وحدت نیوز(اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے مقبوضہ کشمیر میں نہتے شہریوں پر بھارتی فوج کی فائرنگ کے نتیجے میں تیس سے زائد قیمتی انسانی جانوں کے ضیاع پر گہرے افسوس کا اظہار کرتے ہوئے اسے ریاستی دہشت گردی قرار دیا ہے ۔انہوں نے کہا ہے مظلوم کشمیریوں پر بھارت کی جارحانہ کاروائی انسانی حقوق کی شدید خلاف ورزی ہے۔ بھارت طاقت کے بل بوتے پر آزادی کی تحریک کو دبانے کی کوشش کر رہا ہے۔ کشمیر پر بھارت کا غاصبانہ تسلط ختم کرانے کے لیے اقوام متحدہ سمیت عالمی قوتوں اور بین الاقوامی اداروں کواپنا کردار ادا کرنا ہو گا،نہتے کشمیریوں پر جاری بھارتی مظالم پر حکومت پاکستان سمیت عالمی طاقتوں کی خاموشی لمحہ فکریہ ہے،مقبوضہ کشمیر پر ہندوستانی جارحیت نے خطے کو سنگین خطرات سے دوچار کر رکھا ہے۔مقبوضہ کشمیر کے مسلمانوں کو پاکستان کی حمایت میں بولنے کی سزا دی جا رہی ہے۔کشمیر پاکستان کی شہ رگ حیات ہے۔جس پر ہندوستانی ریاست نے کشمیری شہریوں کی مرضی کے خلاف زبردستی قبضہ کر رکھا ہے۔حق خود ارادیت کے لیے آواز بلند کرنے والے شہریوں کو بھارتی فوج گولیوں کو نشانہ بنا دیتی ہے جو ریاستی غنڈہ گردی ہے۔ کشمیر کو بھارتی تسلط سے آزاد کرانے کے لیے پاکستان کو سفارتی سطح سمیت تمام عالمی فورمز پر اپنی کوششوں کو تیز کرنا ہو گا تاکہ کشمیر کے مظلوموں کو اس ظلم و بربریت سے نجات مل سکے۔علامہ ناصر عباس جعفری نے کہا کہ بھارت میں انسانی حقوق کی پامالی کے سنگین ترین واقعات عالم اقوام کی آنکھیں کھولنے کے لیے کافی ہیں۔عالم اسلام کے خلاف واویلا کرنے والی متعصب عالمی قوتوں کو بھارتی جارحیت پر بھی آوا ز بلند کرنی چاہیے ۔

وحدت نیوز(اسلام آباد) مجلس وحدت مسلمین پاکستان شعبہ خواتین کی مرکزی سیکریٹری جنرل خانم سیدہ زہرانقوی نے ایک بیان میں کہاہے کہ ریاستی جبر وتشدد ، پاکستان کی فرقہ وارانہ بنیادوں پر تقسیم اور شیعہ نسل کشی کے خلاف کنیزان زینب ع17جولائی کو تمام چھوٹے بڑے شہروں میں احتجاجی مظاہرے کریں گی اور ریلیاں نکالیں گی،خانم زہرا نقوی کا کہنا تھا کہ ہمارے قائد وحدت انصاف کے حصول کے لئے گذشتہ دو ماہ سے پر امن بھوک ہڑتال پر بیٹھے ان بے حس حکمرانوں کے مردہ ضمیروں کو جھنجھوڑ رہے ہیں لیکن ان کم ظرف حکمرانوں کے کانوں پر جوں تک نہیں رینگ رہی،انہوں نے کہا کہ ہماری قیادت اور جماعت نے آخری وقتوں تک کوشش کی بغیر کسی شور شرابے اور طاقت کے استعمال کے حکمران ہمارے جائز مطالبات تسلیم کرلیں اور ملک بھر میں اہل تشیع مکتب فکر کو درپیش مشکلات اور مسائل کو فوری بنیادوں پر حل کرلیں لیکن حکومت نے ہمارے پر امن رہنےکو ہماری ک کمزوری سمجھا ہے ، 13مئی سے جاری علامہ راجہ ناصرعباس جعفری کی بھوک ہڑتالی تحریک عید الفطرکے بعد دوسرے مرحلے میں داخل ہو گئی ہے ، انصاف کے حصول کیلئے17جولائی کوکنیزان زینب ؑ 22جولائی کو اورعاشقان حسینیؑ ملک بھرکی سڑکوں پر سراپا احتجاج ہوں گے، 22جولائی کو ملک بھر کی اہم شاہراہیں دن دو بجے سے رات آٹھ بجے تک جام کی جائیں گی ، اس کے بعد بھی حکمران ٹس سے مس نہ ہوئے تو پنجاب اسمبلی کے باہر غیر اعلانیہ دھرنے کا اعلان کردیا جائے گا، انہوں نے ملک بھر کی خواتین اور حضرات سے اپیل کی کہ ملت تشیع کے جائز حقوق کے لئے بھرپور انداز میں احتجاجی اجتماعات میں شرکت کریں ۔

