وحدت نیوز(کراچی)مجلس وحدت مسلمین سندھ کے صدر علامہ باقر عباس زیدی نے محنت کشوں کے عالمی دن کے موقع پر اپنے پیغام میں کہا ہے محض یکم مئی کی سرکاری چھٹی کے اعلان یا مزدوروں کے حق میں حکومتی بیانات سے اس پسے ہوئے طبقے کی مشکلات کم نہیں ہوں گی بلکہ اس کے لیے انقلابی اور فوری اقدامات کرنا ہوں گے، وطن عزیز کی معاشی بدحالی نے مزدور طبقے کو سب سے زیادہ متاثر کیا ہے، مہنگائی کی شرح میں تسلسل کے ساتھ اضافے سے عام آدمی کی زندگی اجیرن ہوگئی ہے، معاشی مشکلات سے تنگ دیہاڑی دار طبقے سے تعلق رکھنے والے افراد کی خودسوزی جیسے المناک واقعات آئے دن سننے کو مل رہے ہیں اور سفید پوش افراد بھی خودکشیاں کر رہے ہیں، ایسی صورتحال میں حکومتی بے حسی افسوسناک ہے۔

ان کا مزید کہنا تھا کہ ریاست ماں کا کردار ادا کرتی ہوئی کہیں نظر نہیں آتی، سوائے کرپشن کرنے اور سیاسی رسی کشی میں مصروف عمل ہیں۔ انہوں نے کہا کہ محض زبانی دعووں اور دلفریب وعدوں سے عوام کی قسمت بدلی نہیں جا سکتی، اس کے لیے نیک نیتی، خلوص اور پوری لگن کے ساتھ عملی جدوجہد کی ضرورت ہے، کم سے کم اجرت میں برائے نام اضافہ کرکے عوامی مقبولیت کے خواب دیکھنا عوام اور خود کو دھوکہ دینے کے مترادف ہے۔ انہوں نے کہا کہ اشیائے خوردونوش کی قیمتوں کے مطابق جو عام آدمی کا گھریلو بجٹ بنتا ہے اس کے مطابق اجرت ہونی چاہیئے، حکومت سو یونٹ سے کم بجلی کے استعمال کو مفت قرار اور کھانے پینے کی اشیاء پر مستقل ریلیف پیکج دے کر مزدور طبقے کی مشکلات میں خاطر خواہ کمی کر سکتی ہے۔

وحدت نیوز(لاہور)مجلس وحدت مسلمین پنجاب کے صدر علامہ سید علی اکبر کاظمی نے کہا ہے کہ مزدوروں کا استحصال کرنیوالی حکومت کا یکم مئی پر مزدوروں سے اظہار یکجہتی کرنا شرمناک ہے۔ صنعت کار و جاگیر دار مزدوروں اور محنت کشوں کے مسائل سے ناواقف ہیں اور جی بھر کے اِن کا استحصال کررہے ہیں۔

انہوں نے کہا کہ محنت کش دو وقت کی روٹی کیلئے پریشان ہیں لیکن حکمران اُن سے لاتعلق ہیں، حالانکہ سفید پوش طبقے اور امرا کے لئے اشیائے خورونوش اور ضروریات کے الگ الگ نرخ ہونے چاہئیں تھے۔ مگر حکمران کبھی اپنے مفادات کے خلاف سودا نہیں کرتے۔

وحدت نیوز (جیکب آباد) مجلس وحدت مسلمین پاکستان کے مرکزی سیکرٹری تنظیم سازی علامہ مقصود علی ڈومکی نے یکم مئی عالمی یوم مزدور کے موقع پر مزدوروں سے ملاقات کی اور انہیں یوم مزدور کی مناسبت سے گفٹ پیش کئے۔ اور ان کی جدوجہد و محنت کو خراج تحسین پیش کیا۔اس موقع پر گفتگو کرتے ہوئے علامہ مقصود علی ڈومکی نے کہا کہ آج  دنیا بھر میں محنت کشوں اور مزدوروں کا عالمی دن  منایا جارہا ہے، آج کا دن ہمیں محنت کشوں کی محنت اور قربانیوں کی یاد دلاتا ہے، آج کے دن پوری قوم محنت کشوں کو خراج تحسین پیش کرتی ہے۔

انہوں نے کہا کہ محنت کشوں کی محنت کی وجہ سے دنیا کا یہ پہیہ چل رہا ہے انکی حرکت سے آج دنیا میں بسنے والا ہر شخص آسائش کی زندگی بسر کر رہا ہے۔ آج آگر محنت کش طبقہ کام کرنا چھوڑ دیے تو دنیا کا یہ پہیہ جام ہو جائے گا۔ آج کے دن ہم محنت کشوں کے حقوق کے لئے اپنا کردار ادا کرنے کا عہد کرتے ہیں تاکہ محنت کشوں کی فلاح و بہبود کو یقینی بنایا جاسکے۔ انہوں نے کہا کہ پیغمبر اسلام صلی اللہ علیہ وآلہ وسلم نے مزدور کو اللہ کا دوست قرار دیا ہے۔ دین اسلام نے مزدور کی اہمیت کے پیش نظر اس کی قدر و منزلت اور حقوق کے بارے میں احکامات دئیے ہیں۔ حدیث نبوی میں مزدور کا پسینہ خشک ہونے سے پہلے اسکی اجرت کی ادائیگی کا حکم دیا گیا ہے۔ مزدور اپنا پسینہ بہا کر رزق حلال کماتا ہے۔ اور یہ پاکیزہ رزق خوش نصیب انسانوں کو نصیب ہوتا ہے۔

