وحدت نیوز (رجوعہ سادات) ‎مجلس وحدت مسلمین شعبہ خواتین کی مرکزی سیکرٹری تنظیم سازی محترمہ سیدہ معصومہ نقوی نے رجوعہ سادات محلہ پیر دولت شاہ یونٹ ضلع چینیوٹ کا دورہ کیا اور خواتین سے خطاب کیا ۔

گزشتہ روز پنجاب انسٹیٹیوٹ آف کارڈیالوجی لاھور میں ہونے والی ہنگامہ آرائی پر تشویش کا اظہار کرتے ہوئے ان کا کہنا تھا کہ وکلاء اور ڈاکٹرز کے درمیان یہ ہنگامہ آرائی زمانہ جاھلیت کے اس دور کی یاد دلاتی ہے جب کسی کا اونٹ کسی دوسرے کھیت میں داخل ھو جاتا اور مالک کو خبر ہوتی تو دونوں قبائل میں جنگ شروع ہو جاتی اور سالہاسال جاری رہتی۔ آج ہمارے ملک کے پڑھے لکھے طبقات نے جاہلیت کا مظاھرہ کرتے ہوئے اپنے ڈاکٹر اور وکیل جیسے مقدس پیشے کی توھین کا باعث بنے ہیں جس کی جتنی شدید مذمت کی جاے کم ہے۔

 انھوں نے کہا کہ ملک میں قانونی ادارے موجود ہیں لیکن قانون کا راستہ اپنانے کے بجائے تہذیب و اخلاق کے دائرے سے باہر نکل کر اسپتال پر حملہ کیا گیا توڑ پھوڑ اور ہنگامہ آرائی ہوئی اور بے گناہ مریضوں کو زخمی کیا گیا ہے یہاں تک کہ بعض مریض جان سے ہاتھ دھو بیٹھتے ہیں ، اپنے آپ کو مسلمان اور رحمت للعالمین پیمبر (ص) کے پیروکار ہونے کو فخر سمجھنے والوں کا یہ کردار انسانیت کی تذلیل کا باعث ہے۔

وحدت نیوز(گلگت) پرنس کریم آغا خان شاہ کریم الحسینی کے یوم ولادت پر اسماعیلی برادری کو مبارکباد پیش کرتے ہیں ۔ ہز ہائنس پرنس کریم آغا خان کی سالگرہ کے موقع پر منعقد ہونے والے اجتماعات بین المسالک ہم آہنگی کو فروغ دینے میں معاون ثابت ہونگے ۔ لاہور میں شعبہ امراض قلب کے ہسپتال میں وکلاء کا حملہ نتہائی افسوسناک ہے ۔

مجلس وحدت مسلمین گلگت بلتستان کے ڈپٹی سیکرٹری جنرل شیخ نیئر عباس مصطفوی نے نومل میں نماز جمعہ کے اجتماع سے خطاب کرتے ہوئے کہا ہے کہ معاشرے میں عدم برداشت کارجحان بڑھ رہا ہے جس کی حکومتی سطح پر حوصلہ شکنی ضروری ہے ۔ وکلاء اور ڈاکٹرز کا ایک دوسرے کے خلاف مورچہ زن ہونے سے کئی قیمتی جانیں ضائع ہوگئیں ۔ گزشتہ دنوں لاہور میں وکلاء کی جانب سے ہسپتال پر دھاوا قابل مذمت عمل ہے ۔ انہوں نے کہا کہ ڈاکٹرز انسانیت کی خدمت میں دن رات محنت کرتے ہیں جبکہ وکلاء دکھی انسانیت کو انصاف دلانے میں مصروف ہیں ۔ معاشرے کے ان دونوں پڑھے لکھے طبقات کے آپس میں تصادم نیک شگون نہیں ۔

 نماز جمعہ کے اجتماع سے خطاب کرتے ہوئے مزید کہا کہ پرنس کریم آغا خان کی سالگرہ کے موقع پر اسماعیلی برادری کو مبارکباد پیش کرتے ہیں اور امید کرتے ہیں کہ اس طرح کے مذہبی اجتماعات معاشرے میں امن و بھائی کو فروغ دینگے ۔ انہوں نے سکردو روڈ پر کام کی سستی کے حوالے سے کہا کہ اس اہم شاہر اہ کی تعمیر میں کسی قسم کی کوتاہی برداشت نہیں کی جائیگی ۔ سکردو شاہراہ کی تعمیر میں سکردو کے عوام کے تحفظات کو دور کرنا حکومت کا فریضہ ہے ۔

