The Latest
وحدت نیوز (کراچی) کراچی کے حلقے پی ایس 127ملیرمیں ضمنی انتخاب کا شیڈو ل جاری ہونے کے بعد مجلس وحدت مسلمین کی جانب سے سابق کونسلر یوسی جعفرطیار سید علی عباس عابدی کو امیدوار نامزد کردیا گیا ہے، ایم ڈبلیوایم ضلع ملیر کے سیکریٹری امور سیاسیات سید حسن عباس رضوی کے مطابق ایم ڈبلیوایم نے پی ایس 127کے ضمنی انتخاب میں سید علی عباس عابدی کے کاغذات نامزدگی الیکشن کمیشن میں جمع کرادئیے ہیں ۔ ان کا کہنا تھا کہ ایم ڈبلیو ایم ماضی کی طرح اس بار بھی سیاسی میدان خالی نہیں چھوڑے گی اور موروثی سیاست کے علمبرداروں کا ڈٹ کر مقابلہ کریگی ۔ کاغذات نامزگی کی جمع آوری کے موقع پر ایم ڈبلیو ایم ضلع ملیر کے رہنما عارف رضا زیدی ، حسن عباس رضوی اور ایم ڈبلیو ایم کے امیدوار علی عباس عابدی بھی موجود تھے۔
وحدت نیوز(اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے کہا ہے کہ 2 ستمبر کو لاہور میںوزیر اعلیٰ ہاوس کے سامنے تاریخی دھرنا دیا جائے گا۔انہوں نے کہا کہ ہمارے دھرنے یا احتجاج کے کوئی سیاسی مقاصد نہیں اور نہ ہی ہم حکومت کے خلاف احتجاج میں کسی دوسری جماعت کے اتحادی ہیں۔ہمارا یہ احتجاج حکومتی جبر، بدعنوانی اور لاقانونیت کے خلاف ہے۔ ہمارے مطالبات پر دھرنے کی مجوزہ تاریخ سے قبل عمل درآمد نہ کیا گیا تو مختلف جماعتوں سے اشتراک سمیت دیگر آپشنز پر غور کیا جائے گا۔انہوں نے کہامیری طرف سے 86 روز بعد بھوک ہڑتال کا خاتمہ حکومت کی طرف سے مطالبات کے تسلیم کیے جانے کے وعدے پر ہوا۔وزیر داخلہ چوہدری نثار احمد ہمارے مطالبات پر عمل کرائیں بصورت دیگر حکومت میں ان کی حیثیت کونہ صرف کمزور سمجھا جائے گا بلکہ ہمارا اعتماد بھی وفاقی حکومت پر سے ہمیشہ کے لیے ختم ہو جائے گا۔انہوں نے کہا کہ ملک بھر میں شیعہ ٹارگٹ کلنگ کا سلسلہ تھمنے کا نام نہیں لے رہا۔گزشتہ روز لاہور میں شیعہ وکیل ناصر علی ترابی کو دہشت گردی کا نشانہ بنایا گیا۔جب تک ان مذموم عناصر کے سہولت کاروں کے گرد گھیرا تنگ نہیں ہوتا تب تک ملک میں امن و امان کا قیام ممکن نہیں۔ہمارے دس نکاتی مطالبات محض ملت تشیع کے دفاع کے لیے نہیں بلکہ ملک میں امن کے قیام کے لیے ایک مدلل دستاویز ہے۔ ہمارے مطالبات کی راہ میں وہ عناصر رکاوٹ ہیں جو ملک کے حالات دانستہ طور پر خراب رکھنا چاہتے ہیں۔حکمرانوں کو اپنے گرد وپیش پر بھی نظر رکھیں۔انہوں نے کہا 2 ستمبر کو کسی رکاوٹ کو برداشت نہیں کیا جائے گا۔اگر حکومت نے دھرنے کے لیے مشکلات پیدا کرنے کی کوشش کی تو تمام تر حالات کی ذمہ داری پنجاب حکومت پر ہو گی۔
