وحدت نیوز (فیصل آباد) چیئرمین سنی اتحاد کونسل پاکستان صاحبزادہ حامد رضا نے فیصل آباد میں میڈیا سے بات کرتے ہوئے کہا ہے کہ دینی طبقے کا اتحاد حقیقی سیاسی تبدیلی کا دروازہ کھول سکتا ہے۔ اہلسنت رہنما کا فیصل آباد میں میڈیا سے خطاب کرتے ہوئے کہنا تھا کہ بالادست طبقہ ملکی وسائل پر قابض ہے۔ انکا کہنا تھا کہ قرآن و سنت پاکستان کا سپریم لاء ہے، اس لئے اسلام کے منافی قانون سازی نہیں ہوسکتی۔ انہوں نے کہا کہ حکومت حقوق نسواں ایکٹ پر مذہبی طبقہ کے تحفظات دور کرے۔ انکا کہنا تھا کہ حکومت ایم کیو ایم کے "را" سے روابط کی تحقیقات میں سنجیدہ نہیں۔ سپریم کورٹ ازخود نوٹس لے۔ انہوں نے مزید کہا کہ قومی ٹیم بھارت کو شکست دینے کی بھرپور صلاحیت رکھتی ہے۔
وحدت نیوز (سکردو) مجلس وحدت مسلمین گلگت بلتستان کے صوبائی ڈپٹی سیکریٹری جنرل علامہ آغا سید علی رضوی ، رکن گلگت بلتستان اسمبلی کاچوامتیاز حیدر خان ،بلتستان ایکشن کمیٹی کے عہدیدار آغا سید محمد عباس رضوی، مولانا حافظ بلال زبیری، شیخ فدا حسن عبادی، آخوند محمد علی ایڈووکیٹ، سابق ڈپٹی سپیکر وزیر ولایت علی ایڈووکیٹ، محمد تقی اخونزادہ، غلام حسین اطہر، محمد بشیر، راجہ زکریا مقپون، نور حسن نے یادگارشہداء اسکردو پر منعقدہ احتجاجی جلسے سے خطاب کیا۔ انہوں نے کہا کہ ہم جان دیں گے، مریں گے، کٹیں گے، مگر آئینی، معاشی، بنیادی اور سیاسی حقوق کی جنگ سے ہرگز پیچھے نہیں ہٹیں گے۔ ہم نے پاکستان کیلئے بے پناہ قربنایاں دیں، ہمارے سینکڑوں بچے یتیم ہوگئے اور کئی ماؤں کی گودیں خالی ہوگئیں متعدد خواتین وطن عزیز کے خاطر بیوہ ہوگئیں۔ 1948 سے لے کر اب تک ہزاروں لوگ وطن عزیز کے اوپر قربان ہوگئے مگر افسوس اس بات پر ہوتا ہے کہ ہماری وفاداری پر بے شمار قربانیوں کے باوجود شک کیا جارہا ہے جو کسی بھی صورت میں ملکی مفاد میں نہیں ہے۔ کراچی، لاہور، پشاور سے غیر ملکی ایجنٹ پکڑے گئے وہاں سے کئی لوگ را کے ایجنٹ نکلے مگر اللہ کے فضل وکرم سے گلگت بلتستان سے اب تک دشمن ملک کی جاسوسی کرتے ہوئے کسی کو پکڑا نہیں گیا، اس کے باوجود بعض قوتیں ہمیں آئینی بنیادی حقوق سے محروم رکھ کر غیرملکی عناصر کے ایجنڈے کی تکمیل چاہتی ہیں۔
اسکردو یادگار چوک پر بلتستان ایکشن کمیٹی کے زیراہتمام اپنے چارٹر آف دیمانڈ کے حق میں منعقدہ جلسہ عام سے خطاب کرتے ہوئے مقررین نے کہا کہ ہم ملک کے بڑے وفادار ہیں جو قربانیاں ہم نے دیں کسی نے نہیں دی، مگر سازش کے تحت ہماری قربانیاں فراموش کی جارہی ہیں۔ جس کے بڑے خطرناک نتائج سامنے آئیں گے۔ انہوں نے کہا کہ ہم شہدائے گلگت بلتستان کے ساتھ قسم کھاتے ہیں ہم تمام تر اختلافات اور مصلحتوں سے بالاتر ہوکر علاقے کے آئینی، بنیادی اور سیاسی حقوق کی فیصلہ کن جنگ لڑیں گے۔ انہوں نے کہاکہ ہمیں بھی ملک کے دوسرے شہروں کے برابر حقوق دیئے جائیں قومی اسمبلی اور سینٹ میں نمائندگی ملنے تک پیچھے ہٹنے کا سوال ہی پیدا نہیں ہوتا۔ انہوں نے کہا کہ وزیراعظم نے اسکردو روڈ کا افتتاح کیا ہے لیکن حکومتی اراکین اسمبلی ٹینڈر کرانے کی باتیں کر رہے ہیں جب روڈ کا ٹینڈر ہی نہیں ہوا تھا تو وزیراعظم نے روڈ کا افتتاح کس طرح سے کیا۔ اس سے صاف ظاہر ہوتا ہے کہ وزیر اعظم نے جھوٹا افتتاح کیا تھا اور عوامی مینڈیٹ پر شب خون مارا تھا۔
