وحدت نیوز (لاہور) مجلس وحدت مسلمین پاکستان کے سربراہ علامہ راجہ ناصر عباس جعفری اور مرکزی ڈپٹی سیکرٹری جنرل علامہ امین شہیدی اسلام آباد میں عید منائیں گے،جبکہ سیکرٹری جنرل پنجاب علامہ عبدالخالق اسدی اور مرکزی سیکرٹری سیاسیات سید ناصر شیرازی سرگودہامیں عید منائیں گے۔سربراہ مجلس وحدت مسلمین علامہ راجہ ناصر عباس جعفری نے مرکزی رہنماوں کو ہدایات کی ہے کہ وہ نماز عید کے بعد شہداء کے خانوادہ گان کے ساتھ عید کا دن گذاریں،آپریشن ضرب عضب میں شہید ہونے والے افواج پاکستان کے شہدا کے گھروں میں جا کر ان کے بچوں کی دلجوئی کریں،علامہ راجہ ناصر عباس جعفری نے مجلس وحدت مسلمین پنجاب کے سیکرٹری جنرل علامہ عبدالخالق اسدی کو سیالکوٹ میں بھارتی غنڈہ گردی کے نتیجے میں شہیدہونے والوں کی لواحقین سے تعزیت اور ان کی حوصلہ افزائی کرنے کے ہدایت کر تے ہوئے کہا کہ بھارت کی اشتعال انگیزی اور دہشت گردی کے خلاف قوم متحد ہیں اور ہم دشمن کو عبرتناک جواب دینے کی بھر پور صلاحیت رکھتے ہیں،افواج پاکستان کے شیر دل جوانوں کے پشت پر اٹھارہ کڑوڑو عوام سر پر کفن باندھے وطن عزیز کی دفاع کے لئے تیار ہیں،انشااللہ دشمن کے ارادوں کو ہم اپنی وحدت اور استقامت سے خاک میں ملا کر ہی دم لیںگے۔

وحدت نیوز (کراچی) مجلس وحدت مسلمین پاکستان کے سیکرٹری جنرل سندھ علامہ مختار امامی کراچی میں عید منائیں گے۔وحدت ہاؤس کراچی سے جاری اپنے بیان میں سربراہ مجلس وحدت مسلمین علامہ راجہ ناصر عباس جعفری نے مرکزی رہنماوں کو ہدایات کی ہے کہ وہ نماز عید کے بعد شہداء کے خانوادہ گان کے ساتھ عید کا دن گذاریں،آپریشن ضرب عضب میں شہید ہونے والے افواج پاکستان کے شہدا کے گھروں میں جا کر ان کے بچوں کی دلجوئی کریں،علامہ راجہ ناصر عباس جعفری نے مجلس وحدت مسلمین سندھ اور کراچی کے سیکرٹری جنرل علامہ مختار امامی ،سید حسن ہاشمی کو کراچی میں دہشتگردی کے نتیجے میں شہیدہونے والوں کے لواحقین سے تعزیت اور ان کی حوسلہ افزائی کرنے کے ہدایت کر تے ہوئے کہا کہ دہشت گردی کے خلاف قوم متحد ہیں عید کے روز شہدائے ملت جعفریہ کو فراموش نہیں کیا جائے ذمہ داران کارکنان شہداء کے گھروں پر تعزیت کریں اور عیدکی خوشیوں میں خانوادہ شہداء کو فراموش نہیں کیا جائے ۔

