وحدت نیوز(اسکردو) سانحہ راولپنڈی کی آڑ میں بےگناہ عزاداروں، گلگت بلتستان کے طلباء اور مسافرین کی رہائش گاہوں اور گھروں پر چھاپے، بےجا گرفتاریاں اور تشدّد کے خلاف اسکردو میں جاری دھرنے آج حکومت کی یقین دہانی پر ختم کر دیئے گئے۔ اسکردو میں سانحہ راولپنڈی کی آڑ میں پنجاب حکومت کی جانبدارانہ کاروائیوں اور شیعہ دشمنی کے خلاف آج اسکردو میں دو مقامات پر دھرنے دیئے گئے۔ اس سلسلے میں حسین آباد اسکردو میں جامع مسجد چوک پر دھرنا دوسرے روز میں داخل ہو گیا جبکہ مجلس وحدت مسلمین پاکستان بلتستان ڈویژن تحصیل گمبہ اسکردو کی جانب سے بھی مالک اشتر چوک پر بھی دھرنا دیا گیا۔ مجلس وحدت مسلمین بلتستان ڈویژن کے سیکرٹری جنرل علامہ سید علی رضوی نے دھرنے سے خطاب کرتے ہوئے واضح کیا کہ پنجاب حکومت گلگت بلتستان کے گرفتار شدہ طلباء کو اگر شام تک رہا نہ کیا تو بلتستان بھر میں دھرنوں کا سلسلہ شروع کیا جائے گا جو بلتستان میں مسلم لیگ نون کے بلتستان میں خاتمے پر منتج ہو گا۔ دو روز سے جاری دھرنے آج گلگت بلتستان کے گرفتار طلباء کی رہائی کی یقین دہانی کے بعد پر امن طور پر ختم کر دیئے گئے۔

وحدت نیوز( بلتستان)سیکرٹری جنرل مجلس وحدت مسلمین پاکستان بلتستان ڈویژن علامہ آغا علی رضوی نے اسکردو میں شب عاشور کی مجلس عزاء سے خطاب کرتے ہوئے کہا کہ عاشورا جان کو ہتھیلی پہ رکھ کر، سر پہ کفن باندھے یزیدی طاقتوں سے مقابلہ کرنے اور موت کی آنکھوں میں آنکھیں ڈال کر مسکراتے ہوئے خون کے دھاروں سے بساط ظلم کو لپیٹنے کا دن ہے۔ انہوں نے کہا کہ عزاداری سید الشہداءعزاداری سید الشہداء پر پابندی لگانے اور محدود کرنے کی باتیں یزیدیوں کی بھول ہیں۔ دنیا کی کوئی طاقت ہمیں عزاداری امام حسین (ع) سے نہیں روک سکتی۔ انہوں نے کہا کہ عزاداران امام حسین کل عاشورا کے جلوسوں میں سر پہ کفن باندھ کے شریک ہو جائیں۔ انتظامیہ کی طرف سے گلگت بلتستان میں دہشت گردوں کے داخلے کی خبر خوف و ہراس پیدا کرنے کے لیے ہے۔ دنیا شاید نہیں جانتی کہ ہمارا تعلق اس قبیلہ سے ہے، جس کے لیے موت شہد سے زیادہ میٹھی شے ہے۔ شہادت ہماری کمزوری نہیں بلکہ ہماری قوت اور طاقت کا مظہر ہے۔