وحدت نیوز(اسلام آباد) مجلس وحدت مسلمین پاکستان کے مرکزی ترجمان علامہ مختار امامی نے اے آر وائی نیوز چینل پر حملے اور ملک دشمن نعرے لگائے جانے کی سخت مذمت کرتے ہوئے کہا ہے کہ کسی بھی ذمہ دار سیاسی و مذہبی جماعت کی طرف سے اس طرح کے غیر جمہوری طرز عمل کی توقع نہیں کی جا سکتی۔ ارض پاک ہماری شناخت اور ہمارے اسلامی تشخص کا نگہبان ہے۔پاکستان کے خلاف نعرے ملک دشمن طاقتوں کی تقویت کا باعث ہیں۔سیاسی و مذہبی جماعتوں کے کارکنوں کو کسی شر انگیزی کا حصہ نہیں بننا چاہیے۔انہوں نے کہا پاکستانی میڈیااپنے فرائض کی ادائیگی پوری دیانتداری کے ساتھ کر رہا ہے۔ ملک کی تمام سیاسی و مذہبی جماعتوں کو چاہیے کہ وہ اپنے مطالبات منوانے کے لیے آئینی و قانونی راستے کا استعمال کریں۔میڈیا کے معاملات میں بے جا مداخلت نامناسب اور صحافیوں کی پیشہ وارانہ فرائض کی ادائیگی میں رکاوٹ ہے۔کوئی بھی محب وطن جماعت کسی بھی ایسے اقدام کی قطعاََ حمایت نہیں کرتی جو پاکستان کی نظریاتی سرحدوں سے متصادم ہو۔انہوں نے کہا کہ اپنے حقوق کے لیے پُرامن جدوجہد مجلس وحدت مسلمین کی بنیادی پالیسی کا حصہ ہے۔
وحدت نیوز(کوئٹہ) بدعنوانی اور کرپشن نے ملک کو مسائل میں مبتلاء کر دیا ہے، اگر اس وقت ہم چاروں طرف سے مشکلات اور مسائل میں مبتلاء ہیں تو اسکی ایک اہم وجہ بدعنوانی کے بازار کا گرم ہونا ہے۔ اگر وطن کو ترقی یافتہ دیکھنا چاہتے ہیں تو ہمیں بدعنوانی نامی لعنت کو جڑ سے اکھاڑ کر پھینکنا ہوگا ۔ مجلس وحدت مسلمین کوئٹہ ڈویژن کے سیکریٹریٹ سے جاری شدہ بیان میں سیکریٹری جنرل عباس علی نے ملک کی وجودہ صورتحال پر اظہار خیال کرتے ہوئے کہا ہے کہ ہمیں ہر آزمائش میں صبر سے کام لینا ہوگا۔ پاکستان اس وقت چاروں طرف سے مشکلات میں گھرا ہوا ہے ہمیں ایک ملت بن کر ان مشکلات سے نکلنا ہوگا۔ انہوں نے کہا کہ بدعنوانی نے ہمارے معاشرے کو کھوکھلا کر دیا ہے، جب تک کرپشن کا خاتمہ نہیں ہوتا ملک میں ترقی کی نشانیاں نظر نہیں آئیں گی۔ ظلم کی انتہا یوں ہو گئی ہے کہ بدعنوانی اور کرپشن کو بعض افراد اپنا آئینی حق سمجھنے لگے ہیں۔ انکا کہنا تھا کہ پاکستان سے اگر کرپشن، بد عنوانی کے کلچر کو ختم کرنا ہے تو ہمیں مل کر اسکے خلاف کام کرنا ہوگا ہمارے معاشرے میں ہر طرح کے مسائل موجود ہیں، یہ سوچ کر دکھ ہوتا ہے کہ کیسی کیسی محرومیوں کو ہم قبول کر لیتے ہیں اور کیسی کیسی باتوں پر پورا ملک ،پورا معاشرہ غیظ و غضب کا شکار ہو جاتا ہے جس کیلئے سنجیدہ طرز عمل ضروری ہے ۔ بیان کے آخر میں کہا گیا کہ حکومت کو ان افراد کا پتہ لگانا ہوگا جو قوم کی دولت لوٹنے میں مصروف ہیں اور وہ لوگ جو دوسروں کے حقوق چھیننے میں اپنا پورا کردار ادا کرتے آرہے ہیں انہیں انکے کیفر کردار تک پہنچانا ہوگا۔
