وحدت نیوز(اسلام آباد) مجلس وحدت مسلمین پنجاب کے صوبائی سیکرٹری سیاسیات اور مذاکراتی کمیٹی کے رکن اسد عباس نقوی سمیت ایم ڈبلیو ایم کے40 کارکنوں کو اسلام آباد کے سیکٹر جی سکس فور سے گرفتار کرلیا گیا ہے۔ تفصیلات کے مطابق حکومت کے ساتھ مذاکرات کرنے والی کمیٹی کے رکن و ایم ڈبلیو ایم پنجاب کے سیکرٹری سیاسیات اسد عباس نقوی سمیت 40 افراد کو مجلس وحدت مسلمین کے مرکزی دفتر پر چھاپا مار کر گرفتار کرلیا گیا ہے۔اسد عباس نقوی کے علاوہ ایم ڈبلیوایم آزاد کشمیر کے صوبائی سیکریٹری سیاسیات تصور موسوی، سیکریٹری روابط مولانا حمید نقوی ، سیکریٹری اطلاعات زیشان حیدر سمیت دیگر شامل ہیں ،  اسلام آباد پولیس، پنجاب پولیس اور رینجر زکی مشترکہ کارروائی میں یہ گرفتاریاں عمل میں لائی گئی ہیں۔تمام گرفتار شدگان کو پولیس اور رینجرز کے اہلکار نامعلوم مقام پر لے گئے ہیں ،  مجلس وحدت مسلمین کے سربراہ علامہ ناصرعباس جعفری، مرکزی ڈپٹی سیکرٹری جنرل علامہ امین شہیدی اور مرکزی سیکرٹری سیاسیات ناصر عباس شیرازی کی جانب سے ان گرفتاریوں کی شدید مذمت کی گئی ہے اور مطالبہ کیا گیا ہے کہ حکومت فی الفور کارکنوں کو رہا کرے۔

وحدت نیوز (کوہاٹ) مجلس وحدت مسلمین ضلع کوہاٹ کے سیکرٹری جنرل حاجی علی دادخان کے والد گرامی حاجی اول خان انتقال کر گئے ہیں، ان کی نماز جنازہ کوہاٹ کے علاقہ مرئی بالا میں ادا کی گئی، جس میں بڑی تعداد میں علماء کرام، عمائدین اور عوام نے شرکت کی۔ نماز جنازہ میں مجلس وحدت مسلمین کے صوبائی سیکرٹری جنرل علامہ سید محمد سبطین حسینی، سابق صوبائی سیکرٹری جنرل علامہ سبیل حسن مظاہری، صوبائی ڈپٹی سیکرٹری جنرل علامہ ارشاد علی، علامہ سید عبد الحسین بھی شریک ہوئے، علامہ سید سبطین الحسینی اور دیگر نے حاجی علی داد خان کو تعزیت پیش کی۔ اور دعا کی خدا مرحوم کو جنت الفردوس میں جگہ اور پسماندگان کو صبر جمیل عنایت فرمائے، علاوہ ازیں صوبائی آفس مسئول ارشاد حسین بنگش اور صوبائی سیکرٹری اطلاعات سید عدیل عباس زیدی نے بھی حاجی اول خان کے انتقال پر افسوس کا اظہار کیا۔

وحدت نیوز(کراچی) آج بانیٔ پاکستان و بابائے قوم اور ملت جعفریہ کے ایک روشن ستارے قائد اعظم محمد علی جناح کی 66 ویں برسی عقیدت و احترام سے منائی جا رہی ہے۔ سلسلے میں سیاسی و عسکری شخصیات کے علاوہ مختلف شعبۂ زندگی سے تعلق رکھنے والے افراد کی جانب سے مزار قائد پر حاضری اور فاتحہ خوانی کا سلسلہ بھی جاری ہے۔

قائد اعظم محمد علی جناح 25 دسمبر 1876 کو پیدا ہوئے، انہوں نے ابتدائی تعلیم کا آغاز 1882 میں کیا، وہ 1893 میں اعلیٰ تعلیم کے حصول کیلئے انگلستان روانہ ہو گئے، وہاں سے انہوں نے 1896 میں بیرسٹری کا امتحان پاس کیا اور وطن واپس آ گئے۔ قائدِاعظم کی شخصیّت ایک اعلیٰ اور مثالی کِردار کی حامل تھی، انہوں نے مذہب کے جمہوری اور انصاف پر مبنی اُصولوں کو اپنا کر عزت حاصل کی۔

قائد اعظم نے وکالت اور سیاست میں رہ کر اپنے دامن کو صاف ستھرا رکھا، اس طرح آپ مسلمانوں کی ذِہنی تعمیرِنو میں روشنی کا مینار بنے رہے۔ آپ نے اپنی سیاسی زندگی کا آغاز اعلیٰ معیار اور دیانت سے کِیا اور اپنے لیے ایک ایسا لائحۂ عمل وضع کِیا جو ہمیشہ جامع اور مکمل رہا۔
قائد اعظم محمد علی جناح کا انتقال 11 ستمبر 1948 میں ہوا۔ اپکی نمازہ جنازہ میں ہر آنکھ اشکبار تھی جبکہ آپکے جنازے میں علم غازی عباس بھی لہرایا گیا۔

