وحدت نیوز (اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے عید میلاد البنی حضرت محمد ﷺ کے یوم ولادت کے موقع پر امت مسلمہ کو مبارکباد دیتے ہوئے کہا ہے کہ 12 ربیع الاول کا دن مسلمانوں کا اپنے نبی کریم ﷺ سے عشق کے عملی اظہار کا دن ہے۔ امت مسلمہ کی تنزلی کا سب سے بڑا سبب رحمت اللعالمین ﷺ کی حقیقی تعلیمات سے دوری ہے۔ حضور نبی کریم ﷺ نے امت کو اخوت، رواداری اور بھائی چارے کا درس دیا ہے۔ آج اسلام کے نام پر جو گلے کاٹے جا رہے ہیں، وہ دین اسلام کے روشن چہرے کو بدنما ظاہر کرنے کی مذموم کوشش ہے۔ جس کے پس پردہ صیہونی نصرانی ایجنڈا کار فرما ہے۔ اس سازش کو باہمی اتحاد و یگانگت سے شکست دینا ہوگی۔ علماء کی اعلٰی بصیرت اور دانش مندانہ اقدامات سے عدم برداشت کے رجحان کا خاتمہ کرکے معاشرے میں امن و سکون قائم کیا جا سکتا ہے۔ آج کا دن تجدید عہد کا دن ہے، نبی کریم ﷺ کی حقیقی تعلیمات کا فروغ اور اس کے مطابق اپنی زندگی گزارنے کا آج ہمیں عہد کرنا ہوگا۔ انہوں نے کہا کہ دین اسلام جبر و بربریت سے نہیں بلکہ اسوہ حسنہ سے پھیلا ہے۔ دنیا کے دیگر مذاہب حضور کریم صلی اللہ علیہ وآلہ وسلم کی حیات مبارکہ کو بہترین نمونہ قرار دیتے ہوئے اسلام کے نظام عدل و مساوات اور باہمی احترام پر عمل پیرا ہیں۔

علامہ ناصر عباس جعفری کا کہنا تھا کہ حضور کریم ﷺ کی ذات مبارکہ سے محبت کے زبانی اقرار کے ساتھ ساتھ ان کی تعلیمات کو عملی زندگیوں میں نافذ کرکے دشمنان اسلام کی کوششوں کو ناکامی سے دوچار کیا جا سکتا ہے۔ انہوں نے کہا کہ مجلس وحدت مسلمین 12 تا 17ربیع الاول تک ہفتہ وحدت و اخوت منا رہی ہے۔ اس دوران ملک بھر میں جشن میلاد النبی ﷺ کے سلسلے میں سمینار منعقد کئے جائیں گے۔ تمام صوبائی و ضلعی دفاتر پر چراغان اور نعتیہ محافل کے انعقاد کا سلسلہ جاری ہے۔ بارہ ربیع الاول کو ملک بھر میں عید میلاد النبی ﷺ کے مرکزی جلوسوں کے راستوں میں استقبالیہ کیمپ اور سبیلیں بھی لگائی جائیں گی۔

وحدت نیوز (کوئٹہ) مجلس وحدت مسلمین کوئٹہ ڈویژن کے میڈیا سیل سے جاری شدہ بیان میں مجلس وحدت مسلمین کوئٹہ کے ڈویژنل سیکریٹری جنرل عباس علی نے تعلیم کو انسان کی تکمیل اور معاشرے کی خوشحالی کاذریعہ قرار دیتے ہوئے کہا ہے کہ نئی نسل کے روشن مستقبل کو یقینی بنانے کیلئے تعلیم کے شعبہ کو اولین ترجیح دینی ہوگی۔ان خیالات کا اظہار مجلس وحدت مسلمین کوئٹہ ڈویژن کے سیکریٹری جنرل عباس علی نے کیا، انہوں نے کہا کہ تعلیم پر توجہ دے کر ہی ترقی کی منازل طے کی جاسکتی ہے۔ تعلیم ہر انسان کا بنیادی حق ہے اور کسی بھی شخص کو اس سے محروم رکھنا اس کی حق تلفی کے مترادف ہوگی۔ کسی کو اجازت نہیں دی جائے گی کہ وہ مستحقین کے حقوق پامال کرے، تعلیم کے بغیر ترقی کا خواب شرمندہ تعبیر نہیں ہو سکتا ۔ انہوں نے مزید کہا کہ مجلس وحدت مسلمین کے مرکزی رہنماء آغا رضا نے کوئٹہ میں اسکول اور یونیورسٹی کے قیام کیلئے جدو جہد کئے اور بلآخر انہوں نے علمدار روڈ کے علاقے میںانکا قیام ممکن بنایا، جو جلد ہی طلباء کیلئے کھول دیئے جائیں گے۔ انہوں نے کہا کہ ہمارا نصب العین بلا تفریق رنگ و نسل ، مذہب عوام کی خدمت کرنا ہے۔ ہم نے ہمیشہ اصولوں کی سیاست کی ہے ، ہمیں عوام کے مفادات عزیز ہیں نفرت کی سیاست پر یقین نہیں رکھتے۔ انہوں نے مزید کہا کہ حکومت تعلیم کے شعبے میں مختص فنڈ میں غیر معمولی اضافہ کرنے کے ساتھ تعلیمی اداروں نظم و ضبط بہتر بنانے، تعلیمی ماحول کے ساتھ ساتھ تدریس کے عمل کو با معنی اور مثبت بنانے کے لئے ٹھوس اقدامات اٹھائے۔بلوچستان کو خوشحال ، ترقی یافتہ بنانے کیلئے ہمارا وژن پڑھا لکھا بلوچستان ہونا چاہئے۔

