The Latest
وحدت نیوز (گلگت) گلگت میں برسی شہدائے سانحہ 1988ء و امام خمینی کے عظیم الشان اجتماع سے خطاب کرتے ہوئے مجلس وحدت مسلمین پاکستان کے مرکزی سیکرٹری جنرل علامہ ناصر عباس جعفری نے کہا کہ قومی وحدت و اتحاد کے لئے بڑی سے بڑی قربانی دینے کے لئے تیار ہوں، علامہ راحت حسین الحسینی حکم دیں تو گلگت بلتستان قانون ساز اسمبلی کے انتخابات کے سلسلہ میں کھڑے امیدوار بٹھانے کے لئے تیار ہوں۔ برسی کی تقریب سے خطاب کرتے ہوئے ان کا کہنا تھا کہ خالق نے انبیاء (ع) کی بعثت کا مقصد معاشرے میں عدل کا قیام اور ظلم و ناانصافی کا خاتمہ قرار دیا۔ انبیاء (ع) اس دنیا میں آئے، تاکہ انسانی کے معاشرہ عدل کے سائے میں پروان چڑھے۔ عدل کے قیام کے لئے عوام کا ساتھ بھی ضروری ہے، عوام کے ساتھ کے باعث عدل حاکم ہو جاتا ہے، عدل کی حمایت کرنے والے جب گھروں سے نہ نکلیں تو عدل پسندوں کو جیلوں میں ڈالا جاتا ہے اور تہ تیغ کر دیا جاتا ہے، امام علی علیہ السلام کی وصیت تھی کہ ظالموں کے دشمن اور مظلوم کے مددگار بن کر رہنا۔ شہید قائد نے کہا تھا کہ ہم ہر ظالم کے دشمن ہیں، چاہے وہ شیعہ ہی کیوں نہ ہو۔ ہماری تحریک عدل کے نفاذ کی تحریک ہے۔
علامہ ناصر عباس جعفری کا کہنا تھا کہ قومی وحدت عظیم دولت ہے، جس کے لئے بڑی سے بڑی قربانی دی جاسکتی ہے۔ پاکستان کی سرزمین پر ظلم کے خاتمہ کے لئے وحدت انتہائی ضروری ہے۔ واجبات میں سے ہے، وحدت کے سلسلہ میں ڈپلومیٹک زبان بولنا اور پوائنٹ سکورنگ کرنا خیانت ہے۔ وحدت کی خاطر ایثار اور فداکاری کی ضرورت ہے۔ ہم اکٹھے ہوجائیں تو پہاڑوں کو بھی اپنے راستہ سے ہٹا سکتے ہیں، دشمن کے لئے ہماری وحدت زہر قاتل ہے۔ سیاسی بات نہیں کرنا چاہتا، تھوڑی دیر قبل علامہ راحت حسین الحسینی نے علامہ ساجد نقوی کو اور مجھے بلایا تھا۔ علامہ ساجد نقوی ہمارے بزرگ ہیں، ان کا دل سے احترام کرتا ہوں۔ جی بی الیکشن میں آخری حد تک جانے کو تیار ہوں۔ یہ میرے دل کی آواز ہے۔ آغا راحت حکم دیں تو ہم جی بی الیکشن میں بیٹھ جائیں گے۔ مرکز مضبوط رہنا چاہیے۔ وحدت کی یہ ہوا پورے وطن کو بدل کر رکھ دے گی۔
وحدت نیوز (گلگت) مجلس وحدت مسلمین پاکستان کے مرکزی ڈپٹی سیکرٹری جنرل علامہ محمد امین شہیدی نے کہا ہے کہ شیعہ جماعتیں اکٹھی ہو کر گلگت بلتستان قانون ساز اسمبلی کا الیکشن لڑیں۔ ملت جعفریہ کی خواہش ہے کہ قائدین مل بیٹھیں۔ علامہ راحت حسین الحسینی کو سلام پیش کرتے ہیں، جنہوں نے وہ کام کر دکھایا جو آج تک کوئی نہ کرسکا۔ ان خیالات کا اظہار انہوں نے گلگت میں برسی کے عظیم الشان اجتماع سے خطاب میں کیا۔ ان کا کہنا تھا کہ خطہ جی بی کے عوام کو شین یشکن اور بلتی بروپہ میں تقسیم کر دیا گیا۔ قومیت، زبان، مسلک کے نام پر لڑائیاں کرائی گئیں۔ تمام حکومتوں اور اداروں نے اپنا اپنا حصہ اس کام میں ڈالا اور عوام کو تقسیم کیا گیا۔ حکومت نے گلگت کے ڈیم کا دہانہ کے پی کے میں کھول کر خطہ کے عوام کو رائیلٹی سے محروم کیا۔ اقتصادی راہداری منصوبہ میں گلگت بلتستان کے عوام کو شریک نہ کرنا قابل مذمت ہے۔
وحدت نیوز (گلگت) مجلس وحدت مسلمین گلگت بلتستان کے آئینی حقوق کی جنگ لڑنے کیلئے میدان سیاست میں وارد ہوئی ہے،مجلس وحدت کو حکومت سازی کیلئے مطلوبہ مینڈیٹ مل گیا تو آئینی حقوق کا حصول ہماری پہلی ترجیح ہوگی۔ان خیالات کااظہار مجلس وحدت مسلمین کے سربراہ علامہ ناصر عباس جعفری نے ہوپر نگر میں عوامی اجتماع سے خطاب کے دوران کیا۔
انہوں نے کہا کہ گلگت بلتستان کے عوام کو آئینی حقوق اور شناخت عطا کرنا حکومت پاکستان کی ذمہ داری بنتی ہے لیکن بد نیت حکمرانوں نے جان بوجھ کر علاقے کے عوام کو حقوق سے محروم رکھا ہے اور اب یہ محرومی زیادہ دیر قائم نہیں رہے گی ۔عوام پارٹی وفاداریوں سے بالاتر ہوکر ایسے افراد کا چناؤ کریں جو اسمبلیوں میں عوامی امنگوں کی صحیح ترجمانی کرسکیں،مجلس وحدت نے صاحب کردار اور اہل امیدواروں کو میدان میں اتارا ہے تاکہ عوامی نمائندگی کا حق ادا ہو۔
انہوں نے کہا کہ ہم نے پورے پاکستان کے مظلوم ومحروم خاص طور پر گلگت بلتستان کے بہادر بیٹوں کے حقوق کی جنگ ہماری کا عہد کیا ہے جس پر کوئی سمجھوتہ نہیں کیا جائیگا۔انہوں نے کہا کہ آج ہمارا مقابلہ کرپٹ ، نااہل اور مفاد پرست ٹولے سے ہے جس نے ہر دور میں مظلوموں کے حقوق پر ڈاکہ ڈالا ہے اور آج پھر نت نئے کھوکھلے نعروں سے عوام کو بیوقوف بنانے کی سرتوڑ کوشش میں لگے ہوئے ہیں لیکن خطے کے عوام باشعور ہیں وہ انہیں مسترد کردینگے۔انہوں نے مزید کہا کہ ملک عزیز میں آج منظم دہشت گرد گروہ پاک فوج کے جوانوں، بیگناہ بچوں اور عورتوں کا قتل عام کررہے ہیں یہ سب کچھ حکومتوں کی غلط پالیسیوں اور منافقانہ سیاست کی مرہون منت ہے ،ہمیں امید ہے کہ 8 جون کو گلگت بلتستان کے عوام منافقانہ سیاست کو دفن کرکے علاقے کی خوشحالی اور ترقی کے زینے چڑھنا شروع کرینگے۔
