وحدت نیوز (سکردو) مجلس وحدت مسلمین پاکستان بلتستان ڈویژن کے زیراہتمام سانحہ منٰی  میں زخمی ہونے اور گمشدہ افراد کے حق میں محفل دعا کا انعقاد ہوا۔ تفصیلات کے مطابق ایم ڈبلیو ایم بلتستان کے سیاسی سیل میں سانحہ منٰی میں زخمی ہونے والے حجاج بالخصوص ایم ڈبلیو ایم قم کے سربراہ بلتستان کے نامور عالم دین و سخنور حجتہ الاسلام علامہ شیخ غلام محمد اور بلتستان کے معروف عالم دین حجتہ الاسلام شیخ محمد یعقوب بشوی کی صحت و سلامتی کے لیے ایک دعائیہ محفل کا انعقاد ہوا۔ دعا خوانی کی سعادت ایم ڈبلیو ایم گلگت بلتستان کے ڈپٹی سیکرٹری جنرل علامہ آغا علی رضوی نے حاصل کی۔ اس بابرکت تقریب میں ایم ڈبلیو ایم بلتستان ڈویژن کے کابینہ اراکین کے علاوہ کارکنان کی بڑی تعداد موجود تھی۔ دعائیہ تقریب کے اختتام پر گفتگو کرتے ہوئے ایم ڈبلیو ایم بلتستان کے سربراہ علامہ آغا علی رضوی نے کہا کہ دوران حج پے در پے سینکڑوں شہادتوں کا واقعہ پیش آنا تشویشناک ہے اور کرین کے گرنے کے بعد منٰی میں ہونے والے نقصانات سے بہت سارے سوالات جنم لیتے ہیں۔ اس افسوسناک واقعے پر سے پردے اٹھانے کی ضرورت ہے معاملہ اتنا آسان نہیں جتنا بنایا جا رہا ہے۔ انہوں نے کہا کہ سعودی حکومت کی بدنظمی کی انتہاء ہے کہ تین روز گزرنے کے باوجود زخمی اور شہید ہونے والوں کی فہرست جاری نہیں کر سکی۔

وحدت نیوز (تہران) رہبر انقلاب اسلامی آیت اللہ سید علی خانہ ای نے تاکید کے ساتھ فرمایا ہے کہ سعودی حکام کو چاہئے کہ دوسروں کو ذمہ دار قرار دینے کے بجائے امت مسلمہ اور منی حادثے کے شکار افراد کے لواحقین سے عذرخواہی کریں اور اس المناک واقعے کی ذمہ داری قبول کرتے ہوئے اس کے تقاضوں کو پورا کریں۔

رہبر انقلاب اسلامی آیت اللہ العظمی سید علی خامنہ ای نے اتوار کی صبح فقہ کے اپنے درس خارج کے آغاز میں منی کے المناک واقعے کی طرف اشارہ کوتے ہوئے فرمایا کہ عالم اسلام کی جانب سے منی کے حادثے کے بارے میں کافی سوالات کئے جا رہے ہیں کہ جن کا اسے جواب چاہئے۔ آپ نے منی کے تلخ حادثے اور عید الضحی کے عزا میں تبدیل ہوجانے کا ذکر کرتے ہوئے فرمایا کہ انسان لمحے بھر کے لئے بھی خود کو اس غم سے الگ نہیں سمجھ سکتا اور یہ غم حالیہ کچھ دنوں کے لئے ہمارے اور تمام مسلمانوں کو دلوں پر بھاری بنا رہے گا۔ رہبر انقلاب اسلامی نے سعودی حکام کی جانب سے منی کے سانحے کی ذمہ داری قبول نہ کئے جانے اور یہ ذمہ داری دوسروں پر عائد کئے جانے کو نادرست، غیر موثر اور ایک پست اقدام قرار دیا اور فرمایا کہ عالم اسلام کو بہت زیادہ سوالات درپیش ہیں اور منی کے حادثے میں ایک ہزار سے زائد حجاج کی جانوں کا ضیاع، کوئی معمولی بات نہیں ہے، بنابریں عالم اسلام کو چاہئے کہ اس مسئلے پر غور کرے۔ رہبر انقلاب اسلامی آیت اللہ العظمی سید علی خامنہ ای نے تاکید کے ساتھ فرمایا کہ منی کا عظیم المناک واقعہ، فراموش نہیں کیا جاسکتا اور قومیں اس سلسلے میں اپنی سنجیدہ کوششیں جاری رکھیں گی اور سعودی حکام کو چاہئے کہ ‍اپنی ذمہ داری سے بچنے اور کسی اور پر الزام عائد کرنے کے بجائے منی میں رونما ہونے والے سانحے کی ذمہ داری قبول کرتے ہوئے اس کے تقاضوں کو پورا کریں۔

