وحدت نیوز(کرچی) مجلس وحدت مسلمین کراچی ڈویژن کے رہنما علامہ سید علی انور جعفری نے وحدت ہائوس سے جاری ایک بیان میں کہا ہے کہ شیعہ نسل کشی اور بڑھتی ہوئی لاقانونیت و دہشتگردی کے خلاف علامہ راجہ ناصر عباس جعفری کی احتجاجی بھوک ہڑتال سے اظہار یکجہتی اور شیعہ نسل کشی پر حکومت و ریاستی اداروں کی مجرمانہ خاموشی وقاتلوں کی عدم گرفتاری اور پاکستان کی فرقہ وارانہ تقسیم کے خلاف آج بروز اتوار چار بجے کراچی پریس کلب پر بھرپور عوامی احتجاجی مظاہرہ کیا جائے گا۔

وحدت نیوز (لاہور) پریس کلب لاہور کے سامنے مجلس وحدت مسلمین کے بھوک ہڑتالی کیمپ میں ہفتہ کے روز لاہور کے آئمہ جمعہ و جماعت و مدارس دینیہ کے نمائندہ علماء علامہ مبارک علی موسوی ،علامہ ابوزر مہدوی،علامہ سید حیدر موسوی،علامہ ڈاکٹر محمد یونس حیدری،علامہ حسین نجفی،علامہ حسن ہمدانی،علامہ سید بشیر نجفی،علامہ امتیاز کاظمی،علامہ محمد اقبال کامرانی،مولانا سید منیر رضوی،مولانا محمد خان مہدوی ،مولانا مطہرحسین جعفری،مولاناناظم عترتی،مولانا سید رضی موسوی،مولانا محمد رضا عابدی،مولانا احسن رضوی،مولانا فرمان علی نجفی،مولانا اسماعیل،مولاناحسنین جعفری،مولانا سید مہدی موسوی،مولانا ابراہیم خلیلی،مولانا مظہر نقوی،مولانا ناصر مہدی،مولانا سلیم جعفری،مولانا شبر رضوی،مولانا اظہر حسین کررڑ کی مجلس وحدت مسلمین کے رہنماوں کے ہمراہ مشترکہ پریس کانفرنس ،مجلس وحدت مسلمین کے سربراہ علامہ راجہ ناصر عباس جعفری کی بھوک ہڑتال تحریک کی مکمل حمایت کا اعلان،تحریک میں مرحلہ وار پرامن طور پر تیزی لانے کا اعلان۔

 پریس کانفرنس سے خطاب کرتے ہوئے مجلس وحدت مسلمین پاکستان کے رہنما علامہ مبارک موسوی کا کہنا تھا کہ ہم لاہور کے علمائے امامیہ کے مشکور ہیں کہ انہوں اس اس اہم قومی ایشو پر ہمارے دینے کا اعلان کیا انہوں نے کہا کہ پوری قوم مشترکہ طوپر نیشنل ایکشن پلان اور ضرب عضب کی مکمل حمایت اس لئے کی تھی کہ ملک سے دہشتگردی کا خاتمہ ہواور تمام ان گرہوں کیخلاف کاروائی کی جائے جودہشتگردی و شدت پسندی میں ملوث ہیں لیکن ایسا لگتا ہے کہ نیشنل ایکشن پلان کو  اس کے اصلی مقصد سے ہٹانے کی کوشش کی جارہی ہے۔بعض صوبوں خاص کر پنجاب میں نیشنل ایکشن پلان کو دہشتگردوں کے بجائے پرامن شہریوں خاص کر دورود سلام پڑھنے والوں اور عزاداری کیخلاف استعمال کیا جارہا ہے۔

مدارس جعفریہ پاکستان کے سربراہ علامہ سید حسین نجفی نے آئمہ جمعہ و جماعت و مدارس دینیہ کی طرف سے نمائندگی کرتے ہوئے پریس کانفرنس سے خطاب میں کہا کہ ہم آئمہ جمعہ و جماعت وعلمائے مدارس دینیہ ملک کے مختلف حصوں میں ہونے والی شیعہ ٹارگٹ کلنگ اور عزاداری کیخلاف غیر آئینی اقدامات کی سخت مذمت کرتے ہیں ،اور علامہ راجہ ناصر عباس جعفری کی پرامن بھوک ہڑتال تحریک کی مکمل حمایت کا اعلان کرتے ہیں،اور کل بروز اتوار اس پرامن جد وجہد کی حق میں پریس کلب لاہور سے اسمبلی ہال تک  حمایت مظلومین ریلی کا اعلان کرتے ہیں،ہماری یہ ریلی پاکستان میں بسنے والے تمام مظلومین کی حمایت میں ہے اور ہم انشااللہ علامہ راجہ ناصر عباس جعفری کے ہمراہ آج سے ہمارے تمام مطالبات کی منظوری تک احتجاج کو جاری رکھنے کا اعلان کرتے ہیں۔

