وحدت نیوز(کوئٹہ)مرکزی دفتر مجلس وحدت مسلمین ہزارہ ٹاون کے میں برادران شیر داغ کے سربراہوں کی آمد۔برادران شیر داغ کے سربراہان محترم حاجی عنایت، محترم بوستان، محترمآغائی قربانی ، محترم کربلائی جان علی، محترم آغائی جعفری،محترم جناب سلطان، محترم جمعہ خان، محترم غلام نبی ، محترم عنایت ، محترم بابے عاشور ، محترم کربلائی عوض علی کونسلر ، محترم کربلائی غلام نے اپنے اپنے چندہ برادران کی نمائندگی میں مجلس وحدت مسلمین کے نامزد اُمیدوار برائے صوبائی اسمبلی پی بی 40 سید عباس آغا و نامزد اُمیدوار برائے قومی اسمبلی این اے 262 جعفر علی جعفری کی بھر پور حمایت کا اعلان کیا اور ہر قسم کی تعاون یقین دہانی کی۔

وحدت نیوز(اصفہان) ایم ڈبلیو ایم شعبہ اصفہان کی مجلس شورای کے ممبران کی اہم میٹنگ کا انعقاد،تفصیلات کے مطابق2فروری بروز جمعہ نماز خانہ حکیمیہ ہاسٹل میں مجلس وحدت مسلمین شعبہ اصفھان کی مجلس شورای کے ممبران کی ایک اہم نشست منعقد ہوئی۔ اس نشست میں شعبہ کے مربوط مسائل زیر بحث رہے اور نئی کابینہ کی تشکیل کے لئے مشاورت کی گئی۔اس کے ساتھ مجلس وحدت مسلمین شعبہ اصفھان کے مسئول برادر سید محسن رضا نقوی نے تمام شورای ممبران کی پیش نھادات اور مشوروں کو سراہا اور شرکت کرنے والوں کا خصوصی شکریہ ادا کیا۔ اجلاس کی صدارت صدر مجلس وحدت مسلمین شعبہ اصفہان نے کی۔نشست کا اختتام دعائیہ کلمات سے کیا گیا۔

وحدت نیوز(اسلام آباد) چیئرمین مجلس وحدت مسلمین پاکستان علامہ راجہ ناصرعباس جعفری حفظہ اللہ نے سابق وزیر اعظم اور بانی چیئرمین تحریک انصاف عمران خان اور ان کی اہلیہ محترمہ کے نکاح کے حوالے سے خلاف قرآن وشریعت عدالتی فیصلے پر شدید تنقید کرتے ہوئے اسے پاکستان کی عدالتی تاریخ کا بدترین فیصلہ قرار دے دیا۔

علامہ راجہ ناصرعباس جعفری نے اپنے xایکس اکاؤنٹ سے قرآن شریعت کے مطابق اس بدترین عدالتی فیصلے کی دھجیاں اڑا کررکھ دی ہیںجسے پوری قوم کی جانب سے جرات مندانہ اور مدلل موقف قرار دیا جارہا ہے اور دیگرتمام مکاتب فکر کے علمائے کرام سے بھی علامہ راجہ ناصرعباس جعفری کی اتباءو پیروی کرتے ہوئے قوانین الہیٰ سے متصادم اس فیصلے کے خلاف آواز بلند کرنے کا مطالبہ کیا جارہا ہے ۔

علامہ راجہ ناصرعباس جعفری کا مکمل پیغام درج ذیل ہے ۔

انا للہ وانا الیہ راجعون
 قانون و انصاف کے نام پر اخلاقی ، سیاسی، سماجی اقدار اور شرعی احکامات کی جس انداز میں تضحیک کی جا رہی ہے  پاکستان کی تاریخ میں  اس کی کوئی مثال موجود نہیں۔انا کی تسکین کے لیے کسی خاندان کی عزت کو پامال کرنا کہاں کا انصاف ہے ؟ شرعی احکامات کی من پسند توضیح  کرنے والوں کی دنیا و آخرت میں رسوائی ہے۔۔عدلیہ کا باوقار تشخص اس کے منصفانہ فیصلوں سے مشروط ہے۔اگر عدالتوں کے فیصلوں میں انصاف کی بجائے سفاکیت جھلکتی رہی تو عوام کا اس نظام سے اعتماد مکمل طور پر اٹھ جائے گا۔

