وحدت نیوز(بھٹ شاہ) مولا علیؑ کی ولادت کی مناسبت سے بھٹ شاہ میں اصغر یہ اسٹوڈنٹس آرگنائزیشن کی جانب سے سالانہ قدیمی یوم علیؑ  منایا گیاجس میں مرکزی ڈپٹی سیکرٹری جنرل مجلس وحدت مسلمین علامہ سید احمد اقبال رضوی نےخصوصی شرکت کی اور جشن ولادت مولاعلی ؑسے خطاب کیا۔

 انہوں نے کہا کہ امیر المومنین علی ع کی پیروی عالم اسلام کی سربلندی کا ذریعہ ہے۔مولا علی ع صحابی نہیں نفس رسول ہیں۔ اسوہ حیدری آج بھی دنیا بھر کے حریت پسندوں کے لئے مشعل راہ ہے ،آج ہم دیکھتے ہیں کہ یمنی مولا علیؑ کے چاہنے والے ان کی طرح مظلوم مگر طاقتور ہیں۔ امام خمینی مولا علی ع کی پیروی کی وجہ سے عظیم اسلامی انقلاب کے بانی بنے۔

نصاب کے مسئلے پر گفتگو کرتے ہوئے انہوں نے کہا کہ یکساں نصاب تعلیم کی آڑ میں کسی خاص مسلک کا عقیدہ دوسرے مسالک پر تھوپنا ناقابل قبول ہے پاکستان تمام شیعہ ،سنی مسلمانوں نے مل کر بنایا ہے جس میں شیعہ سمیت کسی مسلک کے ساتھ امتیازی سلوک فلسفہ قیام پاکستان اور آئین کے خلاف ہے۔ نصاب میں ہر مسلک کے بچے کو اس کے عقیدے کے مطابق اسلامیات اورتاریخ پڑھائی جائے۔

انہوں نے کہا کہ شاہ عبد اللطیف بھٹائی کا مذھب محبت اہل بیت ع تھا اور انہوں نے محبت ہی کے ذریعہ تبلیغ دین کا فریضہ ادا کیا۔ یوم علی کے جشن میں اصغر یہ اسٹوڈنٹ آرگنائزیشن کے مرکزی صدر حسن علی سجادی صاحب نے بھی خطاب کیا جشن کے آخر میں یادگاری شیلڈز کی تقسیم کی گئی۔ اس موقع پر  علامہ سید احمد اقبال رضوی نے شاہ عبد اللطیف بھٹائی ؒ کے مزار پر حاضر پر حاضری بھی دی ۔

وحدت نیوز (کراچی) مجلس وحدت مسلمین صوبہ سندھ کےسیکریٹری جنرل علامہ سید باقرعباس زیدی نے اپنے ایک بیان میں کہا ہے کہ سانحہ سیہون شریف کو 5برس بیت گئے،شہید ہونے والے سو سے زائد بے گناہ شیعہ سنی زائرین کے قاتل آج تک قانون کی گرفت سے آزاد ہیں اور خانوادہ شہداء انصاف کے منتظر۔

انہوں نے مزید کہا کہ ریاست قومی سلامتی کا تحفظ چاہتی ہے تو اسے قومی سانحات میں ملوث تمام دہشت گردوں کے خلاف فیصلہ کن کارروائی کو فوری یقینی بناناہوگا۔ کالعدم ٹی ٹی پی ، داعش اورکالعدم تکفیری تنظیمیں وطن عزیز کے امن واستحکام کو تباہ کرنے کے درپہ ہیں۔