ہم شہدا کے خون سے عہد وفا نبھاتے ہوئے عزاداری کے راستے میں حائل ہر رکاوٹ کوقبول نہیں کریں گے، دہشتگردوں سمیت اگر کوئی بھی یہ سمجھتا ہے کہ خود کش حملوں اور ٹارگٹ کلنگ سے عزاداری کو روکا جاسکتا ہے تو یہ اس کی خام خیالی ہے عزاداری اور درود سلام رواداری اور محبت کی ضمانت ہیں ،انہوں نے کہا کہ ہم ملک کے محب وطن شہری ہیں، اس لئے نظم و ضبط قائم رکھے ہوئے ہیں، ملک کے ریاستی ادارے دہشت گردی کے مقابلے میں نا کام ہو چکے ہیں، نہتے عوام کے قتل عام پر ریاستی ذمہ دار اداروں اور عدلیہ کی خاموشی حیران کن ہے،کراچی سے لے کر خیبر تک جو گروپ شیعہ قتل عام کے علاوہ دیگر مختلف جرائم میں بھی ملوث ہیں ان کیخلاف حکومت اور ریاستی اداروں کی خاموشی لمحہ فکریہ ہے ہمیں نہیں بھولنا چاہیے کہ یہ شدت پسند گروہ پاکستان کی بنیادوں کو کھوکھلا کرنا چاہتے ہیں۔ وطن عزیز کے دشمن ہیں مگر پاکستانی قوم حیران ہے کہ وہ کیا مصلحتیں ہیں کہ آج تک یہ گروہ شہرشہر دندناتے پھر رہے ہیں ۔پاکستان میں تمام مکاتب فکر کے جید علما اکٹھے ہیں اور کوئی فرقہ واریت نہیںمگر ان دہشت گردوں کی پشت پر وہ کونسی قوتیں ہیں جو پاکستان کے امن و امان کو تہہ و بالا کئے ہوئے ہیںہم مطالبہ کرتے ہیں کہ ان کے سرپرستوں کو بے نقاب کر کے ان کا قلع قمع کیا جائے۔علامہ حسین نجفی نے کہا کہ ہم حکومت وقت اور مقتدر حلقوں سے مطالبہ کرتے ہیں کہ

١۔پاکستان میں شیعہ نسل کشی میں ملوث تکفیری شدت پسندوں کیخلاف ملک گیر بے رحمانہ آپریشن فی الفور شروع کیا جائے،
٢۔ریاستی و عسکری ادارے شیعہ مسلمانوں کے قتل عام میں ملوث دہشتگردوں کیخلاف عملی کاروائی شروع کریں اور مجرمانہ خاموشی ختم کریں۔
٣۔کالعدم تنظیموں کیخلاف فوری کاروائی کا آغاز کیا جائے،نام بدل کر کام کرنے والی کالعدم تنظیموں کی سرگرمیوں کو روکا جائے۔
٤۔ملک میں شیعہ مسلمانوں پر ہونے والے دہشتگرد حملوں بلخصوص سانحہ شکار پور،جیکب آباد،سانحہ چلاس،سانحہ بابو سر،سانحہ حیات آباد،سانحہ عاشورہ،سانحہ راولپنڈی کراچی سمیت ملک بھر کے ٹارگٹ کلنگ اور سانحات کے مقدمات ملٹری کورٹس کو بھیجا جائے۔
٥۔پاکستان میں موجود تمام مسالک و مذاہب کے لوگوں کو تکفیری دہشت گردوں سے تحفظ فراہم کیا جائے۔
٦۔پنجاب حکومت اپنی شیعہ دشمن پالیسی ختم کریں،عزاداری سید شہداء  پر غیر اعلانیہ پابندیاں،شیعہ عمائدیں اور بانیاں مجالس کیخلاف ایف آئی آرز ختم کی جائیں،ذاکرین و علماء پر پابندی کا فوری خاتمہ اور جن شیعہ عمائدین کو ناجائز طور پر شیڈول فور میں ڈالا گیا ہے،انہیں فوراََ شیڈول فور سے نکالا جائے۔
٧۔خیبر پختونخواہ حکومت اپنے وعدوں کی پاسداری کرتے ہوئے دہشت گردوں کیخلاف عملی کاروائی کرے۔
٨۔پاراچنار میں ایف سی کے ہاتھوں شہید ہونے والے بے گناہ مظاہرین کے لئے تحقیقاتی کمیشن بنایا جائے،کمانڈنٹ کرم ایجنسی،پولیٹیکل ایجنٹ اکرام اللہ اور اسسٹنٹ پولیٹیکل ایجنٹ شاہد علی کیخلاف قانونی کاروائی کی جائے۔
٩۔گلگت بلتستان اور پارا چنار کی ڈیموگرافی تبدیل کرنے کی سازش اور حکومتی سر پرستی میں شیعہ مسلمانوں کی زمینوں پر قبضہ کا سلسلہ فوری ختم کیا جائے۔
١٠۔مسلکی بنیادوں پر پاکستان کی تقسیم کی سازش کے خلاف عملی اقدامات کئے جائیں۔
١١۔گجرات میں تھانہ ٹانڈہ چک بگہ میں شیعہ گھروں پر شدت پسندوں کیساتھ مل کر حملہ کرکے خواتین کی بے حرمتی اور تشدد سے پانچ سے زائد خواتین کو زخمی کرنے والے ایس ایچ او  راوُ خالد اور ڈی ایس پی حافظ امتیاز کو برطرف کرکے فوری قانونی کاروائی کی جائے۔