وحدت نیوز (مظفرآباد) سعودی عرب میں داعش کی کاروائیاں ، شدید ترین الفاظ میں مذمت کرتے ہیں، مسجد امام علی و مسجد امام حسین میں پہ در پہ ایک ہفتے کے اندر 2دھماکے ، سعودی حکومت باہر کے بجائے اندر کا خیال کرے، عوام کے جان و مال کا تحفظ کرے ، ان خیالات کا اظہا ر ریاستی سیکرٹری جنرل علامہ سید تصور حسین نقوی الجوادی نے میڈیا سیل سے جاری ایک بیان میں کیا ، انہوں نے کہا کہ حجاز مقدس میں شرپشندانہ کاروائیاں لمحہ فکریہ، داعش کو سپورٹ کرنے والے احمق کہاں ہیں ، انہوں نے کہا کہ مجلس وحدت مسلمین آزاد جموں و کشمیر ان واقعات کی شدید ترین الفاظ میں مذمت کرتی ہے ، اور شیعان سعودی عرب سے مکمل اظہار یکجہتی کرتی ہے۔دھماکے اسلام کو بدنام کرنے کی سازش ، دشمن اپنے مشن میں کبھی کامیاب نہیں ہو گا، کربلا کے راستے کے راہی ہر مصیبت کا ڈٹ کر مقابلہ کریں گے۔
وحدت نیوز (اسکردو) مجلس وحدت مسلمین کے مرکزی سیکرٹری سیاسیات سید ناصر عباس شیرازی نے گلگت بلتستان انتخابات 2015ء کے لئے انتخابی منشور کا اعلان کر دیا ہے۔ انتخابی منشور کا اعلان انہوں نے سکردو پریس کلب میں پریس کانفرنس سے خطاب کرتے ہوئے کیا۔ اس موقع پر ان کے ہمراہ سیکرٹری سیاسیات محمد علی، صوبہ پنجاب کے رہنما مظاہر شگری، کراچی ڈویژن کے ڈپٹی سیکرٹری جنرل انجینئر رضا نقوی سمیت دیگر رہنما بھی موجود تھے۔ ناصر شیرازی کا کہنا تھا کہ گلگت بلتستان کو مکمل آئینی صوبہ قرار دینا اور قومی اسمبلی و سینیٹ میں گلگت بلتستان کی نمائندگی کو یقینی بنایا جائے گا۔ ان اہداف کے حصول کیلئے اصول تدریج کے مطابق عمل کیا جاسکتا ہے، گڈ گورننس یا شفاف حکومت پہلی ترجیح ہوگی اور اس مقصد کیلئے انتظامی سیٹ اپ میں ضروری تبدیلیاں کی جائیں گی، ایم ڈبلیو ایم کا حکومت کے قیام کے بعد پہلا ہدف شفاف، کرپشن سے پاک حکومت اور انتظامی سیٹ اپ کی تشکیل ہے۔ معیشت، روزگار، انڈسٹری، تجارت کے حوالے سے گفتگو میں ناصر شیرازی کا کہنا تھا کہ گلگت بلتستان کیلئے NFC ایوارڈ سے حصہ معین کروایا جائیگا، وفاق سے حاصل ہونے والے فنڈز اور صوبے کے ترقیاتی پراجیکٹس کیلئے مختص رقم کو مقررہ وقت میں ترجیحی پروجیکٹس پر خرچ کیا جائے گا، بالخصوص ADP کو بروقت اور ترجیحی پراجیکٹس پر خرچ کرنا یقینی بنایا جائے، مقامی وسائل پیدا کئے جائیں گے۔ بالخصوص جنگلات، سیاحت، مائینز اور قدرتی وسائل کو گلگت بلتستان کی فلاح و بہبود کیلئے خرچ کیا جائے گا، وفاق کے زیر اہتمام چلنے والے اہم اور بڑے پروجیکٹس مثلاً اقتصادی کوریڈور، بجلی کی فراہمی کے بڑے منصوبے اور دیگر منصوبوں میں سے رائیلٹی لی جائے گی اور اسے بھی صرف گلگت بلتستان کے عوام کے لئے بنیادی ضروری پراجیکٹس پر خرچ کیا جائے گا۔ سوست پورٹ کو خصوصی درجہ دلایا جائے گا اور وہاں ماڈل پورٹ کی تمام سہولیات فراہم کی جائیں گی۔