انہوں نے کہا کہ موجودہ حکومت کے دور میں مزدور اور کسان پریشان ہیں۔ کسان کو ان کی محنت کا صلہ نہیں مل رہا ہے۔ ملک بھر میں کسان اور مزدور حکومت کی غریب دشمن اور کسان دشمن پالیسیوں کے خلاف سراپا احتجاج ہیں۔ کسانوں کے جائز مطالبات سننے اور ان مسائل کو حل کرنے کی بجائے کسانوں کو پابند سلاسل کیا جا رہا ہے۔ حکومت کی تمام تر توجہ کا مرکز و محور حکمران طبقے اور حکمران خاندانوں کے مفادات کا تحفظ ہے۔ معاشی طور پر کمزور طبقات مزدور اور کسان کو مہنگائی، غربت افلاس اور بد حالی کی دلدل میں دھکیل دیا گیا ہے۔

وحدت نیوز(کوئٹہ) مجلس وحدت مسلمین پاکستان کے مرکزی سیکرٹری تنظیم سازی علامہ مقصود علی ڈومکی نے آستان قدس رضوی اور جامعہ المصطفی العالمیہ کے اشتراک سے (فلسطین پر قبضے کے 75 سال) کے عنوان سے بین الاقوامی کانفرنس منعقد ہوئی۔بین الاقوامی کانفرنس سے مجلس وحدت مسلمین پاکستان کے مرکزی سیکرٹری تنظیم سازی علامہ مقصود علی ڈومکی نے (فلسطین پر اسرائیلی قبضے کی تاریخ اور تحریک آزادی فلسطین) کے موضوع پر خطاب کیا جبکہ افغانستان کی وزارت حج و اوقاف کے مسؤل مولوی نظام الدین نعمانی نے (اسرائیلی قبضے کے خلاف امت مسلمہ کا اتحاد)اور رضویہ اسلامک یونیورسٹی مشہد مقدس کے پروفیسر ڈاکٹر مرتضیٰ مرتضوی نے (اسرائیلی قبضے کے خاتمے کے حوالے سے عالم اسلام کی اقتصادی حکمت عملی) کے موضوع پر خطاب کیا۔

کانفرنس سے آن لائن خطاب کرتے ہوئے مجلس وحدت مسلمین پاکستان کے مرکزی سیکرٹری تنظیم سازی علامہ مقصود علی ڈومکی نے کہا کہ قرآن کریم نے پانچ مقامات پر سر زمین فلسطین کو برکتوں والی دھرتی بتاتے ہوئے اسے عالمین کے لئے باعث برکت قرار دیا ہے۔ حضرت ابراہیم خلیل اللہ حضرت یعقوب علیہ السلام اور بنی اسرائیل کے انبیاء کرام علیہم السلام دین اسلام کے مبلغ اور محافظ تھے اور انہوں نے اپنی آخری وصیت میں بھی اپنی اولاد کو دین اسلام پر پابند رہنے اور مسلمان مرنے کی تاکید کی۔ انبیاء کرام کی نافرمانی کرتے ہوئے اسرائیلیوں نے انبیاء کرام کی تعلیمات سے بغاوت کی وہ فرعون اور فرعونیوں کے نقش قدم پر چل رہے ہیں گذشتہ ایک صدی سے جاری فلسطینیوں پر اسرائیلی مظالم نے فرعونی مظالم کی یاد تازہ کر دی ہے۔

انہوں نے کہا کہ قائد اعظم محمد علی جناح اور حکیم الامت حضرت علامہ اقبال رحمۃ اللہ علیہما نے برطانیہ اور استکباری قوتوں کی سازشوں کے نتیجے میں اس وقت فلسطین پر اسرائیلی قبضے کی شدید مخالفت کی تھی۔ قائد اعظم کی ہدایت پر آل انڈیا مسلم لیگ نے فلسطین پر اسرائیلی قبضے کی سازشوں کے خلاف ایک ہزار سے زائد مقامات پر تاریخی احتجاج کیا تھا۔انہوں نے کہا کہ اسرائیل یہ جنگ ہار چکا ہے اور مظلوم فلسطینی عوام یہ جنگ جیت چکے ہیں۔ اقوام عالم اب اسرائیل کو ایک غاصب اور قابض ریاست تسلیم کر رہے ہیں ان شاءاللہ فلسطین جلد آزاد ہوگا۔