وحدت نیوز (کراچی) مجلس وحدت مسلمین پاکستان کراچی ڈویژن کے رہنما علامہ نشان حیدر ساجدی نے کہا کہ علامہ راجہ ناصر عباس جعفری کی احتجاجی بھوک ہڑتال سے پیدا ہونے والی عالمی بیداری کے نتیجے میں دنیا کے مختلف ممالک میں ان سے اظہار یکجہتی کیلئے پاکستانی کمیونییٹیز نکل کھڑی ہوئی ہیں، انشاء اللہ وہ وقت دور نہیں جب حکومت اور ریاستی اداروں کو ہمارے مطالبات پر عملدرآمد کرنا پڑے گا۔ ان خیالات کا اظہار انہوں نے وحدت ہاؤس کراچی میں اہم تنظیمی اجلاس سے خطاب کرتے ہوئے کیا۔ علامہ نشان حیدر نے کہا کہ شیعہ نسل کشی اور بڑھتی ہوئی لاقانونیت و دہشتگردی کے خلاف علامہ راجہ ناصر عباس جعفری کی احتجاجی بھوک ہڑتال دراصل حکمرانوں اور ریاستی اداروں کے سوئے ہوئے ضمیر کو جھنجھوڑنے کیلئے ہے، ان کے مطالبات درحقیقت ہر محب وطن پاکستانی کے مطالبات ہیں، کیونکہ ہم کسی مخصوص طبقہ یا گروہ کیلئے آواز نہیں اٹھا رہے بلکہ ہم ان تمام مظلوم اور پسے ہوئے لوگوں کے لئے اٹھے ہیں، جن کے ناصرف بنیادی حقوق تک غضب کئے جا چکے ہیں، بلکہ ان کا قتل عام بھی کیا جار ہا ہے، یہی وجہ ہے کہ آج ناصرف پاکستان کے چاروں کونوں سے عوام و خواص رنگ و نسل، سیاسی و لسانی امتیاز سے بالاتر ہوکر علامہ راجہ ناصر عباس کی احتجاجی بھوک ہڑتال سے اظہار یکجہتی کرتے ہوئے انکی صدائے احتجاج پر لبیک کہہ رہے ہیں۔ انہوں نے کہا کہ خیبر پختونخوا کے حوالے سے ہمارے مطالبات پر صوبائی حکومت نے کچھ اقدامات کا آغاز کیا ہے، ضروری ہے کہ وفاقی و دگر صوبائی حکومتیں بھی ہمارے مطالبات پر عملدرآمد کرتے ہوئے اقدامات کا آغاز کریں، اس کے ساتھ ساتھ نواز حکومت دہشتگردوں کی پشت پناہی اور نیشنل ایکشن پلان کا غلط استعمال کرنا چھوڑ دے، بصورت دیگر اسکا دھاندلی سے حاصل کردہ اقتدار عوامی احتجاج کے سیلاب میں بہہ جائے گا، لہٰذا ہمارا مطالبہ ہے کہ شیعہ نسل کشی میں ملوث ریاستی و غیر ریاستی عناصر کے خلاف فی الفور کارروائی کی جائے۔