وحدت نیوز(سکردو) مدینہ منورہ میں روضہ رسول ؐ کے قریب گذشتہ دنوں دہشتگردوں کے حملے، عراق میں امام زادہ سید محمد کے روضے پر حملے، پاکستان میں امجد صابری کی ٹارگٹ کلنگ اور ڈیرہ اسماعیل خان میں ایڈووکیٹ شاہد شیرازی کی ٹارگٹ کلنگ کے خلاف مجلس وحدت مسلمین بلتستان ڈویژن کے زیراہتمام ایک عظیم الشان احتجاجی ریلی امامیہ چوک اسکردو سے نکالی گئی۔ ریلی کی قیادت مجلس وحدت مسلمین بلتستان کے سیکریٹری جنرل آغا علی رضوی اور دیگر علمائے کرام نے کی۔ احتجاجی ریلی امامیہ چوک سے شروع ہوئی جو کلفٹن پل، بے نظیر چوک، علمدار چوک، حسینی چوک سے ہوتی ہوئی ایک طویل مسافت طے کرتی ہوئی یادگار شہداء دھرنا کیمپ میں پہنچی۔ ریلی کے شرکاء نے ہاتھوں نے پلے کارڈز اور بینئرز اٹھا رکھے تھے، جن پر دہشتگردی کے خلاف نعرے درج تھے۔ احتجاجی ریلی سے کلفٹن پل پر شیخ غلام حسن عابدی نے خطاب کیا اور دنیا بھر میں جاری دہشتگردی کے واقعات بالخصوص پاکستان میں جاری ٹارگٹ کلنگ کی مذمت کی۔ ریلی علمدار چوک پر پہنچی تو آغا علی رضوی نے شرکاء سے مخاطب ہو کر احتجاجی ریلی کے مقاصد بیان کئے اور ریلی میں اہلسنت برادری کی شرکت پر شکریہ بھی ادا کیا۔ ریلی اپنے مقررہ راستوں سے ہوتی ہوئی یادگار شہداء اسکردو پر پہنچی اور وہاں جلسے کی صورت اختیار کر گئی، جس سے علمائے کرام نے خطاب کیا۔ مجلس وحدت مسلمین کی جانب سے نکالی گئی ریلی کے نعروں سے اسکردو شہر کی فضاء گونجتی رہی۔

وحدت نیوز(اسلام آباد) مجلس وحدت مسلمین کے سربراہ علامہ ناصر عباس جعفری نے شیعہ علماء کونسل کے نائب صدر علامہ رمضان توقیر کو ٹیلی فون کیا ہے اور گذشتہ روز دوران احتجاج پیش آنے والےناخوشگوار واقعہ پر اظہار افسوس کیا ہے۔ علامہ ناصر عباس جعفری کا کہنا تھا کہ اس طرح کے واقعات کا ہونا انتہائی افسوس ناک ہے جس کا کوئی بھی دفاع نہیں کر سکتا، اس موقع پر علامہ رمضان توقیر نے علامہ ناصر عباس کو احتجاج کے دوران پیش آنے والے واقعہ سے متعلق تفصیلی طورپر آگاہ کیا۔ علامہ ناصر عباس جعفری کا کہنا تھا کہ اس واقعہ پر جتنا افسوس کیا جائے کم ہے۔ علامہ راجہ  ناصر عباس اور علامہ رمضان توقیر کے درمیان تقریباً پندرہ منٹ بات ہوئی، دوران گفتگو علامہ ناصر نے واقعہ پر انتہائی ناپسندگی کا اظہار کیا۔

