وحدت نیوز(ملتان) مجلس وحدت مسلمین جنوبی پنجاب کے صوبائی آرگنائزر علامہ قاضی نادر حسین علوی نے کہا ہے کہ امریکی افواج کی جانب سے ایران جیسے خودمختار ملک پر بلاجواز اور غیرقانونی فوجی حملے کی شدید الفاظ میں مذمت کرتا ہوں، خاص طور پر نطنز، فردو اور اصفہان میں واقع جوہری تنصیبات کو نشانہ بنانا ایک نہایت سنگین اقدام ہے۔ یہ جارحیت بین الاقوامی قوانین اور ایران کی علاقائی خودمختاری کی کھلی خلاف ورزی ہے، جو بے شمار شہری جانوں کو خطرے میں ڈالتی ہے اور علاقائی و عالمی سلامتی کو شدید نقصان پہنچاتی ہے۔ اس حملے کی غیرقانونی حیثیت پر بین الاقوامی ایٹمی توانائی ایجنسی (IAEA) اور اقوام متحدہ کی سلامتی کونسل میں متعدد ممالک بارہا زور دے چکے ہیں۔

محفوظ جوہری تنصیبات کو جان بوجھ کر نشانہ بنانا ایک تباہ کن ریڈیائی ماحولیاتی تباہی کو جنم دے سکتا ہے، جس سے انسانیت اور ماحول دونوں کو ناقابلِ تلافی نقصان پہنچ سکتا ہے۔ یہ انتہائی افسوسناک اقدام امریکی صدر ڈونلڈ ٹرمپ کے کھلے تضاد سے مزید داغدار ہو گیا ہے۔ صرف چند روز قبل وہ سفارتی عمل کی حمایت کا دعوی کر رہے تھے اور دو ہفتے کی مہلت کا وعدہ کر رہے تھے، لیکن 48 گھنٹوں سے بھی کم وقت میں ان کی انتظامیہ نے سفارتکاری کو خیرباد کہہ کر براہ راست جنگ کا راستہ اختیار کیا ہے۔ گزشتہ ہفتے ہی وہ اسرائیلی فوجی منصوبہ بندی کی حمایت کر چکے تھے، جس سے ان کے کسی بھی امن منصوبے کی سچائی پر سنگین شکوک پیدا ہوتے ہیں۔

سب سے بڑا تضاد یہ ہے کہ حملے سے صرف 27 گھنٹے پہلے پاکستان کی حکومت نے صدر ٹرمپ کو نوبل امن انعام کے لیے نامزد کیا تھا، اور اب وہی صدر اپنے اقدامات کو "امن کی کوشش" قرار دے کر ایران پر تباہ کن حملہ کر چکے ہیں۔ یہ غیر ذمہ دارانہ فیصلہ پورے خطے میں ایک وسیع جنگ کی چنگاری بن سکتا ہے اور دنیا بھر میں سفارتکاری پر سے اعتماد کو مزید ختم کر رہا ہے۔ میں پاکستان اور دنیا بھر کے تمام با ضمیر انسانوں سے اپیل کرتا ہوں کہ وہ اس غیر قانونی حملے کی کھل کر مذمت کریں۔ امریکہ، اسرائیل اور اس حملے میں شامل تمام عناصر کو جوابدہ ٹھہرایا جانا چاہیے۔