وحدت نیوز (مظفرآباد) ریاستی کابینہ مجلس وحدت مسلمین آزاد جموں و کشمیر کا اجلاس زیر صدارت علامہ سید تصور حسین نقوی منعقد ہوا ۔ اجلاس میںمولانا سید طالب حسین ہمدانی ، سید عمران حیدر سبزواری ، عابد علی قریشی ، سید حمید حسین نقوی اور دیگر نے شرکت کی ۔ اجلاس میں ربیع الاول کے حوالے سے اہم فیصلہ جات کیئے گئے ۔ اجلاس سے خطاب کرتے ہوئے سیکرٹری جنرل مجلس وحدت مسلمین آزاد کشمیر علامہ سید تصور حسین نقوی نے کہا کہ  12تا 17ربیع الاول ہفتہ وحدت منایا جائے گا ، اس دوران ریلیوں ، جلسوں ، جلوسوں اور محافل میں بھرپور شرکت کی جائے گی ۔ مجلس وحدت مسلمین آزاد جموں و کشمیر حسب سابق امسال بھی ہفتہ وحدت بھرپور انداز سے منائے گی ۔اہلسنت برادران کے ہاتھوں میں ہاتھ ڈال میلاد مسعود ختمی مرتبت ؐ کی خوشیاں منائیں گے ۔بھمبر سے لے کر نیلم تک مجلس وحدت مسلمین پروگرامات کا انعقاد کرے گی ۔ اہلسنت برادران کے ساتھ بھرپور تعاون کریں گے ۔ امام خمینی ؒ کے فرمان کے مطابق12سے 17ربیع الاول ہفتہ وحدت منانے کا مقصد پیغامِ اتحاد و اتفاق بین المسلمین کو عام کرنا ہے ۔ اس سلسلہ میں ریاست بھر میں تقریبات کا انعقاد کیا جائے گا۔ علامہ سید تصور حسین نقوی نے کہا کہ دہشت گردی و انتہاء پسندی کا واحد حل ذات رسول ؐ کی اتباع میں ہے ۔ درود و سلام کی محفلوں میں سیرت نبی کو اجاگر کرنا عین عبادت ہے ۔ اہل سنت بردادران کے ساتھ مکمل تعاون کریں گے ۔ جلوسوں اور ریلیوں کے راستوں میں استقبالیہ کیمپس لگائے جائیں گے ۔ عاشقان مصطفی صلی اللہ علیہ و آلہ وسلم سے کا بھرپور خیرمقدم کریں گے ۔ 10ربیع الاول کو سیرت کمیٹی ہٹیاں بالا کے زیر اہتمام مظفرآباد سے چکوٹھی ریلی میں بھرپور شرکت کریں گے ۔12ربیع الاول کو بھی نیلم سے لیکر بھمبر تک بھرپور شرکت کریں گے ۔ انہوں نے کہا کہ نبی ؐ کا عَلم امن کا علم ، اسی کے نیچے جمع ہو کر مشکلات و مصائب سے چھٹکارا حاصل کیا جا سکتا ہے ۔عالم اسلام اس وقت ٹکڑیوں میں تقسیم ہے ۔ دہشت گردی نے کمر توڑ کر رکھ دی ہے ۔ ضرورت اس امر کی ہے کہ اتحاد و اتفاق کو عام کرتے ہوئے پرچم رسول ؐ کے نیچے جمع ہو جائیں ۔ اسی میں دنیا و آخرت کی بھلائی ہے ۔