اَلنَّبِىُّ اَوْلٰى بِالْمُؤْمِنِيْنَ مِنْ اَنْفُسِهِـمْ. سورہ احزاب ایت 6
،،نبی صلی اللہ علیہ وآلہ وسلم مسلمانوں کی جانوں کے ان سے زیادہ مالک ہیں،،

 دین اسلام میں نکاح کی تنسیخ کا اختیار صرف نبی کریم ختمی مرتبت حضرت محمد صلی اللہ علیہ وآلہ وسلم کو حاصل ہے۔ شرائط کے قواعد و ضوابط کےمطابق کیا جانے والا نکاح جج کے فیصلے سے منسوخ نہیں ہو سکتا۔جج کے پاس ایسے زوجہ اور شوہر کو جدا کرنے کا کوئی اختیار نہیں جو شرعی نکاح کے بعد راضی خوشی رہ رہے ہوں۔عورت نے خود تسلیم کیا ہو کہ عدت کی مدت پوری کرنے کے بعد نکاح ہوا تو پھر جج کے فیصلے کی کوئی اخلاقی، قانونی اور شرعی حیثیت باقی نہیں رہتی۔

وحدت نیوز(اسلام آباد)بانی تحریک انصاف (پی ٹی آئی) عمران خان سے جج کے حکم کے باوجود ملاقات نہ کروانے پر چیئرمین مجلس وحدت مسلمین پاکستان علامہ ناصر عباس جعفری اسلام آباد ہائیکورٹ پہنچ گئے۔

عدالت عالیہ اسلام آباد میں چیئرمین مجلس وحدت مسلمین (ایم ڈبلیو ایم) علامہ ناصر عباس جعفری نے بانی پی ٹی آئی سے اڈیالہ جیل راولپنڈی میں ملاقات کی درخواست دائر کی۔

اسلام آباد ہائیکورٹ کی سپرنٹنڈنٹ اڈیالہ جیل کو ٹرائل کورٹ کے حکم پر عمل درآمد کی ہدایت کی۔

ٹرائل کورٹ کے جج ابوالحسنات ذوالقرنین نے جیل رولز کے مطابق ملاقات کی اجازت دی تھی۔

اڈیالہ جیل کی انتظامیہ نے ٹرائل جج کے حکم کے باوجود علامہ ناصر عباس کی بانی پی ٹی آئی سے ملاقات نہیں کروائی۔

چیئرمین ایم ڈبلیو ایم نے ملاقات نہ کرانے جائے پر عدالت عالیہ اسلام آباد میں درخواست دائر کی تھی، جس پر جسٹس میاں گل حسن اورنگزیب نے حکم جاری کیا ہے۔

عدالت نے ٹرائل کورٹ کے حکم پر عمل درآمد کی ڈائریکشن کے ساتھ درخواست نمٹادی اور کہا کہ سپرنٹنڈنٹ اڈیالہ جیل ٹرائل کورٹ کے حکم پر عمل درآمد کا پابند ہے۔