وحدت نیوز(گلگت)مجلس وحدت مسلمین گلگت بلتستان کے صوبائی صدر آغا علی رضوی نے اپنے اعلیٰ سطحی وفد کے ہمراہ قائد ملت جعفریہ گلگت بلتستان آغا راحت حسین الحسینی سے اہم ملاقات کی۔ اس ملاقات میں ایران و اسرائیل کشیدگی، گلگت بلتستان کے عوامی مسائل، خصوصامتنازعہ لینڈ ریفارمز بل اور خطے کے سیاسی و سماجی حالات پر تفصیلی گفت وشنید کی گئی۔ ملاقات کے دوران آغا علی رضوی نے کہا کہ لینڈ ریفارمز بل کے ذریعے عوام کی زمینوں پر قبضہ کرنے کی جو کوشش کی جا رہی ہے، وہ کسی بھی صورت ناقابلِ قبول ہے۔ گلگت بلتستان کی زمین یہاں کے عوام کی ملکیت ہے، اور کسی بھی نام نہاد قانونی جواز یا اختیارات کے بل پر عوامی اراضی ہتھیانے کی کوشش کی گئی تو ایسی تحریک چلائی جائے گی جسے حکومت سنبھال نہیں سکے گی۔ انہوں نے خبردار کیا کہ ہم ایسی عوام دشمن پالیسیوں کاعوامی مزاحمت کی زبان میں جواب دیں گے۔ عوام کی زمینوں پر ڈاکہ ڈالنے کی اجازت نہ پہلے دی ہے، نہ آئندہ دیں گے۔ اگر حکومت یا کوئی ادارہ یہ سمجھتا ہے کہ گلگت بلتستان کے عوام کمزور ہیں، تو وہ بہت بڑی غلط فہمی میں ہے۔

اس موقع پر قائد ملت جعفریہ گلگت بلتستان آغا راحت حسین الحسینی نے بھی سخت مؤقف اختیار کرتے ہوئے کہا کہ لینڈ ریفارمز بل دراصل گلگت بلتستان کے عوام کو ان کی زمینوں سے محروم کرنے کی ایک سازش ہے۔ ہم اس سازش کو ہر سطح پر بے نقاب کریں گے اور کسی صورت کامیاب نہیں ہونے دیں گے۔ حکومت کو یاد رکھنا چاہیے کہ اگر عوام کا صبر ٹوٹ گیا، تو حالات کی ذمہ داری ان قوتوں پر ہو گی جو یہاں کی زمینوں پر قبضے کی ناپاک کوششیں کر رہی ہیں۔ انہوں نے مزید کہا کہ گلگت بلتستان کے عوام بیدار ہیں، اور اب مزید کسی ظلم، جبر یا محرومی کو برداشت نہیں کریں گے۔ ایران اسرائیل تنازع پر گفتگو کرتے ہوئے آغا علی رضوی نے کہا کہ گلگت بلتستان کے عوام ہر محاذ پر مظلوموں کے ساتھ کھڑے ہیں، اور ایران کے دفاع کو دین و ملت کا دفاع سمجھتے ہیں۔ اسرائیلی جارحیت کے خلاف ایران کی مزاحمت کو ہم امت مسلمہ کے وقار کی علامت سمجھتے ہیں۔

اس ملاقات میں مجلس وحدت مسلمین کے نائب صدر ڈاکٹر مشتاق حسین حکیمی، جنرل سیکریٹری عارف قنبری، رکن اسمبلی شیخ اکبر علی رجائی، صوبائی ترجمان حاجی غلام عباس، سابق معاون خصوصی الیاس صدیقی اور دیگر عہدیداران بھی شریک تھے۔ اس موقع پر آغا راحت حسین الحسینی نے آغا علی رضوی کو صوبائی صدر منتخب ہونے پر مبارکباد دی، ان کی آمد پر خوش آمدید کہا اور ان کی خدمات کو سراہتے ہوئے ان کے حق میں خصوصی دعا کی۔ آخر میں دونوں رہنماؤں نے مشترکہ طور پر کہا کہ گلگت بلتستان کے عوام کے حقوق، زمین، شناخت اور خودداری پر کوئی سمجھوتہ نہیں ہو گا۔ ہم ہر سازش کو متحد ہو کر ناکام بنائیں گے۔

وحدت نیوز (اسلام آباد)عالمی استکبار، شیطانِ بزرگ امریکہ اور غاصب صہیونی ریاست اسرائیل کی برادر اسلامی ملک ایران کے خلاف کھلی جارحیت اور مظالم کے خلاف، مجلس وحدت مسلمین پاکستان کی جانب سے ملک بھر میں “ہفتۂ حمایتِ مظلومینِ جہاں” کا اعلان کیا گیا ہے۔