وحدت نیوز (اسلام آباد) مجلس وحدت مسلمین پاکستان کے سربراہ علامہ راجہ ناصرعباس جعفری نے ماہ مبارک ربیع الاول  اور جشن عید میلاد النبی ﷺکی تقریبات کے آغاز کےموقع پر مرکزی سیکریٹریٹ سے امت مسلمہ کے نام جاری اپنے تہنیتی پیغام میں کہاہے کہ ملت پاکستان شدید خطرات اور چلنجز کے باوجود تاریخی عظیم جشن  میلاد النبی ﷺ میں شرکت کریگی بیدار سنی شیعہ مسلمان عشق رسول اکرم ﷺ کو والہانہ طور پر منائیں ، دشمنان دین ، ملک و ملت کی تمام تر سازشیں اور سرمایہ کاری کو خاک میں مل جائے گی ان شاءاللہ ، شیعہ سنی وحدت کا آغاز یکم محرم الحرام سے ہو چکا ہے ۔محرم صفر اور ربیع الاول سال کے پہلے تین ماہ عملی وحدت کے ہیں اور ہم نے دیکھا کہ جس طرح برادران اہلسنت نے گذشتہ دو ماہ میں اتحاد کا ثبوت دیا ہے ۔اسی طرح ہم بھی اس ماہ ربیع الاول میں اہلسنت بھائیوں کے ہمراہ محافل میلاد میں شرکت فرمائیں گے، عملی وحدت کا مظاہرہ کریں گے ،بفرمان امام خمینی ؒ 12تا 17ربیع الاول ہفتہ وحدت کی مناسبت سے ایم ڈبلیوایم کے کارکنان ملک بھر میں جلوس ہائے میلاد النبیﷺمیں استقبالیہ کیمپوں اور سبیلیوں کا اہتمام کریں گےاور اہلسنت برادران کے ہمراہ آقائے دو جہاں ﷺ کی ولادت کا جشن مل کر منائیں گے،خدا نے چاہا تووطن عزیز میں شیعہ سنی بھائی چارگی اور وحدت کے ثمرات سے پاکستان کے داخلی و خارجی مسائل سے نجات حاصل ہو گی۔

ان کاکہنا تھا کہ امید ہے ملک بھر میں جشن عید میلاد النبی ﷺ کے جلوس بخیر وعافیت اختتام پذیر ہونگے ، شدید خطرات کے باوجود ملک بھر میں سنی شیعہ عوام عشق رسول خداﷺ سے سرشار ہوکر جلوس میلاد النبی میں شرکت کریں گے ،ہمیشہ ملت جعفریہ کی عید میلاد النبیﷺ کے اجتماعات میں ،شرکت غیر معمولی رہی ہے ، اور اہل تشیع برادری گذشتہ سالوں کی نسبت زیادہ بڑی تعداد میں گھروں سے باہر نکلے گی اور عملی طور پر جلوس ہائے میلاد النبی ﷺ میں اپنے اہل سنت بھائیوں کے شانہ بشانہ نظر آئے گی ، مجلس وحدت مسلمین اور سنی اتحاد کونسل اور دیگر اہلسنت جماعتوں نے جس محبت ، اخوت اور وحدت کے صفر کا آغاز کیا ہے آج ملک بھر میں اسکی عملی تصویر ملاحظہ کررہے ہیں۔

انہوں نے کہا کہ وطن عزیز کو بچانے کے لئے اسے بنانے والی قوتیں یعنی اہل سنت و اہل تشیع کا کردار انتہائی اہمیت کا حامل ہے، ہمیں آپس کے اتحاد اور سیرت نبی کریم ﷺ پر عمل پیرا ہو کر دین مبین کی ترویج، دفاع ، سربلندی اور ملکی سلامتی کے لئے اپنا قومی کرار ادا کرنا ہو گا، پاکستان کو دہشت گردی اور لاقانونیت سے نجات دلانا تمام عاشقان و پیروان مصطفیٰ ﷺ کی دینی وشرعی ذمہ داری کے ساتھ ساتھ ملک و ملت کی خدمت بھی ہے ۔ ہم سب ایک تھے ایک رہیں گے اور ملکر وطن عزیز کا دفاع کریں گے ۔ان شاء اللہ۔

وحدت نیوز(جھنگ) نبی پاک (ص) کی ولادت کائنات کے لئے بہت بڑی سعادت ہے، آمد رسول (ص) پر قوم متحد ہو جائے، رسول کریم (ص) کائنات کی وہ عظیم ہستی ہیں جن کے ماتھے کی روشنی سے روشن خیالی جنم لیتی نے۔ ان خیالات کا اظہار مجلس وحدت مسلمین جھنگ کے ضلعی جنرل سیکرٹری علامہ اظہر حسین کاظمی نے اپنے ایک بیان میں کیا۔ انہوں نے کہا کہ ربیع الاول کے جلوسوں کو فول پروف سیکورٹی فراہم کی جائے، ربیع الاول کے جلوسوں میں کسی قسم کی رکاوٹ برداشت نہیں کی جائے گی، وہ دل جہنمی ہے جس میں حب رسول (ص) کی خوشبو نہیں، آمد مصطفی (ص) پر دنیا متحد ہو سکتی ہے، آپ (ص) کے قدموں کے نشان سے منزل کا سراغ ملتا ہے اور جن کی شریعت سے بے انصافی اور ظلم کے سارے دروازے بند ہو جاتے ہیں۔ انہوں نے کہا کہ وہ گھر جنت کا خزینہ ہوتا ہے جس میں ذکر مدینہ ہوتا ہے، ذکر خدا اور ذکر مصطفی (ص) دلوں کو زندہ کھنے کا ذریعہ ہے۔