وحدت نیوز(پشاور) امام انقلاب، بت شکنِ عصر، آیت اللہ العظمیٰ سید روح اللہ موسوی خمینیؒ کی برسی کے موقع پر ایم ڈبلیو ایم وومن ونگ پشاور کی جانب سے امام بارگاہ علی رضا، وپگڈا میں ایک پر وقار اور بامقصد فکری نشست "خمینی بت شکنؒ" کے عنوان سے منعقد ہوئی، جس میں ملت کی باہوش، باکردار اور بیدار خواتین نے شرکت کی۔

اس روح پرور نشست سے محترمہ ثمانہ ضلعی صدر ایم ڈبلیو ایم پشاوراور محترمہ زینب بنت الہدیٰ نقوی مرکزی سیکرٹری روابط ایم ڈبلیو ایم وومن ونگ نے خطاب کرتے ہوئے نہ صرف انقلاب اسلامی کے تاریخی، فکری اور نظریاتی پس منظر کو اجاگر کیا بلکہ امام خمینیؒ کی جانب سے "بت شکنی" کے فلسفے کو عصر حاضر کی روشنی میں خوبصورت انداز میں بیان کیا۔

مقررین نے اپنے پُراثر خطابات میں واضح کیا کہ امام خمینیؒ کی جدوجہد صرف شاہی نظام یا سیاسی آمریت کے خلاف نہ تھی بلکہ ہر اُس فکری، تہذیبی اور طاغوتی بت کے خلاف تھی جو انسان کو اس کی اصل حقیقت اور آزادی سے محروم کرتا ہے۔

انہوں نے کہا کہ آج کے دور میں جدید تقاضوں کے مطابق نئے بت سامنے آ چکے ہیں — خواہ وہ استعمار ہو، فکری غلامی ہو، یا میڈیا کی چکاچوند میں لپٹی ہوئی ثقافتی یلغار — جن کا مقابلہ بھی اسی انقلابی فکر، شعور اور کردار سے ممکن ہے جس کی عملی تصویر امام خمینیؒ نے پیش کی۔

محترمہ زینب بنت الہدیٰ نقوی نے اپنے خطاب میں خاص طور پر خواتین کے انقلابی کردار پر زور دیتے ہوئے کہا کہ آج کی بیدار اور مؤمنہ خواتین، اگر امام خمینیؒ کے افکار سے وابستگی اختیار کریں، تو وہ نہ صرف معاشرے میں تبدیلی لا سکتی ہیں بلکہ آئندہ نسلوں کے لیے بھی راہ روشن کر سکتی ہیں۔

وحدت نیوز(اسلام آباد) وحدت یوتھ پاکستان کے سالانہ مرکزی کنونشن کے اختتام پر سید یاور  کاظمی کو وحدت یوتھ کا مرکزی صدر منتخب کر لیا گیا، چیئرمین مجلس وحدت مسلمین پاکستان سینیٹر علامہ راجہ ناصر عباس جعفری نے سید یاور کاظمی کو مرکزی صدر منتخب کرنے کا اعلان کیا اور اُن سے حلف لیا، ‏یہ انتخاب باقاعدہ ووٹنگ اور اکثریتِ رائے سے عمل میں لایا گیا، جس میں ملک بھر کے وحدت یوتھ پاکستان کے ذمہ داران نے حصہ لیا،‏

نومنتخب صدر سید یاور کاظمی کا کہنا تھا کہ یہ منصب میرے لیے امانت ہے، قوم و ملت کی خدمت، نوجوانوں کی تربیت اور وحدت کے فروغ کے لیے بھرپور کردار ادا کریں گے، کسی بھی قوم اور ملک کی ترقی میں جوانوں کا کردار کلیدی ہوتا ہے، وحدت یوتھ کے جوانوں کی اولین ذمہ داری بنتی ہے کہ امام وقت کی سرپرستی میں قائم ہونے والی عالمی الہی حکومت کی زمینہ سازی کے لیے اپنا بھر پور کردار ادا کریں۔