تعلیم کے شعبے کے حوالے سے ناصر شیرازی کا کہنا تھا کہ تعلیمی اداروں میں گڈ گورننس کا اطلاق کیا جائے گا۔ ضروری انتظامی اصلاحات کی جائیں گی تمام تعلیمی اداروں میں تدریجاً ضروری وسائل فراہم کئے جائیں گے، اساتذہ کی حاضری کو یقینی بنانے کے لئے منظم مانیٹرنگ کا عمل شروع کیا جائے گا، صوبے سے تعلق رکھنے والے ان طلباء کو جو میڈیکل، انجیئرنگ، مائینز، ارتھ سائینسز اور بعض دیگر معین شعبہ جات میں داخلہ لینے کے اہل قرار پائیں گے، انکی مالی معاونت کی جائے گی بشرطیکہ وہ اپنی خدمات گلگت بلتستان کے صوبے کے لئے معین کرنے کا 3 سالہ اقرار نامہ دیں، ہر ضلع میں ایک ماڈل پوسٹ گریجویٹ کالج کا قیام عمل میں لایا جائے گا، نجی تعلیمی اداروں، سرکاری اداروں اور تعلیمی معاملات پر نظارت کے لئے HEC طرز کی ’’ایجوکیشن ریگولیٹری اتھارٹی‘‘ قائم کی جائے گی، جو اپنے امور میں سیاسی دباؤ سے آزاد ہوگی۔ صحت کے متعلق منشور کا اعلان کرتے ہوئے ناصر شیرازی کا کہنا تھا کہ بیسک ہیلتھ انسٹیٹیوشن کا قیام عمل میں لایا جائے گا، تمام ضلعی ہیڈکوارٹر ہسپتالوں کو ماڈل ہسپتال بنائیں گے، دور دراز علاقوں کے لئے مخصوص ہسپتالوں کا قیام عمل میں لایا جائے گا، صحت کے تمام چھوٹے بڑے مراکز کی سخت مانیٹرنگ کے ذریعے عوامی خدمت کو یقینی بنایا جائے گا، ہر اہم وادی کے لئے ایمبولینس سسٹم کا قیام (پہلے پانچ سال میں 12 ترجیحی وادیوں کی ضروریات پوری کی جائیں گی)۔ ذرائع آمد و درفت کے متعلق منشور کا اعلان کرتے ہوئے ناصر شیرازی نے کہا کہ گلگت سکردو روڈ کی از سرِ نو تعمیر کی جائے گی، اسلام آباد اور کشمیر کے لئے متبادل راستوں کا قیام عمل میں لائیں گے، صوبے میں کسی ایک ائیر پورٹ پر انٹرنیشنل فلائٹ شروع کرنے کے لئے اقدامات کئے جائیں گے، وفاقی حکومت کے تعاون سے PIA کے کرایوں میں مناسب کمی کروانا، وادیوں سے شہروں تک پکی سڑکوں کی تعمیر کے اقدامات کرنا، پہلے مرحلے میں صوبہ بھر میں 500 کلومیٹر نئی سڑکیں دور دراز وادیوں کے لئے تعمیر کی جائیں گی، صوبے کے دور افتادہ علاقوں تک ٹیلیفون/ موبائل/ انٹرنیٹ کی فراہمی کے لئے اقدامات کئے جائیں گے، دیوسائی، فیری میڈوز جیسے دیگر سیاحتی مراکز میں سیاحوں کے لئے سیٹلایٹ رابطہ کے ذرائع فراہم کئے جائیں گے۔
ناصر شیرازی کا کہنا تھا کہ انتظامیہ میں نچلی سطح پر مکمل اور بڑی سطح پر 80 فیصد ملازمتیں مقامی لوگوں کو دی جائیں گی۔ دیگر صوبے اور وفاق ملازمتوں میں جتنا کوٹہ گلگت بلتستان کے لئے رکھیں گے، اتنا ہی کوٹہ گلگت بلتستان کی ملازمتوں میں دیگر صوبوں اور وفاق کے لئے ہوگا، پولیس اور انتظامیہ کو سیاسی اثر و نفوز سے آزاد کیا جائے گا۔ تمام تقرریاں میرٹ کی بنیاد پر ہوں گی، عدالتوں اور وکلاء کو انصاف کی فراہمی کے لئے ضروری سہولیات فراہم کی جائیں گی۔ ہر ضلع کی بار کونسلز کو فنڈز فراہم کئے جائیں گے لیکن عدالتیں محدود وقت میں فیصلہ کرنے کہ پابند ہوں گی، کسی بھی قسم کی دہشتگردی، اس میں معاونت، پشت پناہی یا حمایت فراہم کرنے کی صورت میں جو بھی ملوث پایا جائے گا، اس کے لئے Zero Tolerance پالیسی اپنا کر عبرت کا نشان بنایا جائے گا، تاکہ علاقہ کو امن کا گہوارہ بنایا جاسکے۔ دہشتگردی کی حمایت یا معاونت بھی دہشتگردی ہی شمار ہوگی۔ ناصر شیرازی نے مزید کہا کہ گذشتہ 20 سال اقتدار پر رہنے والے افراد پر کرپشن کے الزامات کی تحقیق اور مرتکب افراد کو سزاؤں کے لئے نیشنل احتساب بیورو (نیب) کی طرز پر احتساب ادارہ بنایا جائے گا، احتسابی مراحل کا آغاز گذشتہ پانچ سالہ دور سے کیا جائے گا۔ تمام شعبہ جات اس کی زد میں آئیں گے، جبکہ اس امر کے لئے صوبے کے تمام سٹیک ہولڈرز کو اعتماد میں لینے کی کوشش کی جائے گی، احتسابی معاملات میں انصاف ہوتا نہیں بلکہ ’’انصاف ہوتا نظر آنا چاہئے‘‘ کے اصول پر عمل درآمد کیا جائے گا، لوٹی گئی دولت کو صوبائی خزانہ میں واپس لانے کیلئے ضروری اقدامات کئے جائیں گے
وحدت نیوز (مظفرآباد) ظالموں ، لٹیروں کو اب مذید حقوق غصب نہیں کرنے دیں گے، مجلس وحدت اقتدار کے لیئے نہیں اقدار کے لیئے میدان میں ہے، کامیاب الیکشن مہم نے مخالفین کی نیندیں حرام کر رکھی ہیں ، ان خیالات کا اظہار ریاستی سیکرٹر ی سیاسیات سید تصور عباس موسوی نے گلگت سے وحدت سیکرٹریٹ مظفرآباد میں عہدیداران کی ایک خصوصی نشست سے خطاب کرتے ہوئے کیا ، انہوں نے کہا کہ یہاں کی عوام مجلس وحدت کے حق میں اٹھ کھڑی ہوئی ہے، مجلس وحدت لٹیروں کا احتساب کرے گی، اقتدار نہیں اقدار چاہتے ہیں، مجلس وحدت کے تمام امیدوار باصلاحیت ، نڈر ، بے باک اور تعلیم یافتہ ہیں ، دین کو تابع سیاست نہیں بلکہ سیاست کو تابع دین بنانے میدان میں ہیں ، ہم گلگت بلتستان کے حقوق کے لیئے آخری حد تک جائیں گے، گلگت بلتستان کی عوام کو کسی صورت تنہا نہیں چھوڑیں گے، مجلس وحدت مسلمین کی مرکزی قیادت کا جگہ جگہ پرتباک استقبال اس بات کی واضح دلیل ہے کہ عوام مجلس وحدت پر اعتماد کرتے ہیں ، مجلس وحدت عوام کی خدمت بلاتفریقِ مذہب و مسلک کرے گی، گلگت میں آ کر عوام کا جوش و خروش دیکھ کر خوشی ہوئی کہ عوام اب کھرے کھوٹے کی پہچان رکھتے ہیں ، سنی اتحاد کونسل کے چئیرمین بھی مجلس وحدت کے قائدین کے شانہ بشانہ ہیں ، جو اس بات کی دلیل ہے کہ مجلس وحدت اتحاد بین المسلمین کے تحت ہر مسلک و مذہب والے کی خدمت