وحدت نیوز(ملتان) مجلس وحدت مسلمین جنوبی پنجاب کے سیکرٹری جنرل علامہ اقتدار حسین نقوی، علامہ قاضی نادر حسین علوی، سلیم عباس صدیقی اور صوبائی ترجمان ثقلین نقوی نے سانحہ لاہور کے بعد وکلا کی ہڑتال کو افسوسناک قرار دیتے ہوئے کہا ہے کہ پاکستان بار کونسل قاتل وکلا کا ساتھ دینے کی بجائے قوم سے معافی مانگے، گذشتہ روز لاہور میں جس وکلا احتجاج کے نام پر جس دہشت گردی کا مظاہرہ کیا گیا اس پر پوری قوم کے سرشرمندگی سے جھکے ہوئے ہیں، پوری قوم افسردہ ہے مگر وکلا پوری ڈھٹائی کے ساتھ قاتلوں کے حق میں ہڑتال کررہے ہیں۔ اس طرح کے اقدامات قوم کے نمکوں پر زخم چھرکنے کے مترادف ہے، چند شرپسندوں نے ہسپتال میں گھس کر جس طرح مریضوں کی جانیں لیں اس سے کالے کوٹ کا تقدس بری طرح پامال ہوا ہے۔ قانون کے رکھوالوں سے قوم کو یہ امید ہرگز نہیں تھی۔ وکلاء تنظیمات کو پوری قوم کے ساتھ ہم آواز ہوکر ایسے شرپسندوں کے خلاف سخت ایکشن لینا چاہیے اور ایسی کالی بھیڑوں کو اپنی صفوں سے نکال باہر کر دینا چاہیے۔ رہنماوں نے کہا کہ معصوم انسانی جانوں سے کھیلنے والے درندوں کو وکیل کہنا مقدس پیشے کی توہین ہے۔ لاہور واقعے سے پوری دنیا میں پاکستان کی جگ ہنسائی ہوئی ہے، اس پر وکلا نمائندگان کو قوم سے معافی مانگنی چاہیے اور قاتل وکلا کو کیفر کردار تک پہنچانا چاہیے۔

وحدت نیوز(ملتان) مرکزی کوآرڈینیٹرتنظیم سازی کونسل مجلس وحدت مسلمین پاکستان آصف رضاایڈوکیٹ اور صوبائی سیکرٹری تنظیم سازی جنوبی پنجاب علی رضا زیدی کا ضلع ملتان کا دورہ ،ضلعی کا بینہ کے ممبران سے ملاقات، تنظیمی صورت حال کا جائزہ لیااور تنظیمی سازی کے لائحہ عمل پر گفتگو کی گئی۔

ملاقات میںآئندہ ماہانہ دورجات اور یونٹس کے وزٹ پر اتفاق کیا گیا۔آئندہ ماہانہ سطح پر مرکزی شخصیت کےملتان کے باقائدہ دورہ جات کالائحہ عمل تیارکیا گیا۔آصف رضا ایڈوکیٹ ضلعی سیکریٹری جنرل کو آئندہ ایک ماہ کے اندر تنظیم سازی تیز کرنے کی ہدایت دی اور اعلان کیا کہ اگلے ماہ جنوری 2020 مرکزی ترجمان مجلس وحدت مسلمین پاکستان علامہ مقصود ڈمکی ملتان کا دورہ کریں گے۔

وحدت نیوز (اسلام آباد) وزارت مذہبی امور کے زیر اہتمام زیارت پالیسی سے متعلق اجلاس سے خطاب کرتے ہوئے مجلس وحدت مسلمین کے مرکزی رہنما علامہ محمد اقبال بہشتی نے کہا ہے کہ کسی ایسی حکومتی پالیسی کی حمایت نہیں کی جائے گی جس سے زائرین کی سفری یا دستاویزاتی مشکلات میں اضافہ ہوتا ہو۔انہوں نے کہا کہ پاکستان سے ایران اور عراق جانے والے زائرین پہلے ہی تشویش ناک صورت حال سے دوچار ہیں۔متعلقہ حکام اس معاملے پر خاطرخواہ توجہ نہیں دے رہے۔زائرین کے حوالے سے حکومت کی یہ سردمہری پوری قوم کے لیے اضطراب کا باعث ہے۔

 اجلاس میں ایم ڈبلیوایم کے رہنما نے اپنا موقف نکات کی صورت میں پیش کرتے ہوئے مزیدکہا کہ زائرین کے ٹٰیکسز میں قطعاََ اضافہ نہ کیا جائے۔پاکستانی ہونے کی حیثیت سے شہری پہلے ہی بے شمار قسم کے ٹیکسز کے بوجھ اٹھائے ہوئے ہیں۔زائرین اب کسی بھی اضافی بوجھ کے متحمل نہیں رہے۔پاکستانی زائرین دوسرے ممالک میں ملک کے روشن تشخص کو اجاگر کرتے ہیں انہیں زیادہ سے زیادہ سہولیات ملنی چاہیئے۔نظم و ضبط کے نام پر زائرین کی تعداد سے مشروط کوئی قانون یا نکتہ قابل قبول نہیں ہو گا۔اس ضمن میں وزارت مذہبی امور کی سفارشات کا مقصد زائرین کوغیر ضروری قوانین کے تابع کرنے کی بجائے زائرین کی مشکلات کا ازالہ ہونا چاہیے۔اس سلسلے میں سیاحت کا موجودہ قانون ہی لاگو رہنا چاہیے۔