وحدت نیوز(کراچی) مجلس وحدت مسلمین پاکستان کے مرکزی جنرل سیکریٹری علامہ راجہ ناصر عباس جعفری نے عید الفطر کے پُرمسرت موقعہ پرمرکزی سیکریٹریٹ سے جاری اپنے ایک پیغام میں دنیا بھر کے مسلمانوں کو عید کی مبارکباد دیتے ہوئے کہا ہے کہ عید کادن اللہ تعالیٰ کی طرف سے ماہ صیام کی برکتوں پر امت مسلمہ کے لیے خصوصی انعام ہے ۔رمضان المبارک کے مہینہ میں دنیا کے مسلمان وحدت و اخوت کا فقید المثال مظاہرہ کرتے ہیں اور رب کائنات کے ہر حکم کی بجا آوری کی جاتی ہے۔ آج کے دن بھی ہمیں یہ عہد کرنا ہو گا کہ ہم اپنے اس عمل میں استقامت کا مظاہرہ کریں گے اور اپنے شب و روز کو اطاعت خداوندی،رواداری اور اتحاد و یگانگت میں بسر کریں گے۔انہوں نے کہا کہ خوشیوں کے اس موقعہ پرمادر وطن کے شہدا ء اور قوم کے لیے جانوں کا نذرانہ پیش کرنے والے افراد کو ہم خراج تحسین پیش کرتے ہوئے ان کی بلندی درجات کے لیے دعاگو ہیں۔عید کے موقع پر خاندانوں ،ہمسایوں اور نادار گھرانوں کو بھی اپنے ساتھ شامل رکھتے ہوئے ان کی ضروریات کو بھی پورا کرنے کی حتی الوسع کو شش کی جانی چاہیے۔

علامہ ناصر عباس نے بھارت کی طرف سے گولہ باری کے نتیجہ میں پانچ افراد کی شہادت پر غم و غصے کا اظہار کرتے ہوئے اس کھلی جارحیت اور دخل اندازی قراد دیا ۔انہوں نے کہا کہ کوتلیہ چانکیہ کے پیروکارکی طرف دوستی کا ہاتھ بڑھنا خود کو دھوکہ دینے کے مترادف ہے۔انڈیاکسی غلط فہمی کا شکار نہ رہے افواج پاک داخلی معاملات سے نبر د آزما ہونے کے ساتھ ساتھ ملکی دفاع کے لیے بھی پوری طرح سے چوکس اور تیار کھڑی ہے اور پاکستان کی اٹھارہ کروڑ عوام پاک فوج کے شانہ بشانہ ہیں۔جسم کے کسی بھی حصے کو نقصان پہنچے تکلیٖف سارے بدن کو ہوتی ہے۔ ہمیں اسی تکلیف کا ادراک کرنا ہے۔ پوری دنیا میں اس وقت امت مسلمہ کو سب سے زیادہ مسائل کا سامنا ہے۔ برما، یمن، عراق، شام ،فلسطین،مقبوضہ کشمیر، سمیت دنیا کے بیشتر ممالک میں رسول کریم ﷺ کے پیروکاروں کو وحشیانہ مظالم کا سامنا ہے۔ خوشی کے اس موقع پر ان افراد کی تکالیف کو فراموش نہ کیا جائے۔ عالم اسلام اپنی وحدت و اخوت سے عالم استکبار کو عبرت ناک شکست سے دوچار کر سکتا ہے ۔روزعید کے اس مذہبی تہوارکو امت مسلمہ روزِ عہد کے طور پر منائے اور اس پیمان پر یکجا ہو ہم اسلام دشمن یہودی و نصرانی قوتوں کو اپنے اتحاد اور قوت ایمانی سے شکست دیں گے۔ہمیں اپنے عمل سے یہ ثابت کرنا ہو گا کہ سپر پاور کے زعم میں مبتلا ہم کسی ریاست کے احکامات کو دین اسلام کی سربلندی کی راہ میں رکاوٹ نہیں بننے دیا جائے گا۔

وحدت نیوز(لاہور) مجلس وحدت مسلمین،جماعت اسلامی، مرکزی جماعت اہلحدیث، منہاج القرآن، جماعت الدعوۃ کے رہنماوُں کا کہنا تھا کہ مسلم امہ کے اتحاد اور وحدت سے ہی اسلام دشمنوں کے ناپاک عزائم خاک میں ملائے جاسکتے ہیں، آج سٹی 42 والے مبارکباد کے مستحق ہیں کہ تمام مکاتب فکر کو ایک جگہ جمع کرکے جس اتحاد یکجہتی کا مظاہرہ کیا ہے تمام جماعتوں اور مدارس سمیت ہر ایک کو اس عمل کی تقلید کرتے ہوئے اتحاد وحدت کے پیغام کو قریہ قریہ تک پہنچانا ہوگا۔
 