وحدت نیوز (اسلام آباد) مرکزی سیکرٹری جنرل مجلس وحدت مسلمین پاکستان علامہ ناصرعباس جعفری نے وحدت سیکریٹریٹ اسلام آباد سے جاری اپنے خصوصی پیغام میں کہا ہے کہ گزشتہ سالوں کی طرح اس سال بھی تباہ کن سیلاب نے قوم کو پھر ایک بڑے امتحان میں مبتلا کر دیا ہے جس کے نتیجے میں ہزاروں لوگ بے گھر ،سینکڑوں افراد جاں بحق اور ہزاروں ایکڑ اراضی کو نقصان پہنچا ہے جیسے جیسے سیلابی ریلہ آگے بڑھ رہا ہے نقصان کے دائرہ کار میں بھی اضافہ ہوتا جا رہا ہے پاکستانی قوم گزشتہ دہائیوں سے قدرتی وانسانی سانحات کا مقابلہ کر رہی ہے ،یہ قوم کہیں معاشرے کے ظلم و جبر پر مبنی استحصالی نظام کی زنجیروں کو توڑنے کے لیے قربانیاں دے رہی ہے اور کہیں سیلاب وزلزلے اس قوم کے صبر وحوصلے کو آزما رہے ہیں۔ قوم کی ترقی اور آزمائشوں کا سفر بحرانوں سے گزر کر ہوتا ہے جسے وہ اپنے عزم وارادے کے ساتھ طے کرتے ہیں لیکن یہ آزمائش باضمیر حکمرانوں اور اچھی لیڈر شپ کی موجودگی میں اچھی فرصتوں اور بہترین مواقعوں میں بدل جاتے ہیں جو قوم کے اندر ایک نئی روح پھونکتے ہیں اور انہیں نئے عزم کے ساتھ ان بحرانوں سے نبردآزما ہونے کا رستہ بتلاتے ہیں لیکن بدقسمتی سے پاکستانی قوم کو جوحکمران ملے ہیں وہ بحرانوں کا مقابلہ کرنے کی صلاحیت نہیں رکھتے بلکہ یہ حکمران بحران ایجاد کرتے ہیں اور پھر اپنی تمام توانائی اور منصوبہ بندی اپنے مفادات کو ہی محفوظ بنانے کے لیے صرف کرتے ہیں ۔نتیجے کے طور پر قوم ان بحرانوں سے گزر کر پسماندگی اور غربت کی دلدل میں اور بھی دھنس جاتی ہے۔

0 201 کے سیلاب کے بعد جس طرح پور ی قوم نے یکجا ہوکر متاثرین سیلاب کی بحالی اور تعمیر نو کے مرحلے تک اپنا کردار بخوبی ادا کیا انشاء اللہ اس بار بھی یہ قوم اس مشکل گھڑی میں اپنے سیلاب سے متاثرین پاکستانیوں کو تنہا نہیں چھوڑے گی ۔میں پاکستان کی سول سوسائٹی،مخیر حضرات،رفاہی اداروں اور میڈیا سے التماس کرتا ہوں کہ وہ سیلاب زدگان کی بحالی کے لیے ایک جسد واحد کی مانند ان کے درد میں شریک ہوں ۔ میں مجلس وحدت مسلمین پاکستان کے تمام مرکزی ،صوبائی ،ضلعی اور یونٹس کے ذمہ داروں کوخصوصی تاکید کرتا ہوں کہ اس مشکل گھڑی میںآ گے بڑھیں اور متاثرین سیلاب کی بحالی کے لیے اپنا کلیدی کردار ادا کریں اور پاکستان سے باہر بھی عالم اسلام اور دیگر تمام ممالک میں مقیم پاکستانی بھائیوں اور بہنوں کو بھی اس مشکل گھڑی میں سیلاب زدگان کی بھر پور امداد کی اپیل کرتاہوں ۔ انشاء اللہ غریب اور مستضعف عوام کی خدمت کے اس کار خیر میں اللہ ہمارا حامی و ناصر ہو گا ۔

نوٹ :تعاون کیلئے تفصیلات درج ذیل ہیں
برائے امداد( ادویات،خوراک،خیمے ،نقدرقوم):ہیڈ آفس خیرالعمل فاؤنڈیشن پاکستان ،اسلام آباد،فون نمبر 051444487
اکاؤنٹ نمبر۔ دبئی اسلامک بینک بلیو ایریا اسلام آباد برانچ A/c: 0171430001
نثار علی/سیدمسرور عالم نقوی/سیدبابرعباس زیدی