وحدت نیوز(اسلام آباد) وحدت یوتھ پاکستان کے زیر اہتمام تین روزہ سالانہ مرکزی کنونشن”صدائے عدل“ کا انعقاد، جس میں ملک کے چاروں صوبوں سمیت گلگت بلتستان اور آزاد جموں کشمیر سے وحدت یوتھ کے جوانوں کی بڑی تعداد شریک، تنظیمی وتربیتی کنونشن میں ملک بھر سے آئے شرکاء کو مرکزی صدر وحدت یوتھ ونگ علامہ تصور مہدی نے والہانہ انداز میں خوش آمدید کہا اور افتتاحی کلمات کہے۔

مرکزی کنونشن کے شرکاء سے وائس چیئرمین ایم ڈبلیو ایم پاکستان علامہ سید احمد اقبال رضوی نے مہدویت عصر حاضر کے تناظر میں کے موضوع پر گفتگو کرتے ہوئے کہا کہ عدل وانصاف کسی بھی ریاست کا بنیادی تقاضا ہے، تاریخ میں کبھی بھی پوری دنیا پر عدل کی حکومت قائم نہیں رہی، یہ شرف صرف حکومت امام مہدی کو حاصل ہو گا، وحدت یوتھ کے جوانوں کی اولین ذمہ داری بنتی ہے کہ امام وقت کی سرپرستی میں قائم ہونے والی عالمی الہی حکومت کے لیے زمینہ سازی اور کردار ادا کریں۔

چیئرمین ایم ڈبلیو ایم پاکستان کے معاون خصوصی و چیف آرگنائزر سید ناصر عباس شیرازی نے حالات حاضرہ کے موضوع پر گفتگو کرتے ہوئے کہا کہ ڈیڑھ سالہ خاک و خون کے کھیل کے باوجود اسرائیل اپنے مقاصد میں مکمل ناکام ہے، تمام تر جدید ٹیکنالوجی اور امریکہ سمیت مغربی قوتوں کے تعاون کے باوجود بھی صہیونی ریاست دو تنظیموں کے سامنے بے بس ہے، اپنی شکست کو چھپانے کیلئے اسرائیل غزہ میں نسل کشی کر رہا ہے اور خوراک و ادویات کی بندش کو جنگی ہتھیار کے طور پر استعمال کر رہا ہے جو عالمی قوانین کی سنگین خلاف ورزی ہے۔

شرکاء کنونشن سے ماہر تعلیم ڈاکٹر ثقلین عباس نقوی نے ٹائم منیجمنٹ کے عنوان پر گفتگو کی، دیگر مقررین میں صوبائی صدر علامہ سید علی اکبر کاظمی، سید یاور کاظمی اور راجہ مصطفی حیدر شامل تھے۔

وحدت نیوز(لاہور)مجلس وحدت مسلمین پاکستان کے شعبہ نصاب تعلیم کونسل کے جاری بیان میں کہا گیا ہے کہ ایم ڈبلیو ایم پاکستان نصاب تعلیم کونسل کے زیر اہتمام 18 جون 2025 کو لاہور میں پنجاب سطح کی "قومی نصاب تعلیم کانفرنس" کا انعقاد کیا جا رہا ہے۔ جس کا مقصد ایک متوازن، غیر متنازعہ اور قومی وحدت و اتحاد بین المسلمین پر مبنی نصاب تعلیم کی تشکیل پر مشاورت اور لائحہ عمل کی تیاری ہے۔ نصاب تعلیم کونسل کے کنوینئر اور مجلس وحدت مسلمین پاکستان کے مرکزی سیکرٹری نشر و اشاعت علامہ مقصود علی ڈومکی نے کانفرنس کے دعوتی سلسلے میں امامیہ آرگنائزیشن پاکستان کے سابق چیئرمین اور موجودہ مرکزی سیکرٹری تعلیمات و تبلیغات لعل مہدی خان، ادارہ خودی ہمدرد ہاؤس کے صدر جواد جعفری اور عزاداری کونسل لاہور ڈویژن کے رہنماء شیخ عمران علی کو کانفرنس میں شرکت کی دعوت دی۔ اس موقع پر گفتگو کرتے ہوئے علامہ مقصود علی ڈومکی نے کہا کہ نصاب تعلیم کسی بھی قوم کے مستقبل کا آئینہ دار ہوتا ہے۔ موجودہ متنازعہ نصاب تعلیم کو ملت جعفریہ اور محبان اہل بیت اہل سنت نے متفقہ طور پر مسترد کیا ہے۔ اب وقت کا تقاضا ہے کہ ایک ایسا متفقہ، غیر جانبدار اور حب الوطنی پر مبنی نصاب تعلیم ترتیب دیا جائے جو حب الوطنی قومی یکجہتی اور اتحاد بین المسلمین کا علمبردار ہو۔

نصاب تعلیم کونسل کے سیکرٹری غلام حسین علوی نے بھی صوبائی نصاب تعلیم کانفرنس لاہور کے حوالے سے سرگرم کردار ادا کرتے ہوئے مختلف شخصیات کو کانفرنس کے دعوت نامے پیش کئے۔ جن میں امام بارگاہ گلشن زہرا وحدت روڈ لاہور کے بانی و متولی سیٹھ حسنین ظفر کے لیے دعوت نامہ شاکر بخاری کے ذریعے پیش کیا گیا۔ سیٹھ حسنین کی ناسازی طبع پر ان کی صحت و سلامتی کی دعا کی گئی۔ امام بارگاہ قصر علی وحدت روڈ لاہور کے بانی و متولی ملک زوار حسین کو دعوت نامہ غلام حسین علوی نے براہ راست پیش کیا، جس پر ملک صاحب نے کانفرنس کے سلسلے میں ہر ممکن تعاون کی یقین دہانی کرائی۔ مجلس وحدت مسلمین پاکستان کی جانب سے تمام علمی، دینی، تعلیمی و سماجی شخصیات کو اس اہم قومی کانفرنس میں شرکت کی دعوت دی جائے گی، تاکہ سب مل کر ایک روشن، باوقار اور باہمی احترام پر مبنی نصاب تعلیم کی تشکیل میں اپنا کردار ادا کریں۔

