The Latest
وحدت نیوز(لاہور)گلگت بلتستان کے عوام سے اظہار یکجہتی کیلئے لاہور پریس کلب کے سامنے مجلس وحدت مسلمین کے کیمپ میں پاکستان عوامی تحریک کے سیکرٹری جنرل خرم نواز گنڈا پور، مجلس وحدت مسلمین کے مرکزی سیکرٹری تربیت علامہ احمد اقبال رضوی، مرکزی سیکرٹری سیاسیات سید ناصر عباس شیرازی نے شرکا ء سے خطاب کرتے ہوئے کہا کہ گلگت بلتستان کے لاکھوں عوام اپنے حق کے حصول کیلئے گزشتہ دس روز سے مسلسل روڈ پر ہیں، جو احتجاجی تحریک میں ایک ریکارڈ ہے۔ ہم ان کی استقامت کو سلام پیش کرتے ہیں۔ انہوں نے کہا کہ قیام پاکستان سے لیکر آج تک ہماری حکومتوں نے اس خطے کے عوام کے حقوق غصب کر رکھے ہیں۔ انہوں نے مزید کہا کہ موجودہ نااہل و کرپٹ حکمرانوں نے گندم پر سبسڈی ختم کر کے اپنی سیاسی موت کے پروانے پر دستخط کر دیئے ہیں۔
انہوں نے اس عزم کا اظہار کیا کہ عوام کے سمندر کے سامنے موجودہ حکمران مکڑی کے جالے سے بھی کمزور ثابت ہونگے اور عوام کی تاریخی جدوجہد کامیابی پر منتج ہو گی۔ علاوہ ازیں پاکستان عوامی تحریک کے سیکرٹری جنرل خرم نواز گنڈا پور نے گلگت بلتستان میں جاری تاریخی عوامی دھرنوں کی حمایت کرتے ہوئے کہا کہ اس خطے کے عوام اب بیدار ہو چکے ہیں، ان کے حقوق پر اب کوئی ڈاکہ نہیں ڈال سکتا، پاکستان عوامی تحریک دامے، درہمے سخنے گلگت بلتستان کے عوام کے ساتھ ہیں۔ یاد رہے کہ گزشتہ تین دن سے مجلس وحدت مسلمین کے زیراہتمام گلگت بلتستان میں جاری عوامی ایکشن کمیٹی کے دھرنوں کی حمایت میں احتجاجی کیمپ جاری ہے۔
وحدت نیوز(کراچی) شہرقائد میں شیعہ افراد کو چن چن کر دہشتگردی کا نشانہ بنایا جا رہا ہے، ڈاکٹرز، وکلاء، پروفیسرز اور تاجروں کی ٹارگٹ کلنگ قومی نقصان ہے، پاکستان کو امریکی کالونی بنایا جا رہا ہے، سندھ حکومت شیعہ نسل کشی روکنے میں ناکام ہو چکی ہے، شیعہ افراد کی ٹارگٹ کلنگ کے ذمہ دار گورنر اور وزیر اعلیٰ سندھ مستعفی ہو جائیں، قانون نافذ کرنے والے ادارے کرائم میں کمی کے جھوٹے دعوے کر رہے ہیں، کراچی میں کرائم کے واقعات میں کمی نہیں مزید اضافہ ہوا ہے، سکیورٹی ادارے عوام کو بے وقوف نہ بنائیں۔ ان خیالات کا اظہار مجلس وحدت مسلمین کے رہنماء علامہ علی انور جعفری اور علامہ مبشر حسن نے شیعہ افراد کی ٹارگٹ کلنگ کے خلاف انچولی امام بارگاہ خیر العمل سے شاہرائے پاکستان تک نکالی جانے والی ریلی سے خطاب کے دوران کیا۔ احتجاجی ریلی میں سینکڑوں کی تعداد میں مرد، بزرگ، عورتوں سمیت بچے اور علماء اور دیگر عمائدین موجود تھے، جنہوں نے سندھ حکومت مردہ باد، دہشتگردی مردہ باد، یہ کس کا لہو یہ کون مرا بدمعاش حکومت بول ذرا، مردہ باد امریکہ و طالبان کے نعرے لگائے۔ شرکاء نے شاہرائے پاکستان پر علامتی دھرنا بھی دیا جس کی وجہ سے ٹریفک معطل ہوگئی۔
