وحدت نیوز(اسلام آباد) مجلس وحدت مسلمین پاکستان کے مرکزی سیکرٹری جنرل علامہ ناصر عباس جعفری نے فلسطین نیوز کے نمائندے کے ساتھ بات چیت کرتے ہوئے کہا ہے کہ عرب دنیا کے اسرائیل کے ساتھ بڑھتے ہوئے تعلقات جہاں فلسطین کاز کے لئے خطرہ ہیں وہاں پوری مسلم امہ کی پیٹھ پر خنجر گھونپنے کے مترادف ہے۔ان خیالات کا اظہار انہوں نے حالیہ دنوں ذرائع ابلاغ پر مسلسل شائع ہونے والی ان خبروں پر تبصرہ کرتے ہوئے کیا جن میں عرب دنیا کے اسرائیل کے ساتھ دوستانہ تعلقات بنائے جانے کی کوششوں کا ذکر کیا گیا تھا تاہم گذشتہ ماہ مسلم دنیا کے سب سے بڑے ملک سعودی عرب کی جانب سے ایک اعلی سطحی وفد کی جانب سے اسرائیل کادورہ اور موساد سمیت دیگر اداروں کے عہدیداروں سے ہونے والی ملاقاتوں کی خبریں بھی شائع ہوئی تھیں۔

علامہ ناصر عباس جعفری نے ان تمام خبروں پر تبصرہ کرتے ہوئے کہا کہ سعودی عرب اسرائیل کے ساتھ تعلقات بنا کر جلد سے جلد اسرائیل کو تسلیم کرنے کی کوششوں میں مصروف عمل ہے اور اس گھناؤنی اور سیاہ سازش میں براہ راست امریکہ ملوث ہے ، ان کاکہنا تھاکہ افسوس کی بات ہے کہ مسلم دنیا امریکی غلامی میں اس قدر آگے جا چکی ہے کہ سرزمین بیت المقدس پر بہنے والا مظلوم فلسطینیوں کا لہو بھی ان کے سامنے بے معنی ہو چکا ہے۔

مجلس وحدت مسلمین پاکستان کے سربراہ کاکہنا تھا کہ کشمیر میں ایک طرف اسرائیلی طرز پر ہندوستانی حکومت نے مظالم کا سلسلہ روا کھا ہوا ہے تو دوسری جانب امریکہ کی کھلم کھلم سرپرستی بھی حاصل ہے جیسا کہ خود امریکہ نے کشمیر میں ہونے والے بھارتی مظالم اور ریاستی دہشت گردی کو بھارت کا اندرونی معاملہ قرار دے کر نہ صرف بھارت کی حمایت کی بلکہ ہزاروں مظلوم کشمیریوں کی جد وجہد آزادی کو بھی زک پہنچانے کے ساتھ ساتھ پاکستان کو بھی واضح پیغام دیا ہے۔

علامہ ناصر عباس جعفری نے بین الاقوامی ذرائع ابلاغ اور پاکستانی ذرائع ابلاغ میں شائع ہونے والی خبروں کہ جس میں پاکستان اور اسرائیل کی مشترکہ فوجی مشقوں کے بارے میں انکشاف کیا گیا ہے کے بارے میں گفتگو کرتے ہوئے کہاکہ حکومت پاکستان بے بس ہو چکی ہے اور امریکی دباؤ میں آ کر اب ایک ایسی فوجی مشقوں میں پاک فضائیہ کو جھونک رہی ہے کہ جہاں ظالم اور سفاک اسرائیلی افواج بھی مشقوں میں حصہ لے رہی ہیں انہوں نے حکومت سمیت اعلیٰ ریاستی اداروں اور فوجی اداروں سے مطالبہ کیاکہ پاکستان فضائیہ اور افواج پاکستان کے وقار کو مجروح کرنے کی امریکی سازش کو بے نقاب کیا جائے اور افواج پاکستان ایسی کسی بھی مشقوں میں حصہ نہ لیں جہاں غاصب صیہونی افواج بھی حصہ لے رہی ہوں، انہوں نے کہا کہ اس طرح کا کوئی بھی اقدام واضح طور پر بابائے قوم قائد اعظم محمد علی جناح ؒ اور نظریہ پاکستان سے انحراف کے مترادف سمجھا جائے گا ۔انہوں نے مزید کہا کہ افواج پاکستان اور وزارت دفاع کو پاکستانی قوم کی امنگوں کی ترجمانی کرنی چاہئیے اور پاکستانی قوم کے جذبات و احساسات کو مجروح کرنے والے کسی بھی فعل سے اجتناب کیا جائے۔