کے لیئے میدان میں ہے، انہوں نے کہا کہ اگر دھاندلی کی گئی تویہ مرکزی حکومت کے لیئے گلے کی ہڈی ثابت ہوگی ، یہاں کی عوام اسے ہر گز قبول نہیں کریں گے، مجلس وحدت مسلمین 5اور 6مئی کو گلگت اور بلتستاتان میں بھرپور عوامی طاقت کا مظاہرہ کرے گی ، جو مک مکا کرنے والی جماعتوں کے تابوت میں آخری کیل ہو گی، مجلس وحدت سنگل پارٹی کے طور پر سامنے آئے گی ، لوگ مجلس وحدت کے منشور سے متفق ، 8جون کو خیمے کے نشان پر مہر لگا ئیں گے، لٹیروں کو گھر بھگائیں گے، خیمہ کا نشان گلگت بلتستان کی ترقی و خوشحالی کا نشان ہے۔ انہوں نے کہا کہ انشاء اللہ 8جون کی شام مجلس وحدت مسلمین کے نام ہو گی۔
وحدت نیوز(کراچی ) مجلس وحدت مسلمین کراچی کے پولٹیکل سیکرٹری علی حسین نقوی نے مستونگ میں دہشت گردوں کی جانب سے بے گناہ افراد کا نشانہ بنانے کے واقعہ پر شدید مذمت کرتے ہوئے وحدت ہاؤس سے جاری اپنے مذمتی بیان میں کہا کہ وزیر اعلیٰ بلوچستان اگر عوام کو تحفط فراہم نہیں کر سکتے تو اقتدار کسی ایسے شخص کے حوالے کر دیں جو بلوچستان جیسے حساس صوبہ میں امن و امان کو یقینی بنا سکے۔انہوں نے کہا کہ کوئٹہ اور مستونگ میں دہشت گردی کی تازہ لہر حکومت اور سیکورٹی اداروں کی نااہلی کا منہ بولتا ثبوت ہیں۔ دہشت گردی اب حکومت کے لیے کھلے عام چیلنج کی صورت اختیار کرتی جارہی ہے۔دہشت گرد خودکش حملوں کی کھلے عام دھمکیاں دینے میں مصروف ہیں جب کہ بلوچستان حکومت ان سے ملاقاتیں کر کے نہ صرف اپنے آپ کو کمزور ثابت کررہی ہے بلکہ ان مذموم عناصر کے حوصلوں کو بھی تقویت دے رہی ہے۔گزشتہ تین دن میں ہزارہ قبیلے کے پانچ افراد کی جانیں لے لی گئیں اور اب مستونگ میں بے گناہ عوام کو خون میں نہلایا گیا لیکن اب تک کسی ایک بھی ذمہ دار پر ہاتھ نہیں ڈالا گیا جب کہ اس کے برعکس صدر مملکت کے بیٹے کے قافلے پر حملہ کرنے والے دہشت گردوں کو اگلے ہی روز گرفتار کر لیا گیا۔ہم یہ امتیازی سلوک قطعاََ برداشت نہیں کریں گے ۔حکومت پاکستانی عوام کے خون کو ارزاں نہ سمجھے۔ ہم محب وطن شہری ہونے کا حق ادا کر رہے ہیں اس لیے خاموش ہیں۔ہماری اس خاموشی کو بزدلی کے معنوں میں نہ لیاجائے۔انہوں نے کہا دہشت گردی کے پس پردہ محرکات میں پاک چائنا اقتصادی راہدری کے منصوبے کو ناکام بنانا بھی شامل ہیں۔ ملک دشمن قوتیں ہم مضبوط نہیں دیکھنا چاہیے۔ مستحکم اور ترقی یافتہ پاکستان کے لیے دہشت گردی کو جڑوں سے ختم کرنا ہوگا۔اس سلسلے میں حکومت کو باہمت فیصلے کرنے کی ضرورت ہے۔وزیر اعلیٰ بلوچستان کوئٹہ میں ایمر جنسی نافذ کریں اور ایف سی دہشتگردوں کے خلاف بھر پور آپریشن کرے۔