سعودی عرب اور کویت میں دہشت گردی کے واقعات کے بعد اہل تشیع اور اہل سنت نے دشمن کے عزائم خاک میں ملانے کے لئے مشترکہ نماز کا اہتمام کرکے اسلام دشمنوں کے منہ پر وہ طمانچہ رسید کیا جس کی مثال نہیں ملتی۔ سعودی عرب اور کویت کے بعد شیعہ سنی اتحاد کا مظاہرہ پاکستان کے دل لاہور میں دیکھنے کو ملا، جب ایک ٹی وی چینل نے ہمت کا مظاہرہ کرتے ہوئے تمام محمودوں اور ایازوں کو لا کر ایک صف میں کھڑا کر دیا۔ لاہور کے معروف ٹی وی چینل سٹی 42 نے پنجاب یونیورسٹی کے جامع مسجد میں "نماز اخوت" کا اہتمام کیا، جس میں مجلس وحدت مسلمین پاکستان کے مرکزی رہنماوُں علامہ سید مبارک علی موسوی، علامہ احمد اقبال رضوی، علامہ محمد اقبال کامرانی، علامہ ابوذر مہدوی، علامہ ناظم رضا عترتی، ایگزیکٹیو ممبر عزاداری سیل ایم ڈبلیو ایم لاہور سید خرم نقوی، مظاہر شگری سیکرٹری اطلاعات ایم ڈبلیو ایم پنجاب اور مدارس جعفریہ پاکستان کے سربراہ علامہ سید حسین نجفی، مولانا حسنین عارف،  شیعہ علماء کونسل پنجاب کے نائب صدر علامہ حافظ سید کاظم رضا نقوی، جامعۃ المنتظر سے علامہ محمد مہدی، جماعت اسلامی کے قائم مقام امیر لیاقت بلوچ، جماعت الدعوۃ کے یحییٰ مجاہد، بادشاہی مسجد کے خطیب عبدالخیر آزاد، داتا دربار مسجد کے خطیب رمضان سیالوی، سمیت تاجروں، صنعت کاروں، سیاست دانوں، حکومتی اور اپوزیشن ارکان اسمبلی نے خصوصی شرکت کی۔ نماز میں مشیر وزیراعلٰی پنجاب خواجہ احمد حسان، پارلیمانی سیکرٹری برائے صحت خواجہ عمران نذیر، اپوزیشن لیڈر ان پنجاب اسمبلی میاں محمود الرشید، تحریک انصاف پنجاب کے رہنما اعجاز چودھری، پیپلز پارٹی پنجاب کے رہنما شوکت بسرا،سی سی پی او لاہور امین وینس، ڈی آئی جی آپریشنز ڈاکٹر حیدر اشرف، ڈی سی او لاہور کیپٹن (ر) محمد عثمان، وائس چانسلر پنجاب یونیورسٹی ڈاکٹر مجاہد کامران سمیت شہریوں کی کثیر تعداد شریک ہوئی۔

نماز کے بعد تمام مسالک کے علمائے کرام اور دیگر نمازی آپس میں بغل گیر ہوئے اور رقت آمیز مناظر دیکھنے کو ملے، جماعت اسلامی، مرکزی جماعت اہلحدیث، منہاج القرآن، جماعت الدعوۃ اورمجلس وحدت مسلمین پاکستان کے مرکزی رہنما علامہ احمد اقبال رضوی کا کہنا تھا کہ اسلام اور مسلمانوں کے دشمن فرقہ واریت کو ہوا دے کر اپنے مذموم مقاصد حاصل کرتے ہیں، ہمیں قرآن و سنت کے پرچم تلے جمع ہونا ہوگا،لاہور میں شیعہ سنی کی نماز اخوت، اسلام دشمنوں کے منہ پر طمانچہ ہے۔ مدارس جعفریہ پاکستان کے سربراہ علامہ حسین نجفی نے کہا کہ شیعہ سنی اسلام کے دو بازو ہیں، ان کے درمیان اختلاف پیدا کرنے والے درحقیقت استعمار کے ایجنٹ ہے۔مسلم امہ کے اتحاد اور وحدت سے ہی اسلام دشمنوں کے ناپاک عزائم خاک میں ملائے جاسکتے ہیں، آج سٹی 42 والے مبارکباد کے مستحق ہیں کہ تمام مکاتب فکر کو ایک جگہ جمع کرکے جس اتحاد یکجہتی کا مظاہرہ کیا ہے، تمام جماعتوں اور مدارس سمیت ہر ایک کو اس عمل کی تقلید کرتے ہوئے اتحاد وحدت کے پیغام کو قریہ قریہ تک پہنچانا ہوگا۔ وطن عزیز کی سلامتی و بقا کے لئے ضروری ہے کہ ہم ایک دوسرے کے ہاتھ میں ہاتھ ڈال کر آگے بڑھیں، تاکہ دشمن کے ناپاک ادرادوں کو خاک میں ملایا جاسکے۔