وحدت نیوز(بلتستان) مجلس وحدت مسلمین پاکستان بلتستان ڈویژن کے سیکرٹری جنرل علامہ آغا علی رضوی نے اسکردو میں مجلس عزا سے خطاب کرتے ہوئے کہا ہے کہ عزادری کل کے مردہ یزید سے اظہار نفرت نہیں بلکہ وقت کے یزید کے خلاف قیام کرنا ہے اور کربلائے عصر میں پیروئے حسین ابن علی(ع) بن کر دور حاضر کے یزیدوں کا گھیرا تنگ کر کے ان کے مذموم مقاصد کو خاک میں ملانا ہے۔ انہوں نے کہا کہ دنیا میں اسوقت یزید کا کردار امریکہ نبھا رہا ہے اور امریکی تنظیمیں لشکر یزید کا کردار نبھانے میں مصروف ہیں۔ انہوں نے کہا کہ راکب دوش رسول(ص) کو میدان کربلا میں شہید کرانے اور خانوادہ وحی و نبوت کو اسیر کرانے کے لیے یزید نے اس وقت خزانوں کے دروازے کھول رکھے تھے اور آج بھی اسلام کا اصل چہرہ مٹانے، پیغام کربلا کو روکنے، جوانوں سے روح حسینی(ع) چھیننے کے لیے یزید وقت امریکہ نے خزانے کھول دیے ہیں۔ فلاح کے نام پر لوگوں سے دین چھین رہے ہیں، فحاشی و عریانی اور بے دینی کو عام کر رہے ہیں۔ لہٰذا کربلا اور عاشورا کا تقاضا ہے کہ قناعت کو سرمایہ بنا کر خودی اور معنوی طاقت سے وقت کے تمام یزیدی اور شیطانی طاقتوں سے نبرد آزما ہوں، یہی اصل عزادری اور پیغام کر بلا ہے۔

اسکردو (وحدت نیوز) سابق سیکرٹری جنرل مجلس وحدت مسلمین پاکستان بلتستان ڈویژن علامہ شیخ حافظ حسین نوری کی پہلی برسی کے موقع پر گنگچھے خپلو میں مجلس ترحیم کا انعقاد ہوا۔ جس میں خپلو بھر سے علمائے کرام اور عوام کی کثیر تعداد نے شرکت کی۔ مرکزی امام بارگاہ خپلو ڈینس میں بھی شیخ حافظ حسین نوری کی برسی  کے موقع پر قرآن خوانی کی گئی۔ اس موقع پر امام جمعہ خپلو شیخ سجاد حسین مفتی کی سربراہی میں جوانوں نے سینو جا کر شیخ حافظ حسین نوری مرحوم کی قبر پر حاضری دی اور ان کے ایصال ثواب کیلئے فاتحہ خوانی کی۔ خپلو مرکزی امام بارگاہ میں منعقدہ مجلس ترحیم سے خطاب کرتے ہوئے مقررین نے شیخ حافظ حسین نوری مرحوم کی دینی اور ملّی خدمات پر انہیں خراج تحسین پیش کیا۔ مقررین نے مجلس ترحیم سے خطاب کرتے ہوئے کہا کہ مرحوم ہمہ گیر شخصیت کے مالک تھے، ہم نے ان کی شخصیت کو پہچاننے میں بہت دیر کی، اور ہم ان کی علمی و عرفانی ہستی سے خاطر خواہ استفادہ نہ کر سکے۔

وحدت نیوز(بلتستان ) سیکرٹری جنرل ایم ڈبلیوایم بلتستان نے اپنے خطاب میں کہا ہے کہ کوفہ عصر میں مسلم کا نام لینا بہت آسان ہے لیکن وقت کے ظالم و جابر حکمرانوں اور دین فروش ملاوں کے قیام کر کے مسلم کا کردار ادا کرنا مشکل ہے۔کوفہ کے بےضمیر اور سکوّں کے عوض فتویٰ دینے والے مفتیوں، ڈرپوک سرداران، بےحس عوام اور سفاک، مکار، شرابی و بےدین حکمرانوں نے مل کر سفیر امام حسین (ع)، حضرت مسلم بن عقیل کو شہید کر دیا۔ ان خیالات کا اظہار سیکرٹری جنرل مجلس وحدت مسلمین پاکستان بلتستان ڈویژن علامہ آغا علی رضوی میں اسکردو میں مجلس عزاء سے خطاب کرتے ہوئے کیا۔ انہوں نے کہا کہ حضرت مسلم بن عقیل (ع) عزم و ہمت، شجاعت و بہادری، ایثار و وفا اور اطاعت امام  کے  درخشندہ سورج کا نام ہے۔ جس نے معرکہ حق و باطل کی بیناد ڈالی اور یزیدیت کے خلاف اعلان جنگ کر کے انسانیت پر احسان کیا۔ انہوں نے کہا کہ امام وقت کے سفیر اور نمائندہ کے خلاف جن لوگوں نے قیام کیا ان میں کوفہ کے بےضمیر اور زرپرست علماء، ڈرپوک سرداران، بےحس عوام اور سفاک، مکار، شرابی و بےدین حکمران شامل ہیں، جنہوں نے مل کر امام وقت کے سفیر کا راستہ روکا۔