اس موقع پر چیئرمین مجلس وحدت مسلمین پاکستان سینیٹر علامہ راجہ ناصر عباس جعفری نے ملک بھر کے تمام صوبائی، ضلعی اور مقامی عہدیداران و کارکنان کو ہدایت جاری کی ہے کہ وہ اپنے اپنے شہروں اور علاقوں میں احتجاجی مظاہروں اور اجتماعات کا انعقاد کریں اور ان مظلوموں کی حمایت میں صدائے احتجاج بلند کریں۔وطنِ عزیز پاکستان کے تمام باشعور، غیور اور غیرت مند عوام، مرد و خواتین، نوجوانوں، علمائے کرام، مشائخ، دانشوروں، اساتذہ، طلباء اور صحافی برادری سے بلا تفریق مذہب و مسلک اپیل کی جاتی ہے کہ وہ غیرتِ اسلامی، ملی حمیت اور اخوتِ ایمانی کا مظاہرہ کرتے ہوئے، امریکہ اور اسرائیل کی ان جارحانہ سازشوں کے خلاف آواز بلند کریں اور مظلومینِ جہاں کی حمایت میں میدان میں نکلیں۔

لہذا تمام ضلعی و صوبائی ذمہ داران کو ہدایت دی جاتی ہے کہ وہ قومی و ملی جماعتوں، سرکردہ شخصیات، انسانی حقوق کے علمبرداروں اور سول سوسائٹی کو ان احتجاجی مظاہروں میں شرکت کی دعوت دیں تاکہ عالمی ضمیر کو جھنجھوڑا جا سکے اور مظلومین کی آواز دنیا بھر تک پہنچائی جا سکے، یاد رکھیں! ظلم کے خلاف آواز بلند کرنا عین عبادت اور دینِ محمدیؐ کا تقاضا ہے۔

وحدت نیوز(اسلام آباد)سربراہ مجلس وحدت مسلمین پاکستان سینیٹر علامہ راجہ ناصر عباس جعفری حفظہ اللہ کی سینیٹرز کے وفد کے ہمراہ ایرانی سفارت خانے آمد،اس موقع پر وفد میں سینیٹر علی ظفر، سینیٹر عون عباس بپی،سینیٹر سیف اللہ نیازی، سینیٹر فوزیہ ارشد اور سینیٹر دوست محمد نے ایران سے اظہارِ یکجہتی کی اور یقین دلایا کہ امتِ مسلمہ کے اتحاد اور مظلوموں کی حمایت کے لیے ہر محاذ پر ساتھ ہیں۔ جنگ میں شہید ہونے والے ایرانی شہدا کے لیے فاتحہ خوانی بھی کی گئی۔

وحدت نیوز(اسلام آباد) چیئرمین مجلس وحدت مسلمین پاکستان سینیٹر علامہ راجہ ناصرعباس جعفری نے اپنے بیان میں کہا ہے کہ میں خودمختار ریاست ایران کے خلاف امریکہ کی طرف سے شروع کیے گئے بے ہودہ اور غیر قانونی فوجی حملے، خاص طور پر نطنز، فردو اور اصفہان میں جوہری تنصیبات پر نشانہ بنائے جانے والے حملوں سے شدید صدمے اور شدید مایوسی کا شکار ہوں۔جارحیت کا یہ ڈھٹائی کا مظاہرہ بین الاقوامی قانون اور ایران کی علاقائی سالمیت کی سنگین خلاف ورزی ہے، جس سے بے شمار شہریوں کی زندگیوں کو خطرہ لاحق ہے اور علاقائی اور عالمی سلامتی کو نقصان پہنچا ہے۔