وحدت نیوز (مظفرآباد /اسلام آباد) مجلس وحدت مسلمین آزادکشمیر الیکشن 2016 ء میں بھرپور حصہ لے گی، تیاریاں شروع ، ڈور ٹو ڈور جائیں گے ، جلد لائحہ عمل کا اعلان کیا جائے گا، مظفرآباد وحدت سیکرٹریٹ میں پولیٹیکل کونسل کے اجلاس میں فیصلہ ، بعد ازاں پولیٹکل کونسل کے اراکین نے اسلام آبامرکزی سیکرٹریٹ میں سربراہ مجلس وحدت مسلمین پاکستان علامہ راجہ ناصر عباس جعفری اور مرکزی انچارج امور سیاسیات سید ناصر عباس شیرازی سے ملاقات کی ، ریاستی سیکرٹری جنرل علامہ سید تصور حسین نقوی الجوادی ،ریاستی سیکرٹری سیاسیات سید محسن رضا جعفری ایڈووکیٹ کے علاوہ پولیٹیکل کونسل کے ذمہ داران بھی کثیر تعداد میں شامل تھے، اس موقع پر سربراہ مجلس وحدت مسلمین پاکستان علامہ راجہ ناصر عباس جعفری نے کہا کہ محروموں و مظلوموں کے لیے میدان میں اتریں گے ، مقصد اقتدار نہیں اقدار ہیں ، دھونس دھاندلی کے انتخابات قبول نہیں کریں گے ، مجلس وحدت مسلمین پسے ہوئے طبقات کی نمائندہ جماعت ثابت ہو گی ، کشمیر مظلوم و محروم خطہ ہے ، انشاء اللہ کشمیر کی محرومیوں کے خاتمے کے لیے عملی جدوجہد کریں گے ، صحت ،تعلیم ،روزگار، بجلی ان تمام مسائل کے حوالے سے عملی جدوجہد کریں گے ۔
مرکزی سیکرٹری امور سیاسیات سید ناصر شیرازی نے کہا کہ ہمارا مقصد اتحاد امت ہے، کشمیر کے پرامن خطے میں پرامن لوگ رہتے ہیں ، آزاد کشمیر کو ماڈل ریاست بنایا جانا چاہیے ، مجلس وحدت مسلمین انتخابی دنگل میں حصول اقتدار کے لیے نہیں بلکہ خدمت خلق کے لیے اترے گی ، ہم متوسط طبقات کی بھرپور نمائندگی کریں گے، ریاستی سیکرٹری جنرل علامہ سید تصور حسین نقوی الجوادی نے کہا کہ ہم اس نعرے و مشن کو آگے لیکر بڑھیں گے ، کہ ’’ وحدت کا یہ نعرہ ہے ہر مظلوم ہمارا ہے‘‘ باشعور عوام ساتھ دیں ، خطہ کشمیر میں مہذب سیاست متعارف کروائیں گے ، کارکن تیاریاں شروع کریں ، پیغام وحدت گھر گھر پہنچانا ہے ، مسئلہ کشمیر ہمارے پیش نظر ،جدوجہد میں اپنا حصہ ڈالیں گے ، ریاستی سیکرٹری سیاسیات سید محسن رضا سبزواری ایڈووکیٹ نے کہا کہ جلد تمام اضلاع کا دورہ کر کے تیاریوں کو حتمی شکل دیں ، مرکزی قیادت بھی ہمارے ساتھ ہے ، گھر گھر جائیں گے ، پیغام امن ، پیغام وحدت ، پیغام خدمت پہنچانا ہے ، جلد لائحہ عمل کا اعلان کریں گے ، بلا تفریق مذہب و مسلک جدوجہد کریں گے ، محروم کا تعلق چاہے کسی بھی قوم ، کسی بھی مسلک ، کسی بھی ذات سے ہو ہم اس کے ساتھی بنیں گے ، اس کی آواز بنیں گے ، انشاء اللہ کشمیری عوام آزمائے ہوئے لوگوں کو مسترد کرے گی ۔