وحدت نیوز (بیروت) مجلس وحدت مسلمین پاکستان کے سیکرٹری امور خارجہ ڈاکٹر علامہ سید شفقت حسن شیرازی نے بیروت میں حزب اللہ کے عالمی عربی چینل المنار کو انٹرویو دیتے ہوئے کہا کہ پاکستانی حکمرانوں اور اداروں کے ضمیر کو جھنجھوڑنے کے لئے قائد وحدت نے بھوک ہڑتال کا اعلان کیا ہے اور ہمارے مطالبات وہ ہیں جو ہر پاکستانی کے مطالبات ہیں، کیونکہ ہم کسی طبقہ یا گروہ کے لئے آواز نہیں اٹھا رہے بلکہ ہم ان تمام مظلوم اور پسے ہوئے لوگوں کے لئے اٹھے ہیں، جن کو بنیادی حقوق سے محروم رکھا جا رہا ہے، جن کا قتل عام کیا جار ہا ہے۔ لبنان کے دارالحکومت بیروت میں ہونے والے اس انٹرویو میں سربراہ امور خارجہ نے بھوک ہڑتال سے پیدا ہونے والی عالمی بیداری کا تذکرہ کرتے ہوئے کہا کہ آج دنیا کے مختلف ممالک میں قائد وحدت سے اظہار یکجہتی کے لئے پاکستانی کمیونییٹیز نکل کھڑی ہوئی ہیں اور بالآخر ان ظالم حکمرانوں کو ہمارے مطالبات ماننے پڑیں گے۔

وحدت نیوز (ہٹیاں بالا) مجلس وحدت مسلمین مظلوم طبقات کی آواز بن چکی ہے ، قائد وحدت علامہ راجہ ناصر عباس جعفری کی بھوک ہڑتال صرف ان کی ذات تک محدود نہیں رہی بلکہ ظلم کے خلاف ایک عالمی تحریک بن چکی ہے، ملک پاکستان کے علاوہ دنیا کے ممالک میں 53سے زائد شہروں میں ہڑتالی کیمپ قائم ہو چکے ہیں ، یہ تحریک ظالموں کو لے ڈوبے گی ، ایک مرد مجاہد جو شیعہ کی بھی بات کرتا ہے سنی کی بھی بات کرتا ہے ، ہر مظلوم کی آواز بن کر اسلام آباد کے چوک میں ظالم کو للکار رہا ہے ، ہم سلام پیش کرتے ہیں ، ان خیالات کا اظہار ریاستی سیکرٹری اطلاعات مجلس وحدت مسلمین پاکستان آزاد جموں و کشمیر مولانا سید حمید نقوی نے ہٹیاں بالا کے دورے کے موقع پر مختلف وفود سے ملاقاتوں کے دوران کہی۔

مولانا حمید نقوی نے کہا کہ قائد وحدت کی بھوک ہڑتال ظلم کے خلاف ایک تحریک بن چکی ہے ، ملک بھر میں احتجاجی کیمپ لگا دیے گئے ، جس طرح سے منظم شیعہ نسل کشی ہو رہی تھی ، چن چن کر مارا جارہا تھا ، ملک کے محب وطن بیٹون کو ، قابل بیٹوں کو ٹارگٹ کیا جا رہا تھا ، وقت آگیا تھا کوئی مرد آہن نکل کر ظالم کو للکارتا ، علامہ راجہ ناصر عباس نے عصر کی کربلا میں حسینی بنکر یزیدیوں کو للکارا ہے ، حکومت وقت کی خاموشی سوالیہ نشان ہے ، ملت اور ملک کے لیے جو بھی قربانی دینا پڑی دیں گے ، کراچی سے کشمیر ایک چین کے طور پر ملت آواز احتجاج بلند کر رہی ہے ، ملت کی مظلومی کی تمام اہلسنت جماعتوں اور سیاسی پارٹیوں نے گواہی دی ۔ سب سے زیادہ دہشتگردی کا شکار ملت تشیع ہے ، حکومتی اور قانون نافذ کرنے والے اداروں کو نوٹس لینا ہو ، ہم اب گھروں سے نکل چکے ، مطالبات کی عملی صورت میں منظوری تک گھر نہیں جائیں گے ، انہوں نے مزید کہا کہ احتجاج کسی جماعت یا شخصیت کا نہیں بلکہ ملت جعفریہ کا احتجاج ہے، مظفرآباد میں جاری بھوک ہڑتالی کیمپ میں جعفریہ سپریم کونسل آزاد کشمیر ، امامیہ آرگنائزیشن آزاد کشمیر ، امامیہ اسٹوڈنٹس آرگنائزیشن آزاد کشمیر سمیت تمام انجمنوں اور سنگتوں نے قائد وحدت سے نہ صرف اظہار یکجہتی کی ہے بلکہ مکمل حمایت کا اعلان کیا ہے ۔ اور بتا دیا ہے کہ ملت قائد وحدت کے ملت پر فدا ہو جانے کے جذبے اور عملی قدم کو قدر کی نگاہ سے دیکھتی ہے ، اور قائد وحدت کو سلام پیش کرتے ہوئے شہداء کے مشن کی خاطر میدان میں رہے گی۔