اس کی واضح غیر قانونییت کے علاوہ، جیسا کہ بین الاقوامی جوہری توانائی ایجنسی (IAEA) اور اقوام متحدہ کی سلامتی کونسل دونوں میں متعدد ریاستوں کی طرف سے بار بار زور دیا گیا ہے، محفوظ ایٹمی مقامات کو جان بوجھ کر نشانہ بنانا اس کے ساتھ ریڈیولوجیکل فال آؤٹ کا تباہ کن خطرہ ہے۔انسانی اور ماحولیاتی تباہی کا امکان ان تنصیبات پر حملہ کرنے کی لاپرواہی کو واضح کرتا ہے جو IAEA کی براہ راست نگرانی میں تھیں۔یہ انتہائی افسوسناک عمل صدر ٹرمپ کی واضح دوغلی پن سے مزید متاثر ہوا ہے۔ صرف چند دن پہلے، اس نے عوامی سطح پر سفارتی راستوں کی حمایت کرنے کا دعویٰ کیا تھا اور کشیدگی میں کمی کے لیے دو ہفتے کی ونڈو تجویز کی تھی۔ پھر بھی، 48 گھنٹوں سے بھی کم عرصے میں، اس کی انتظامیہ نے سفارت کاری کو ترک کرنے اور دور رس نتائج کے ساتھ براہ راست امریکہ کو جنگ میں شامل کرنے کا انتخاب کیا ہے۔

ابھی پچھلے ہفتے، اسی صدر نے ایران کے خلاف اسرائیلی فوجی منصوبہ بندی کی واضح طور پر توثیق کی تھی، اور کسی بھی امن کوششوں کے اخلاص پر شک ظاہر کیا تھا۔ستم ظریفی یہ ہے کہ حملوں سے صرف 27 گھنٹے قبل، حکومت پاکستان نے صدر ٹرمپ کو امن کے نوبل انعام کے لیے باضابطہ طور پر نامزد کیا تھا۔ اب پڑوسی ملک پر اس طرح کے تباہ کن حملے کی اجازت دینا اور ساتھ ہی ساتھ اس کے اقدامات کو "امن" کے لیے کوششوں کی تعریف کرنا ایک سخت اور پریشان کن تضاد کو بے نقاب کرتا ہے۔اس لاپرواہ فیصلے سے ایک وسیع تر علاقائی تصادم کو بھڑکانے کا خطرہ ہے اور اس نے تنازعات کے حل کے لیے ایک قابل عمل طریقہ کار کے طور پر سفارت کاری پر اعتماد کو مزید ختم کر دیا ہے۔میں پاکستان اور دنیا بھر کے تمام باضمیر لوگوں سے مطالبہ کرتا ہوں کہ وہ طاقت کے اس غیر قانونی استعمال کی بلاشبہ مذمت کریں۔ امریکہ، اسرائیل اور اس جارحیت میں ملوث تمام اداکاروں کو جوابدہ ہونا چاہیے۔ہمیں بین الاقوامی قانون، قومی خودمختاری اور انصاف اور امن کے پائیدار اصولوں کے دفاع میں متحد ہونا چاہیے۔

وحدت نیوز(شکارپور)مجلس وحدت مسلمین پاکستان کے مرکزی رہنماء علامہ مقصود علی ڈومکی نے کہا ہے کہ اسلامی جمہوریہ ایران کے خلاف شیطان بزرگ امریکہ و غاصب اسرائیل کی جارحیت شرمناک عمل ہے۔ صدر ٹرمپ عالمی دہشت گرد ہے۔ انجمن غلامان امریکا کی جانب سے شیطان ٹرمپ کے لئے امن کے نوبل انعام کی سفارش پاکستانی قوم کی توہین ہے۔ انہوں نے کہا کہ سندھ میں بدامنی عروج پر ہے۔ کچے اور پکے کے ڈاکوؤں کے خلاف پاک فوج رینجرز اور سندھ پولیس فوری مشترکہ آپریشن کا آغاز کرے۔

ان خیالات کا اظہار انہوں نے ضلع شکار پور کے ضلعی صدر اصغر علی سیٹھار، جنرل سیکرٹری شاکر حسین سومرو، تحصیل صدر سید نوید علی شاہ، مولانا نثار علی نجفی اور سعید احمد خروس کے ہمراہ ڈکھن شہر میں ایک ہنگامی پریس کانفرنس سے خطاب کرتے ہوئے کیا۔ علامہ مقصود ڈومکی نے کہا کہ اسلامی جمہوریہ ایران کے خلاف جاری امریکی اور اسرائیلی جارحیت بین الاقوامی قوانین کی کھلی خلاف ورزی اور امریکا کی عالمی بدمعاشی کی عکاس ہے۔ انہوں نے کہا کہ امریکہ عالمی نظام کو قانون و انصاف کے بجائے ظلم، استبداد اور جبر کی بنیاد پر چلانا چاہتا ہے۔