وحدت نیوز (مظفرآباد) سیدہ فاطمہ زھرا ؑ جنتی عورتوں کی سردار ، خواتین کے لیے اسوہ کامل ہیں ، رسول ؐ کی لاڈلی بیٹی کاکردار و سیرت عالم اسلام کے لیے مشعل راہ ہے،ان خیالات کا اظہار ریاستی سیکرٹری جنرل مجلس وحدت مسلمین پاکستان آزاد جموں و کشمیر علامہ سید تصور حسین نقوی الجوادی نے شہادت خاتون جنت حضرت فاطمہ زھراء سلام اللہ علیھا کے دن کی مناسبت سے میڈیا سیل مجلس وحدت مسلمین سے جاری ایک بیان میں کیا۔
انہوں نے کہا کہ سیدہ زھراء ؑ نے سخت اور مشکل حالات میں بھی ولایت اور دین کے لیے خدمات انجام دیں ،آج کا یہ مشکل دور اگر آسان بنانا ہے تو عالم اسلام کو سیدہ کونین ؑ اور اہلبیت ؑ کے راستے کو اپنانا ہو گا،جن کی محبت و مؤدت کا حکم خدا نے دیا ہے ، اسی میں عالم اسلام کی بقاء ہے ، عالم اسلام کی اتحاد بھی اسی میں مضمر ہے،دشمنان اسلام کے خلاف علم بغاوت بلند کرنا تربیت زھراء ہے، اولاد زھراء نے اسلام پر سب کچھ قربان کر کے بتا دیا کہ یہ سر کٹ تو سکتے ہیں لیکن جھک نہیں سکتے ،دین کے لیے عزت ،جان اور مال سب حاضر ہے ۔
انہوں نے مذید کہا کہ چودہ سو سال قبل اہلبیت ؑ پر مظالم ڈھائے گئے آج بھی یمن ، عراق اور شام میں ان کے چاہنے والوں کو یزید اور یزید جیسوں نے نشانے پر رکھا ہوا ہے،مشرق وسطیٰ کے حالات صہیونی سازش ہیں ، امت مسلمہ متحد ہو کر اغیار کو صفوں سے نکالے ، ملک پاکستان میں بھی اس آگ کو پھیلانے کی کوشش کی جا رہی ہے ، ہمیں نادانیاں چھوڑ کر باہم ایک ہونا ہو گا ، ہم ایک ہوں گے اسی میں ہمارے مشترکہ دشمن کی شکست ہے ۔
وحدت نیوز (سکردو) مجلس وحدت مسلمین بلتستان کے رہنماء ڈاکٹر کاظم سلیم نے اپنے ایک بیان میں کہا ہے کہ مسلم لیگ نون اسکردو روڈ کا وزیراعظم سے جعلی افتتاح کروا کر بہت بڑے فراڈ کا مرتکب ہوئی ہے، ایک ایسا فرضی منصوبہ جس کی کوئی بنیاد نہ ہو، صرف انتخابات کے نتیجے پر اثر انداز ہونے کے لئے لاکھوں عوام کی احساسات اور جذبات سے کھیلنا بہت بڑا جرم ہے۔ ملک کا چیف ایگزیکٹیو اس بڑے جرم کا مرتکب ہوا ہے، لہٰذا وزیراعظم سمیت نون لیگ کے صوبائی پالیسی سازوں پر آرٹیکل 63،62 کے تحت مقدمہ قائم ہونا چاہئے۔ یہ بات ایم ڈبلیو ایم کے رہنما ڈاکٹر کاظم سلیم نے اسلام آباد میں’’ ویژن 2020‘‘ کے زیر اہتمام ’’ گلگت بلتستان کا آئینی مستقبل، عوام اور حکومت‘‘ کے عنوان سے منعقدہ سیمینار سے خطاب میں کہی۔
انہوں نے مزید کہا کہ متمدن معاشروں میں ایسے فراڈ کام سامنے آنے کے بعد حکومتیں مستعفی ہوجاتی ہیں لیکن یہاں جھوٹ پر جھوٹ بولے جارہا ہیں۔ ہم چاہتے ہیں علاقے کی تعمیر وترقی کے لئے حکومت کو کام کرنے دیا جائے، لیکن حکومت کے رویے سے ایسا لگتا ہے کہ ان کا کام کرنے کا کوئی ارادہ نہیں ہے، بلکہ عوام دشمن اقدامات کے ذریعے اقتصادی راہ داری کیلئے موجود سازگار فضاء کو بھی خراب کرنا چاہتی ہے۔ عوامی ملکیتی زمینوں کو خالصہ سرکار قرار دیکر عوام سے چھیننا، گلگت بلتستان کی قومی یکجہتی کو سبوتاژ کرنے کے لئے علاقے کو تقسیم کرنے کے فارمولے اس بات کی غمازی کرتی ہے کہ موجودہ حکومت ہر حال میں علاقے میں کشیدگی بڑھانا چاہتی ہے، جو ہمارے ملی اور قومی مفاد کی منافی ہے۔