وحدت نیوز(اسلام آباد) وحدت یوتھ پاکستان کے زیر اہتمام تین روزہ سالانہ مرکزی کنونشن”صدائے عدل“ کا انعقاد، جس میں ملک کے چاروں صوبوں سمیت گلگت بلتستان اور آزاد جموں کشمیر سے وحدت یوتھ کے جوانوں کی بڑی تعداد شریک، تنظیمی وتربیتی کنونشن میں ملک بھر سے آئے شرکاء کو مرکزی صدر وحدت یوتھ ونگ علامہ تصور مہدی نے والہانہ انداز میں خوش آمدید کہا اور افتتاحی کلمات کہے۔

مرکزی کنونشن کے شرکاء سے وائس چیئرمین ایم ڈبلیو ایم پاکستان علامہ سید احمد اقبال رضوی نے مہدویت عصر حاضر کے تناظر میں کے موضوع پر گفتگو کرتے ہوئے کہا کہ عدل وانصاف کسی بھی ریاست کا بنیادی تقاضا ہے، تاریخ میں کبھی بھی پوری دنیا پر عدل کی حکومت قائم نہیں رہی، یہ شرف صرف حکومت امام مہدی کو حاصل ہو گا، وحدت یوتھ کے جوانوں کی اولین ذمہ داری بنتی ہے کہ امام وقت کی سرپرستی میں قائم ہونے والی عالمی الہی حکومت کے لیے زمینہ سازی اور کردار ادا کریں۔

چیئرمین ایم ڈبلیو ایم پاکستان کے معاون خصوصی و چیف آرگنائزر سید ناصر عباس شیرازی نے حالات حاضرہ کے موضوع پر گفتگو کرتے ہوئے کہا کہ ڈیڑھ سالہ خاک و خون کے کھیل کے باوجود اسرائیل اپنے مقاصد میں مکمل ناکام ہے، تمام تر جدید ٹیکنالوجی اور امریکہ سمیت مغربی قوتوں کے تعاون کے باوجود بھی صہیونی ریاست دو تنظیموں کے سامنے بے بس ہے، اپنی شکست کو چھپانے کیلئے اسرائیل غزہ میں نسل کشی کر رہا ہے اور خوراک و ادویات کی بندش کو جنگی ہتھیار کے طور پر استعمال کر رہا ہے جو عالمی قوانین کی سنگین خلاف ورزی ہے۔

شرکاء کنونشن سے ماہر تعلیم ڈاکٹر ثقلین عباس نقوی نے ٹائم منیجمنٹ کے عنوان پر گفتگو کی، دیگر مقررین میں صوبائی صدر علامہ سید علی اکبر کاظمی، سید یاور کاظمی اور راجہ مصطفی حیدر شامل تھے۔

وحدت نیوز(لاہور) مجلس وحدت مسلمین پاکستان وومن ونگ کی مرکزی صدر محترمہ سیدہ معصومہ نقوی نے اپنے مذمتی بیان میں کہا ہے کہ خضدار میں بچوں کی سکول بس پر حملہ اور معصوم شہادتوں کے دلسوز واقعے نے پورے ملک کو سوگوار کر دیا ہے۔ پاکستان میں دہشتگردانہ کاروائیوں کا سلسلہ طول پکڑتا جا رہا ہے ایسے دل دہلا دینے والے واقعات اور معصوم طالب علم بچوں کی جانوں کا ازالہ زبانی کلامی بیانات سے ممکن نہیں ۔

ان سنگین اور دلخراش واقعات کی مذمت کے بجائے فوری اقدامات ہونے چاہئے ملکی ریاستی اداروں اور سیکیورٹی انتظامیہ آخر کب تک غفلتوں کا شکار رہے گی ؟ حکومت اور ریاستی اداروں کو اس سانحے میں ملوث سہولتکاروں اور مجرموں کو کیفر کردار تک پہنچانے کے لیے فوری اقدامات کرنے چاہیے ۔ میں شہید ہونے والے معصوم بچوں کے والدین سے اظہار تعزیت کرتی ہوں اور زخمی بچوں کی صحتیابی کے لیے دعاگو ہوں اللہ تعالی ہمارے ملک اور اسکے عوام پر اپنا کرم فرمائے اور اسکے دشمنوں کو نابود فرمائے۔