وحدت نیوز(کراچی)مجلس وحدت مسلمین کی جانب سے پاکستان تحریک انصاف کے نامزد امیدوار برائے قومی اسمبلی حلقہ NA-235 ضلع شرقی سیف الرحمٰن اور امیدوار برائے صوبائی اسمبلی حلقہ PS-98ضلع شرقی کراچی جانشیر جونیجو کی حمایت کا اعلان کردیا۔ تفصیلات کے مطابق پی ٹی آئی کے نامزد امیدوار برائے قومی اسمبلی حلقہ NA-235 سیف الرحمٰن اور امیدوار برائے صوبائی اسمبلی حلقہ PS-98 جانشیر جونیجو نے نیو رضویہ سوسائٹی میں مجلس وحدت مسلمین کے رہنماؤں سے خصوصی ملاقات کی۔ ملاقات میں ایم ڈبلیوایم کراچی ڈویژن کے پولیٹیکل سیکریٹری علامہ مبشر حسن، ڈویژنل رہنما علامہ حیات عباس نجفی، رکن مرکزی پولیٹیکل کونسل عارف رضا اور صدر ضلع ملیر ورکن ڈویژنل پولیٹیکل کونسل سید احسن عباس رضوی سمیت معززین واکابرین نیو رضویہ کوآپریٹیو ہاؤسنگ سوسائٹی اور تحریک انصاف کے مقامی رہنما شریک تھے ۔ ایم ڈبلیوایم رہنما علامہ مبشرحسن نے قائد وحدت علامہ راجہ ناصرعباس جعفری کی ہدایت پر ملک بھر کی طرح حلقہ NA-235 پرپاکستان تحریک انصاف کے نامزد امیدوار اور عمران خان کے وفادار ساتھی سیف الرحمٰن اور صوبائی اسمبلی کے حلقہ PS-98 پر جانشیر جونیجو کی مکمل حمایت کا اعلان کیا۔ علامہ مبشر حسن نے پی ٹی آئی امیدواروں کو یقین دلایاکہ ہم اپنے قائد کے حکم کے مطابق پی ٹی آئی کے دونوں امیدواروں کو مکمل سپورٹ کریں گے اور کامیابی میں اپنا بھرپور کردار ادا کریں گے، علامہ مبشر حسن نے اس موقع پر ویڈیو پیغام میں حلقے میں موجود ایم ڈبلیوایم کے تمام ووٹرز، سپوٹرز اور مومنین ومومنات سے اپیل کی کہ وہ 8 فروری کے دن بھرپور اندازمیں گھروں سے نکلیں اور NA-235 پرپاکستان تحریک انصاف کے نامزد امیدوار سیف الرحمٰن کو کھانے والا کانٹے (Fork) اور صوبائی اسمبلی کے حلقہ PS-98 پر جانشیر جونیجو کو کرکٹ وکٹ (stumps)پرمہر لگا کرکامیاب بنائیں۔ پی ٹی آئی کے نامزد امیدواروں نے ایم ڈبلیوایم کی قیادت اور کراچی ڈویژن کے ذمہ داران کو تہہ دل سے شکریہ ادا کیا اور کہا کہ ہم مشکورہیں ایم ڈبلیوایم کہ جنہوں نے ہمیشہ مرکز کی سطح پر بھی اور مقامی سطح پر بھی پی ٹی آئی اور عمران خان کے موقف کو سپورٹ کیا ہے اور مشکل کی گھڑی میں بھی ہمارے ساتھ کھڑے ہیں۔

وحدت نیوز(گلگت)پبلک اکاؤنٹس کمیٹی گلگت بلتستان کونسل کا اہم اجلاس رکن جی بی کونسل حشمت اللہ خان کی سربراہی میں گلگت بلتستان کونسل سیکریٹریٹ اسلام آباد میں منعقد ہوا،اجلاس میں رکن جی بی کونسل و پولیٹیکل سیکریٹری مجلس وحدت مسلمین گلگت بلتستان شیخ احمد علی نوری،رکن جی بی کونسل سید شبیہ الحسنین،رکن جی بی کونسل عبد الرحمن،جوائنٹ سیکرٹری جی بی کونسل سدھیر خان خٹک اور دیگر ذمہ داروں نے شرکتِ کی۔ اجلاس میں اراکین کونسل نے کہا کہ صحت کارڈ گلگت بلتستان میں غریبوں کے علاج کے لیے انتہائی اہمیت کا حامل ہے،صحت کارڈ کے بندش کی وجہ سے اس وقت گلگت بلتستان کے مریض پاکستان کے مختلف ہسپتالوں میں پریشان حال ہے لہذا اس اہم ایشو کو مدنظر رکھتے ہوئے گلگت بلتستان کونسل کے ممبران نے سیکرٹری ہیلتھ کو فوری صحت کارڈ بحالی کے لئے مراسلہ بھیجنے کا فیصلہ کیا۔ اس اہم اجلاس میں گلگت بلتستان میں جاری ترقیاتی کاموں پی ایس ڈی پی کے پروجیکٹس خاص کر استور شغرتھنگ روڈ کے ٹینڈر بار بار منسوخ ہو رہے جس پر اراکین کونسل نے سخت تشویش کا اظہار کرتے ہوئے فوری نوٹس لینے کے لیے متعلقہ حکام کو مراسلہ بھیجنے کا فیصلہ کیا۔ اجلاس میں گندم ایشو کے حوالے سے گلگت بلتستان کونسل ممبران کی کاوشوں سے گندم کوٹہ بڑھا کر جون تک پندرہ لاکھ بوری اور جون کے بعد سولہ لاکھ بوری اور لوکل گندم فراہم کرنے کے حوالے سے گلگت بلتستان کونسل ممبران کی اقدامات کو سراہا گیا نیز گلگت بلتستان کو مالی بحران سے نکالنے کے لیے مختلف اقدامات زیر غور آئے اور اس سلسلے میں متعلقہ اداروں سے فوری رابطہ کر کے مالی بحران پورا کرنے کے عزم کا اظہار کیا۔