وحدت نیوز(ملتان) مجلس وحدت مسلمین کے زیراہتمام ملک کے دیگر شہروں کی طرح ملتان میں بھی شیعہ ٹارگٹ کلنگ، بے بنیاد مقدمات اور دہشت گردی کے خلاف بھوک ہڑتال 13روز سے جاری، ملتان پریس کلب کے سامنے مجلس وحدت مسلمین کے رہنماؤں نے نماز مغرب ادا کی اور بعدازاں شہداء کی یاد میں شمعیں روشن کی گئیں، ایم ڈبلیو ایم کے کیمپ میں ملتان کے سیکرٹری جنرل علامہ قاضی نادر حسین علوی،زوہیب حسن، محمد عباس صدیقی،وسیم عباس زیدی اور دیگر موجود تھے۔ اس موقع پر علامہ قاضی نادر حسین علوی نے کہا کہ حکومت کی طرف سے ملت تشیع کے ساتھ یہ غیر منصفانہ طرز عمل حکومت کے متعصبانہ رویہ کی دلالت کرتا ہے۔حکومت کو واضح کرنا ہو گا کہ ہمیں مسلسل نظر انداز کر کے وہ کن قوتوں کو خوش کر رہی ہے۔ انہوں نے کہا کہ ملک بھر سے سینکڑوں قافلے اسلام آباد کی طرف مارچ کرنے کے لیے بے چین بیٹھے ہیں۔اگر ان ریلیوں کا رخ اسلام آباد کی طرف ہو گیا تو پھر واپسی آسانی سے نہیں ہو گی۔ ہماری کوشش ہے ہم اپنے مطالبات کو پرامن انداز میں منوائیں۔ انہوں نے کہا کہ محب وطن جماعتوں کو تصادم کی راہ پر اکسانے کے لیے مشتعل کرنا نون لیگ کا پرانا ہتھیار ہے۔ہمیں اس طرح کی چالوں میں نہیں الجھایا جا سکتا۔علامہ قاضی نادر حسین علوی نے آرمی چیف جنرل راحیل شریف سے مطالبہ کیا ہے کہ پاکستانی قوم کو قائد و اقبال کا وہ پاکستان واپس کیا جائے جس کا انہوں نے خواب دیکھا اور جس کے لیے لاکھوں جانوں کی قربانی دی گئی حکمرانوں کی تباہ کن پالیسیوں نے اس ملک کو طالبان اور انتہاپسندوں کا ملک بنا کر رکھ دیا ہے۔ آرمی چیف اس ملک سے ان ملک دشمن عناصر کا مکمل صفایا کریں۔انہوں نے کہا ملک کے تمام سول و عسکری اداروں سے ان کالی بھیڑوں کا صفایا کیا جائے جواداروں کی بدنامی کا باعث بنی ہوئی ہیں۔واضح رہے کہ مجلس وحدت مسلمین کا علامتی بھوک ہڑتالی کیمپ پچھلے دو ہفتوں سے جاری ہے تاہم ابھی تک انتظامیہ نے کسی قسم کا کوئی رابطہ نہیں اور نہ ہی کوئی سیکیورٹی فراہم کی گئی ہے۔ مجلس وحدت مسلمین کے رہنما اور کارکن اپنی مددآپ کے تحت بھوک ہڑتالی کیمپ لگاتے ہیں ۔ لیکن موجودہ حالات کے پیش نظر سیکیورٹی فراہم نہ کرنا خطرے سے خالی نہ ہوگا۔