شرکاء سے خطاب میں علامہ علی انور کا کہنا تھا کہ شہر قائد میں شیعہ نسل کشی بدستور جاری ہے اور گزشتہ سال کی نسبت شیعہ افراد کی ٹارگٹ کلنگ میں مزید اضافہ ہوا ہے مگر حکومت سمیت قانون نافذ کرنے والے ادارے دہشتگردوں کو پکڑنے میں یکسر ناکام ہو چکے ہیں، گورنر اور وزیر اعلیٰ سندھ روزانہ صرف ٹارگٹ کلنگ روکنے کیلئے کمیٹیوں کے اعلانات سے کام چلا رہے ہیں اور مظلوم عوام اپنی جانوں سے ہاتھ دھو رہے ہیں، آخر کیا وجہ ہے جو بالخصوص روزانہ دو سے تین شیعہ افراد سمیت دیگر افراد لقمہ اجل بن جاتے ہیں اور یہ حکمران صرف میڈیا پر آکر حکم دیتے ہیں اور پھر اپنے حجروں میں جا کر چھپ جاتے ہیں۔ ان کا کہنا تھا کہ شہر کے حالات ایک پری پلان منصوبہ بندی کے تحت خراب کئے جا رہے ہیں اور حالات کی عدم درستگی اور قیام امن کیلئے گورنر اور وزیر اعلیٰ سندھ کا کردار مشکوک ہے لہذا ان نا اہل حکمرانوں کو مستعفی ہو جانا چاہیئے۔ مظاہرین نے شیعہ عمائدین کی مسلسل ٹارگٹ کلنگ میں ملوث کالعدم دہشت گرد گروہوں کے خطرناک دہشت گردوں کی عدم گرفتاری پر شدید غم اور غصے کا اظہار کرتے ہوئے سندھ حکومت اور پاکستان پیپلز پارٹی کے چیئر مین بلاول بھٹو زرداری سے مطالبہ کیا کہ شیعہ مسلمانوں کے قاتلوں کو فی الفور گرفتار کرکے کیفر کردار تک پہنچایا جائے۔
علامہ مبشر حسن نے خطاب کرتے ہوئے کہا کہ ہم چیف جسٹس آف پاکستان سے بھی مطالبہ کرتے ہیں کراچی میں حالیہ دہشتگردی کا فی الفور نوٹس لیں اور مجرموں کی عدم گرفتاری اور نام بدل کر دوبارہ کام کرنے والی تمام کالعدم دہشتگرد تنظیموں پر پابندی عائد کی جائے تاکہ کے شہر میں امن و امان کی ابتر صورت حال پر قابو پایا جاسکے۔ دریں اثناء علامتی دھرنے کے شرکاء سے خطاب میں ایم ڈبلیو ایم کراچی کے سیکریٹری جنرل حسن ہاشمی کا کہنا تھا کہ پر امن احتجاج ہمارا آئینی اور قانونی حق ہے، حکومت ہوش کے ناخن لے اور اب بے گناہ شیعہ افراد کے قتل عام کے خلاف شہر بھر میں احتجاجی مظاہروں کا آغاز کیا جائے گا، ڈالروں اور ریالوں کی طاقت سے ملت جعفریہ کی نسل کشی کی جا رہی ہے، ہم بانیان پاکستان کی اولادیں ہیں ہمیں دیوار سے لگانے کی سازش کی جارہی ہے جسے ہم کامیاب نہیں ہونے دیں گے۔
وحدت نیوز(گلگت) صوبائی حکومت مسلسل جھوٹ بول رہی ہے۔ انہوں نے کہا تھا اگلے دن سمری بناکر وفاق کو بھجوا دینگے اور کاپی ایکشن کمیٹی کو فراہم کی جائیگی مگر اب تک گندم سبسڈی کی بحالی کی سمری وفاق کو نہیں بھجوائی گئی ہے جبکہ ہسپتالوں میں لی جانے والی فیسوں کی واپسی کا نوٹیفکیشن تین دن بعد جاری کیا گیا۔ صوبائی وزراء اور مشیروں کے اپنے بیانات میں تضاد ہے۔ عوامی ایکشن کمیٹی نے دھرنے ختم کرنے کا کہا ہے اور نہ کوئی وعدہ کیا ہے۔ یہ سراسر جھوٹ اور بہتان ہے۔ ان خیالات کا اظہار عوامی ایکشن کمیٹی گلگت بلتستان کے ترجمان نے اخبارات کیلئے جاری پریس ریلیز میں کیا ہے۔ انہوں نے مزید کہا کہ صوبائی حکومت جان بوجھ کر الزام تراشی کررہی ہے اور اسی طرح کے اوچھے ہتھکنڈوں کے ذریعے عوامی ایکشن کمیٹی میں دراڑ پیدا کرنا چاہتی ہے، جسے کسی طور کامیاب ہونے نہیں دیا جائیگا۔ ہم صوبائی حکومت کی پالیسی کو اچھی طرح جان چکے ہیں، عوامی ایکشن کمیٹی گلگت بلتستان کے 20 لاکھ عوام کا مقدمہ لڑ رہی ہے۔ اگر صوبائی وزراء و ممبران عوام کے ساتھ مخلص ہوتے تو وہ عوامی مسائل حل کرتے اور پچھلے 8 دنوں سے گلگت بلتستان کے عوام سڑکوں پر موجود ہیں مگر یہی عوامی نمائندے عوام کو گمراہ کرنے اور اپنی کرپشن کو چھپانے میں لگے ہوئے ہیں۔ عوام آج ان کے اصلی چہرے کو پہچان چکے ہیں۔ دھرنوں میں عوام کی بھرپور شرکت سے ثابت ہو گیا ہے کہ گلگت بلتستان کے عوام صوبائی وزراء اور اراکین اسمبلی کی دوغلی پالیسی سے تنگ آ چکے ہیں۔ انہوں نے مزید کہا کہ شیعہ علماء کونسل، جمعیت علمائے اسلام، متحدہ قومی موومنٹ و دیگر جماعتیں عوامی ایکشن کمیٹی کا حصہ ہیں اور رہیں گی۔ مذکورہ تنظیموں کے اکابرین نے بھرپور حمایت اور عوامی جدوجہد میں ساتھ دینے اور صوبائی وزراء کی غلط بیانیوں کی مذمت کرکے عوام کا حقیقی نمائندے ہونے کا ثبوت فراہم کیا ہے۔
وحدت نیوز(جیکب آباد) مجلس وحدت مسلمین ضلع جیکب آباد کی جانب سے ضلعی جنرل سیکرٹری حسن رضا غدیری، شاہد حسین جوادی، محمد ابراہیم، ندیم ڈومکی، فیاض احمد کی سربراہی میں ڈسٹرکٹ پریس کلب کے سامنے گلگت بلتستان میں گندم پر سبسڈی کے خاتمے کے خلاف احتجاجی مظاہرے کے بعد علامتی بھوک ہڑتال کی گئی۔ مظاہرین کے ہاتھوں میں بینرز اور پلے کارڈز بھی تھے۔ اس موقع پر رہنمائوں نے خطاب کرتے ہوئے کہا کہ گلگت بلتستان کے محب وطن عوام بھوک و بد حالی کی زندگی گزار رہے ہیں۔ جبکہ ہمارے حکمران دہشت گردوں سے مذاکرات میں مصروف ہیں، جو قابل تشویش ہے۔ انہوں نے مطالبہ کیا کہ گلگت بلتستان کے عوام کے مطالبات فوری طور پر تسلیم کئے جائیں۔
وحدت نیوز(پشاور) مجلس وحدت مسلمین خیبر پختونخوا نے گلگت بلتستان حکومت کی جانب سے گندم کی سبسڈی کے خاتمے کیخلاف عوام کے احتجاج کی مکمل حمایت کرتے ہوئے موقف اپنایا ہے کہ 9 روز سے جاری رہنے والے دھرنوں کے باوجود عوام کے مطالبات تسلیم نہ کرنا جی بی حکومت کی آمرانہ ذہنیت کی عکاسی کرتا ہے۔ وحدت ہاوس پشاور سے جاری اپنے ایک بیان میں ایم ڈبلیوایم کے صوبائی سیکرٹری اطلاعات سید عدیل عباس زیدی نے کہا کہ ہم گلگت بلتستان کی غیور عوام کی عظمت، استقامت، شجاعت اور ثابت قدمی کو سلام پیش کرتے ہیں۔ گلگت بلتستان کے عوام اپنے حقوق کیلئے گذشتہ 9 روز سے سڑکوں پر ہیں، اور انشاء اللہ وہ اپنے حقوق حاصل کرکے ہی گھروں کو لوٹیں گے۔