وحدت نیوز(پاراچنار) شہید قائد علامہ عارف حسین الحسینیؒ کی اٹھائیسویں برسی کے موقع پر تحریک حسینی کے تحت شہید کے مرقد پر تعزیتی جسلہ منعقد کیا گیا جس کا با قائدہ آغاز قاری سید ہدایت حسین نے قرآن مجید کی تلاوت سے کیا۔ مجاہد حسین طوری، ذاکر سید مجاہد حسین، سید مہدی حسین، ذاکر سید عنایت حسین، ذاکر محمد افضل اور ذاکر محب حسین نے شہید عارف الحسینی کو خراج عقیدت پیش کرنے کے لئے شاعرانہ کلام پیش کیا۔ برسی کے روح پرور اجتماع سے ایم ڈبلیو ایم کے مرکزی رہنما علامہ اقبال حسین بہشتی، آئی او کے مرکزی جنرل سیکرٹری جناب خادم حسین کھوسہ، لوئر علی کے جامع مسجد کے پیش امام حجۃ الاسلام مولانا صداقت حسین اور تحریک حسینی کے رہنماؤں شبیر حسین ساجدی، ثاقب حسین بنگش، منیر حسین جعفری، علامہ سید محمد حسین طاہری اور علامہ سید عابد حسینی نے خطاب کیا۔
برسی کے اس روح پرور اجتماع سے خطاب کرتے ہوئے ایم ڈبلیو ایم کے مرکزی رہنما علامہ اقبال بہشتی نے اپنے خطاب کے دوران عوام سے برسی میں علامہ راجہ ناصر عباس جعفری کی عدم شرکت پر معذرت کرتے ہوئے کہا کہ علامہ صاحب کی بہت خواہش تھی تاہم اسکی صحت پاراچنار کے طویل سفر میں مخل ہوئی۔ انہوں نے کہا کہ ملک بھر میں شیعیان علی کو نہایت مشکلات کا سامنا ہے۔ ملک بھر میں شیعوں کی ٹارگٹ کلنگ جاری ہے۔ گلگت بلتستان کی متعصب حکومت کے ہاتھوں شیعوں کی حق تلفی ہورہی ہے۔ انکی زمینوں پر ناجائز قبضہ کیا جارہا ہے۔
انہوں نے شیعہ حقوق کے لئے راجہ ناصر عباس کے عزم مصمم کا اعادہ کرتے ہوئے انہیں زبردست خراج تحسین پیش کیا۔ انہوں نے پاراچنار کے حکام سے انصاف کے قیام کا مطالبہ کیا، شیعوں کے حقوق کے حوالے سے بات کرتے ہوئے انکا کہنا تھا کہ پاراچنار کے مومنین کے مسائل کو حل نہ کیا گیا تو عنقریب راجہ ناصر عباس پاراچنار کا دورہ کریں گے۔ اور اس وقت تک یہاں رہیں گے جب تک عوام کے حقوق کا مداوا نہیں کیا جاتا۔
وحدت نیوز(لیہ) مجلس وحدت مسلمین جنوبی پنجاب کے رہنما سید عدیل عباس زیدی کا کہنا ہے کہ حکمرانوں کی ظلم کی حدیں پار کردی ہیں، ہم شہدائے ماڈل ٹاون کے قاتلوں کو کیفر کردار تک پہنچانے تک خاموش نہیں بیٹھیں گے، ان خیالات کا اظہار انہوں نے ضلع لیہ کے علاقہ چوک اعظم میں پاکستان عوامی تحریک کی جانب سے دیئے جانے والے دھرنے سے خطاب کرتے ہوئے کیا۔ ان کا کہنا تھا کہ مجلس وحدت مسلمین ہر ظلم کیخلاف آواز بلند کرتی آئی ہے، اور سانحہ ماڈل ٹاون جیسے ظلم پر بھی اپنا شرعی فریضہ ادا کر رہی ہے، ہم ماڈل ٹاون کے شہداء کا خون رائیگاں نہیں جانے دیں گے، ان ظالم حکمرانوں نے ماڈل ٹاون میں جس طرح نہتے اور بے گناہ پاکستانیوں کا نشانہ بنایا اسی طرح پاراچنار میں بھی 3 شعبان کو محب وطن شہریوں پر گولیاں برسائیں، ظالم حکمرانوں کو اس خون کا حساب دینا ہوگا، شریف برادران کے ظلم کی رات جلد ختم ہونے والی ہے۔
