جمہوریت پر بار بار شب خون مارا گیا، جس سے یہ عمل عوام کے لیے خاطر خواہ نتائج نہیں دے سکا، جمہوری عمل عوام کی نظروں میں تب مضبوط ہوتا ہے جب وہ فائدہ مند بھی ہو، جس کی اولین شرط یہ ہے کہ اس عمل کو تسلسل کے ساتھ چلتے رہنا چاہیے، پاکستان میں جمہوری نظام کو سب سے زیادہ نقصان لوٹا ازم اور ان کی سرپرستی کرنے والوں نے پہنچایا ہے، فلور کراسنگ اور ہارس ٹریڈنگ جیسے غیر جمہوری اور قابل مذمت عمل کا راستہ روکنا اشد ضروری ہے، قابل اور عوامی خدمت کے جذبے سے سرشار سیاستدانوں کے میسر آنے کے لیے ضروری ہے کہ طلباء یونینز سے پابندی کو ختم کیا جائے۔

وحدت نیوز: ( جیکب آباد ) مجلس وحدت مسلمین پاکستان کے مرکزی رہنماء علامہ مقصود علی ڈومکی نے ایک وفد کے ہمراہ ڈپٹی کمشنر جیکب آباد دادلو زہرانی سے ملاقات کی۔

وفد میں سید احسان شاہ بخاری، سید غلام شبیر نقوی و دیگر شامل تھے۔

اس موقع پر علامہ مقصود علی ڈومکی نے ڈپٹی کمشنر دادلو زہرانی کو 23 اکتوبر 2023 کو منعقد ہونے والی شہدائے سانحہ شب عاشور جیکب آباد کی آٹھویں برسی میں شرکت کی دعوت دی۔

انہوں نے گفتگو کرتے ہوئے کہا کہ سانحہ شب عاشور جیکب آباد جو 23 اکتوبر 2015 کو رونماء ہوا، وہ جیکب آباد کی تاریخ کا المناک واقعہ تھا۔ جس میں 29 افراد شہید اور 59 افراد زخمی ہوئے۔ شہداء اور زخمیوں کی اکثریت کمسن معصوم بچوں پر مشتمل تھی۔

سانحہ شب عاشور کے شہداء کی یاد میں یادگار شہداء ٹاور بنانے کا سندھ حکومت نے وعدہ کیا، جو ابھی تک عملی نا ہو سکا۔

انہوں نے کہا کہ جیکب آباد کے شہداء کی یاد میں ہر سال عظمت شہداء کانفرنس منعقد کی جاتی ہے۔ جبکہ مقتل شہداء پر شمعیں روشن کی جاتی ہیں۔ جس میں جید علماء اور شخصیات کے علاوہ شہر جیکب آباد کے سیاسی سماجی رہنما شریک ہوتے ہیں۔

اس موقع پر گفتگو کرتے ہوئے سید احسان شاہ بخاری نے کہا کہ نیکٹا کی فہرست میں موجود دہشت گردوں اور شرپسندوں پر کڑی نظر رکھی جائے۔ جبکہ کالعدم تکفیری گروہ کی نفرت انگیز سرگرمیوں کا سدباب بھی ضروری ہے۔

وفد نے نئے تعینات ہونے والے ڈپٹی کمشنر کو قیام امن وامان میں اپنے مکمل تعاون کا یقین دلایا۔ اس موقع پر ڈپٹی کمشنر دادلو زہرانی نے جیکب آباد کے شہداء کو خراج عقیدت پیش کیا۔ انہوں نے کہا کہ عوام علمائے کرام اور انتظامیہ کا باہمی تعاون قیام امن کی ضمانت ہے۔