واضح رہے کہ آئندہ ماہ امریکہ میں فوجی مشقوں کا آغاز ہو رہاہے جہاں عرب امارات سمیت ترکی اور اردن کی افواج شریک ہو ں گی جبکہ پاکستان فضائیہ بھی ان جنگی مشقوں میں شرکت کے لئے جائے گی اور اس موقع پر غاصب صیہونی ریاست اسرائیل کی فضائیہ بھی حصہ لے رہی ہے اور اس بات پر پاکستان بھر میں پوری قوم میں بے چینی کی لہر پائی جاتی ہے تاہم کئی دن گزر جانے کے باوجود وزارت دفاع سمیت افواج پاکستان کی جانب سے اس معاملے کی تردید یا تصدیق سے متعلق کوئی بیان سامنے نہیں آیا ہے۔

وحدت نیوز(اسلام آباد) شہید قائد عارف حسین الحسینی کی 28ویں برسی کے سلسلے میں جناح ایونیوپر  مجلس وحدت مسلمین پاکستان کے زیر اہتمام”تحفظ پاکستان کانفرنس“کے شرکاءسے خطاب کرتے ہوئےامامیہ اسٹوڈنٹس آرگنائزیشن کے مرکزی صدرعلی مہدی نے کہا کہ شہید قائد نے استعماری اور استکباری قوتوں کے خلاف ملک میں سب سے پہلے نعرہ بلند کیا اور امریکی و اسرائیلی ایجنڈے سے امت مسلمہ کوآگاہ کیا۔امت مسلمہ کے درمیان خصوصاًمومنین ومسلمین کے درمیان اتحاد اور اتفاق ان کی دلی آرزو تھی،استعماری قوتوں کو شکست دینے کیلئے الٰہی اور ولائی جماعتیں شہید قائد علامہ عارف الحسینی کے مشن کی تکمیل کیلئے اکھٹاہو جائیں۔

وحدت نیوز(اسلام آباد) شہید قائد عارف حسین الحسینی کی 28ویں برسی کے سلسلے میں جناح ایونیوپر  مجلس وحدت مسلمین پاکستان کے زیر اہتمام”تحفظ پاکستان کانفرنس“کے شرکاءسے خطاب کرتے ہوئےریاست کشمیر کے سیکرٹری جنرل علامہ تصور جوادی نے کہاکہ سالمیت پاکستان کے اوپر کوئی آنچ نہیں آنے دی جائے گی۔علامہ ناصر عباس نے قوم کے لیے تین ماہ بھوک ہڑتال کر کے قوم کے پاس مخلص قیادت کی عدم موجودگی کے تاثر کو مٹا دیا ہے۔انہوں نے کہا کہ مجلس وحدت مسلمین مظلوم کشمیری مسلمانوں پر بھارتی ظالم کی پر زور مذمت کرتی ہے، حکومت پاکستان بھارتی ہائی کمشنر کو ناپسندیدہ شخصیت قراردیکرملک بدر کرے۔

