The Latest

وحدت نیوز(ملتان) مجلس وحدت مسلمین ملتان کے زیراہتمام قائد وحدت علامہ راجہ ناصر عباس جعفری کے ساتھ اظہار یکجہتی اور دس نکاتی مطالبات کے حق میں چوک گھنٹہ گھر ملتان میں احتجاجی جلسہ منعقد کیا گیا۔ احتجاجی جلسے سے مجلس وحدت مسلمین جنوبی پنجاب کے سیکرٹری جنرل علامہ اقتدار حسین نقوی، ملتان کے سیکرٹری جنرل علامہ قاضی نادر حسین علوی، علامہ سلطان احمد نقوی، مخدوم عباس رضا مشہدی،شیعہ علماء کونسل ملتان کے صدر علامہ مجاہد عباس گردیزی، علامہ غلام مصطفی انصاری،مولانا کاشف ظہور نقوی، مولانا عون محمد نقوی، مولانا ہادی حسین ہادی، مولانا مظہر عباس صادقی، مولانا وسیم عباس جعفری، مولانا سلیمان محمدی،مولانا عمران ظفر اور ثقلین نقوی نے خطاب کیا۔ احتجاجی جلسے کے شرکاء نے نماز مغربین چوک گھنٹہ گھرمیں ادا کی ۔ احتجاجی جلسے میں خواتین اور بچوں کی بڑی تعداد موجودتھی۔ اس موقع پر سیکیورٹی کے سخت انتظامات کیے گئے تھے۔ احتجاجی جلسے سے مجلس وحدت مسلمین کے مرکزی رہنما علامہ حسن ظفر نقوی نے ٹیلیفونک خطاب کیا۔

علامہ اقتدار حسین نقوی نے خطاب کرتے ہوئے کہا کہ ہم کسی جابر اور ظالم حکومت سے ڈرنے والے نہیں ہیں ہم بار بار حکومت کو متنبہ کررہے ہیں کہ ہمارے مطالبات تسلیم کیے جائیں ورنہ عید کے بعد لانگ مارچ ہوگا۔ سجادہ نشین بری امام سرکار مخدوم عباس رضا مشہدی نے خطاب کرتے ہوئے کہا کہ علامہ راجہ ناصر عباس جعفری کی بھوک ہڑتال کو ایک مہینے سے زیادہ کا وقت ہوچکا ہے لیکن ان ظالم حکمرانوں کوکوئی فکر نہیں ہم آج اعلان کرتے ہیں علامہ راجہ ناصر عباس جعفری اکیلے نہیں ہیں ہم سب ان کے ساتھ اور بلکہ پوری قوم ان کے ساتھ ہے۔ میں حکومت وقت پر واضح کرنا چاہتا ہوں عزاداری امام حسین کو محدود کرنے کی سازشوں سے باز آجاؤ ، امام حسین کا غم منانا ہمارا آئینی اور قانونی حق ہے اور اسے کوئی نہیں چھین سکتا ۔ شیعہ علماء کونسل ملتان کے ڈویژنل صدر علامہ سید مجاہد عباس گردیزی نے خطاب کرتے ہوئے کہا کہ علامہ راجہ ناصرعباس جعفری کے جائز مطالبات تسلیم کیے جائیں کیونکہ یہ ہمارے حقوق ہیں ، ہم عزاداری سیداشہداء کو برپا کرنے کی اجازت نہیں لیں گے، وقت کے ہر یزید نے امام حسین کے ذکر کو محدود کرنے کی کوشش کی لیکن وہ ناکام ہوگئی ۔ جلسے کے آخر میں ماتمداری اور نوحہ خوانی کی گئی۔ مخدوم سید حسن رضا مشہدی نے نوحہ پڑھا۔