وحدت نیوز (مانٹرنگ ڈیسک) ریاض حسین بنگش کا بنیادی تعلق پاراچنار کے علاقہ لقمان خیل سے ہے، وہ زمانہ طالب علمی میں امامیہ اسٹوڈنٹس آرگنائزیشن سے منسلک رہے، اور بعدازاں امامیہ آرگنائزیشن پاراچنار ریجن کے چیئرمین کی حیثیت سے بھی ملی ذمہ داریاں ادا کیں۔ اس وقت وہ مجلس وحدت مسلمین کے پلیٹ فارم سے فرائض سرانجام دے رہے ہیں، اور ایم ڈبلیو ایم پاراچنار کے سیکرٹری جنرل کی مسئولیت ان کے کندھوں پر ہے، انہوں نے پاراچنار کے داخلی معاملات کو مدنظر رکھتے ہوئے اعلٰی تعلیم یافتہ اور اہل ساتھیوں پر مشتمل کابینہ تشکیل دی ہے۔ ’’اسلام ٹائمز‘‘ نے مجلس وحدت مسلمین کے سربراہ علامہ راجہ ناصر عباس جعفری صاحب کے حالیہ دورہ پاراچنار کے حوالے سے ریاض حسین بنگش کیساتھ ایک انٹرویو کا اہتمام کیا، جو قارئین کے پیش خدمت ہے۔ (ادارہ)
سوال: آپکی جماعت کے سربراہ علامہ راجہ ناصر عباس جعفری صاحب نے گذشتہ دنوں پارا چنار کا تین روزہ دورہ کیا، انکا یہ دورہ کیسا رہا۔؟
ریاض حسین بنگش: ان کا یہ دورہ بہت ہی اچھا اور کامیاب رہا، یہ ایک تاریخی دورہ تھا، جس میں عوام کی ان سے محبت دیدنی تھی، لوگ بہت خوش ہوئے، ان کی مایوسی اور ناامیدی نئے جوش اور ولولہ میں تبدیل ہوگئی، عوام کا رسپانس بہت ہی زبردست تھا، عوام میں ایک نیا جذبہ پیدا ہوا، میں سمجھتا ہوں کہ آغا صاحب کا یہ دورہ موجودہ صورتحال میں ایک تاریخی اہمیت کا حامل تھا۔
سوال : اس دورہ میں عوام کے علاوہ انکی کن کن طبقات اور تنظیموں سے ملاقاتیں ہوئیں۔؟
ریاض حسین بنگش: اس دورہ میں ان کی تقریباً ہر قسم کے طبقات سے ملاقاتیں ہوئیں، یہاں لوکل یا ملکی سطح پر جتنی بھی سیاسی جماعتیں ہیں، ان سب سے راجہ صاحب کی نشست ہوئی، جن میں سیاسی جماعتوں نے ان سے داخلی معاملات پر تعاون طلب کیا، جس پر علامہ راجہ ناصر عباس صاحب نے ان سے بھرپور تعاون کرنے کی یقین دہانی کرائی کہ انشاءاللہ ہم آپ کیساتھ بھرپور تعاون کریں گے۔ اس کے علاوہ جتنی بھی مذہبی جماعتیں ہیں، ان کے رہنماوں سے ملاقاتیں ہوئیں، دریں اثناء جن علاقوں میں 10 ہزار کے لگ بھگ آبادی ہے، وہاں بھرپور اجتماعات ہوئے، وہاں کے متاثرین سے بھی ملاقاتیں ہوئیں، ان کی حوصلہ افزائی کی، اس کے علاوہ شہداء کے گھر والوں سے تعزیت کی، علاوہ ازیں یہاں پر فلاحی اداروں جیسے کہ علی ٹرسٹ یتیم خانہ، وہاں پر بھی گئے، ان کو تقریباً 50 ہزار روپے امداد بھی دی، اس کے علاوہ فلاحی کاموں میں مصروف عمل حیدری بلڈ بنک کو بھی بھرپور تعاون کی یقین دہانی کرائی، ان کے علاوہ بھی یہاں جتنے فلاحی ادارے ہیں، ان کے ذمہ داروں سے ملاقاتیں ہوئیں۔ علامہ صاحب نے مرکز کے علمائے کرام اور تحریک حسینی کے رہنماوں سے بھی اہم ملاقاتیں کیں، انہوں نے ان سب کی مشکلات اور مسائل کو بہت خلوص سے سنا اور ہر ممکن تعاون کرنے کی یقین دہانی کرائی۔
