وحدت نیوز(کوئٹہ)مجلس وحدت مسلمین پاکستان کے مرکزی ترجمان علامہ مقصود علی ڈومکی نے کہا ہے کہ وزیر اعظم پاکستان کو تین سال اقتدار میں رہنے کے بعد ناراض بلوچ یاد آئے جو کہ خوش آیند ہونے کے ساتھ ساتھ حکومت کے غیر سنجیدہ رویئے کا عکاس بھی ہے۔ دیر آید درست آید کے مصداق ہم ایسے مذاکرات کی کامیابی کے لئے دعاگو ہیں جن سے مظلوم بلوچستان کے دکھوں کا مداوا ہو سکے۔ بلوچ محب وطن ہیں ان کا اس ملک کی تعمیر و ترقی میں برابر کا حصہ ہے لہذا انہیں اس ملک میں برابر کا شہری تسلیم کیا جائے۔

انہوں نے کہا کہ مسئلہ بلوچستان کے اصل فریق سردار اور نواب نہیں بلکہ بلوچستان کے مظلوم عوام ہیں جو اکیسویں صدی میں بھی اپنے بنیادی حقوق سے محروم ہیں۔ جن کے لئے آج بھی پینے کا صاف پانی تعلیم اور صحت کی سہولیات ایک حسین خواب ہیں۔انہوں نے کہا کہ اب وقت آچکا ہے کہ بلوچستان کی محرومیوں کا خاتمہ کیا جائے اور بلوچستان کے ساحل اور وسائل پر یہاں کے عوام کا حق حاکمیت تسلیم کیا جائے۔ اور ان وسائل کو بلوچستان کے عوام کی تعمیر و ترقی اور فروغ تعلیم و صحت کی سہولیات کی دستیابی پر خرچ کیا جائے۔

 انہوں نے کہا کہ بلوچستان کے زخموں پر مرہم رکھنے سے معاملات حل کی طرف جائیں گے۔ ناراض بلوچوں سے مذاکرات کے لئے نیک نام اور بہتر شہرت کے حامل باوقار شخصیات پر مشتمل با اختیار کمیٹی تشکیل دی جائے جسے مقتدر اداروں کی حمایت بھی حاصل ہو تو ناراض بلوچوں کو قومی دھارے میں لایا جا سکتا ہے۔ ناراض بلوچ اسی سر زمین کے بیٹے ہیں جن کے خدشات دور کرکے انہیں عزت و وقار کے ساتھ قومی دھارے میں شامل کیا جائے۔

وحدت نیوز(لاہور) مجلس وحدت مسلمین شعبہ خواتین لاہور کے زیر اہتمام وحدت ہاوس لاہور میں تحفظ و فروغ عزاداری کانفرنس کا انعقاد کیا گیا کانفرنس میں مرکزی ڈپٹی سیکرٹری جنرل ایم ڈبلیو ایم علامہ احمد اقبال رضوی ، مرکزی سیکرٹری جنرل ایم ڈبلیو ایم شعبہ خواتین و رکن پنجاب اسمبلی سیدہ زہرا نقوی ، لاہور کی معروف معلمات و ذاکرات ، بانیان مجالس اور تمام ضلعی کابینہ نے شرکت کی کانفرنس کا آغاز تلاوت کلام پاک سے ہوا ۔

ضلعی سیکرٹری جنرل محترمہ حنا تقوی نے تمام شرکاء کو خوش آمدید کہا اور اپنی کابینہ کے تعارف کیساتھ اب تک کی کارکردگی رپورٹ پیش کی مرکزی ڈپٹی سیکرٹری جنرل ایم ڈبلیو ایم علامہ سید احمد اقبال رضوی نے تحفظ و فروغ عزداری کانفرنس سے خطاب کرتے ہوئے کہا کہ جب تک ہم متحد ہو کر ایک قوم کی شکل میں نہیں ابھریں گے دشمن ہماری صفوں میں گھس کر ہمیں کھوکھلا کرتا رہے گا ہم غفلت میں گھرے رہیں تو اسکا مطلب یہ نہیں کہ دشمن بھی سو رہا ہے دشمن منصوبہ بندی کر رہا ہے طاقت جمع کر رہا ہے۔

 انہوں نے کہا کہ ہمارے آئمہ کی حکمت عملی تھی کہ وہ دشمن کو دوست اور مخالف کو حامی بنانے کی کوشش کرتے جبکہ ہم دوست کو دشمن اور حامیوں کو مخالف بنا کر ان کی حکمت عملی کے بر عکس عمل کر رہے ہیں۔ انہوں نے مزید کہا کہ شہید قائد علامہ عارف حسین الحسینیؒ نے اپنے دور  قیادت میں سب سے پہلا مطالبہ تحفظ عزاداری کا کیا تھا دشمن ہماری عزاداری کو محدود کرنا چاہتا ہے لیکن یہ فرش عزا ، ماتمداری جلوس ہائے عزا ہماری عبادت ہے اور ہمیں اپنی جان ہتھیلی پر رکھ کر اسکی حفاظت کرنی ہے اور اپنی نسلوں تک بطور امانت پہنچانا ہے ۔