وحدت نیوز(سکردو) مجلس وحدت مسلمین پاکستان بلتستان ڈویژن کے زیراہتمام اپنے مطالبات کے حق میں جاری دھرنا اکتیسویں روز میں داخل ہو چکا ہے اور تاریخی دھرنے میں روزے کی حالت میں بھی عوام کی کثیر تعداد شریک ہے۔ یادگار شہداء اسکردو پر جاری دھرنے سے شیخ مبارک عارفی اور آغا علی رضوی نے خطاب کیا۔مقررین نے اپنے خطاب میں کہا کہ رمضان المبارک کے بعد مطالبات کی منظوری کے لیے علامہ راجہ ناصر عباس جعفری کے حکم پر ملک بھر کی طرح بلتستان بھر سے لانگ مارچ کریں گے۔ لانگ مارچ کے سلسلے میں عوام تیار اور آمادہ رہیں۔ آغا علی رضوی نے کہا کہ وفاقی حکومت کی طرح صوبائی حکومت بھی اوچھے ہتھکنڈے پر اتری ہوئی ہے اور مخالف جماعتوں کو دیوار سے لگانے کے لیے ریاست کو استعمال کر رہی ہے۔ گلگت بلتستان میں خالصہ سرکار اور دیگر مظالم کے روک تھام کے لیے عوام آمادہ رہے۔ موجودہ صوبائی حکومت کو بلتستان سے خصوصی طور پر دشمنی ہے اور بلتستان کی ترقی نہیں چاہتی اگر ایسا نہیں ہے تو شغرتھنگ پاور پروجیکٹ اور بلتستان یونیورسٹی منسوخ نہیں ہوتی۔ انہوں نے کہا کہ ہمارے دھرنے کا مقصد اقبال اور جناح کے پاکستان کا حصول ہے۔ ملک بھر میں دہشتگردوں کی پشت پناہی اور محب وطن پاکستانیوں کو ٹارگٹ بنانا روح پاکستان کے مخالف ہے۔ جس پاکستان کے حصول کے لیے قربانیاں دی ہیں اسے بچانے کے لیے بھی قربانیان دینے کو تیار ہیں۔ انہوں نے کہا کہ ریاستی ادارے اگر خیانت نہیں کرتے تو گلگت بلتستان پاکستان کا آئینی حصہ بن چکا ہوتا۔ ستر سالوں سے ریاستی اداروں میں موجود خیانت کاروں نے بلتستان کی حب الوطنی کو مشکوک بنا کر پیش کر تے رہے ہیں آج بھی ملک کے حقیقی فرزندوں کو غدار ثابت کرنے کی کوشش ہو رہی ہے۔ گلگت بلتستان پر جاری مظالم پر آرمی چیف نوٹس لے۔ صوبائی اور وفاقی حکومت اس حساس خطے کو مزید مشکلات میں دھکیلنا چاہتی ہے۔ اکنامک کوریڈور میں جی بی کو جس طرح نظر انداز کیا گیا اور خالصہ سرکار کے نام پر زمینوں پر ناجائز قبضے کے خلاف اٹھنے والی ہر آواز کو جبر سے دبا نا چاہتے ہیں۔

وحدت نیوز(کراچی) مجلس وحدت مسلمین سندھ کے صوبائی سیکرٹری جنرل علامہ مقصود ڈومکی نے شیعہ سنی عمائدین سے گفتگو کرتے ہوئے دو ٹوک انداز میں کہا ہے کہ ہم اپنے اصولی موقف سے ایک انچ بھی پیچھے نہیں ہٹیں گے اور نہ ہی مطالبات کی کسی شق سے دستبردار ہونا قابل قبول ہے۔ پارہ چنار میں پرامن احتجاج پر ایف سی کی طرف سے گولیاں چلانے والے واقعہ کی تحقیقات کے لیے کمیشن کے قیام سے لے کر ملک میں دہشت گرد وں کے خلاف بھرپور آپریشن اور نیشنل ایکشن پلان کی روح کی مطابق نفاذ تک ہمارا احتجاج ختم نہیں ہو گا۔ہماری جدوجہد پُر امن پاکستان کے لیے ہے جہاں ہر شخص کو آئین کے مطابق مذہبی آزادی اور بنیادی حقوق حاصل ہوں۔انہوں نے کہا کہ نون لیگ کی حکومت نے ملت تشیع کے ساتھ ہمیشہ امتیازی سلوک روا رکھا۔پاکستان کے اہل تشیع نہ صرف دہشت گردی کا شکار ہیں بلکہ حکومتی مظالم نے بھی ان کے لیے زندگی اجیرن کر رکھی ہے۔شہریوں کے جان ومال کے تحفظ کو یقینی بنانا ریاست کی اولین ذمہ داری ہے ۔ ملک بھر میں دندناتے ہوئے دہشت گرد امن و سکون کے قیام میں موجود ہ حکومت کی ناکامی کی بین دلیل ہے۔نیشنل ایکشن پلان کو دہشت گردی کے تدارک کی بجائے سیاسی انتقام کے لیے استعمال کیا جا رہا ہے۔دہشت گردوں یا ان کے سہولت کاروں کے ساتھ کسی بھی جگہ نرمی کا مظاہرہ کرنا پاکستان کے اسی ہزار شہدا کے خون سے غداری ہے۔انہوں نے کہا کہ لانگ مارچ کا اعلان حکومتی بے حسی کی وجہ سے کیا گیا ہے۔ حکمرانوں کے پاس تدبر، حکمت اور بصیرت جیسی کوئی شے سرے سے موجود نہیں۔سیاسی شعور کے فقدان اور عوامی مشکلات سے دانستہ بے خبری نے نون لیگ کو عوام سے دور کر دیا ہے۔اگلے الیکشن میں نہ صرف ملت تشیع نواز لیگ کابائیکاٹ کرے گی بلکہ اسے بہت سارے حلقوں میں ذلت آمیز شکست کا سامنا کرنا پڑے گا۔انہوں نے کہا کہ مجلس وحدت مسلمین کے سربراہ علامہ راجہ ناصر عباس جعفری سے اظہار یکجہتی کے لیے پوری دنیا میں علامتی بھوک ہڑتال اور احتجاجوں کا سلسلہ جاری ہے۔