وحدت نیوز (قم) مجلس وحدت مسلمین قم کے قائم مقام سیکرٹری جنرل حجۃ الاسلام والمسلمین گلزار جعفری نے سعودی عرب میں ہونے والے دہشت گردی کے واقعات پر گہری تشویش اور رنج و غم کا اظہار کیا ہے۔ انہوں نے کہا کہ سعودی عرب کے حکومتی ادارے اپنی سرزمین پر پاکستانی حکمرانوں کی غلطیوں کو نہ دہرائیں۔ انہوں نے کہا کہ مساجد میں نمازیوں کو شہید کرنے والے کسی بھی مذہب یا مکتب کے خیرخواہ نہیں ہیں۔ سعودی عرب کے حکمرانوں کو چاہیے کہ وہ ہوش کے ناخن لیں۔ اگر ان واقعات پر سعودی حکومت نے فوری طور پر کنٹرول نہ پایا تو پھر تھوڑے ہی عرصے میں سعودی عرب بھی پاکستان کی طرح ایک غیر محفوظ منطقے میں تبدیل ہوجائے گا۔
وحدت نیوز (دنیور) امپھری دنیور میں مجلس وحدت مسلمین کا بول بالا ہوگیا۔ محلہ کے عمائدین اور عوام نے ایم ڈبلیو ایم کے نامزد امیدوار علامہ نئیر عباس کی بھر پور حمایت کا اعلان کر دیا عمائدین محلہ نے آئندہ انتخابات میں علامہ نئیرعباس کو جتانے کے عزم کا اظہار کیا۔عمائدین کا کہنا تھا کہ گزشتہ 20سالوں سے علاقہ محرومی کا شکار ہے منتخب نمائندوں نے صرف ایک محلے کی ہی نمائندگی کی ہے اور حلقے کے دیگر علاقوں کو نظر انداز رکھا امپھری کے عمائدین نے امید ظاہر کی کہ ایم ڈبلیو ایم اقتدار میں آکر انصاف اور ترقی کو اپنا شعار بنا ئے گی۔
وحدت نیوز (اسلام آباد) مجلس وحدت مسلمین نے گلگت بلتستان الیکشن کے سلسلے میں 4 جون کو بلتستان اور 5 جون کو گلگت میں تاریخی انتخابی جلسہ کرنیکا فیصلہ کیا ہے۔ ایم ڈبلیو ایم کی پوری مرکزی قیادت اس وقت جی بی الیکشن کے سلسلے میں ہر حلقے میں زبرست انتخابی مہم چلا رہی ہے اور لوگوں کو اپنے منشور اور پارٹی کی طرف متوجہ کر رہی ہے۔وحدت نیوز کیساتھ خصوصی گفتگو کرتے ہوئے ایم ڈبلیو ایم کے سیکرٹری اطلاعات مہدی عابدی نے بتایا ہے کہ مجلس وحدت مسلمین کی انتخابی مہم اپنے عروج پر ہے اور مجلس کی مقبولیت نے مخالفین کی نیندیں حرام کر دی ہیں۔ انہوں نے بتایا کہ 6 جون کی شام تک ایم ڈبلیو ایم کی انتخابی مہم چلے گی، اس سلسلے کے آخری دو بڑے جلسے ہوں گے، جس کیساتھ ہی انتخابی مہم الیکشن کمیشن کے ضابطہ اخلاق کے تحت روک دی جائیگی۔ مہدی عابدی نے بتایا کہ 4 جون کو بلتستان میں سیاسی قوت کا اظہار کیا جائیگا اور 5 جون کو گلگت شہر میں اپنی طاقت کا اظہار کریں گے۔ ان کا کہنا تھا کہ ایم ڈبلیو ایم پہلی بار گلگت بلتستان کے الیکشن میں جا رہی ہے اور عوام کی جانب سے زبردست پزیرائی مل رہی ہے۔ اگر عوام نے مجلس پر اعتماد کا اظہار کیا تو اس خطے کی تقدیر بدل دیں گے۔