وحدت نیوز (کوئٹہ) مجلس وحدت مسلمین کوئٹہ ڈویژن کی جانب سے جاری شدہ بیان میں ایم ڈبلیو ایم کوئٹہ ڈویژن کے ڈپٹی سیکریٹری جنرل علامہ ولایت حسین جعفری نے کہا کہ سانحہ منیٰ کے سلسلے میں اسلامی کانفرنس کا اجلاس منعقد ہونا چاہئے، سانحہ کرین اور سانحہ منیٰ کے وقوع ہونے سے سعودی حکومت اور سعودی انتظامیہ کہ نا اہلی ثابت ہوتی ہے، انکی نا اہلی کی وجہ سے حج کا فریضہ انجام دینے والے حجاج کرام اپنی جان کی بازی ہار بیٹھے۔ حرمین شرفین اور مقدس مقامات تمام مسلمانوں کیلئے اہمیت کا حامل ہے اور کوئی بھی مسلمان چاہے جہاں بھی زندگی بسر کر رہا ہو اسکا دل خانہ کعبہ اور مقدس مقامات کیلئے ڈھڑکتا ہے اس لئے حرمین شرفین اور دیگر مقامات مقدسہ کے انتظامات کیلئے تمام مسلم ممالک کی جانب سے مشترکہ انتظامی فورسز تشکیل دی جائے اور تمام تر انتظامات ان فورسز کو سونپا جائے۔ انہوں نے مزید کہا کہ سانحہ منیٰ میں محمد بن سلیمان کا اپنے تین سو سے زاید سیکورٹی گارڈز کے ساتھ آمد کے نفی اثرات کو ہرگز نظر انداز نہیں کیا جا سکتا اور سعودی شہزادے کے دل میں خانہ کعبہ کا زرہ بھی احترام موجود نہیں۔ بیان کے آخر میں انہوں نے کہا کہ دیگر حادثات سے بچنے کیلئے خانہ کعبہ کے ارد گرد فالتو عمارات کا صفایا ہونا لازمی ہے۔ سانحہ منیٰ کے شھیدوں کی تعداد دو ہزار سے تجاوز کر گئی ہے جو کہ قابل افسوس بات ہے۔ حکومت پاکستان سانحہ منیٰ میں زخمی ہونے والت والے پاکستانیوں اور لا پتہ افراد کے حوالے سے سنجیدگی کا اظہار کرے اور جلد از جلد موثر اقدامات اٹھائے اور شہداء کے جنازوں کو ان کے لواحقین تک پہنچائے۔