وحدت نیوز(کراچی) مجلس وحدت مسلمین پاکستان کے مرکزی سیکریٹری امورتربیت علامہ شیخ اعجاز بہشتی نے تبلیغی وتربیتی دورہ کراچی کے موقع پر مختلف مقامات پر منعقدہ عوامی اجتماعات سے خطاب کرتے ہوئے کہا ہے کہ ماہ مبارک رمضان قرب خدا اور شیطان سے دوری کا مہینہ ہے، خدا کی اطاعت اور بندگی کی معراج کے حصول کے لیئے انسان خود کو اس ماہ  مبارک میں اللہ کے سامنے پیش کردے ، قائد وحدت علامہ راجہ ناصرعباس نے ماہ مبارک رمضان سے قبل ماہ شعبان سے ہی خدا کے مقرب بندوں کے حمایت میں خود کو خدا کی راہ میں پیش کردیا تھا، مظلوموں کی پیروی اور کے حقوق کی جنگ لڑنے کا جو طرز عمل قائد وحدت نے اختیار کیا اس کی نظیر تاریخ میں بہت کم ملتی ہے، بھوک ہڑتال کے ذریعے ملت مظلوم تشیع کی دبی ہوئی آوازکو عالمی سطح پر بلند کرنا کوئی معمولی اقدام نہیں بلا مبالغہ علامہ راجہ ناصرعباس جعفری ملت تشیع پاکستان کے سر فخر سے بلند کیا ہے ۔

وحدت نیوز(مٹیاری) مجلس وحدت مسلمین ضلع مٹیاری کےسیکریٹری جنرل علامہ اختر حسین کی کاوشوں سےپرنسپل جامعہ نورولایت علامہ اعجاز حسین شریعتی نےمجلس وحدت مسلمین میں باقائدہ شمولیت کااعلان کردیا ہے علامہ اختر حسین نے انہیں ضلع مٹیاری کے ڈپٹی سیکریٹری کی زمہ داری تفویض کی ہے،علامہ اعجاز حسین کا کہنا ہے کے علامہ راجہ ناصر کے لانگ مارچ کے حمایت کرتا ہو اور اس کو کامیاب کرنے کے ہر ممکن کوشش کرنے کا اعلان کرتا ہوں۔