انہوں نے کہا کہ پیپلز پارٹی اور مسلم لیگ ن کی حکومتوں نے عوام کو نہ صرف مایوس کیا بلکہ ان کے آئینی حقوق پر ڈاکہ ڈالا ہے۔ ان کا مزید کہنا تھا کہ خیبر پختونخوا کے عوام اس حقوق کی جنگ میں گلگت بلتستان کے عوام کے شانہ بشانہ ہیں۔ مہدی شاہ حکومت خود کو مزید رسوائی سے بچانے کیلئے فوری طور پر گندم کی سبسڈی بحال کرے۔ انہوں نے کہا کہ مجلس وحدت مسلمین خیبر پختونخوا سینئر صحافی حامد میر پر حملہ کو آزادی صحافت پر حملہ تصور کرتی ہے، اور حکومت سے مطالبہ کرتی ہے کہ صحافیوں کو تحفظ فراہم کیا جائے، تاہم اس حملہ کی آڑ میں قومی سلامتی کے اداروں پر بلاجواز تنقید درست نہیں۔
وحدت نیوز(اسلام آباد) جماعت اسلامی آزاد کشمیر کے امیرعبدالرشید ترابی نے گلگت بلتستان کے عوام کے ساتھ اظہاریکجہتی کیلئے نیشنل پریس کلب اسلام آباد کے سامنے مجلس وحدت مسلمین کے زیراہتمام لگائے گئے احتجاجی کیمپ میں شرکت کی اور اظہار یکجہتی کیا۔ اس موقع پر ایم ڈبلیوایم راولپنڈی کے سیکرٹری جنرل سعید رضوی بھی موجود تھے۔ عبدالرشید ترابی کا کہنا تھا کہ جماعت اسلامی گلگت بلتستان کے عوام کے جائز مطالبات کی مکمل حمایت کرتی ہے اور حکومت سے مطالبہ کرتی ہے کہ وہ فی الفور جی بی عوام کے درینہ مطالبات کو تسلیم کرے۔ ان کا کہنا تھا کہ پیپلزپارٹی اور نون لیگ کی حکومت کی طرف سے 9 روز سے خاموشی ثابت کرتی ہے کہ انہیں عوام سے کوئی سروکار نہیں۔ گلگت بلتستان کے عوام گذشتہ نو روز سے سڑکوں پر ہیں، لیکن نہ تو صوبائی وزیراعلٰی کو کوئی خیال آیا ہے اور نہ ہی ملک کے وزیراعظم اس معاملے میں کوئی دلچسپی لے رہے ہیں۔ ان کا کہنا تھا کہ جماعت اسلامی وفاقی حکومت سے مطالبہ کرتی ہے کہ وہ فی الفور صوبے کی صورتحال کا جائزہ لے اور عوام کے مطالبات تسلیم کرے۔
وحدت نیوز(وحدت نیوز) مجلس وحدت مسلمین پاکستان کے مرکزی ڈپٹی سیکریٹری جنرل اور ملی یکجہتی کونسل کے رکن علامہ محمد امین شہیدی نے اسلام آبادمیں جمیعت علمائے پاکستان کے سربراہ اور ملی یکجہتی کونسل کے مرکزی صدرصاحبزادہ ابولخیرمحمد زبیر، جامعہ نعیمیہ کے مہتمم مفتی راغب نعیمی اور دیگر اہل سنت علمائے کرام اور اکابرین سے ملاقات کی،اس موقع پر ملی یکجہتی کونسل کے مرکزی ڈپٹی سیکریٹری جنرل اور چیئرمین البصیرہ پپلیکیشنزثاقب اکبر نقوی بھی موجود تھے،رہنما وں نےمسالکِ اسلامی کے درمیان ہم آہنگی ،بھائی چارگی اور علمی مباحثوں کی ضرورت پر زوردیا، گفتگو کے دوران ملک کو درپیش چیلنجز اور داخلی اور خارجی صورتحال پر بھی تفصیلی بات چیت ہوئی۔
وحدت نیوز(اسلام آباد) نور الہدیٰ ویلفیئر ٹرسٹ کے تحت قائم معصومہ انسٹیوٹ آف اسلامک اسٹڈیز کا افتتاح کر دیا گیا۔ افتتاحی تقریب بارہ کہو، اسلام آباد میں منعقد ہوئی، جس میں مجلس وحدت مسلمین پاکستان کے مرکزی سیکرٹری جنرل علامہ ناصر عباس جعفری، علامہ حسنین گردیزی، علامہ اصغر عسکری، علامہ نادر حسنین، علامہ اعجاز بہشتی اور دیگر نے شرکت کی۔ علامہ ناصر عباس جعفری نے اپنے دست مبارک سےادارے کی نو تعمیرشدہ عمارت کافیتہ کاٹ کر افتتاح کیا۔