وحدت نیوز(سکھر)ٹھکراٹھو ضلع سکھر میں جشن مولود کعبہ سے خطاب کرتے ہوئے مجلس وحدت مسلمین پاکستان کے مرکزی ترجمان مقصود علی ڈومکی نے کہا ہے کہ اھل سنت کے امام حاکم نیشابوری نے کتاب المستدرک میں لکھا کہ یہ بات تواتر سے ثابت ہے کہ حضرت امیرالمومنین علی کی ولادت کعبہ میں ہوئی۔ مولود کعبہ مولا علی علیہ السلام کی ذات گرامی میں تمام انسانی فضائل و کمالات جمع ہوئے اسی لئے رسول اللہ نے فرمایا کہ آدم کا علم نوح کا عزم ابراہیم کی خلت موسی کی ہیبت عیسی کا زہد اور حضرت محمد مصطفی کا جلال و جمال سب ذات علی میں جمع ہے۔ یعنی آپ انبیائے الہی کے وارث ہیں اسی لئے انبیاء کی صفات نے آپ کی ذات میں تجلی کی۔

انہوں نے کہا کہ عادلانہ معاشرے کا قیام انبیائے کرام کا ھدف تھا مولا علی ؑنے عدل و انصاف کی جو حکومت قائم کی وہ آج بھی تاریخ انسانی کا سنہری باب ہے۔ حضرت علی علیہ السلام نے حضرت مالک اشتر رضی اللہ عنہ کو مصر کا گورنر مقرر کرتے جو تفصيلی تحریر وہ آج دنیا بھر کے حکمرانوں کے لئے بہترین آئین حکومت ہے۔

انہوں نے کہا کہ مولا علی سے عشق و محبت ایمان کی نشانی ہے جبکہ مولا علی سے بغض و عداوت منافقت اور گمراہی ہے۔ مولا علی سے عشق و محبت کا یہ تقاضا ہے کہ ہم ان کے نقش قدم پر چلیں۔ جب تک ہمارے گفتار اور کردار سے کردار علوی کی خوشبو نہ آئے دعوائے محبت ادھورا ہے۔

وحدت نیوز(اسلام آباد)مجلس وحدت مسلمین پاکستان کے سنٹرل سیکریٹریٹ اسلام آباد میں ممبر قومی اسمبلی حلقہ NA 46 ،چیئر مین قومی اسمبلی قائمہ کمیٹی صنعت وپیداوار و نائب صدر پاکستان پیپلز پارٹی صوبہ خیبر پختونخواہ ساجدحسین طوری نےمرکزی ڈپٹی سیکریٹری جنرل مجلس وحدت مسلمین پاکستان  ناصر عباس شیرازی ودیگر رہنماؤں سے ملاقات کی اور 13رجب المرجب یوم مولود کعبہ کی مناسبت سے مبارک باد پیش کی ۔

 اس ملاقات میں محترم جناب علامہ سید آغاعلی رضوی صوبائی سیکریٹری جنرل گلگت بلتستان ، علامہ شیخ احمد علی نوری معزز ممبر جی بی کونسل صوبہ گلگت بلتستان ،صوبائی رہنما ایم ڈبلیو ایم برادر زاھد علی کاچو ، سلیم یاسر ،مولانا ظہیر کربلائی کے علاوہ دیگرشعبوں کے عہدیداران بھی موجود تھے ۔

ملاقات میں دوطرفہ تعلقات کےعلاوہ ملکی اور علاقائی امور بر بات چیت ہوئی  اور آئندہ صوبہ خیبر پختونخواہ میں سیاسی و دیگر معاملات پر مشاورت کی گئی ۔ اس ملاقات میں جی بی اورخیبرپختونخواہ کے سیاسی امور بھی زیر بحث آئے ۔ ملاقات کے آخر میں جناب ساجد علی طوری نےقائد وحدت قبلہ علامہ راجہ ناصرعباس جعفری کے لئے نیک خواہشات کا اظہار کیا اوران کی صحت وسلامتی کے خصوصی دعا کی ۔