انہوں نے واضح کیا کہ اسلامی جمہوریہ ایران مظلوم فلسطینی عوام کا سچا حامی ہے، جبکہ امریکہ اور اسرائیل انسانیت کے دشمن ہیں۔ رہبر انقلاب اسلامی آیت اللہ سید علی خامنہ ای اور ایرانی قوم، امریکی و اسرائیلی جارحیت کے خلاف پہاڑ کی طرح استقامت کے ساتھ کھڑے ہیں۔ اسرائیل جو مظلوم فلسطینیوں پر ظلم کے پہاڑ توڑ رہا تھا، آج خود نشان عبرت بن چکا ہے۔ انہوں نے کہا کہ اگر امریکہ نے مزید جارحیت کی تو اسے بھرپور اور منہ توڑ جواب دیا جائے گا۔

صدر ڈونلڈ ٹرمپ کو علامہ ڈومکی نے "شیطان صفت اور مجرم انسان" قرار دیتے ہوئے کہا کہ وہ اسرائیلی ظلم و ستم میں برابر کا شریک ہے۔ انہوں نے مزید کہا کہ 60 ہزار بے گناہ فلسطینیوں کے قتل عام میں ٹرمپ کا ہاتھ ہے۔ اس لئے انجمن غلامان امریکا کی جانب سے ٹرمپ کو "نوبل انعام" کے لئے نامزد کرنا شرمناک اور قومی وقار کے خلاف ہے۔ پوری پاکستانی قوم اس عمل کی سخت مذمت اور مخالفت کرتی ہے۔ علامہ ڈومکی نے پاکستانی حکمرانوں سے مطالبہ کیا کہ وہ اس اقدام پر قوم سے معافی مانگیں اور آئندہ ایسے فیصلوں سے گریز کریں جو قومی جذبات اور مظلومین جہان کے خلاف ہوں۔

پریس کانفرنس میں سندھ کی بگڑتی ہوئی امن و امان کی صورتحال پر شدید تشویش کا اظہار کرتے ہوئے انہوں نے کہا کہ شکارپور، کشمور، کندھ کوٹ سمیت پورا سندھ بدامنی اور ڈاکو راج کی لپیٹ میں ہے۔ کالعدم دہشت گرد تنظیموں کی جانب سے شہداد کوٹ اور کندھ کوٹ میں شرانگیز جلسے، شیعہ رہنماؤں کو دھمکیاں اور کافر کافر کے نعرے ناقابل برداشت ہیں۔ علامہ ڈومکی نے حکومت سندھ اور ضلعی انتظامیہ سے مطالبہ کیا کہ کالعدم تنظیم کے ان شرپسند عناصر کے خلاف فی الفور ایف آئی آرز درج کی جائیں اور سخت قانونی کارروائی کی جائے۔

انہوں نے کہا کہ سندھ میں لوگ روزانہ لٹ رہے ہیں۔ موٹر سائیکل چھینی جا رہی ہیں۔ خواتین کے زیورات چھینے جا رہے ہیں۔ ایک دن میں دن کی روشنی میں نیشنل ہائی وے پر 300 سے زائد افراد کو سرعام لوٹا گیا۔ لیکن سندھ پولیس، رینجرز، حکومت اور دیگر ادارے خاموش تماشائی بنے ہوئے ہیں۔ علامہ مقصود علی ڈومکی نے مطالبہ کیا کہ سندھ میں ڈاکوؤں کے خلاف پاک فوج، رینجرز اور پولیس پر مشتمل ایک مشترکہ مؤثر آپریشن کا فوری آغاز کیا جائے جو جرائم کے مکمل خاتمے اور امن کے قیام تک جاری رکھا جائے۔ انہوں نے یہ بھی انکشاف کیا کہ ماضی میں "آپریشن" کے نام پر محض ڈرامہ بازی کی گئی اور فنڈز ہضم کئے گئے، جس کا کوئی حقیقی نتیجہ سامنے نہیں آیا۔