وحدت نیوز (اسلام آباد) مجلس وحدت مسلمین پاکستان کے فلاحی شعبے خیرالعمل فاونڈیشن پاکستان کے زیر اہتمام اس سال عید قربان پر 80 جانوروں کی قربانی کی گئی. جس کا گوشت غرباء . مساکین اور سیلاب سے متاثرہ علاقوں میں تقسیم کیا گیا،جب کہ ملک بھر میں فلاحی منصوبوں کی تکمیل کیلئے ایم ڈبلیوایم کے کارکنان نے قربانی کے جانوروں کی کھالیں بھی جمع کیں ،ہیت امام حسین ؑکویت کے تعاون سےخیر العمل فائونڈیشن کی جانب سے اندرون سندھ حیدرآباد، ٹنڈومحمد خان،ماتلی، دولت پور، نوابشاہ، پنجاب کے شہروں چنیوٹ، لیہ، شیخوپورہ،سرگودھا، گلگت اور سکردو سمیت ملک بھر کے متعدد اضلاع میں قربانی برائے مستحقین کا اہتمام کیا گیا، کراچی کے ضلع شرقی، ضلع ملیر، ضلع جنوبی اور ضلع وسطی نے بھی اجتماعی قربانی کا اہتمام کیا جبکہ کئی سو کلو گوشت خانوادہ شہداءاور مستحق مومنین میں تقسیم کیا گیا،جبکہ مختلف اضلاع نے اپنی مدد آپ کے تحت کئی ٹن قربانی کا گوشت غرباء ، مساکین اورسیلاب متاثرین میں تقسیم کیا گیا، خیرالعمل فائونڈیشن کے قائم مقام چیئرمین مسرت کاظمی نے ہیڈ آفس سے جاری ایک بیان میں ہیت امام حسین ؑ، قربانی کی کھالیں دینے والے مخیرحضرات اور خیرالعمل فائونڈیشن کے رضاکاروں کا شکریہ ادا کیا ہے ، ان کی نیک خواہشات کی تکمیل کی دعا اور آئندہ بھی اسی طرح تعاون جاری رکھنے کی اپیل کی ہے۔

وحدت نیوز(کوئٹہ) مجلس وحدت مسلمین کوئٹہ ڈویڑن کے میڈیا سیل سے جاری شدہ بیان میں رکن بلوچستان اسمبلی سید محمد رضا نے کہا ہے کہ عید قربان کی آمد پر ملک دشمن عناصر کی نظریں ہماری خوشیوں پر ہے اور انکی پوری کوشش رہے گی کہ کسی نہ کسی طرح ہمیں اس موقع پر نشانہ بنائے، معصوموں کو قتل کرنے والے تو اللہ کے دشمن ہوتے ہیں اور اس موقع پر کسی بھی نا خوشگوار واقع سے بچنے کیلئے حکومت اور انتظامیہ کو عید کیلئے سیکیورٹی کے انتظامات کو بہتر اور مضبوط تر بنانا ہوگا تاکہ عین عید کے موقع پر کسی نا خوشگوار واقع کا سامنا نہ کرنا پڑے. بیان میں مزید کہا گیا کہ وطن عزیز پاکستان کو ترقی کے بجائے جن مشکلات کا سامنا ہے ان میں سے ایک دشواری دہشتگردی ہے۔حکومت اگر اس کا کوئی ابدی حل نکال لے تو جس طرح پاکستان محفوظ رہے گا اسی طرح عوام بھی خوشحال رہیں گے اور ترقی کی طرف راغب ہونگے. ملک میں سرمایہ کاری ہوگی اور بہت سے دیگر کاموں کا آغاز بھی ہوگا۔ ان معاملات کا تعلق ملک کے حالات پر مبنی ہے جن پر قابو پاکر ملک کے ترقی کا پہیہ چلایا جا سکتا ہے.انہوں نے آخر میں شہید طالب حسین، جو کہ شب عید الفطر خودکش حملہ آور کو روکتے ہوئے شہید ہوئے تھے، کو خراج عقیدت پیش کرتے ہوئے کہا گیا کہ شہید طالب حسین نے اپنی قربانی سے ثابت کر دیا کہ اس دنیا میں آج بھی ایسے لوگ ہے جو اپنی زندگی کا مقصد اپنے بجائے دوسروں کے کام آنا سمجھتے ہیں۔اور ساتھ ہی ساتھ شہید طالب حسین نے اپنی شہادت سے اتحاد بین المسلمین اور انسانیت دوستی کی بہترین مثال پیش کیا ہے۔

وحدت نیوز(کراچی) مجلس وحدت مسلمین کراچی ڈویژن کے رہنماامام جمعہ جامع مسجد حیدری اورنگی ٹاون مولاناصادق جعفری  کے دست مبارک پرایک ہندو جوان دلیپ نے مذہب حقہ (اسلام )قبول کرلیا،دائرہ اسلام میں شامل ہوجانے کے بعد اس نومسلم کا نام عرفان رکھا گیا، مولانا صادق جعفری نے نومسلم عرفان کے حق میں دعا کی ۔