سوال: پارا چنار کے داخلی مسائل کے حوالے سے اس دورہ کیوجہ سے کوئی بہتری کی امید نظر آئی۔؟
ریاض حسین بنگش: علامہ راجہ ناصر عباس صاحب نے اپنے اس دورہ میں جس چیز پر زیادہ فوکس کیا، وہ وحدت اور ولایت تھی، وہ جہاں بھی گئے، وہاں اتحاد و وحدت اور ولایت کو اپنی تقاریر میں اولیت دی، مقامی لوگوں نے اس بات کو بہت غور سے سنا اور اس حوالے سے ان کی حوصلہ افزئی ہوئی، انہوں نے علامہ صاحب کو اتحاد و یگانگت برقرار رکھنے کی یقین دہانی کرائی۔
سوال: آپکے خیال میں علامہ صاحب کا یہ دورہ اپنے مقاصد میں کس حد تک کامیاب ثابت ہوا اور عوام کا کیا رسپانس ہے۔؟
ریاض حسین بنگش: آپ یہ سمجھیں کہ آغا صاحب کا یہ دورہ 80 فیصد کامیاب ثابت ہوا، ہماری مالی مجبوریوں کی وجہ سے ہم عوام تک اس طرح رابطہ بھی نہیں کرسکے، ہمارے پاس یہاں آفس بھی نہیں ہے، عوام ہم سے ٹیلی فون پر رابطے کر رہے ہیں، وہ کہتے ہیں کہ آپ کا آفس کہاں ہے، ہم آپ کے پاس آنا چاہتے ہیں،کہنے کا مقصد یہ ہے کہ کچھ مالی مشکلات آڑے آرہی ہیں، راجہ صاحب کا دورہ بہت موثر رہا، لوگ جوق در جوق مختلف ذرائع سے مجھ سے رابطہ کرنے کی کوشش کر رہے ہیں، تاہم آفس اور دیگر ذرائع نہ ہونے کی وجہ سے عوام اور ہمارے درمیان رابطہ کا فقدان نظر آرہا ہے۔
سوال: پاراچنار کے موجودہ حالات اب کیسے ہیں، ہمارے قارئین کو آگاہ فرمایئے گا۔؟
ریاض حسین بنگش: جب سے ہمارے نئے پیش امام صاحب آئے ہیں، اس کے بعد سے لوگوں میں دوریاں آہستہ آہستہ ختم ہو رہی ہیں، اب تک جمعہ کے جتنے بھی خطبات دیئے گئے ہیں، ان میں لوگوں کو اتحاد و وحدت کی زیادہ تلقین کی گئی ہے، جس کہ وجہ سے لوگوں میں دوریاں ختم ہو رہی ہیں، تاہم چیزوں کو بہتر بنانے میں وقت لگے گا، ظاہر بات ہے کہ دشمن نے ہمیں تقسیم کرنے کیلئے بہت کام کیا تھا، اب اس کی سازشیں آہستہ آہستہ دم توڑ رہی ہیں۔
سوال: پارا چنار کے عوام کیلئے ہمارے توسط کوئی پیغام دینا چاہئیں گے۔؟
ریاض حسین بنگش: میں سب برادران کا شکریہ اس وجہ سے بھی ادا کرنا چاہتا ہوں کہ علامہ صاحب کے دورہ کے حوالے سے ہم زیادہ تشہیری مہم بھی نہ چلا سکے، تاہم پھر بھی ایک جذبہ اور ولولہ کی وجہ سے جس جس کو معلوم ہوتا رہا، انہوں نے خود سے ہمارے ساتھ رابطے کئے، اور علامہ صاحب کے اس دورہ کو کامیاب کرانے میں اپنا حصہ ڈالا، جہاں جہاں بھی اجتماعات ہوئے، ان سب میں دوستوں کا کردار رہا، ہر جماعت خواہ وہ مذہبی ہو یا سیاسی، انکی خواہش تھی کہ راجہ صاحب ہمارے ساتھ ایک نشست کریں، ہم پاراچنار کے عوام، عمائدین، مذہبی و سیاسی رہنماوں، علمائے کرام اور تنظیمی کارکنوں کا آپ کے توسط سے شکریہ ادا کرنا چاہتے ہیں۔
