وحدت نیوز (کوئٹہ ) طالبان سے مذاکرات اور شام پر ممکنہ امریکی حملے کے خلاف مجلس وحدت مسلمین کےسربراہ علامہ ناصر عباس جعفری کی اپیل پر کوئٹہ کے مرکزی امام بارگاہ کلاں میں احتجاجی مظاہرہ کیا گیا۔ جس سے ایم ڈبلیو ایم کی شوریٰ عالی کے رکن و امام جمعہ کوئٹہ علامہ سید ہاشم موسوی اور مجلس وحدت مسلمین بلوچستان کے سیکرٹری جنرل علامہ مقصود علی ڈومکی نے خطاب کیا۔ احتجاجی مظاہرین سے خطاب کرتے ہوئے علامہ سید ہاشم موسوی کا کہنا تھا کہ پاکستان کی حکومت ایک ایسے دہشتگرد گروہ سے مذاکرات کرنا چاہتی ہے، جو پاکستان کے آئین کو نہیں مانتے۔ طالبان دہشتگردوں سے مذاکرات کرنا پاکستانی شُہداء کے خون کو اپنے سیاسی مقاصد کیلئے استعمال کرنے کے مترادف ہوگا۔ مظاہرین نے پلے کارڈز اور بینرز اٹھا رکھے تھے۔ احتجاجی مظاہرے کے شرکاء نے امریکہ کے خلاف شدید نعرے بازی کی اور شام سے اظہار یکجہتی کیا۔