مرکزی سیکرٹری جنرل ایم ڈبلیو ایم شعبہ خواتین و رکن اسمبلی سیدہ زہرا نقوی نے اپنے خطاب میں کہ عزاداری کے انعقاد میں تین ارکان ایک مثلث کی طرح اہم کردار ادا کرتے ہیں بانیان مجالس ، علماء و ذاکرین اور سامعین تینوں کی فکری ہم آہنگی اہمیت کی حامل ہے انہوں نے کہا بانیان مجالس ایسے ذاکرین کو منبر سونپیں جو  اپنے بیان کے ذریعے عزاداروں کی فکری تربیت انجام دے سکتے ہوں یہ منبر اور فرش عزا ہماری درسگاہ ہیں یہاں سے تربیت یافتہ عزادر معاشرے میں سب سے منفرد اور بلند کردار کے حامل ہونے چاہئیں۔

 انہوں نے مزید کہا کہ ہر فرد کی ذمہ داری ہے کہ وہ انفرادی یا اجتماعی طور پر تحفظ عزاداری کے لیے عملی قدم اٹھائیں کیونکہ عزاداری ہماری شہ رگ حیات اور میراث ہے۔ کانفرنس سے سیکرٹری جنرل ایم ڈبلیو ایم شعبہ خواتین لاہور محترمہ حنا تقوی ، محترمہ عصمت زہرا ، محترمہ بشری اور محترمہ معصومہ نے بھی خطاب کیا اس موقع پر شرکائےکانفرنس نے وہاں موجود معلمات سے مختلف سوالات پوچھے جن کے عمدہ انداز میں جوابات دیے گئے تحفظ و فروغ عزاداری کانفرنس کے اختتام پر ضلعی سیکرٹری جنرل محترمہ حنا تقوی نے تمام مہمانان و شرکائے کانفرس کا شکریہ ادا کیا، ڈپٹی سیکرٹری جنرل محترمہ عظمی نقوی نے دعائے امام زمانہ عج کے ساتھ محفل کا اختتام کیا ۔

وحدت نیوز(قم)افغانستان سے امریکی انخلاء اور بعد کی صورتحال پر تبصرہ کرتے ہوئے حجت الاسلام و المسلمین ڈاکٹر شفقت حسین شیرازی نے کہا امریکہ مکمل طور پر افغانستان سے لاتعلق نہیں ہونا چاہتا۔ مجلس وحدت مسلمین پاکستان کے مرکزی سیکرٹری امور خارجہ نے عرب ذرائع ابلاغ کی یونین "یو نیوز" کو اپنے ایک اہم انٹرویو میں کہا کہ امریکہ انخلاء کے بعد بھی افغانستان میں اپنا اثر و رسوخ بحال رکھنا چاہتا ہے۔ امریکہ افغانستان اور خطے میں امن و استحکام نہیں دیکھنا چاہتا۔ امریکہ افغانستان میں اثر و رسوخ کے ذریعے ہمسایہ ممالک کے لیے مشکلات میں اضافہ کرنا چاہتا ہے۔

ڈاکٹر شفقت حسین شیرازی نے یو نیوز کو انٹرویو دیتے ہوئے کہا: امریکہ طالبان کے ساتھ ڈیل کے بعد افغانستان سے نکل رہا ہے اور جہاں سے امریکہ انخلاء کرتا جارہا ہے وہاں طالبان قابض ہوتے جارہے ہیں۔ انہوں نے کہا بیس سال قبل امریکہ طالبان کو ختم کرنے کے نعرے کے ساتھ اپنے اتحادیوں سمیت افغانستان میں داخل ہوا۔ امریکہ افغانستان سے شدت پسندی کا خاتمہ تو نہ کرسکا اور نہ افغانستان کی تعمیر و ترقی میں کوئی خاص کردار ادا کرسکا البتہ اس نے خطے کے امن کو تباہ اور افغانستان کو برباد کر رکھ دیا ہے۔  

انہوں نے کہا افغانستان سے انتہا پسندی تو ختم نہ ہوسکی لیکن افغانستان کی عوام ظلم و ستم کا بعی طرح نشانہ بنی۔ ان کا کہنا تھا کہ افغانستان میں جو مصیبت بھی آئی ہے یہ امریکی ظلم کی سیاست کا نتیجہ ہے۔

یو نیوز کو اپنے انٹرویو میں ڈاکٹر سید شفقت شیرازی نے کہا نائن الیون کا بہانہ بنا کر خطے کے امن کو تباہ کیا گیا۔ انہوں نے کہا امریکہ جب مکمل ناکام ہوا تو مذاکرات کا ڈرامہ رچا رہا ہے۔ بیس سال کی تباہی پھیلانے کے بعد امریکہ کہتا ہے ہم اس نتیجے پر پہنچے ہیں کہ افغانستان کے مسئلے کا مذاکرات کے علاؤہ کوئی دوسرا حل نہیں جبکہ یہ بات افغانستان کے چند حلقے اور خطے کے اہم ممالک پہلے دن سے کررہے تھے۔

انہوں نے کہا امریکہ طالبان کے ساتھ ڈیل اور ایک منصوبہ بندی کے ساتھ افغانستان سے نکل رہا اور اس نے طالبان سے اپنی حفاظت کی ضمانت لی ہے جبکہ افغانستانی عوام کی حفاظت کی ضمانت کے لیے امریکہ نے کوئی حکمت عملی نہیں بنائی ہے۔