آغا علی رضوی نے اپنے خطاب میں کہا کہ جہاں ایک طرف دولت کے انبار ہوں اور دوسری طرف دین، ایک طرف قید و بند ہوں اور دوسری طرف سرداری و انعام، ایک طرف تیر و تلوار ہوں اور دوسری طرف آرام، تو ایسے میں دینداروں کی پہچان ہوتی ہے۔ اس کوفہ عصر میں مسلم کا نام لینا بہت آسان ہے لیکن وقت کے ظالم و جابر اور فاسق حکمرانوں اور دین فروش ملاوں کے لئے قیام کر کے مسلم کا کردار ادا کرنا مشکل ہے۔ اگر ایسا کر سکو تو حسینی کہلاو ورنہ ہر نام لیوا حسینی نہیں ہو سکتا۔

وحدت نیوز(بلتستان)  مجلس وحدت مسلمین پاکستان بلتستان ڈویژن کا ایک ہنگامی اجلاس ڈویژنل سیکرٹریٹ میں منعقد ہوا، جس میں ڈویژنل کابینہ نے شرکت کی۔ ہنگامی اجلاس کی صدارت ڈویژنل سیکرٹری جنرل علامہ آغا علی رضوی نے کی۔ انہوں نے اجلاس سے خطاب کرتے ہوئے بلتستان کی سیکیورٹی صورتحال پر تشویش کا اظہار کرتے ہوئے کہا کہ نہایت افسوس کا مقام ہے کہ امریکی تنظیمیں باالخصوص سی آئی اے، بلیک واٹر اور دیگر امریکی جاسوسی تنظیمیں دفاعی اہمیت کے حامل حساس علاقہ بلتستان میں سرگرم عمل ہیں، جبکہ بلتستان کی انتظامیہ خاموش تماشائی بنی بیٹھی ہے۔ بلتستان انتظامیہ سیاسی بکھیڑوں میں الجھی ہوئی ہے انہیں عالمی سازش کی فکر ہے اور نہ بلتستان کے امن و امان کی۔

انہوں نے مزید کہا کہ امریکی تنظیمیں بلتستان کو بلوچستان کی طرف دھکیلنے کی کوششوں میں مصروف ہیں۔ لیکن مقام افسوس ہے کہ بلتستان انتظامیہ کے ساتھ ساتھ حساس اور سیکیورٹی ادارے بھی بچگانہ سرگرمیاں سر انجام دے رہے ہیں۔ حساس اداروں کو بلتستان کے خلاف ہونے والی سازشوں کی بھرپور اطلاع ہونے کے باوجود چشم پوشی لمحہ فکریہ ہے۔ انہوں نے کہا کہ حساس ادارے بلتستان میں امریکی سفیر کی آمد کو روکیں، امریکی سفیر کا بلتستان میں آنا اس خطہ کے لئے خطرہ کی گھنٹی ہے۔ دشمن اسلام، دشمن قرآن اور دشمن پاکستان امریکہ کے سفیر کی اسکردو آمد کے موقع پر عوام کا کوئی ردعمل سامنے آئے اور کسی قسم کا ناخوشگوار واقعہ پیش آیا تو تمام تر ذمہ داری سیکیورٹی اداروں پر عائد ہوگی۔