وحدت نیوز(کراچی) مجلس وحدت مسلمین پاکستان کے مرکزی ڈپٹی سیکرٹری جنرل علامہ امین شہیدی نے کہا ہے کہ شہر کراچی میں معصوم انسانوں کے خون سے ہولی کھیلی جا رہی ہے اور حکومت سندھ اقتدارکی بندر بانٹ تقسیم میں مصروف عمل ہے،ان خیالات کا اظہار انہوں نے کراچی میں پاک محرم ہال میں منعقدہ ایک پر ہجوم پریس کانفرنس سے خطاب کرتے ہوئے کیا ،اس موقع پر ان کے ہمراہ مجلس وحدت مسلمین کے رہنماؤں میں مولانا منور نقوی، مولانا باقر زیدی، مولانا علی ا نور جعفری، علامہ مبشر حسن اور کراچی ڈویژن کے سیکرٹری سیاسیات علی حسین نقوی بھی موجود تھے۔
علامہ امین شہیدی کاکہنا تھا کہ شہر کراچی میں گذشتہ ایک ہفتے میں دس سے زائد شیعہ مسلمانوں کا قتل سندھ حکومت کی کارکردگی پر سوالیہ نشان ہے، حکومت سندھ کراچی میں جاری ٹارگٹ کلنگ کی روک تھام کے لئے اقدامات کرے ورنہ سنگین نتائج برآمد ہوں گے۔ان کاکہنا تھا کہ گذشتہ کئی ماہ سے شہر کراچی میں ایک سوچی سمجھی سازش کے تحت ملت جعفریہ کے عمائدین اور نوجوانوں سمیت علماء کرام، ڈاکٹروں ، پروفیسروں کو ٹارگٹ کلنگ کا نشانہ بنا کر قوم اور ملک و ملت کو عظیم سرمایہ سے محروم کرنے کی گھناؤنی سازش پر عمل کیا جا رہاہے اور افسوس ناک بات یہ ہے کہ سندھ حکومت کسی ایک بھی قاتل کو گرفتار کر کے قرار واقعی سزا دلوانے میں ناکام نظر آتی ہے، انہوں نے کہا کہ اب تو ایسا محسوس ہو رہا ہے کہ طویل عرصے سے قتل کئے جانے والے ملت کے عظیم سپوتوں کے قتل عام میں خود سندھ حکومت اور اعلیٰ ریاستی ادارے بھی ملوث ہیں۔انہوں نے سندھ حکومت سے مطالبہ کیا کہ فی الفور قاتلوں کوگرفتار کر کے منظر عام پر لایا جائے اورسندھ میں بسنے والے محب وطن پاکستانیوں کے جان ومال کے تحفظ کو یقینی بنایا جائے بصورت دیگر ملت جعفریہ اپنے حقوق کے دفاع کی خاطر کسی قسم کے راست اقدام سے گریز نہیں کرے گی۔
مجلس وحدت مسلمین پاکستان کے مرکزی رہنما علامہ امین شہیدی کا کہنا تھا کہ گلگت اور بلتستان کے عوام کے حقوق پر ڈاکہ ڈالنے والوں کو معاف نہیں کریں گے، اور وفاقی حکومت سمیت گلگت انتظامیہ یہ بات جان لے کہ گلگت اور بلتستان میں گندم سبسڈی کو بحال نہ کیا گیا تو احتجاج کا دائرہ کار وسیع ہو کر اسلام آباد میں ایوانوں تک جا پہنچے گا اور حالات کی تمام تر ذمہ داری وفاقی حکومت پر عائد ہو گی، انہوں نے وفاقی حکومت کو متنبہ کرتے ہوئے مطالبہ کیا کہ فی الفور گندم سبسڈی کو بحال کیا جائے اور گلگت بلتستان کے عوام کے حقوق کی فراہمی میں رکاوٹوں کو دور کیا جائے، گلگت اور بلتستان میں جاری عوامی ایکشن کمیٹی کے احتجاجی دھرنوں اور لانگ مارچ کی بھرپور حمایت کرتے ہیں، ضروت پڑی تو ملک بھر میں پہیہ جام کر دیں گے۔علامہ امین شہیدی نے کراچی میں گذشتہ دنوں دہشت گردانہ حملے کا نشانہ بننے والے معروف صحافی اور اینکر پرسن حامد میر پر قاتلانہ حملے کی سخت الفاظ میں مذمت کرتے ہوئے مطالبہ کیا کہ سندھ حکومت حامد میر سمیت شہر کراچی میں ٹارگٹ کلنگ کا نشانہ بننے والے دیگر صحافی بھائیوں سمیت عام شہریوں کے قتل میں ملوث خطر ناک اور ملک دشمن دہشت گردوں کو فی الفور گرفتار کیا جائے اور قرار واقعی سزا دی جائے۔