وحدت نیوز(اسلام آباد) شہید قائد عارف حسین الحسینی کی 28ویں برسی کے سلسلے میں جناح ایونیوپر  مجلس وحدت مسلمین پاکستان کے زیر اہتمام”تحفظ پاکستان کانفرنس“کے شرکاءسے خطاب کرتے ہوئےشہید قائد عارف حسین کے فرزند حسین الحسینی نے شرکا ءکا شکریہ ادا کرتے ہوئے کہا کہ شہید قائد اتحاد بین المسلمین کے داعی تھے۔آج کے دن شہید کی روح سے تجدید عہد کرنا ہو گا کہ ہم سب ایک ہیں۔آپس کے اختلافات کو دور کرنا وقت کی اہم ضرورت ہے۔علامہ ناصر عباس کی بھوک ہڑتال کی حمایت کرتا ہوں اور ان کی تہہ دل سے قدر کرتا ہوں۔قوم کی خاطر ان کی جدوجہد کوئی معمولی بات نہیں۔بھوک ہڑتال نتیجہ خیز ثابت ہوئی اور انہوں نے اپنے مطالبات منوائے ہیں۔پارہ چنار میں حالات تبدیل ہو چکے ہیں۔انتظامیہ مذاکرات کرنے پر مجبور ہے۔

وحدت نیوز(اسلام آباد) شہید قائد عارف حسین الحسینی کی 28ویں برسی کے سلسلے میں جناح ایونیوپرمجلس وحدت مسلمین پاکستان کے زیر اہتمام”تحفظ پاکستان کانفرنس“کے شرکاءسے خطاب کرتے ہوئےڈپٹی سیکرٹری امور خارجہ علامہ ظہیر الحسن نقوی نے کہا کہ اگر عارف حسینی کے افکار کے حقیقی پیروکار کی شناخت میدان عمل میں موجودگی سے ہو گی۔جو شخص میدان عمل میں موجود ہے ۔جو قوم اور وطن کی بات کرتا ہے جو شہدا کے لیے آواز بلند کرتا ہے وہ قائد شہید کا وارث ہے۔علامہ ناصر عباس نے اپنے عمل اپنے فکر اور اپنے کردار سے یہ ثابت کیا ہے کہ وہ قوم کے حقیقی قائدہیں۔

وحدت نیوز(اسلام آباد) شہید قائد عارف حسین الحسینی کی 28ویں برسی کے سلسلے میں مجلس وحدت مسلمین پاکستان کے زیر اہتمام”تحفظ پاکستان کانفرنس“کا انعقادجناح ایونیو پر ہوا جس میں ملک بھر سے ہزاروں کی تعداد میں کارکنوں اور شیعہ سنی افراد نے شرکت کی۔شرکاءسے خطاب کرتے ہوئے ڈپٹی سیکرٹری جنرل علامہ احمد اقبال رضوی نے علامہ عارف حسینی کی قومی خدمات اور بصیرت کو سلام پیش کرتے ہوئے کہا شہید قائد نے بکھری قوم کو یکجا کر ایک مضبوط ملت بنا دیا۔علامہ ناصر عباس اپنے اُس شہید قائد کی راہ پر گامزن ہیں جس نے کسی آمر کواپنی راہ کی دیوار نہیں بننے دیا۔موجودہ حکمران یہ بات ذہن نشین کر لیں کہ اس حسینی قوم کو طاقت کے بل بوتے پر دبانے کی کوشش کبھی کامیاب نہیں ہو گی۔وطن عزیز میں طاغوت و استکبار اور نجدی قوتوں کے ایجنڈے کو پنپنے نہیں دیا جا سکتا۔انہوں نے کہا کہ علامہ ناصر عباس کی بھوک ہڑتال کو تین ماہ کا عرصہ گزر چکا ہے۔ مختلف مراجع عظام اور ملک کے نامور سیاستدانوں نے ان سے بھوک ہڑتال کے خاتمے کی اپیل کی ہے۔ آج شرکا کی طرف سے بھی میں اس کی تائید کرتے ہوئے علامہ ناصر سے اپیل کرتا ہوں کہ وہ شہید قائد کی برسی کے موقعہ پر بھوک ہڑتال کے خاتمے کا اعلان کر کے قوم کے اضطراب کو تسکین میں بدل دیں۔