جماعت اسلامی کے قائم مقام سربراہ لیاقت بلوچ کا کہنا تھا کہ آج شیعہ اور سنی کا یہ اجتماع دشمن اسلام کے لئے بہت بڑا پیغام ہے کہ تو نے جس قوم کا شیرازہ بکھیرنے کے لئے کروڑوں ڈالر صرف کر دیئے، آج وہی قوم ایک امام کے پیچھے اللہ اکبر کے نعرے لگا رہی ہے۔ انہوں نے کہا کہ دشمن کی یہ بھول ہے کہ وہ شیعہ اور سنی کو لڑا سکے گا، شیعہ اور سنی اسلام کے دو بازو ہیں، انہیں جدا نہیں کیا جاسکتا، دشمن جان لے کہ پوری امت مسلمہ یک جان ہے اور اسلام کی سربلندی کے لئے اپنا تن من دھن قربان کرنے کے لئے تیار ہے۔ جماعت الدعوۃ کے رہنما یحیٰی مجاہد نے کہا کہ اسلام کو اس وقت تکفیریت کے آسیب کا سامنا ہے اور تکفیریت کی حوصلہ شکنی کے لئے ایسے اجتماعات سنگ میل کی حیثیت رکھتے ہیں۔ انہوں نے کہا کہ اسلام کے دشمنوں کے لئے آج پنجاب یونیورسٹی کی جامع مسجد سے بہت بڑا پیغام گیا ہے کہ امت مسلمہ متحد ہے اور دشمن کی سازشیں ناکام ہوچکی ہیں۔ انہوں نے کہا کہ اسلام کی بقا کے لئے ضروری ہے کہ تمام امت متحد ہو جائے، تکفیریت کی حوصلہ شکنی کرے اور تمام مکاتب فکر اپنی اپنی صفوں میں موجود کالی بھیڑوں کو محاسبہ کریں۔

لاہور کی تاریخ میں اتحاد امت کے بہترین مظاہرے پر عوامی حلقوں نے اظہار مسرت کیا، شہریوں کا کہنا تھا کہ ایسے اجتماعات سے ایک دوسرے کو برداشت کرنے کا جذبہ ملتا ہے، لہذا حکومتی سرپرستی میں ایسے اجتماعات کا انعقاد کیا جانا چاہیے تھا۔ شہریوں نے ٹی وی چینل سٹی 42 کی انتظامیہ کو خراج تحسین پیش کیا، جنہوں نے اس عظیم اجتماع کا اہتمام کیا۔ شہریوں کا کہنا تھا کہ امت مسلمہ متحد ہے، بیرونی اور اسلام دشمنوں کی سازشوں کے باعث ماضی میں شیعہ اور سنی اختلافات کو ہوا دے کر امت کو کمزور کرنے کی سازش کی گئی، مگر اب حالات اور سوچ بدل چکی ہے، اب امت جان چکی ہے کہ شیعہ اور سنی کا کوئی اختلاف نہیں، بلکہ دونوں شجر اسلام کی دو خوبصورت شاخیں ہیں۔ شہریوں نے ملک میں امن و امان کی بہتر ہوتی صورت حال پر اطمینان کا اظہار کیا اور پنجاب حکومت سے دہشت گردوں کے خلاف مزید کارروائیوں کا مطالبہ کرتے ہوئے کہا کہ حکومت سنجیدگی کا مظاہرہ نہیں کر رہی، اتحاد امت کے لئے کسی ٹی وی چینل کی بجائے پنجاب حکومت کی جانب سے ایسی "نماز اخوت" کا اہتمام کیا جاتا تو زیادہ بہتر ہوتا۔