وحدت نیوز(سکردو) علمائے امامیہ شگر کا ایک وفد نے حجت الاسلام سید طٰہٰ موسوی کی سربراہی میں مجلس وحدت مسلمین پاکستان بلتستان ڈویژن کی جانب سے جاری دھرنا کیمپ میں پہنچ گئے اور دھرنے کی مکمل حمایت اور اظہار یکجہتی کیا۔ علمائے شگر کی نمائندگی کرتے ہوئے حجت الاسلام سید طٰہٰ موسوی نے کہا کہ مجلس وحدت مسلمین کی جانب سے جاری احتجاجی دھرنے کی بھرپور حمایت کرتے ہیں اور بلتستان میں آغا علی رضوی کی قیادت میں جاری دھرنا استقامت کی ایک عظیم مثال ہے۔ ملک بھر میں جاری مظالم کے خلاف اٹھنے والی آواز انسانی بنیادوں پر ہے اور اسکی تائید و حمایت کرتے ہیں۔ اس موقع پر خطاب کرتے ہوئے آغا علی رضوی نے کہا کہ شگر سے تعلق رکھنے والے متدین اور علماء کی بڑی تعداد میں کیمپ میں آمد پر انکا خیر مقدم کرتے ہیں اور شکریہ ادا کرتے ہیں۔ انہوں نے کہا کہ شگر کے برجستہ علمائے کرام کی تائید و حمایت سے ہمارے حوصلے بہت بلند ہوئے ہیں اور مطالبات کی منظوری کے لیے پہلے سے زیادہ پرعزم ہوئے ہیں۔

انہوں نے کہا کہ شگر کے علماء و عمائدین اور عوام نے کبھی عوامی مسائل اور مظالم پر خاموشی اختیار نہیں کی ہے گندم سبسڈی کے خاتمے کے وقت عوامی ایکشن کمیٹی کی تحریک ہویا دیگر مراحل اہلیان شگر نے بڑھ چڑھ کر حصہ لیا ہے اور ملک و قوم کے لیے آپکی خدمات ناقابل فراموش ہیں۔ آغاعلی رضوی نے کہا کہ وفاقی حکومت مجلس وحدت کے جائز مطالبات پر توجہ کرنے کے لیے تیار نہیں ہے، جو مطالبات وفاقی حکومت سے جاری ہے وہ دراصل ریاست کی اپنی ذمہ داری تھی لیکن ریاست اپنی ذمہ داری ادا کرنے میں غفلت سے کام لے رہی ہے، ریاستی اداروں میں موجود افراد شہریوں کو تحفظ فراہم کرنے میں ناکام ہو چکے ہیں۔ ہمار ا سفر جناح اور اقبال کے پاکستان کے طرف ہے اس راہ میں ہر طرح کی مشکل قبول کرنے کیلئے تیار ہے۔

وحدت نیوز(اسلام آباد)عید سعید الفطرکے روز جب دنیا بھر میں مسلمان اپنے اہل وعیال اور عزیز واقارب کے ہمراہ خوشیاں منانے میں مصروف ہیں مجلس وحدت مسلمین پاکستان کے سربراہ علامہ راجہ ناصرعباس جعفری نے اپنی عید کی خوشیاں قوم کے شہداءاور ان کے اہل خانہ کے نام کردی ،علامہ راجہ ناصرعباس جعفری نے ریاستی جبر وتشدد، شیعہ نسل کشی پرحکمرانوں کی مجرمانہ خاموشی اور انصاف کے حصول کے لئےگذشتہ پونے دوماہ سے جاری بھوک ہڑتالی کیمپ میں عید الفطر کا مصروف دن گذارا، نماز عیدکی ادائیگی بھوک ہڑتالی کیمپ میں مجلس وحدت مسلمین کے مرکزی رہنماعلامہ اعجاز بہشتی کی زیر اقتداءادا کی گئی جس میں ایم ڈبلیوایم کے سربراہ راجہ ناصرعباس جعفری ،علامہ حسن ظفر نقوی ، علامہ عبدالخالق اسدی، علامہ علی شیر انصاری سمیت دیگر علمائے کرام ، تنظیمی ذمہ داران سمیت راولپنڈی اسلام آباد کے شہریوں کی بڑی تعداد شریک تھی، جنہوں نے علامہ راجہ ناصرعباس جعفری کی مظلوموں کے حقوق کے لئے جاری پر امن جدوجہد سے اظہار یکجہتی کرتے ہوئے بازوئوں پر سیاہ پٹیاں باندھی ہوئی تھیں ، نماز عید کی ادائیگی کے بعد علامہ راجہ ناصرعباس جعفری نے نمازیوں سے عید ملی اور انہیں مبارک باد دی، مختلف طبقہ ہائے زندگی سے تعلق رکھنے والے افراد نے عید کےپرمسرت موقع پر علامہ راجہ ناصرعباس جعفری کو پھولوں کے گلدستے اور تحائف بھی پیش کیئے، واضح رہے کہ مجلس وحدت مسلمین ضلع سکھر کا ایک اعلیٰ سطحی وفد سیکریٹری جنرل چوہدری اظہر حسن کی زیرقیادت خصوصی طور پرعلامہ راجہ ناصرعباس جعفری کے ہمراہ عید منانے بھوک ہڑتالی کیمپ پہنچا تھا۔