وحدت نیوز(ملتان) مجلس وحدت مسلمین ملتان کے زیراہتما م ملک کے دیگر شہروں کی طرح ملتان میں بھی جعفریہ الائنس کے سربراہ علامہ عباس کمیلی کے بیٹے علامہ علی اکبر کمیلی کی المناک شہادت کے خلاف سوتری وٹ سے فوارہ چوک تک احتجاجی ریلی نکالی گئی۔ ریلی کی قیادت مجلس وحدت مسلمین ملتان کے سیکرٹری جنرل علامہ سید اقتدارحسین نقوی، علامہ قاضی نادر حسین علوی، علامہ غلام مصطفی انصاری اور ثقلین نقوی نے کی۔ ریلی کے شرکاء نے وفاقی اور سندھ حکومت کے خلاف بھرپورنعرے باز ی کی۔ رہنماؤں نے ریلی کے شرکاء سے خطاب کرتے ہوئے کہا کہ علامہ علی اکبر کمیلی پر حملہ حکومت کی نااہلی اور دہشتگردوں کو فری ہینڈ دینے کا نتیجہ ہے، کراچی جیسے میٹروپولیٹن شہر میں جسکی غیر معمولی معاشی اہمیت ہو وہاں ٹارگٹ کلرز کا دندناتے پھرنا اور دن کے اجالے میں لوگوں کی جانیں لے کر فرار ہو جانا حکومت کی کارکردگی اور سکیورٹی اداروں کی سکیورٹی پر سوالیہ نشان ہے۔ ٹارگٹ کلنگ کا نہ تھمنے والا سلسلہ ملک میں جاری ہے جبکہ حکومت کو کوئی فکر ہے اور نہ ہی کبھی ٹارگٹ کلنگ کو روکنے کا ارادہ معلوم ہوتا ہے۔ رہنماؤں کا کہنا تھا کہ ان واقعات کے پیچھے اپوزیشن لیڈر خورشید شاہ اور وزیراعلی سندھ سید قائم علی شاہ کا ہاتھ ہے یہ دونوں رہنما سندھ میں دہشت گردوں اور تکفیریوں کی پشت پناہی کررہے ہیں۔ پاکستان میں شیعہ سنی فرقہ واریت کو ہوادے کر سعودی اور امریکی ایجنڈے پر عمل کیا جارہاہے۔ انہوں نے علی اکبر کمیلی کے قاتلوں کی گرفتاری کا مطالبہ کرتے ہوئے کہا کہ اگر ٹارگٹ کلرز کو گرفتار کر کے قرار واقعی سزا نہ دی جائے تو کراچی میں بدامنی اور دہشتگردی کے جن کو قابو کرنا محال ہوگا۔ پاکستان کی ریڑھ کی ہڈی کراچی کو پرامن بنانے کے لیے حکومت اور سکیورٹی ادارے ٹھوس بنیادوں پر عملی اقدامات اٹھائیں۔ریلی کے شرکاء نے مجلس وحدت مسلمین کے جھنڈے، پلے کارڈز اور بینرز اُٹھارکھے تھے جن پر حکومت مخالف نعرے درج تھے۔ اس موقع پر رہنماؤں نے گونواز گو کے نعرے لگائے۔