وحدت نیوز(مشہد مقدس)شہید خدمت آیت اللہ ابراھیم رئیسی اور ان کے رفقاء کی برسی کی مناسبت سے دفتر مجلس وحدت مسلمین مشہد مقدس میں مجلس عزا کا اھتمام کیا گیا ۔اس مجلس کے خطیب علامہ سید حسن ظفر نقوی( مرکزی جنرل سیکرٹری مجلس وحدت مسلمین پاکستان) تھے۔

 انہوں نےشہید رئیسی کی زندگی پر روشنی ڈالتے ہوئے فرمایا کہ  شہید رئیسی" رجال "میں سے تھے کہ جن کا ذکر اللہ نے سورہ احزاب آیت 23 میں کیا ہے ۔شہید رئیسی کی بطور صدر مملکت مخلصانہ خدمات نے ایسے انمٹ نقوش چھوڑے ہیں جنہیں رہتی دنیا تک یاد رکھا جائے گا ۔

آپ نے حوزہ علمیہ مشہد مقدس کے طلاب کو نصیحت کرتے ہوئے فرمایا کہ اپنے آپ کو معاشرے میں مثبت اثر گزاری کے لئے تیار کریں کیونکہ امام خمینی ،شہید حسینی،شہید مطہری اور شہید رئیسی جیسی شخصیات حوزہ علمیہ میں ہی تیار ہوئی ہیں جنہوں نے اپنے کرداروعمل سے ایسے اثرات چھوڑے ہیں جنہیں تاریخ بھلا نہیں سکتی ۔

پروگرام کا آغاز تلاوت کلام مجید سے کیا گیا جسکی سعادت جناب قاری کاظم علی نے حاصل کی.  منقبت خواں جناب محمد علی نقوی سلمہ نے اپنی بہترین آواز سے داد تحسین حاصل کی. اس پروگرام میں کثیر تعداد میں علماء ،فضلاء اور طلاب عزیز نے شرکت فرمائی۔

وحدت نیوز(اسلام آباد)مجلس وحدت مسلمین پاکستان کے چیئرمین، سینیٹر علامہ راجہ ناصر عباس جعفری نے بانی رکنِ مجلس وحدت مسلمین ڈاکٹر سید ناصر عباس شیرازی کو "معاونِ خصوصی برائے چیئرمین" اور "چیف آرگنائزر" کے اہم عہدے پر نامزد فرمایا ہے۔

یہ فیصلہ اُن کی بے مثال قربانیوں، فکری بصیرت، اور تنظیمی صلاحیتوں کے پیش نظر کیا گیا، جو مجلس وحدت مسلمین کے آغاز سے اب تک وحدت، استقامت اور جدوجہد کی روشن علامت رہے ہیں۔

اس موقع پر چیئرمین مجلس وحدت مسلمین، سینیٹر علامہ راجہ ناصر عباس جعفری نے اپنے خصوصی دعائیہ کلمات میں فرمایا:"ہم بارگاہِ رب العزت میں دستِ دعا بلند کرتے ہیں کہ وہ برادر سید ناصر عباس شیرازی کو اس عظیم ذمہ داری میں توفیق، حکمت، اخلاص اور استقامت عطا فرمائے۔ آمین

وحدت نیوز(سکردو)صوبائی صدر مجلس وحدت مسلمین گلگت بلتستان آغا علی رضوی نے مرکزی رہنما مجلس وحدت مسلمین و رکن سپریم کونسل علامہ سید مولانا مبارک موسوی کی عیادت کی ۔ علامہ سید مبارک علی موسوی علیل ہیں اورسکردو ہسپتال میں زیر علاج  ہیں ۔ عیادت کرنے والوں میں علامہ ڈاکٹر مشتاق حسین حکیمی ،کاچو ولایت علی خان  ،جان حیدری بھی ہمراہ موجود تھے۔

وحدت نیوز(اسلام آباد) وائس چیئرمین مجلس وحدت مسلمین پاکستان علامہ سید احمد اقبال رضوی اور مرکزی سیکرٹری سیاسیات سید اسد عباس نقوی کی زیر صدارت مرکزی سیاسی کونسل کا اجلاس مرکزی سیکرٹریٹ ایم ڈبلیو ایم اسلام آباد میں منعقد ہوا۔

 اجلاس میں اپوزیشن لیڈر گلگت بلتستان و ممبر سیاسی کونسل میثم کاظم آنلائن شریک تھے، ممبر سیاسی کونسل ایم این اے انجینئر حمید حسین طوری، سابق صوبائی وزیر قانون آغا محمد رضا، تحصیل چیئرمین پارا چنار آغا مزمل حسین فصیح، انجینئر ظہیر عباس نقوی اور عارف رضا بھی موجود تھے۔

اجلاس میں شعبہ سیاسیات کے حوالے سے اہم امور پر تفصیلی گفتگو کی گئی، آئندہ تنظیمی سال کے لائحہ عمل، پروگرامات اور پالیسی کے حوالے سے اہم فیصلہ جات کئے گئے۔