وحدت نیوز(لاہور) رمضان المبارک کے بعد پاکستان بھر سے لوگ اسلام آباد اور تخت لاہور کا رخ کریں گے اور ان بے حس حکمرانوں سے کی مجرمانہ خاموشی اور کرپشن کا حساب لیں گے،اقتدار کے نشے میں مست حکمرانوں کو ایک ماہ سے زائد عرصے سے جاری ہمارے پرامن احتجاج نظر نہیں آرہے،ان خیالات کا اظہارمجلس وحدت مسلمین لاہور کے سیکرٹری جنرل علامہ حسن رضا ہمدانی نے لاہور پریس کلب پر 31 دن جاری مجلس وحدت مسلمین کے بھوک ہڑتالی کیمپ میں شرکاء سے خطاب کرتے ہوئے کیا،انہوں نے کہا کہ پنجاب کی حکومت ہمارے قاتلوں اور دہشت گردوں کی سرپرستی کر رہی ہے،جنوبی پنجاب میں دہشت گردوں کیخلاف کاروائی میں سب سے بڑی رکاوٹ ن لیگ کی صوبائی و وفاقی حکومتیں ہیں،ہم جناح اور اقبال کے پاکستان کے لئے جدو جہد کر رہے ہیں اور انشااللہ اسے حاصل کر کے دم لیں گے۔

وحدت نیوز(کراچی) مجلس وحدت مسلمین کے صوبائی سیکرٹری فلاح و بہبود عالم کربلائی نے کہا کہ ماہ صیام تزکیہ نفس کا مہینہ ہے۔اس مقدس مہینہ میں اللہ تعالیٰ ہمیں ہمیں صوم و صلوۃ کے ذریعے اپنی اندرونی کثافتیں صاف کرنے کا موقع عطا کرتا ہے۔انہوں نے کہا اس ماہ مبارک میں ہمیں ایثار و قربانی کے جذبات کا عملی مظاہرہ کرنا چاہیے۔سحری و افطاری کے اوقات میں عزیز و اقربا کی ضروریات کو بھی پیش نظر رکھا جائے۔ جو لوگ رمضان کے دنوں میں چوربازاری اور خود ساختہ مہنگائی کرتے ہیں ۔وہ روزداروں کی مشکلات میں اضافہ کا باعث بنتے ہیں ۔اس طرح کے اعمال روزہ کی قبولیت میں مانع ہیں۔ایسے لوگوں روزہ کے روحانی فوائد سے محروم رہ جاتے ہیں۔روزہ محض بھوکا رہنے کا نام نہیں بلکہ اپنے تمام اعضا کو غیر شرعی امور سے دور رکھنے کا نام ہے ۔ان خیالات کا اظہار کراچی وحدت ہاؤس صوبائی دفتر میں کارکنان کی تربیتی ورکشاپ سے خطاب کرتے ہوئے کہا کہ صبر، برداشت اور رواداری اس مقدس مہینے کے خصوصی انعام ہیں۔ روزے کا حقیقی لطف ان انعامات کے حصول میں ہے اور یہ تبھی حاصل ہوتے ہیں جب نفس کے ساتھ جہاد میں ثابت قدمی اور استقامت اختیار کی جائے۔مجلس وحدت مسلمین کی جانب سے ملک بھر کی طرح مخیر حضرات کے تعاون سالہائے گزشتہ کی طرح امسال بھی مستحقین میں پانچ ہزار سے زائد راشن تقسیم کئے ہیں اور انشااللہ مخیر حضرات کے تعاون سے اس سلسلے کو جاری رکھا جائے گا ۔

وحدت نیوز (مطفرآباد) سینئر نائب صدر پی وائی او ارسلان شاہ عہدے سے مستعفی ہو کر مجلس وحدت مسلمین میں شامل ، مجلس وحدت مسلمین میں شمولیت کا فیصلہ کارکنان سے مشاورت کے بعد کیا ، سید ارسلان شاہ نے اس بات کا اعلان مجلس وحدت مسلمین آزاد کشمیر کے ریاستی سیکرٹری جنرل علامہ سید تصور حسین نقوی الجوادی اور سیکرٹری سیاسیات سید محسن رضا سبزواری ایڈووکیٹ سے ملاقات کے دوران کیا ، انہوں نے کہا کہ پیپلز پارٹی کی حکومت نے پانچ سالوں کے دوران نظریاتی کارکنان کو نظر انداز کیا ، مجلس وحدت مسلمین خدمت خلق کا منشور رکھتی ہے ، اس جماعت میں شمولیت کا فیصلہ اصولی ہے ، سیاست عوام الناس کی خدمت کے لیے کرنی ہے ، مجلس وحدت سے بہتر کوئی پلیٹ فارم نہیں کہ جو عملی طور پر مظلوموں و محروموں کے حقوق کے لیے عملی جدوجہد کرے ، آمدہ الیکشن میں مجلس وحدت مسلمین کا کردار انتہائی اہم ہو گا ، کرپشن کے خاتمے ، مسئلہ کشمیر اجاگر کرنے ، تمام شہریوں کو برابری کی بنیاد پر بنیادی سہولیات، صحت و تعلیم ، میرٹ کی بحالی ، انفراسٹریکچر کی بہتری ، سیاحت کے فروغ ، جبگلات کے تحفظ اور کشمیری عوام کی خوشحالی کا مشن لیکر میدان میں اتری ہے ، ایسا مشن کہ جو سیاست کے ساتھ ساتھ عوام الناس کی خدمت کا بھی ہے ، اس مشن کی تکمیل کے لیے حلقہ تین سٹی میں بھرپور کوشش کی جائے گی ۔