وحدت نیوز(مشہد مقدس)مجلس وحدت مسلمین شعبہ مشہد مقدس کے زیراہتمام ولادت باسعادت امیرالمومنین، امام المتقین علی ابن ابی طالب علیہ السلام اور انقلاب اسلامی ایران کی 43ویں سالگرہ کی مناسبت سے موسسہ شہید عاف الحسینی دفتر مجلس وحدت مسلمین میں جشن کا اہتمام کیا گیا، جشن میں علمائے کرام، طلاب، زائرین نے بڑی تعداد میں شرکت کی۔ جشن میں علمائے کرام کے علاوہ شعرائے کرام کی بڑی تعداد نے شرکت کی۔

جشن کی صدارت سیکرٹری جنرل ایم ڈبلیو ایم مشہد مقدس حجتہ الاسلام والمسلمین عقیل حسین خان نے کی۔ حجتہ الاسلام والمسلمین عارف حسین تھہیم، حجتہ الاسلام والمسلمین سید منور نقوی، اُلفت حسین جوئیہ، اکبر سرسوی، سید نیر رضوی، حسنین رضا عابد، سید عاصم زیدی، سید سبط رضوی اور ذاکر اسدی نے شرکت اور خطاب کیا۔ علمائے کرام اور شعرائے کرام نے امیر المومنین علی ابن ابی طالب علیہ السلام اور انقلاب اسلامی ایران کی سالگرہ کی مناسبت سے کلام پیش کیے گئے۔

وحدت نیوز(لاہور) تیرہ رجب یوم ولادت با سعادت امیرالمومنین،  شیر خدا ، وصی رسول اللہ ، مولائے کائنات حضرت علی علیہ سلام کی ولادت باسعادت کے موقع پر ایم ڈبلیو ایم شعبہ خواتین و رکن صوبائ اسمبلی محترمہ سیدہ زہرا نقوی نے اپنے تہنیتی پیغام میں  کہا پروردگار کا لاکھ لطف و احسان ہے کہ اس نے اپنے محبوب نبی کے بعد ہمیں امام علی علیہ جیسا رہبر و رہنما عطا کیا آپ کی ذات فضائل و کمالات کا ایسا مجموعہ ہے کہ کوئی دانشور مفکر نکتہ داں اس کا احاطہ نہیں کر سکتا ۔

انہوں نے کہا کہ امیرالمومنین ایسی شخصیت ہیں جن کے اندر متضاد صفات پائی جاتی ہیں۔ جو شخص جنگجو ہوتا ہے وہ اہل عبادت نہیں ہوتا، جو طاقت کے بل بوتے پر زندگی بسر کرتا ہے وہ زاہد و پرہیزگار نہیں ہو سکتا، جو ہمیشہ تلوار چلاتا ہو اور منحرف افراد کو سیدھے راستے پر لگاتا ہو وہ لوگوں پر مہربان نہیں ہو سکتا لیکن حضرت امیر المومنین علیہ السلام اس ذات کا نام ہے جس میں متضاد صفات پائی جاتی تھیں۔ وہ دنوں کو روزے رکھتے تھے اور راتوں کو عبادت میں مصروف رہتے انہوں نے کہا کہ آج تیرہ رجب  ایسا دن ہے جس میں رسول اسلام صل اللہ علیہ و آلہ وسلم کو قرآن کریم اور اپنی سنت کا مفسّر ملا ہے اور دین اسلام کو اس دن حامی و مددگار ملا ہے، اس عظیم مولود کے وجود سے بعثت رسول اسلام صلی اللہ علیہ و آلہ و سلم پایہ تکمیل تک پہنچی اور دین کامل ہوا ۔

ان کا مزید کہنا تھا کہ امام علی علیہ سلام کی محبت و ولایت ہمارا ایمان ہے اسکے بغیر ہمارا ایمان مکمل نہیں ہوتا پیروان امیرالمومنین کی ذمہ داری ہے کہ وہ اس عظیم الہی نعمت کی قدر کریں اور ان کے سیرت و کردار کو مشعل راہ بنا کر دنیا و آخرت میں نجات کا سامان کریں۔