وحدت نیوز(اسٹاف رپورٹر) گلگت بلتستان میں جاری عوامی ایکشن کمیٹی کی بحالی حقوق تحریک سے اظہار یکجہتی کے لئے علامہ راجہ ناصر عباس جعفری کی اپیل پر احتجاج کا دائرہ کار ملک بھر میں پھیلنا شروع ہو چکا ہے، اس سلسلے میں نیشنل پریس کلب اسلام آباد کے سامنے ایم ڈبلیو ایم ضلع راولپنڈی /اسلام آباد کی جانب سے احتجاجی کیمپ لگا دیا گیا ہے، مجلس وحدت مسلمین کے سربراہ علامہ راجہ ناصر عباس جعفری اور مرکزی ڈپٹی سیکریٹری جنرل علامہ شفقت شیرازی نے احتجاجی کیمپ کا دورہ کیا اور اہلیان گلگت بلتستان کی حمایت اور ان کے حقوق کی بحالی کے لئے آواز بلند کرنے پر کیمپ میں موجود کارکنان کے حوصلوں کو سراہا۔
دوسری جانب لاہور پریس کلب کے سامنے ایم ڈبلیو ایم ضلع لاہور اور گلگت بلتستان یوتھ کے زیر اہتمام احتجاجی کیمپ لگایا گیا ہے، ٹنڈو محمد خان میں پریس کلب کے سامنے ایم ڈبلیو ایم سندھ شعبہ تنظیم سازی اور ضلع ٹنڈو محمد خان کی جانب سے احتجاجی بھوک ہڑتالی کیمپ لگایا گیا ہے، جس میں صوبائی رہنما علامہ مختار امامی ،عالم کربلائی اور یعقوب حسینی نے بھی شرکت کی ،نصیر آباد میں ایم ڈبلیو ایم کے ضلعی سیکریٹری جنرل مولانا اختر عباس نقوی کی سربراہی میں علامتی دھرنا کیمپ لگایا گیا ہے،ضلع بدین کی تحصیل ماتلی میں ایم ڈبلیو ایم کے کارکنان کی بڑی تعداد نے گلگت بلتستان کے عوام سے اظہار یکجہتی کے لئے ریلی نکالی جس کی قیادت ایم ڈبلیو ایم کے صوبائی رہنما یعقوب حسینی نے کی ، بعد ازاں تمام کارکنان نے پریس کلب کے سامنے علامتی دھرنا دیا اور بھوک ہڑتال پر بیٹھ گئے۔
گلگت بلتستان میں گندم سبسڈی کی بحالی کے لئے میر پور خاص میں ضلعی رہنما بشیر شاہ نقوی کی قیادت میں ریلی نکالی گئی ریلی پریس کلب پہنچی تو شرکائے احتجاج پریس کلب کے سامنے بھوک ہڑتال پر بیٹھ گئے، نوشہرو فیروزمیں ضلعی سیکریٹری جنرل اعجاز ممنائی کی زیر قیادت ایم ڈبلیو ایم کے کارکنان کی بڑی تعداداہلیان گلگت بلتستان سے اظہار یکجہتی کے لئے پریس کلب پر علامتی بھوک ہڑتال کا کیمپ لگا کر بیٹھ گئے ہیں جس میں صوبائی رہنما امتیاز بخاری بھی شامل ہیں ، حیدر آباد پریس کے سامنے ضلعی سیکریٹری جنرل علامہ امداد علی نسیمی اور عالم کربلائی کی زیر قیادت ایم ڈبلیو ایم کے کارکنان نے احتجاجی دھرنا کیمپ لگا دیا ہے اور کارکنان بھوک ہڑتال پر بیٹھ گئے ہیں ، اس کے علاوہ کوئٹہ ،پنجاب اور سندھ کے دوسرے اضلاع میں بھی حکومت کی جانب سے گندم پر سبسڈی کے خاتمے کے خلاف مسلسل احتجاج کا سلسلہ جاری ہے۔