ان کا مزید کہنا تھا کہ پنجاب میں عزاداری سید الشہداء (ع) کیخلاف حکومت کی کارروائیاں ناقابل برداشت ہیں، مجلس وحدت مسلمین 2 ستمبر کو لاہور میں تاریخی دھرنا دے گی، اور ان نام نہاد شریفوں کو یہ باور کرایا جائے گا کہ اب ظالم کے حساب کا وقت آگیا ہے، انہوں نے کہا کہ ہم اپنے قائد وحدت علامہ راجہ ناصر عباس جعفری کے حکم کے مطابق اپنے اہلسنت بھائیوں پر بھی مظالم پر خاموش نہیں بیٹھیں گے، یہ حکومت کبھی عزاداری کو محدود کرنے کی کوشش کرتی ہے تو کبھی درود شریف پر پابندی کی بات کرتی ہے، پاکستانی قوم حکمرانوں کی یہ روش ہرگز برداشت نہیں کرے گی۔
وحدت نیوز(گلگت) مجلس وحدت مسلمین پاکستان نے کاچو امتیاز حیدر خان کی اسمبلی رکنیت خارج کروانے کیلئے الیکشن کمیشن میں ریفرنس دائر کردی ہے۔کاچو امتیاز حیدر خان جو مجلس وحدت مسلمین کے ٹکٹ پر سکردو حلقہ ۲ سے رکن اسمبلی منتخب ہوئے تھے ۔گزشتہ گلگت بلتستان کونسل کے انتخابات کے دوران پارٹی ڈسپلن کی خلاف ورزی کرنے پر کاچو امتیاز حیدر خان کے خلاف تادیبی کاروائی کیلئے کمیٹی قائم کردی گئی جس نے فیکٹس فائنڈنگ کے بعد کاچو امتیاز حیدر خان کی بنیادی رکنیت ختم کرنے کا فیصلہ کیا۔اس دوران کاچو امتیاز حیدر خان نے اسمبلی رکنیت سے استعفیٰ بھی پارٹی قیادت کو پیش کیا۔پارٹی قیادت کی جانب سے سپیکر جی بی اسمبلی کو کاچو امتیاز حیدر خان کی اسمبلی رکنیت ختم کرنے کی استدعا کی گئی اور کاچو امتیاز کے اپنے ہاتھ کا لکھا ہوا استعفیٰ بھی پیش کردیا گیا۔کاچو امتیاز حیدرخان سپیکر جی بی اسمبلی کے روبرو پیش ہوکر اپنے استعفیٰ سے انکاری ہوئے اور سپیکر نے آزاد حیثیت میں کاچو امتیاز کی اسمبلی رکنیت بحال رکھی ۔سپیکر کے اس فیصلے کے خلاف مجلس وحدت مسلمین نے الیکشن کمیشن میں ریفرنس دائر کرنے فیصلہ کیا اور گزشتہ روز الیکشن کمیشن گلگت بلتستان میں ریفرنس داخل کردیا گیا ہے جس میں سپیکر گلگت بلتستان اسمبلی کو بھی فریق بنالیا گیا ہے۔
وحدت نیوز(کوئٹہ) مجلس وحدت مسلمین کوئٹہ ڈویژن شعبہ خواتین کی شوری کا اہم اجلاس مسجد خاتم النبیاء ع میں مرکزی سیکریٹری جنرل خانم سیدہ زہرا نقوی کی زیرصدارت منعقد ہوا جس میں 16یونٹ کی ذمہ داران سمیت اراکین ڈویژنل کابینہ نے شرکت کی ،اجلاس کا باقائدہ آغاز مقامی دینی مدرسے کی طالبات نے تلاوت کلام پاک سے کیا جبکہ مرکزی ڈپٹی سیکٹریٹری جنرل علامہ سید احمد اقبال رضوی نے شرکائے اجلاس سے خصوصی خطاب کیا ،اجلاس کے اختتام پر اراکین شوری نے کثرت رائے سے خانم رقیہ بی بی کو آئندہ سال کیلئے ایم ڈبلیوایم شعبہ خواتین کوئٹہ ڈویژن کا سیکریٹری جنرل اور خانم کنیز فاطمہ کو ڈپٹی سیکریٹری جنرل منتخب کرلیا۔اس موقع پر گفتگو کرتے ہوئے خانم زہرا نقوی نے کہا کہ خواہران معاشرے میں الہی اقدارکے رواج کیلئے مردوں کے شانہ بشانہ فعالیت کریں۔