وحدت نیوز(لیہ) مجلس وحدت مسلمین صوبہ جنوبی پنجاب کے رہنماء سید عدیل عباس زیدی کا کہنا ہے کہ لانگ مارچ کی تیاریاں شروع کردی گئی ہیں، انشاء اللہ لاکھوں افراد جنوبی پنجاب سے عید الفطر کے بعد اسلام آباد کا رخ کریں گے، ان خیالات کا اظہار انہوں نے عوام رابطہ مہم کے سلسلہ میں ضلع لیہ کے علاقہ فتح پور میں ایک کارنر میٹنگ سے خطاب کرتے ہوئے کیا۔ ان کا کہنا تھا کہ ملک کے دیگر علاقوں کی طرح جنوبی پنجاب میں بھی لانگ مارچ کے حوالے سے عوام رابطہ مہم کا آغاز کردیا گیا ہے، اگر حکمرانوں نے علامہ راجہ ناصر عباس جعفری کے مطالبات تسلیم نہ کئے تو عید کے بعد جنوبی پنجاب کے ہر ضلع، شہر، گاوں اور قصبہ سے عوام کا سیلاب نکلے گا، انہوں نے مزید کہا کہ جنوبی پنجاب کے دیگر اضلاع میں بھی عوام رابطہ مہم کا آغاز کردیا گیا ہے، لانگ مارچ تاریخی ہوگا، اور ملت تشیع اپنی وحدت کے ذریعے کامیاب ہوگی۔

وحدت نیوز(قم) جامعۃ المصطفیٰ العالمیہ کے سربراہ اور امام جمعہ قم المقدسہ آیت اللہ علی رضااعرافی نے گذشتہ دنوں حرم مطہرحضرت معصومہؑ قم میں خطبہ جمعہ سے خطاب کرتے ہوئے کہا کہ پاکستان میں ان گذشتہ دہشت گردانہ کاروائیوں خصوصیت سے شیعیان پاکستان کے حوالے سے حادثات رونما ہوئے اور ان کے خلاف جس عالم بزرگوار (آقائے الشیخ ناصرعباس الجعفری)نے بھوک ہڑتال کااعلان کیا ہے اس کی ہم حمایت کرتے ہیں، ہم حکومت پاکستان اور اس ملک عزیز کی فوج سے امید کرتے ہیں کہ وہ ان دہشت گردانہ کاروائیوں کے خلاف بنیادی اقدامات اٹھائینگے۔

مجلس وحدت مسلمین پاکستان

مجلس وحدت مسلمین پاکستان ایک سیاسی و مذہبی جماعت ہے جسکا اولین مقصد دین کا احیاء اور مملکت خدادادِ پاکستان کی سالمیت اور استحکام کے لیے عملی کوشش کرنا ہے، اسلامی حکومت کے قیام کے لیے عملی جدوجہد، مختلف ادیان، مذاہب و مسالک کے مابین روابط اور ہم آہنگی کا فروغ، تعلیمات ِقرآن اور محمد وآل محمدعلیہم السلام کی روشنی میں امام حسین علیہ السلام کے ذکر و افکارکا فروغ اوراس کاتحفظ اورامر با لمعروف اور نہی عن المنکرکا احیاء ہمارا نصب العین ہے 


MWM Pakistan Flag

We use cookies to improve our website. Cookies used for the essential operation of this site have already been set. For more information visit our Cookie policy. I accept cookies from this site. Agree