وحدت نیوز(اسلام آباد) چیئرمین مجلس وحدت مسلمین پاکستان سینیٹر علامہ راجہ ناصر عباس جعفری نے اپنےمذمتی بیان میں کہا ہے کہ پیٹرولیم مصنوعات کی قیمتوں میں مسلسل اضافے کو یکسر مسترد کرتے ہیں، غریب عوام کا کسی کو ذرا بھی احساس نہیں ہے، لوگ پہلے ہی مہنگائی کی چکی میں پس رہے ہیں۔
انہوں نے مزید کہا کہ پیٹرول اور ڈیزل کی قیمتوں میں اضافہ ملک میں مزید مہنگائی کا طوفان لائے گا، ان اقدامات سے حکومت کی جانب سے آئے روز مہنگائی میں کمی کے بلند بانگ دعوؤں کی قلعی کھل گئی ہے، ظالمانہ اقدامات نے عام آدمی کے لیے جینا دوبھر کر دیا ہے اور دو وقت کی روٹی کا حصول مشکل بنا دیا ہے۔