وحدت نیوز (کوئٹہ) مجلس وحدت مسلمین بلوچستان کے سربراہ علامہ مقصود علی ڈومکی نے کہا ہے کہ کچھی کینال بلوچستان کی ترقی اور خوشحالی کی علامت ہے۔ اس منصوبے میں غیر ضروری تاخیر افسوسناک ہے۔ منصوبے کا آغاز 2003 میں ہوا مگر تیرہ سال گزر جانے کے باوجود اسے مکمل نہیں کیا گیا۔ اس منصوبے کی تکمیل سے علاقے میں زرعی ترقی ہوگی اور خوشحالی آئے گی۔ جب کہ اس وقت لوگ پانی کی بوند بوند کو ترس رہے ہیں۔ سندھ اور پنجاب میں بلدیاتی الیکشن کے شیڈول کا جلد اعلان کیا جائے۔ پیپلز پارٹی اور مسلم لیگ کی حکومتیں اب تلک بلدیاتی الیکشن میں تاخیری حربے استعمال کرکے غیر جمہوری روئیے کی مرتکب ہوئی ہیں۔ بلدیاتی الیکشن جمہوریت کا حسن اور نرسری ہیں،جمہوری جماعتیں خود جمہوری اصولوں کو پامال نہ کریں۔ نیب کی جانب سے کرپشن سے متعلق 150 میگا اسکینڈلز کی فوری تحقیقات کی ضرورت پر زور دیتے ہوئے کہا کہ نیب کا ادارہ کرپشن کے ناسور سے قوم کو نجات نہیں دے سکا۔ جب کہ نیب ادارے کی افادیت بھی سوالیہ نشان بن کررہ گئی ہے۔ بدقسمتی سے ملک میں کرپشن کلچر اس قدر عام ہوگیا ہے کہ اسے منہدم کرنا آسان نہیں۔ تفتیشی ادارے حکومتی دباؤ سے آزاد ہوکر مگرمچھوں کی کرپشن اور بدعنوانیوں کی تحقیقات کریں۔ احتساب کے عمل کو سیاسی مفادات اور مقاصد کے لئے استعمال نہ کیا جائے اور اسے جانبداری اور بددیانتی سے پاک رکھا جائے۔

وحدت نیوز (ملتان) مجلس وحدت مسلمین پاکستان ضلع ملتان (شعبہ وحدت یوتھ) کے زیراہتمام روزہ داروں کے اعتکاف کے لیے جامع مسجد الحسین نیو ملتان میں اہتمام کیا گیا، محفل اعتکاف میں کثیر تعداد میں نمازیوں نے شرکت کی۔ اعتکاف کا آغاز 27 ماہ رمضان المبارک سے کیا گیا جو کل (تیسرے روز) اختتام پذیر ہوگا، محفل اعتکاف میں شریک مومنین سے مجلس وحدت مسلمین پنجاب کے ڈپٹی سیکرٹری جنرل علامہ اقتدار حسین نقوی، ملتان کے ضلعی سیکرٹری جنرل علامہ نادر حسین علوی، علامہ قاضی فیاض حسین علوی اور بزرگ عالم دین علامہ قاضی شبیر حسین علوی سمیت دیگر علماء نے شرکت کی اور معتکفین سے خطاب کیا۔ معتکفین سے خطاب کرتے ہوئے علامہ اقتدار حسین نقوی کا کہنا تھا کہ ماہ مبارک رمضان میں اعتکاف مومنین کے لیے خدا کا عظیم تحفہ ہے، اعتکاف کے ذریعے انسان دنیا و مافیا سے بے خبر ہو کر اپنے خدا کو یاد کر کے قرب الہی حاصل کر سکتا ہے، اعتکاف میں بیٹھنے والے مومنین خدا کے قرب میں ہیں کیونکہ خدا اُس انسان کو زیادہ چاہتا ہے جو دنیاوی اُمور کو ترک کرتے ہوئے خدا کے ساتھ راز و نیاز کرتا ہے۔ اس موقع پر مجلس وحدت مسلمین شعبہ یوتھ کے سیکرٹری جنرل مرزا وجاہت علی نے کہا کہ اس سال پہلی بار ملتان میں محفل اعتکاف کا اہتمام کیا گیا ہے انشاء اللہ آئندہ سالوں میں اس سے روحانی محفل کو پورے شہر میں پھیلایا جائے گا۔