وحدت نیوز(کراچی) مجلس وحدت مسلمین کراچی ضلع وسطی شعبہ خواتین کا اہم اجلاس ڈویژنل آفس میں منعقدہوا جس میں مرکزی سیکریٹری جنرل خانم زہرا نقوی نے خصوصی شرکت کی، اجلاس کا باقائدہ آغاز خواہر عتیق فاطمہ نے حدیث سے کیا،اجلاس میں اراکین نے کثرت رائے سے خانم زرین کو ایم ڈبلیوایم ضلع وسطی کی سیکریٹری جنرل منتخب کیا، بعد ازاں انہوں نے خواہر نایاب زہرا کو ڈپٹی سیکریٹری جنرل ، خانم عتیق فاطمہ کوسیکریٹری مالیات ونشرواشاعت ،خواہر بنین فاطمہ کو سیکریٹری روابط اور میڈیا سیل ،خواہر معصومہ اور خواہر یاسمین کو سیکریٹری فلاح وبہبود، خانم ندیم زہرا کو سیکریٹری تربیت اور خانم حنا فاضل کو سیکریٹری تنظیم سازی نامزد کردیا۔ مرکزی سیکریٹری جنرل شعبہ خواتین خانم زہرا نقوی نے نومنتخب اراکین کابینہ سے ان کے عہدوں کا حلف لیا۔
وحدت نیوز(لاہور) مجلس وحدت مسلمین پنجاب کے صوبائی شوریٰ کا اجلاس صوبائی سیکرٹریٹ شادمان لاہور میں منعقد ہوا جس میں آئندہ تین سال کے لئے بھاری اکثریت سے علامہ مبارک علی موسوی کو صوبائی سیکرٹری جنرل پنجاب منتخب ہوا،نو منتخب صوبائی سیکرٹری جنرل پنجاب علامہ مبارک علی موسوی نے مجلس وحدت مسلمین کے دیکر رہنماوں علامہ عبدالخالق اسدی رکن شوریٰ عالی مجلس وحدت مسلمین پاکستان،علامہ حسن ہمدانی سیکرٹری جنرل مجلس وحدت مسلمین لاہور، سید حسین زیدی سیکرٹری سیاسیات مجلس وحدت مسلمین لاہور،علامہ سخاوت قمی رہنما مجلس وحدت مسلمین پنجاب،علامہ ناصر مہدی رہنما مجلس وحدت مسلمین لاہور و دیگر کے ہمراہ پریس کانفرنس کرتے ہوئے کہا کہ مجلس وحدت مسلمین کے سربراہ علامہ راجہ ناصر عباس جعفری نے 87 دن کے طویل بھوک ہڑتال کر کے موجودہ حکمرانوں کی ملت تشیع کیخلاف جاری متعصبانہ رویوں اور انتقامی کارویوں کیخلاف احتجاج ریکارڈ کروایا،ملک کے تمام سیاسی و مذہبی جماعتوں نے اس پر امن تحریک کی مکمل حمایت کا اعلان کیا اور نیشنل پریس کلب اسلام آباد میں جاری کیمپ میں آکر بھر پور اظہار یکجہتی بھی کی،وفاقی وزیر داخلہ چوہدری نثار نے مطالبات پر عملدرآمد کی مکمل یقین دہانی کروائی لیکن بدقسمتی سے مطالبات پر عملدرآمد سست روی کا شکار ہے،پنجاب میں ہمارے مسائل جوں کا توں ہیں ہم عزاداری نواسہ رسول ۖ پر کسی بھی قسم کے قدغن کو برداشت نہیں کریں گے،پنجاب میں ہمارے خلاف انتقامی کاروائیاں جاری ہیں،انہوں نے کہا کہ اسلام آباد میں منعقدہ استحکام پاکستان کانفرنس میں علامہ راجہ ناصر عباس جعفری نے اعلان کیا تھاکہ اگر ہمارے مطالبات پر عملدرآمد نہ ہوئے تو ہم دو ستمبر کو وزیر اعلیٰ ہاوس کے سامنے دھرنا دینگے،لیکن ابھی تک حکمران ٹس سے مس نہیں ہم آج یہ اعلان کرتے ہیں کہ دو ستمبر کو ہر حال میں وزیر اعلیٰ ہاوس کے سامنے دھرنا دینگے،اور اس دھرنے کی قیادت خود سربراہ مجلس وحدت مسلمین علامہ راجہ ناصر عباس جعفری صاحب کرینگے،اور یہ دھرنا ہمارے مطالبات کی منظوری نہیں بلکہ عملدرآمد تک جاری رہیگا۔