انہوںنے کہاکہ زائرین پالیسی کو حج پالیسی کے ساتھ نتھی نہ کیا جائے کیونکہ یہ دونوں مسائل انتظامی اور افرادی اعتبار سے مختلف ہیں۔ایران و عراق میں پاکستانی سفارتخانوں کے عملے کا پاکستانی زائرین کے ساتھ غیرذمہ دارنہ طرز عمل پر متعلقہ وزارت کی طرف سے باز پرس ہونی چاہیے اور انہیں زائرین کے مسائل کے حل کے لیے ذمہ دارانہ کردار ادا کرنے کا پابند بنایا جائے۔بلوچستان میں داخل ہونے کے لیے این او سی کی شرط سمجھ سے بالاتر اور غیر منصفانہ ہے اس کا فوری طور پر خاتمہ ازحد ضروری ہے۔تفتان میں امیگریشن کے عمل میں آسانی پیدا کرنے اور تیزی لانے کی ضرورت ہے۔محرم صفر کے ایام میں عملے کی تعداد میں ممکنہ حد تک اضافہ اور خواتین کی تعیناتی کی جائے۔کوئٹہ سے تفتان کے سفر کو آسان اور محفوظ بنانے کے لیے سفری سہولیات میں بہتری لائی جائے۔ کوئٹہ اور تفتان میں زائرین کو غیر ضروری قیام پر مجبور کرنے کو سوائے زیادتی کے کوئی اورنام نہیں دیا جا سکتا۔اس زیادتی کا اب ازالہ ہو جانا چاہیے۔

علامہ اقبال بہشتی نے کہاکہ زائرین کی لوٹ مار میں مصروف کوئٹہ اور تفتان میں موجود”مخصوص مافیا“ کو کنٹرول کیا جائے۔کراچی اور سندھ کے لیے گوادر اور پسنی کا سرحدی راستہ کھولا جائے۔ہوائی سفر کرنے والے زائرین کی جملہ مشکلات کا حل نکالا جائے۔محرم اور صفر کے دوران پی آئی اےکی زائرین کے لیے خصوصی پروازوں کا انتظام کرکے آسانیاں پیدا کی جاسکتی ہیں۔یا درہے کہ اس سے قبل وفاقی وزارت مذہبی امور کی جانب سے بلائے گئے اجلاس میں شیعہ قافلہ سالاروں کو مدعو نہ کرنے پر مجلس وحدت مسلمین نے احتجاجاََ بائیکاٹ کر دیا تھاجس پر مذکورہ اجلاس دوبارہ بلایا گیااور ایم ڈبلیوایم کے مطالبے پر کراچی تا پاراچنار کوئٹہ تا گلگت تمام بڑے قافلہ سالاروں اور اور ٹورآپریٹرزکو دعوت دی گئی تھی۔وزارت مذہبی امورکی طرف سے ان امور پر سنجیدگی سے غور کرنے کی یقین دہانی بھی کرائی گئی۔

وحدت نیوز(پشاور) مجلس وحدت مسلمین خیبر پختونخوا کے صوبائی سیکرٹری جنرل علامہ وحید کاظمی نے لکی مروت کے ممتاز شاعر، ادیب اور شیعہ رہنما کے بہیمانہ قتل کی شدید الفاظ میں مذمت کرتےہوئے کہا ہے کہ سوچی سمجھی سازش کے تحت افگار بخاری کو شہید کیا گیا،خیبرپختونخوا میں ایک منظم منصوبہ بندی کے تحت تکفیری فکر کو دوبارہ سے پروان چڑھایا جا رہا ہے، ٹانک اور بالخصوص ڈیرہ اسماعیل خان کئی سالوں سےاہلِ تشع کی مقتل گاہ بنا ہوا ہے اب لکی مروت میں یہ سلسلہ شروع ہونا اس بات کی غمازی ہے کہ حکومت مٹھی بھر تکفیری شدت پسندوں کے سامنے بے بس ہے۔

علامہ وحید کاظمی نے کہا ہے کہ صوبائی حکومت کے ذمہ دار صرف طفل تسلیاں دیکر خوابِ خرگوش کی نیند سو جاتے ہیں۔ انہوں نے کہا کہ لکی مروت کے مظاہرین کے مطالبات کی بھر پورحمایت کرتے ہیں حکومت شہید افگار بخاری کی قاتلوں کو جلد از جلد گرفتار کرے، بصورت دیگر ہم ہر قسم کے احتجاج کاآئینی قانونی اور جمہوری حق محفوظ رکھتے ہیں۔